འདི་ནི་འཛད་སྤྱོད་པས་དྲ་ཐོག་གི་ཚོང་ཟོག་ལ་ལྟ་བཞིན་པ།

“འཛད་སྤྱོད་པ”

དྲ་ཕྱི་ནས་ཅ་ལག་ཉོས་པར་ཁེ་དབང་ལ་གནོད་འཚེ་ཕོག་པ།

ཟླ་6ཚེས་18ཉིན། ཀྲུའུ་ཆེ་གེ་མོས་ཐད་གཏོང་ག་གེ་མོའི་བརྙན་ཐུང་ལ་ལྟ་སྐབས། ལྷ་སའི་ཐད་གཏོང་བ་ཞིག་གིས་འཚོང་བཞིན་པའི་བོད་ཀྱི་ཁྱད་ལྡན་རྒྱན་ཆ་མུ་ཏིག་ཅིག་བློར་བབས་ཏེ་ཉོ་འདོད་ཆེན་པོ་བྱུང་བས། དེ་འཕྲལ་སྒེར་འཕྲིན་བསྐུར་ནས་ཉོ་འདོད་ཡོད་ཚུལ་གླེང་། ཐད་གཏོང་བས། མུ་ཏིག་འཚོང་རྒྱུ་ཡོད་མོད། འོན་ཀྱང་རིན་པ་སྐད་འཕྲིན་ནས་སྒྱུར་དགོས་ལུགས་བཤད། ཀྲུའུ་ཆེ་གེ་མོས“ཕ་རོལ་པོ་ཐད་གཏོང་བྱས་ནས་ཡུན་རིང་སོང་བར་རྦད་དེ་ཡིད་ཆེས་ཏེ་སྐད་འཕྲིན་ནས་སྒོར་2800བསྐུར་པ་ཡིན”ཞེས་བཤད། ཁ་བསླུས་མི་ཕོག་པ་བྱ་ཆེད། ཁོང་གིས་གལ་སྲིད་འཚོང་མ་འགྲིག་ན་དངུལ་ཕྱིར་སློག་རོགས་ཞེས་ནན་བཤད་བྱས།

འོན་ཀྱང་། ཟླ་6ཚེས་21ཉིན། ཀྲུའུ་ཆེ་གེ་མོར་མུ་ཏིག་འབྱོར་རྗེས་ཐད་གཏོང་གི་ཅ་ལག་དང་གཅིག་པ་མིན་པ་ཤེས་ཏེ་བློ་ཕམ་ཆེན་པོ་སྐྱེས། ཁོང་གིས་ཆེད་ལས་མི་སྣ་མང་པོ་ཞིག་གི་སར་བསྐྱོད་ནས་ཅ་ལག་ལ་གསལ་འབྱེད་བྱེད་སྐབས། མུ་ཏིག་དེར་སྒོར་བཅུ་ཕྲག་ཁ་ཤས་ལས་མི་རི་བ་དང་སྤུས་ཀ་ཡང་ཡག་པོ་མེད་པ་ཤེས། ཁོང་གིས་དེ་འཕྲལ་ཐད་གཏོང་བ་དང་འབྲེལ་བ་བྱས་ནས་དངུལ་ཕྱིར་སློག་དགོས་ཚུལ་བཤད་ཀྱང་། ཕ་རོལ་པོས་ཁ་ཆད་རྒྱབ་སྐྱུར་གྱིས་མུ་ཏིག་བརྗེ་བ་ལས་དངུལ་སློག་གི་མིན་ཞེས་བཤད།

མཐར་འུ་ཐུག་ཐབས་ཟད་ཀྱི་གནས་སུ་གྱར་སྟབས། ཁོང་གིས་ལྷ་སའི་འབྲེལ་ཡོད་སྡེ་ཚན་ལ་རོགས་རམ་བྱེད་རོགས་ཞུས་ཏེ་མཐུན་སྦྱོར་ཐེངས་མང་བྱས་ཀྱང་གནད་དོན་ཐག་གཅོད་ཐུབ་མེད།

“ཐད་གཏོང་བ”

