ཏང་འཛུགས་སྐྱོང་སྣེ་ཁྲིད་དུ་བྱས་ནས་ཐབས་མང་མཉམ་སྤྱོད་ཀྱིས་དཀའ་གནད་བསལ་བ།
—— ལྷ་ས་གྲོང་ཁྱེར་རྔ་ཆེན་ཁྲོམ་གཞུང་གི་གཞི་རིམ་བཅོས་སྐྱོང་ལས་དོན་ལ་གྲུབ་འབྲས་མངོན་གསལ་དོད་པོ་ཐོབ་པ།

འདི་ནི་གླིང་ཆུང་སྡེ་ཁུལ་གྱིས་གྲོང་ཁྱེར་དོ་དམ་ཁྲིམས་སྒྱུར་སྡེ་ཚན་དང་མཉམ་དུ་རྒྱུན་ལྡན་ཅན་དང་ཕུགས་ཕན་ཅན་གྱི་བཅོས་སྐྱོང་ལམ་སྲོལ་བཙུགས་ཏེ། ལམ་འགྲམ་གྱི་ཚོང་ཁང་ལ་ཆེད་དོན་བཅོས་སྐྱོང་བྱ་སྤྱོད་སྤེལ་བཞིན་པ།
ཉིན་ཤས་རིང་། ལྷ་ས་གྲོང་ཁྱེར་ཁྲེང་ཀོན་ཆུས་རྔ་ཆེན་ཁྲོམ་གཞུང་གིས“ཏང་འཛུགས་སྐྱོང་གིས་སྣེ་ཁྲིད་དང་། དམངས་འཚོ་རྩ་བར་འཛིན་པ། ཞིབ་ཕྲའི་བཅོས་སྐྱོང”བཅས་ཀྱི་ལས་ཀའི་འདུ་ཤེས་མཐའ་འཁྱོངས་བྱས་ཏེ། ཁོངས་གཏོགས་ཁུལ་གྱི་གྲོང་ཚོ(སྡེ་ཁུལ)ཁག་གི་ཏང་རྩ་འཛུགས་ཀྱི་སྟོབས་ཤུགས་སྤྱི་འདོམས་བྱེད་པ་དང་། ཁོར་ཡུག་བཅོས་སྐྱོང་དང་། བདེ་འཇགས་ཀྱི་མངོན་མེད་རྐྱེན་ངན་གྲལ་བཤེར། སྐྱེ་ཁམས་སྲུང་སྐྱོང་སོགས་གཙོ་གནད་ཁྱབ་ཁོངས་ལ་དམིགས་ནས་ནུས་ཤུགས་གནད་སྨིན་འདོན་པ། ཚད་ལྡན་ཅན་གྱི་བྱེད་ཐབས་ལ་བརྟེན་ནས་གཞི་རིམ་བཅོས་སྐྱོང་གི་དཀའ་གནད་ཐག་གཅོད་བྱེད་པ། ལས་འཕྲོད་གནས་འཚམ་གྱི་རྨང་གཞི་བརྟན་དུ་གཏོང་བ་བཅས་བྱས་ཏེ། གཞི་རིམ་བཅོས་སྐྱོང་གི་དེང་རབས་ཅན་འཛུགས་སྐྲུན་ལ་སྐུལ་འདེད་བརྟན་པོ་བཏང་ཡོད།
ཁང་གསར་ལྷོ་སྡེ་ཁུལ་གྱི་ཏང་རྩ་འཛུགས་ཀྱིས་སྣེ་ཁྲིད་བྱས་ཏེ“བཅོས་སྐྱོང་དང་ཁྲིད་སྟོན”ཟུང་འབྲེལ་གྱི་སྐུལ་འདེད་གཏོང་སྟངས་སྤྱད་ཅིང་། ལས་དོན་མི་སྣ་དང་། དྲ་མིག་པ། དང་བླངས་པ་བཅས་ཀྱི་སྟོབས་ཤུགས་གཅིག་སྡུད་བྱས་ཏེ། སྤྱི་པའི་ས་ཁོངས་དང་མེ་ཟོན་བགྲོད་ལམ་སོགས་འགག་རྩའི་གནས་སུ་གློག་སྒུལ་འཁོར་རིགས་གང་བྱུང་དུ་བཞག་པར་ཆེད་དོན་བཅོས་སྒྲིག་བྱས་ནས“ལེབ་བཤེར་རྣམ་པའི་གྲལ་བཤེར་དང་ཚད་ལྡན་ཅན་གྱི་འཇོག་སྟངས”གཉིས་ཟུང་འབྲེལ་གྱིས་འཁོར་རིགས་ཀྱི་སྒྲིག་ལམ་ཚད་ལྡན་དུ་བཏང་ཡོད། གཞུང་ལམ་རྒྱབ་ཀྱི་སྲང་ལམ་ཆུང་ཆུང་དང་ཐོག་ཁང་གི་ཟུར་དུ་གད་སྙིགས་སྣ་ཚོགས་གཙང་སེལ་བྱས་པ་མ་ཟད། མེ་ཟོན་བདེ་འཇགས་དང་ཁོར་ཡུག་སྲུང་སྐྱོང་ཤེས་བྱ་ས་གནས་ས་ཐོག་ཏུ་སྒྲོག་འགྲེལ་བྱས་པས་ཁོངས་གཏོགས་ཁུལ་གྱི་ཁོར་ཡུག་རྣམ་པ་དང་གྲོང་མིའི་ཤེས་དཔལ་བྱང་ཚད་མཐོ་རུ་ཕྱིན་ཡོད།
