མཐའ་མཚམས་མངགས་གཏོང་ཁང་གི་མི་དམངས་ཉེན་རྟོག་པས་གངས་ཕུག་འཁྱགས་རོམ་དུ་སྐོར་གཡེང་བྱེད་བཞིན་པ།

ཕུ་མ་བྱང་ཐང་མཐའ་མཚམས་མངགས་གཏོང་ཁང་གི་མི་དམངས་ཉེན་རྟོག་པས་གངས་ཕུག་འཁྱགས་རོམ་དུ་སྐོར་གཡེང་བྱེད་བཞིན་པ།

ཕུ་མ་བྱང་ཐང་མཐའ་མཚམས་མངགས་གཏོང་ཁང་གི་མི་དམངས་ཉེན་རྟོག་པས་ཧུའུ་ནན་ཞིང་ཆེན་གྱི་བོད་སྐྱོར་སྨན་པ་ཅང་ཀྲེ་ཁྲའོ་དང་ཀྲའོ་ཆི་སོགས་དང་མཉམ་དུ་འབྲོག་ཁྱིམ་དུ་འོས་འགན་སྨན་བཅོས་བྱེད་བཞིན་པ།

མཚན་མོར་ཕུ་མ་བྱང་ཐང་སྲུང་མཁན་གྱི་བུད་མེད་ཉེན་རྟོག་པ་ཝུའུ་ཧུའེ་དང་། ལི་ཧུང་ཡན། ལི་ཐེན་ཅའོ་ཡིན་པ། (གཡོན་ནས་གཡས་བར)

ཤིན་ཧྭ་གསར་འགྱུར་ཁང་གི་གསར་འགོད་པ། རེན་ཆིན་ཆིན།

ས་བབ་སྨི་4500དང་། 4800 5100 5373བཅས་རིམ་བཞིན་མཐོ་རུ་ཕྱིན་ནས་ཕུ་མ་བྱང་ཐང་འདི་ཉིད་མིག་ལམ་དུ་འཆར་བ་དང་། རླངས་འཁོར་ལས་བབས་མ་ཐག་ངོ་གདོང་ལ་གྲང་ཟུག་རྒྱག་པའི་གྲང་རླུང་ཞིག་ལྡང་བ་དང་སྦྲགས་ཁ་འདར་ཡང་ཤོར།

“གནམ་དང་ཐག་ཉེ་ཤོས་ཀྱི་མངགས་གཏོང་ཁང་ལ་ཕེབས་པར་དགའ་བསུ་ཞུ”ཞེས་ཕུ་མ་བྱང་ཐང་མཐའ་མཚམས་མངགས་གཏོང་ཁང་གི་སུའོ་ཀྲང་ཕུར་བུ་བཀྲ་ཤིས་ཀྱིས་འཚམས་འདྲི་བྱས་པ་དེ་རྣམ་ཀུན་གྱི་འཚམས་འདྲི་ལས་ཀྱང་དྲོ་སྐྱིད་ལྡན་པ་ཞིག་སྣང་།

གསོ་རླུང་འདུས་ཚད་40%ལས་ཟིན་གྱི་མེད་པ་དང་ཆ་སྙོམས་དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ་7གྱི་ས་ཆ་འདིར་ཆུའི་འཁོལ་ཚད་ལ་ཧྲེ་ཧྲི་ཏུའུ་60ལས་མེད་པ་དང་གསོ་རླུང་ཡང་དེ་བས་དཀོན་པོ་ཡོད།

མཐའ་མཚམས་ས་ཐིག་ལ་སྤྱི་ལེ་25ཟིན་པ་ནི་མཐའ་སྲུང་བ་མི་རབས་མང་པོས་ས་ནག་འདོམ་ལ་འཇལ་བའི་གྲུབ་འབྲས་ཤིག་རེད།

མངགས་གཏོང་ཁང་གི་སློབ་སྟོན་པ་ཉི་མ་རྒྱལ་མཚན་གྱིས་གངས་རླུང་འཚུབ་བཞིན་པའི་ལ་ཁ་ཞིག་ལ་མཛུབ་མོ་འཛུགས་བཞིན་དུ“སྐབས་དེ་དུས་མཐོང་རྒྱ་སྨི་5ཡང་མེད་པའི་ཁར་རླུང་འཚུབ་དྲག་པོས་འཁྱགས་ཧྲུལ་ངོ་གདོང་ལ་རྡེབ་ཡོང་བའི་ཁྲོད་དུ་ཚང་མས་ཨམ་གཙིགས་བསྡམས་པ་དང་ལག་གདང་སྦྲེལ་ནས་སྐེད་པའི་མཚམས་བར་སླེབས་པའི་གངས་གསོག་དཀྱིལ་དུ་ཆུ་ཚོད་6བསྐྱོད་པ་རེད”ཅེས་ཁ་བ་བུ་ཡུག་ཁྲོད་ཀྱི་སྐོར་གཡེང་ཞིག་ཕྱིར་དྲན་བྱས་ཏེ་བཤད།

