ཉེ་ཆར། དིང་རི་རྫོང་མི་དམངས་ཁྲིམས་ཁང་གིས“ལག་བསྟར་མ་བྱས་གོང་གི་ལྟ་སྐུལ”ལམ་སྲོལ་བརྒྱུད་འགན་ལེན་གན་རྒྱའི་རྩོད་གཞི་ཞིག་གི་དོ་བདག་གིས་རང་འགུལ་ངང་འོས་འགན་བསྒྲུབ་པར་སྐུལ་འདེད་བཏང་ནས་གྱོད་གཞིའི་དངུལ་སྒོར་376421ཚང་མ་དམིགས་སར་འབྱོར་བ་རེད། ཀུང་སི་ཞིག་གིས“ལག་བསྟར་མ་བྱས་གོང་གི་ལྟ་སྐུལ་ཕན་འབྲས། ཇོ་མོ་གླང་མའི་ཐུར་སྲང་666”ཞེས་པའི་གོས་དར་བསྐྱལ་ནས་དིང་རི་ཁྲིམས་ཁང་གི་ཕན་ནུས་ཆེ་ཞིང་དམངས་ཕན་གྱི་ལག་བསྟར་ལྟ་སྐུལ་བྱེད་ཐབས་ལ་ཐུགས་རྗེ་ཆེ་ཞུས་པ་རེད།

2021ལོར་ཀུང་སི་Ａདང་ཀུང་སི་Ｂདབར་འགན་ལེན་གན་རྒྱའི་ཐད་རྩོད་གླེང་བྱུང་བར་དིང་རི་ཁྲིམས་ཁང་གིས་འདུམ་སྒྲིག་བྱས་པ་དང་འབྲེལ་གྲོས་མཐུན་བཞག་སྟེ། ཀུང་སི་Ａཡིས་2025ལོའི་ཟླ་6ཚེས་1ཉིན་གོང་ཀུང་སི་Ｂལ་འགན་ལེན་གན་རྒྱའི་དངུལ་སྒོར་376421སྤྲོད་རྒྱུའི་ཁ་ཆད་བྱས་པ་རེད། ལག་བསྟར་དུས་བཅད་ཐིམ་ཡང་ཀུང་སི་Ａཡིས་དུས་བཀག་ལྟར་ལག་བསྟར་མ་བྱས་པས་ཀུང་སི་Ｂཡིས་ཁྲིམས་ཁང་ལ་བཙན་ཤེད་ཀྱིས་ལག་བསྟར་བྱེད་དགོས་པའི་རེ་ཞུ་བྱས། བཙན་ཤེད་ལག་བསྟར་བྱེད་པའི་རེ་ཞུ་བྱས་ཉིན་དེར། གྱོད་གཞིའི་དམངས་དོན་ཁྲིམས་དཔོན་གྱིས“ལག་བསྟར་མ་བྱས་གོང་གི་ལྟ་སྐུལ”ལམ་སྲོལ་ལ་བརྟེན་ནས། ཀུང་སི་Ａལ་ནུས་པ་ཐོན་པའི་ཁྲིམས་གཅོད་ཡིག་ཆ་ལག་བསྟར་མ་བྱས་པའི་བཅའ་ཁྲིམས་མཇུག་འབྲས་དང་ཁེ་ལས་ཀྱི་ཡིད་རྟོན་སོགས་ཀྱི་ཤུགས་རྐྱེན་སླར་ཡང་གསལ་བཤད་བྱས་རྗེས་མཐར་ཀུང་སི་Ａཡིས་ཉིན་དེ་རང་ལ་ཀུང་སི་Ｂལ་དངུལ་ཚང་མ་སྤྲད་པ་རེད། གྱོད་གཞི་དེར་ལག་བསྟར་མ་བྱས་གོང་གི་ལྟ་སྐུལ་ལམ་སྲོལ་ཡང་དག་སྤྱད་པ་ལས་ཁེ་ལས་ཀྱི་ཡིད་རྟོན་ལ་ཤུགས་རྐྱེན་མ་ཐེབས་པ་བྱས་པ་མ་ཟད། ཁ་མཆུ་ཐོབ་མཁན་དོ་བདག་གི་ཁེ་དབང་ལའང་སྲུང་སྐྱོང་གང་ལེགས་ཐུབ་ནས“མ་གནས་དམའ་བ་དང་། ལས་ཆོད་མཐོ་བ། འགྲན་རྒོལ་ཉུང་བ”བཅས་ཀྱི་ལས་ཀའི་དམིགས་ཚད་མངོན་འགྱུར་བྱུང་ཡོད།

2025ལོ་ནས་བཟུང་། དིང་རི་ཁྲིམས་ཁང་གིས་ཉེན་ཁའི་གསལ་བརྡ་དང་། གཏུག་བཤེར་མ་བྱས་གོང་གི་གེགས་སྲུང་། གཏུག་བཤེར་ཁྲོད་ཀྱི་གེགས་སྲུང་། ལག་བསྟར་མ་བྱས་གོང་གི་ལྟ་སྐུལ་སོགས་ཀྱི་ལས་དོན་རྒྱུན་མཐུད་གཏིང་ཟབ་སྤེལ་ཏེ། ལག་བསྟར་འབྱུང་ཁུངས་བཅོས་སྐྱོང་ལ་ཕྱོགས་ཡོངས་ནས་སྐུལ་འདེད་བཏང་ནས“ཉིན་30+15+7”ཡི་ལག་བསྟར་མ་བྱས་གོང་གི་ལྟ་སྐུལ་ལམ་སྲོལ་ཆགས་པ་དང་།“ལག་བསྟར་ལ་ལྟ་སྐུལ་དང་། ཡིད་རྟོན་ལ་སྐུལ་ལྕག མཉེན་གཤིས་ཁྲིམས་འཛིན་བཅས་ཟུང་དུ་འབྲེལ་བའི”སྣ་འདུས་ཐབས་བཟང་ལ་བརྟེན་ནས་རྩོད་གཞི་དེ་བས་མང་བ་ལག་བསྟར་མ་བྱས་གོང་ཐག་གཅོད་བྱེད་པར་སྐུལ་འདེད་བཏང་སྟེ། ཁྲིམས་སྐྱོང་ཅན་གྱི་གཉེར་སྐྱོང་ཁོར་ཡུག་ལེགས་སུ་གཏོང་ཆེད་ཁྲིམས་འཛིན་གྱི་བློ་གྲོས་སྐྱེས་སུ་ཕུལ་ཡོད།