རྔ་ཆེན་སྡེ་ཁུལ་གྱིས“མངོན་མེད་རྐྱེན་ངན་ཁྱོན་ཡོངས་ནས་སེལ་བ་དང་དག་ཐེར་ལ་ལྷོད་གཡེང་མི་བྱེད་པའི”རྩ་དོན་རྒྱུན་འཁྱོངས་བྱས་ནས། བདེ་འཇགས་ཀྱི་འགོག་སྲུང་འཛིང་རགས་བརྟན་པོ་བསྐྲུན་ཞིང་། ཁོངས་གཏོགས་ཁུལ་གྱི་རྫས་འགྱུར་བཟོ་གྲྭ་རྙིང་པ་ཞིག་ཏུ་གད་སྙིགས་སྤུང་པ་དང་སྒྲིག་འགལ་བསྐྱར་སྐྲུན་སོགས་ཀྱི་གནད་དོན་ཡོད་པའི་ཐད། སྡེ་ཁུལ་གྱི་ཏང་རྩ་འཛུགས་ཀྱིས་མགྱོགས་མྱུར་དང་ལེན་ཞུས་ཏེ། འཕྲལ་མར་དཔང་རྟགས་པར་ལེན་བྱས་པ་དང《དག་ཐེར་བྱེད་དགོས་པའི་བཀའ་རྒྱའི་བརྡ་ཐོ》བཏང་ནས། སྒྲིག་འགལ་ཨར་ལས་མཚམས་འཇོག་པ་དང་འབྲེལ་དུས་བཀག་ནང་གད་སྙིགས་གཙང་སེལ་བྱེད་དགོས་པའི་བླང་བྱ་ཡང་བཏོན་ཡོད། དེ་དང་ཆབས་ཅིག་ཁྲེང་ཀོན་ཆུས་མེ་ཟོན་རོགས་སྐྱོབ་རུ་ཆེན་དང་རང་བྱུང་ཐོན་ཁུངས་ཅུས་ལྟ་ཞིབ་ཁོའོ་ལ་སྙན་སེང་ཞུས་ནས་ཁྲིམས་སྒྱུར་མཉམ་ཤུགས་ཆགས་པར་བྱས་ཏེ། “ཞིབ་ཐོ་ཅན་གྱི་དོ་དམ་དང་གདུབ་ཟུམ་རྣམ་པའི་སྐུལ་འདེད”ལ་བརྟེན་ནས་གནད་དོན་དག་ཐེར་དོན་འཁྱོལ་ཡོང་བའི་འགན་ལེན་བྱས་ཡོད།
གླིང་ཆུང་སྡེ་ཁུལ་གྱིས“དམངས་ཀྱི་འབོད་སྐུལ་ང་ཡིས་དང་དུ་ལེན་པའི”སྟོན་ཕྱོགས་མཐའ་འཁྱོངས་བྱས་ནས་བཅོས་སྐྱོང་གི་ཕན་ནུས་ཆེ་རུ་བཏང་ཞིང་། ཏུང་ཁྲེང་དབྱི་ཕིང་ཚོང་ཁང་གི་མཐའ་འཁོར་དུ་གད་སྙིགས་སྤུངས་པ་དང་ས་ངོས་སུ་སྣུམ་སྙིགས་ཡོད་པ་སོགས་ཀྱི་སྙན་སེང་འབྱོར་རྗེས། སྡེ་ཁུལ་ཏང་རྩ་འཛུགས་ཀྱིས་སྡེ་ལས་དང་། ཚོང་དུད། རླངས་འཁོར་འཇོག་ས་བཅས་ཀྱི་འགན་འཁུར་བར་མགྱོགས་མྱུར་འབྲེལ་བ་བྱས་ནས། ས་གནས་ས་ཐོག་ཏུ་མཐུན་སྦྱོར་ཚོགས་འདུ་འཚོགས་ཏེ་བཅོས་སྒྲིག་ཇུས་གཞི་བཟོས་པ་སྟེ། གསོག་ཉར་གད་སྙིགས་གཅིག་སྡུད་ཐོག་གཙང་སེལ་དང་ས་ངོས་ཀྱི་སྣུམ་སྙིགས་བཀྲུས་པ་དང་དུས་མཚུངས་རྒྱུན་ལྡན་ཅན་གྱི་སྐོར་ཞིབ་ལམ་སྲོལ་བཙུགས་ནས་སྐོར་ཞིབ་བྱེད་ཚད་མང་དུ་བཏང་སྟེ། གནད་དོན་བསྐྱར་དུ་མི་ཐོན་པའི་སྔོན་འགོག་བྱས་ཡོད།
འབྲེལ་ཡོད་གསར་འགྱུར།