ཚབ་ཉོའི་ཚོང་ཟོག་ལ་དངུལ་ཐད་ཀར་སྤྲོད་དགོས།

གནས་ཚུལ་ལ་སྔར་བས་ཤེས་རྟོགས་བྱ་ཆེད། གསར་འགོད་པས་དོན་རྐྱེན་དང་འབྲེལ་བ་ཡོད་པའི་ཐད་གཏོང་བར་བཅར་འདྲི་བྱེད་སྐབས། ཐད་གཏོང་བས། ཅ་ལག་མ་ཉོས་གོང་འཛད་སྤྱོད་པར“ཉིན་བདུན་ནང་ཚུན་དུ་ཅ་ལག་བརྗེ་ཆོག་མོད། འོན་ཀྱང་བསྐུར་གླ་འཛད་སྤྱོད་པས་སྤྲོད་དགོས་པ་མ་ཟད། ཅ་ལག་དང་དངུལ་ཕྱིར་སློག་གི་མིན་ཞེས་ཁ་གསལ་བཤད་ཡོད”ཅེས་བརྗོད། གསར་འགོད་པས། འོ་ན་སྐད་འཕྲིན་བརྒྱུད་དངུལ་བསྐུར་དུ་བཅུག་དོན་གང་ཡིན་ཞེས་འདྲི་སྐབས། ཐད་གཏོང་བ་དེས“ཐད་གཏོང་ཁང་གི་ཐེར་ཆུང་སེར་པོའི་ནང་ཡོད་པའི་ཚོང་ཟོག་ནི་ང་རང་གི་ཡིན་སྟབས་ཐད་ཀར་ཉོས་ཆོག འོན་ཀྱང་། ཚོང་ཟོག་གཞན་དག་ནི་ལྷ་སའི་ཁྲོམ་ར་ག་གེ་མོའི་ཡིན་པས། གལ་ཏེ་འཛད་སྤྱོད་པས་ཉོ་འདོད་ན། ཚབ་ཉོའི་དངུལ་ནས་བརྒྱ་ཆ་10འཐེན་གྱི་ཡོད། ཚབ་ཉོའི་ཚོང་ཟོག་ཡིན་ཕྱིན་དངུལ་ཐད་ཀར་སྤྲོད་དགོས་པས། འཛད་སྤྱོད་པར་སྔོན་ལ་དངུལ་བསྐུར་དུ་འཇུག་གི་ཡོད”ཅེས་ཀྲུའུ་ཆེ་གེ་མོས་ཉོས་པའི་མུ་ཏིག་དེ་ཚབ་ཚོང་ཚོང་ཟོག་ཡིན་ལུགས་བཤད།

གསར་འགོད་པས་ཐད་གཏོང་བས་བཤད་པའི་སྐད་ཆ་ཀྲུའུ་ཆེ་གེ་མོར་བརྗོད་སྐབས། ཁོང་གིས་མོས་མཐུན་གཏན་ནས་མ་བྱས་པར། ཐད་གཏོང་བ་དང་ཚོང་པ་གཉིས་པོ་ངན་པ་ལག་སྦྲེལ་ཡིན་པ་དང་། ངས་ཉོས་པའི་མུ་ཏིག་ཚབ་ཚོང་ཚོང་ཟོག་ཡིན་ཟེར་ཡང་དོན་དངོས་སུ་ཁོང་ཚོའི་ཚོང་ཁང་གི་ཚོང་ཟོག་རེད། ཐད་གཏོང་བས་ཚོང་པར་དངུལ་བསྐུར་ལུགས་ཤོད་པ་དེ་ནི་འགན་འཁྲི་གཡོལ་ཆེད་རང་རེད་ཅེས་བཤད།

ཀྲུའུ་ཆེ་གེ་མོ་དང་ཐད་གཏོང་བས་སྐད་ཆ་ཐེངས་མང་བྱས་པ་བརྒྱུད། མཐར་ཚོང་ཟོག་བརྗེ་རྒྱུའི་ཐག་བཅད། མིག་སྔར་ཕྱོགས་གཉིས་པོས་ཚོང་ཟོག་ཇི་ལྟར་བརྗེ་བའི་ཐད་སྐད་ཆ་བྱེད་བཞིན་ཡོད་པ་རེད།

“གསར་འགོད་པས་བཅར་འདྲི་བྱས་པ”

ལྐོག་ཏུ་ཉོ་ཚོང་དང་ཚོང་ཟོག་གཅིག་པ་མིན་པ་དེ། འཛད་སྤྱོད་ཀྱི་རྩོད་གཞི་ཐག་གཅོད་བྱེད་པའི་དཀའ་གནད་དུ་གྱུར་པ།

འཛད་སྤྱོད་ཀྱི་རྩོད་གཞི་དེ་ལས་དྲ་རྒྱའི་ཐད་གཏོང་ཁྱབ་ཁོངས་སུ་གནད་དོན་མང་པོ་ཞིག་ཡོད་པ་གསལ་བཤད་བྱེད་ཐུབ། གསར་འགོད་པས་བཅར་འདྲི་བྱེད་རིང་འཛད་སྤྱོད་པ་མང་པོས་དྲ་ཐོག་ནས་དངོས་ཟོག་ཉོ་སྐབས་མགོ་སྐོར་འོག་ཚུད་པར་མ་ཟད། ལྐོག་ཏུ་ཉོ་ཚོང་བྱེད་པ་དང་། ཚོང་ཟོག་གཅིག་པ་མིན་པ། ཉོས་རྗེས་ཅ་ལག་ཇི་ལྟར་བརྗེ་སྟངས་སོགས་ལ་རྩོད་གཞི་ཡོད་པ་ཤེས་རྟོགས་བྱུང་ཡོད།

ལས་རིགས་མི་སྣས། གནས་ཚུལ་དེ་རིགས་རྟག་ཏུ་ཐོན་གྱི་ཡོད། ཐད་གཏོང་བ་ལ་ལས་ཁེ་བཟང་རག་ཆེད། གོང་ཁེ་པོ་བྱེད་པ་དང་སྤུས་ལེགས་ཚོང་ཟོག་ཡིན་ཚུལ་བརྗོད་ནས་འཛད་སྤྱོད་པར་མགོ་སྐོར་གཏོང་གི་ཡོད་པས། འཛད་སྤྱོད་པར་མགོ་སྐོར་ཐེབས་ཕྱིན་ཤོད་ཁག་པོར་གྱུར་གྱི་ཡོད་ཅེས་བརྗོད།