གྲོ་མོའི་ཞིབ་དཔྱོད་སྡེ་ཚན་གྱིས་ཞིང་པ་ལས་མིར་རྒྱབ་སྐྱོར་བྱས་ནས་ཉིན་གཅིག་ནང་འགྱངས་ཆད་གླ་ཆ་བླངས་པ།
“ཞིབ་དཔྱོད་དཔོན་ལགས། ང་ཚོ་སི་ཁྲོན་ནས་གླ་པ་རྒྱུག་པར་ཡོང་བ་ཡིན། གླ་ཆ་འགྱངས་ཆད་བྱས་ནས་ལོ་ཕྱེད་ཙམ་སོང་ཡང་ད་དུང་རག་མ་བྱུང་། ད་གང་འདྲ་བྱེད་དགོས་རེད། དངོས་གནས་ཐབས་ཟད་སོང”ཞེས་2025ལོའི་ཟླ་7ཚེས་1ཉིན་གཞིས་རྩེ་གྲོང་ཁྱེར་གྲོ་མོ་རྫོང་ཕྱོགས་བསྡུས་བཅོས་སྐྱོང་ལྟེ་གནས་ཀྱི་ཞིབ་དཔྱོད་ཞབས་ཞུའི་སྐར་ཁུང་མདུན་དུ་གྱོན་ཆས་རྙིང་བ་གྱོན་པའི་ཞིང་པ་ལས་མི་གཉིས་ཀྱིས་ཆད་འཛིན་རལ་པ་ཞིག་འཁྱེར་ནས་འུ་ཐུག་པར་བཤད།
ཀྲང་ཆེ་གེ་མོ(བསྒྱུར་མིང)དང་ལི་ཆེ་གེ་མོ(བསྒྱུར་མིང)ནི་སི་ཁྲོན་ནས་གླ་པ་རྒྱུག་པར་ཡོང་བ་ཞིག་ཡིན་པ་དང་། 2024ལོའི་ཟླ་9པར་ཝང་ཆེ་གེ་མོས(བསྒྱུར་མིང)སྐྲུན་འགན་འཁུར་བའི་གྲོ་མོ་རྫོང་གི་ཨར་སྐྲུན་ལས་ཡུལ་ཞིག་ཏུ་གླ་པ་བྱས། ཁོང་གཉིས་པོས་ཝང་ཆེ་གེ་མོ་དང་ཁ་ཆད་བྱས་ཏེ་ཀྲང་ཆེ་གེ་མོར་ཉིན་གླ་སྒོར་500སྤྲོད་རྒྱུ་དང་ལི་ཆེ་གེ་མོར་ཉིན་གླ་སྒོར་450སྤྲོད་བྱས་ལ། མི་གཉིས་ཀྱི་གླ་ཆ་ཁྱོན་སྒོར་50200ཟིན་ཡོད། འོན་ཀྱང་ལས་མཇུག་འགྲིལ་རྗེས་ཝང་ཆེ་གེ་མོས་དུས་ཐོག་ཏུ་ངལ་རྩོལ་གླ་ཆ་སྤྲད་མེད་པས། ཀྲང་ཆེ་གེ་མོ་དང་ལི་ཆེ་གེ་མོ་གཉིས་གྲོ་མོ་རྫོང་ཕྱོགས་བསྡུས་བཅོས་སྐྱོང་ལྟེ་གནས་སུ་བསྐྱོད།
“སེམས་ཁྲལ་མ་བྱེད། ང་ཚོ་ཆེད་མངགས་མང་ཚོགས་ཀྱི་དཀའ་གནད་ཐག་གཅོད་རོགས་བྱེད་མཁན་ཡིན”ཞེས་གཉེར་འགན་འཁུར་མཁན་གྱིས་ཁོང་གཉིས་ལ་སེམས་གསོ་གཏོང་ཞོར་དུ་གྱོད་གཞི་གང་མགྱོགས་གསེད་བཀྲོལ་བྱས། ཀྲང་ཆེ་གེ་མོ་དང་ལི་ཆེ་གེ་མོས་ངལ་རྩོལ་གན་རྒྱ་བཞག་མེད་མོད། འོན་ཀྱང་ཝང་ཆེ་གེ་མོས་བཏོན་པའི་ཆད་འཛིན་དཔང་རྟགས་སུ་འཁྱེར་ཡོད། གཉེར་འགན་འཁུར་མཁན་གྱིས་འཕྲལ་དུ་ཝང་ཆེ་གེ་མོར་འབྲེལ་བ་བྱས་ནས་བཅའ་ཁྲིམས་ཀྱི་མཇུག་འབྲས་གསལ་འགྲེལ་བྱས་ཤིང་། ཝང་ཆེ་གེ་མོས་ཀྱང་ཕྱོགས་བསྡུས་བཅོས་སྐྱོང་ལྟེ་གནས་སུ་གྲོས་མོལ་བྱེད་པར་ཡོང་རྒྱུའི་མོས་མཐུན་བྱས།
