“ཁྲིམས་རྩོད་པའི་བསམ་འཆར”

ཀྲུའུ་ཆེ་གེ་མོར་མགོ་སྐོར་ཐེབས་པའི་གནས་ཚུལ་ལ་དམིགས་ནས། པེ་ཅིང་གྲོང་ཁྱེར་པེ་ཏུའོ་ཏིང་མིང(བོད་ལྗོངས)ཁྲིམས་རྩོད་ལས་དོན་ཁང་གི་ཁྲིམས་རྩོད་པ་ཀོན་ལིན་མེང་གིས“དྲ་ཐོག་ཉོ་ཚོང་ཁྱབ་གདལ་དང་ཉོ་ཚོང་སྟེགས་བུ་སྣ་མང་ཅན་དུ་འགྱུར་བར་བརྟེན། དྲ་ཐོག་ཉོ་ཚོང་ལའང་ཉེན་ཁ་ཅིག་ཅར་དུ་ཐོན་བཞིན་ཡོད”ཅེས་བཤད།

དེའི་ཐད་ཁྲིམས་རྩོད་པ་ཀོན་ལིན་མེང་གིས“འཛད་སྤྱོད་པས་དྲ་རྒྱའི་ཉོ་ཚོང་གི་ཉེན་ཁར་སྔོན་འགོག་དང་དྲ་རྒྱའི་ཉོ་ཚོང་གི་བདེ་འཇགས་སྲུང་བར‘ཐབས་ཤེས་གསུམ’ཡོད་པ་སྟེ། གཅིག དྲ་རྒྱའི་ཉོ་ཚོང་ལས་སྟེགས་ཡག་པོ་བདམས་ཏེ་ཁྲིམས་མཐུན་ཐོ་འགོད་བྱས་པའི་དྲ་རྒྱའི་ཉོ་ཚོང་ལས་སྟེགས་འདེམས་དགོས། ཡོང་ཁུངས་མི་གསལ་བའི་ＡＰＰསྣ་ཚོགས་དང་དྲ་རྒྱའི་སྦྲེལ་མཐུད་ལ་ཡིད་གཟབ་བྱས་ནས་མགོ་སྐོར་འོག་མི་ཚུད་པར་བྱེད་དགོས། གཉིས། ལས་སྟེགས་དང་གྱེས་རྗེས་གན་རྒྱ་འཇོག་དགོས། རྒྱུན་གཏན་གྱི་ཉོ་ཚོང་བྱེད་སྐབས། ཚོང་པས་འཛད་སྤྱོད་པར་དྲ་རྒྱའི་ཉོ་ཚོང་ལས་སྟེགས་དང་གྱེས་ཏེ། ལྐོག་ཏུ་ཚོང་རྒྱག་པར་བསླུ་བྲིད་བྱེད་པའི་གནས་ཚུལ་མི་ཉུང་བ་ཞིག་ཐོན་གྱི་ཡོད། ལས་སྟེགས་དང་གྱེས་ན་ཚོང་པར་ཚོད་འཛིན་བྱེད་ཐབས་བྲལ་བ་མ་ཟད། ཕན་ཚུན་དབར་བཞག་པའི་གན་རྒྱར་ཡང་ཚོད་འཛིན་བྱེད་དཀའ་བ་དང་ཞབས་ཞུར་ཡང་ཁས་ལེན་བྱེད་མི་ཐུབ་པས། ལས་སྟེགས་ལས་གྱེས་རྗེས་ཕྱོགས་གཉིས་པོས་ཉོ་ཚོང་གན་རྒྱ་བསྐྱར་དུ་བཞག་ནས་ཚོང་ཟོག་འབྱོར་རྗེས་དངུལ་སྤྲོད་དགོས། གསུམ། དབང་ཆ་དུས་ཐོག་ཏུ་སྤྱོད་དགོས། ཚོང་པས་ཁ་ཆད་དང་རྒྱབ་འགལ་བྱས་པའི་གནས་ཚུལ་ཐོན་ཚེ། འཛད་སྤྱོད་པས་བཅའ་ཁྲིམས་ལ་བརྟེན་ནས་དུས་ཐོག་ཏུ་ཕྱོགས་གཉིས་པོའི་ཉོ་ཚོང་གི་ཟིན་ཐོ་དང་། གན་རྒྱ། འབྲེལ་གཏུག་ཟིན་ཐོ་སོགས་དཔང་རྟགས་བསྡུ་རུབ་བྱེད་དགོས་ལ། རང་འགུལ་ངང་གྲོས་མོལ་དང་། ལས་སྟེགས་ལ་ཞུ་གཏུག་རྒྱག་པ། ལྟ་འདོམས་སྡེ་ཚན་ལ་ཐེར་འདོན་བྱེད་པ། ཁྲིམས་ཁང་ལ་ཞུ་གཏུག་རྒྱག་པ་སོགས་བྱས་ནས། རང་ཉིད་ཀྱི་ཁྲིམས་མཐུན་ཁེ་དབང་ལ་སྲུང་སྐྱོབ་བྱེད་དགོས།