ཉེ་ཆར་ཆབ་མདོ་གྲོང་ཁྱེར་མེ་གསོད་རོགས་སྐྱོབ་ཉིང་ལག་རུ་ཁག་གིས་ཆབ་མདོ་གྲོང་ཁྱེར་ཁྲོམ་ར་ལྟ་འདོམས་ཅུས་དང་མཉམ་དུ་ཆེད་དོན་ཞིབ་བཤེར་ཚོགས་ཆུང་བཙུགས་ནས། མེ་ཟོན་ཐོན་རྫས་ལ་གཅིག་སྡུད་བཅོས་སྒྲིག་གི་ཆེད་དོན་བྱ་སྤྱོད་སྤེལ་ཏེ། མེ་གསོད་ཡོ་ཆས་ཉམས་གསོ་དང་སྒྲིག་སྦྱོར་ཁྱབ་ཁོངས་ཀྱི་སྤུས་ཚད་དོ་དམ་ལས་དོན་ལ་གཙོ་གནད་ཐོག་ཞིབ་བཤེར་ནན་པོ་བྱས་པ་དང་ཆབས་ཅིག མེ་གསོད་ཡོ་ཆས་ཐོན་རྫས་ཀྱི་སྤུས་ཚད་ལ་ལྟ་སྐུལ་ཟུར་བཤེར་དང་ཞིབ་བཤེར་བྱས་ཏེ་མེ་ཟོན་ཐོན་རྫས་ཀྱི་སྤུས་ཚད་བདེ་འཇགས་ཀྱི་འགོག་རགས་ཕྱོགས་ཡོངས་ནས་བརྟན་དུ་བཏང་ཡོད།

ཞིབ་བཤེར་ཚོགས་ཆུང་གིས་ཁོངས་གཏོགས་ཁུལ་གྱི་མེ་ཟོན་ཐོན་རྫས་ཕྱིར་ཚོང་དྲ་ཚིགས་མང་པོར་བསྐྱོད་དེ་ཐོན་རྫས་སྤུས་ཚད་ལ་ཆེད་དོན་ཞིབ་བཤེར་བྱས་ནས《མེ་ཟོན་ཐོན་རྫས་ཀྱི་སྤུས་ཚད་ལྟ་སྐུལ་དོ་དམ་གཏན་འབེབས》དང《མེ་ཟོན་ཐོན་རྫས་ཀྱི་ས་གནས་ས་ཐོག་གི་ཞིབ་བཤེར་ཐག་གཅོད་སྒྲིག་སྲོལ》སོགས་ཀྱི་ཚད་ལྡན་ཚད་གཞི་གཞིར་བཟུང་། ཕྱིར་ཚོང་ཚན་པའི་གཉེར་སྐྱོང་ཆོག་འཐུས་འོས་ཐོབ་དང་། ཐོན་རྫས་ཡོང་ཁུངས་ཀྱི་སྲོལ་མཐུན་རང་བཞིན། ཁྲོམ་རའི་ཆོག་འཐུས་ར་སྤྲོད་ཡིག་ཆ། མཛོད་ཉར་ཐོན་རྫས་ཀྱི་སྤུས་ཚད་གནས་ཚུལ་བཅས་དང་དེ་བཞིན་ངོ་རྟགས་དང་ཟུར་མཆན་སོགས་ཀྱི་འགག་རྩའི་ལྷུ་ཚིགས་ལ་ཕྱོགས་ཡོངས་ནས་ཞིབ་བཤེར་བྱས་པ་མ་ཟད། ད་དུང་ཐོན་རྫས་ཀྱི་ཕྱི་དབྱིབས་ངོ་རྟགས་དང་། རྒྱུ་ཆའི་གྲུབ་ཆ། ནུས་པའི་དཔྱད་གྲངས་སོགས་ལ་ཞིབ་བཤེར་བྱས་པ་དང་། རིགས་ཁག་གི་མེ་ཟོན་ཐོན་རྫས་ཀྱི་ཁས་ལེན་དཔང་འདོན་ལག་ཁྱེར་དང་ཞིབ་དཔྱད་ཚད་ལེན་སྙན་ཞུ་སོགས་ཀྱི་ཆ་འཕྲིན་ལ་ཞིབ་བཤེར་ཞིབ་ཕྲ་ཡང་བྱས་ཡོད། དེ་དང་དུས་མཚུངས་ཚན་པའི་མེ་ཟོན་བདེ་འཇགས་ཀྱི་འགན་འཁྲི་འཁུར་མཁན་ལ་ཐོན་རྫས་སྤུས་ཚད་ཀྱི་བྱེད་པོའི་འགན་འཁྲིའི་འདུ་ཤེས་སྔར་བས་ཟབ་ཏུ་བཏང་སྟེ། རྫུན་ལྷད་ཞན་གསུམ་དང་དེ་བཞིན་ཁྲོམ་རའི་ཆོག་འཐུས་བླང་བྱ་དང་མི་འཚམ་པའི་མེ་ཟོན་ཐོན་རྫས་རང་རྟོགས་ངང་བཀག་འགོག་བྱ་རྒྱུར་ཁྲིད་སྟོན་བྱས་ཡོད་པ་རེད།