“སྐབས་དེ་དུས་མྱོང་ཚོར་གང་ཞིག་བྱུང་ངམ”ཞེས་གསར་འགོད་པས་དྲིས་པ་ན།

“འཐབ་གྲོགས་ཚོ་བདེ་འཇགས་ངང་འཁྲིད་དགོས་སྙམ་པ་ལས་བསམ་ཚུལ་གཞན་གང་ཡང་མེད”ཅེས་ཁོང་གིས་འཛུམ་དམུལ་དམུལ་ངང་བཤད།

ཉི་འོད་དང་ཆར་རླུང་གིས་གཙེས་ནས་ངོ་གདོང་སྨུག་པོར་གྱུར་པའི་ན་གཞོན་ཉེན་རྟོག་པ་ཁྲེན་ཆིན་ཧྥུང་གིས“ང་ཚོས་འདི་གར་བརྟན་སྲུང་བྱས་ནས་མེས་རྒྱལ་གྱི་ས་ཆ་སྦར་མཐིལ་ཙམ་ཡང་བློས་གཏོང་མི་སྲིད”ཅེས་བཤད།

འབྲོག་པ་ཚེ་རིང་རྒྱ་མཚོས་ཇ་བསྲུབས་མ་ཇ་དམ་གང་འཁྱེར་ནས་ལམ་འགྲམ་དུ་སྒུགས་ནས་བསྡད་ཡོད་ཅིང་། ཁ་བ་བུ་ཡུག་འཚུབ་པའི་མཚན་མོ་དེར་མི་དམངས་ཉེན་རྟོག་པ་ཚོས་ལག་བཞུ་འཁྱེར་ནས་ཁོང་གི་འབྲི་གཡག་30འཚོལ་རོགས་བྱས་པ་དེ་ཁོང་གིས་བརྗེད་ག་ལ་སྲིད། ཕོ་གཞོན་ཞིག་གི་མཛུབ་མོ་འཁྱགས་སྦོས་ཐེབས་ནས་གོང་ལ་ཕུག་ལྟ་བུར་གྱུར་ཏེ་ཇ་ཕོར་ལེན་སྐབས་འདར་སིག་སིག་བྱེད་ཀྱི་ཡོད།

2024ལོའི་ཟླ་2པར། མངགས་གཏོང་ཁང་དེ་ཉིད་བཙུགས་ནས་ལོ་12སོང་ཚུན་གྱི་ཁག་དང་པོའི་བུད་མེད་ཉེན་རྟོག་པ་3སླེབས་ཤིང་། ཁོང་ཚོ་ནི་1996ལོར་སྐྱེས་པའི་ལི་ཐེན་ཅའོ་དང་། 1998ལོར་སྐྱེས་པའི་ཝུའུ་ཧུའེ། 2000ལོར་སྐྱེས་པའི་ལི་ཧུང་ཡན་བཅས་རེད། ཁོང་གསུམ་པོ་ནི་རང་མོས་ངང་ས་མཐོར་ཡོང་རྒྱུའི་རེ་འདུན་ཞུས་པ་ཞིག་རེད།

“དེ་ནི་ས་བབ་མཐོ་ཤོས་ཀྱི་ས་ཆ་ཡིན་པས་གཟུགས་པོར་གནོད་པ་ཆེ”ཞེས་གཉེན་གྲོགས་ཚོས་བཀག་འགོག་བྱས་ཀྱང་། ཝུའུ་ཧུའེ་ཡིས་བློ་རྩ་བརྟན་པོས་ཡོང་བ་དང་། ཁོང་ནི་དེ་སྔ་དཔའ་བོ“ལྕགས་ཐོ་ཐོན་ཤོག”ཏུ་དམག་ཞབས་ཞུ་མྱོང་ཞིང་། “དཀའ་སྡུག་ཇི་ཙམ་ཆེ་ན་དེ་ཙམ་གྱིས་རྣམ་པར་རྒྱལ་དགོས”ཞེས་བརྗོད།