འདུམ་འགྲིག་ཁང་དུ“ཕྱོགས་གཉིས་དབར་བཅའ་ཁྲིམས་གསལ་འགྲེལ”བྱེད་འགོ་ཚུགས་ཤིང་། “ཝང་ཆེ་གེ་མོ། ཁྱེད་ཀྱིས་བྲིས་པའི་ཆད་འཛིན་ནི་གླ་ཆ་འགྱངས་ཆད་ཀྱི‘དཔང་རྟགས་ཁུངས་བཙན’ཞིག་རེད། ཁྱེད་ཀྱིས་ཁས་ལེན་ཐེངས་མང་བྱས་ཀྱང་དངུལ་ད་བར་སྤྲད་མེད” ཝང་ཆེ་གེ་མོས“མ་དངུལ་ཐད་དཀའ་ངལ་ཡོད་པ”རྒྱུ་མཚན་དུ་བྱས་ཀྱང་། གཉེར་འགན་འཁུར་མཁན་གྱིས་ངལ་རྩོལ་གླ་ཆ་མ་སྤྲད་ན་བཅའ་ཁྲིམས་ཀྱི་འགན་འཁྲི་འཁུར་དགོས་ལུགས་ནན་པོས་བརྗོད་ལ། “ཁོང་ཚོ་ཚང་མ་ཕ་ཡུལ་དང་ཁ་བྲལ་ནས་དངུལ་གསོག་པར་ཡོང་བ་རེད། ཁྱེད་ཀྱང་གྲོང་གསེབ་ནས་ཡོང་བ་ཞིག་ཡིན་པས་དཀའ་ངལ་དེ་ཤེས་གསལ་རེད”ཅེས་བཤད་པ་མ་ཟད། ཀྲང་ཆེ་གེ་མོ་དང་ལི་ཆེ་གེ་མོ་ཕ་ཡུལ་སི་ཁྲོན་ནས་བོད་དུ་གླ་པ་རྒྱུག་པར་ཡོང་བ་ཡང་ལས་སླ་པོ་མེད་ལུགས་བཤད།
མི་དམངས་འདུམ་འགྲིག་པའི་སྣེ་ཁྲིད་འོག་ཕྱོགས་གཉིས་དབར་འདུམ་འགྲིག་གྲོས་མཐུན་གྲུབ་པ་སྟེ། ཀྲང་ཆེ་གེ་མོར་ཝང་ཆེ་གེ་མོས་གླ་ཆ་ཐེངས་བཞི་ལ་བགོས་ནས་སྤྲོད་རྒྱུ་དང་། 2025ལོའི་ཟླ་10ཚེས་30ཉིན་གོང་ཚང་མ་སྤྲོད་རྒྱུའི་ཁས་བླངས་པ་དང་། ལི་ཆེ་གེ་མོར་ཝང་ཆེ་གེ་མོས་གླ་ཆ་ཐེངས་གསུམ་ལ་བགོས་ནས་སྤྲོད་རྒྱུ་དང་། 2025ལོའི་ཟླ་9ཚེས་15ཉིན་གོང་ཚང་མ་སྤྲོད་རྒྱུའི་ཁས་བླངས་ཡོད། གལ་ཏེ་དུས་ཚོད་ཡོལ་ཡང་ད་དུང་སྤྲད་མེད་ཚེ་ཁོང་གཉིས་པོས་དམངས་དོན་གྱི་བཀའ་བཅད་ཁྲ་མར་གཞིགས་ནས་བཙན་སྐུལ་ལག་བསྟར་ཐད་ཀར་རེ་ཞུ་བྱ་རྒྱུ་ཡིན་པ་རེད།
“གལ་ཏེ་སྐབས་དེ་དུས་སླར་ཡང་འགྱུར་ལྡོག་བྱུང་ཚེ་ང་ཚོས་ཇི་ལྟར་བྱེད་དམ”ཞེས་དྲིས་པར། གཉེར་འགན་འཁུར་མཁན་གྱིས་ཉིན་དེ་རང་དུ་ཕྱོགས་གཉིས་པོས་ཁྲིམས་འཛིན་གྱི་གཏན་འཁེལ་རེ་ཞུ་བྱེད་པར་ཁྲིད་སྟོན་བྱས། ཕྱོགས་བསྡུས་བཅོས་སྐྱོང་ལྟེ་གནས་སུ་བཅའ་སྡོད་གྲོ་མོ་རྫོང་མི་དམངས་ཁྲིམས་ཁང་སྐར་ཁུང་གིས་ཞིབ་བཤེར་བྱས་པ་བརྒྱུད་འདུམ་འགྲིག་གྲོས་མཐུན་ཡི་གེ་གཉིས་ཁྲིམས་འཛིན་གྱི་གཏན་འཁེལ་ཆ་རྐྱེན་དང་མཐུན་པས《དམངས་དོན་བཀའ་བཅད་ཁྲ་མ》འཕྲལ་མར་བཏོན་ནས་འདུམ་འགྲིག་གྲོས་མཐུན་གོ་ཆོད་པའི་གཏན་འཁེལ་བྱས་ཡོད། བཀའ་བཅད་ཁྲ་མ་དེ་ནི་བཙན་སྐུལ་ལག་བསྟར་བྱེད་ཤུགས་ལྡན་པའི“བཅའ་ཁྲིམས་ཀྱི་འགན་བཅོལ”ཞིག་རེད། “བཀའ་བཅད་ཁྲ་མ་དམར་པོ་དེ་ཡོད་པས་ང་ཚོའི་སེམས་པ་ལྷོད་ལ་བབས་སོང”ཞེས་ཀྲང་ཆེ་གེ་མོས་བཀའ་བཅད་ཁྲ་མར་ལྟ་བཞིན་དགའ་སྤྲོའི་ངང་བཤད།
འབྲེལ་ཡོད་གསར་འགྱུར།