ལི་ཧུང་ཡན་ལ་ཨ་མའི་ཁ་པར་འབྱོར་སྐབས་ཁོ་མོ་གསོ་རླུང་རྔུབ་བཞིན་ཡོད་ཅིང་། ཁོ་མོས“ཨ་མ་ལགས། ཕྲུ་གུ་གཞན་གྱིས་འཇོན་དུས་ཁྱེད་ཀྱི་བུ་མོས་མ་འཇོན་པ་མེད”ཅེས་བཤད།

“ང་ཚོ་ཚང་མ་འཚོ་བའི་བདེ་སྡུག་ལ་ཉམས་ཞིབ་བྱེད་པར་ཡོང་བ་ཞིག་མིན་པར་འདིར་འཚོ་སྡོད་བྱེད་པར་ཡོང་བ་ཞིག་ཡིན”ཞེས་ཕ་ཡུལ་ཉིང་ཁྲི་ནས་ཕུ་མ་བྱང་ཐང་དུ་ཡོང་བའི“བོད་སྐྱོད་མི་རབས་གཉིས་པ”ལི་ཐེན་ཅའོ་ཡིས་ཁོང་གསུམ་པོའི་སྙིང་གཏམ་བཤད།

ས་མཐོའི་ཁྲག་ངན་ནད་ཕོག་པའི་ཕུར་བུ་བཀྲ་ཤིས་ཀྱི་མཆུ་ཏོ་རྟག་ཏུ་སྨུག་པོ་ཡིན་ཞིང་། ལོ་4ཡི་རིང་ཁོང་གི་ལས་རོགས་3ལས་སྒྱུར་བྱས་ཀྱང་ཁོང་སྔར་བཞིན་དེ་གར་ལས་སྡོད་བྱས། “ང་ཚོས་འདི་གར་བརྟན་སྲུང་བྱེད་པ་ནི་དམ་བཅའ་བཞག་པ་དང་ཁྱད་མེད”

མི་དམངས་ཉེན་རྟོག་པ་ཞུང་ཁའེ་2018ལོར་དེ་གར་སླེབས་མ་ཐག་པའི་སྐབས་སུ་ལྐོག་ཏུ་ངུ་མྱོང་ཡོད། ད་ཆ་ཁོང་ལ་ས་བབ་མཐོ་བའི་ས་ཁུལ་ནས་བྲལ་བའི་གོ་སྐབས་རག་ཀྱང་ཁོང་གིས་བློ་རྩ་བརྟན་པོས་ཁ་བྲལ་མེད། ད་ལོའི་དཔྱིད་ཀར་ཁོང་གིས་ལོ་མང་གོང་བསྐྱབས་མྱོང་བའི་ཡུལ་སྐོར་བ་ཞིག་ཆེད་མངགས་ཕུ་མ་བྱང་ཐང་དུ་ཡོང་ནས་ས་བབ་སྨི་5373ཟིན་པའི་མཚམས་རྡོའི་མདུན་དུ་ཁོང་ལ་དམ་པོར་འཐམས། “སྐབས་དེ་དུས་ངས་བྱ་གཞག་འདིར་གོ་བ་གསར་པ་ཞིག་ལོན་སོང”

མངགས་གཏོང་ཁང་གི་གཟི་བརྗིད་མཚན་སྙན་ཁང་དུ་རྒྱལ་དར་དམིགས་བསལ་ཞིག་ཡོད་དེ། 2022ལོར་ཀྲུང་གོ་མི་དམངས་ཉེན་རྟོག་པའི་དུས་ཆེན་ཐེངས་གཉིས་པའི་ཉིན་མོར་རྒྱལ་དར་དེ་གནམ་བདེ་སྒོ་མོའི་ཐང་ཆེན་དུ་ལྷབ་ལྷུབ་ཏུ་གཡོ་བ་དང་། ད་ཆ་རྒྱལ་དར་དེ་རི་ཆུ་ཁྲི་སྟོང་བརྒལ་ནས་ཐག་རིང་གི་མཐའ་མཚམས་འགག་སྒོ་སྲུང་བཞིན་ཡོད།

“ང་ཚོ་ད་ལྟ་གནས་སའི་ས་ཆ་འདི་ཀྲུང་གོ་རེད”

ས་བབ་སྨི་5373ནི་ས་ཁམས་ཚད་འཇལ་རྟགས་རིས་ཤིག་མིན་པར་དེ་ནི་སྙིང་སྟོབས་ཀྱི་གནས་ཚད་ཅིག་རེད།