འདི་ནི་ལྷ་སའི་གྲོང་ཤར་དབན་ཏ་ཐང་ཆེན་དུ། དགུང་སྔོན་རོགས་སྐྱོབ་རུ་ཁག་གི་ལས་དོན་མི་སྣས་མང་ཚོགས་ལ་གནོད་འཚེ་སྔོན་འགོག་དང་ཉུང་གཏོང་གི་ཤེས་བྱ་སློབ་བཞིན་པ།

ཟླ་5ཚེས་12ཉིན་ནི་རྒྱལ་ཡོངས་ཀྱི་གནོད་འཚེ་སྔོན་འགོག་དང་ཉུང་གཏོང་གི་ཉིན་མོ་ཐེངས་17པ་ཡིན་ཞིང་། དེའི་བརྗོད་དོན་གཙོ་བོ་ནི“ཚང་མས་བདེ་འཇགས་ལ་སྣང་ཆེན་དང་འཕྲལ་སྡོམ་ཤེས་པར་བྱས་ཏེ། ཉེ་འཁོར་གྱི་གནོད་འཚེའི་མངོན་མེད་རྐྱེན་ངན་གྲལ་བཤེར་བྱེད་དགོས”ཞེས་པ་དེ་རེད། དེ་ཉིན་རང་ལྗོངས་ཀྱི་ས་གནས་ཁག་དང་སྡེ་ཚན་ཁག་གིས་རྣམ་པ་འདྲ་མིན་སྣ་ཚོགས་ཀྱི་གནོད་འཚེ་སྔོན་འགོག་དང་ཉུང་གཏོང་གི་དྲིལ་བསྒྲགས་སློབ་གསོ་དང་། དེ་བཞིན་ནང་སྦྱོང་གསོ་སྦྱོང་བྱེད་སྒོ་སྤེལ་ནས་སྤྱི་དམངས་ཀྱི་ཚན་རིག་དང་མཐུན་པའི་སྒོ་ནས་གནོད་འཚེ་སྔོན་འགོག་གི་འདུ་ཤེས་དང་ཉེན་གཡོལ་རང་སྐྱོབ་ཀྱི་ནུས་པ་ཆེ་རུ་བཏང་བ་རེད།

ཚེས་12ཉིན། སྡེ་ཚན་70ཙམ་གྱིས་ལྷ་ས་གྲོང་ཁྱེར་གྱི་གྲོང་ཤར་དབན་ཏ་ཐང་ཆེན་དུ་དྲིལ་བསྒྲགས་བྱ་ཡུལ་བཙུགས་ནས“5·12”རྒྱལ་ཡོངས་ཀྱི་གནོད་འཚེ་སྔོན་འགོག་དང་ཉུང་གཏོང་ཉིན་མོའི་དྲིལ་བསྒྲགས་བྱེད་སྒོ་སྤེལ་ཞིང་།

བྱེད་སྒོ་སྤེལ་ཡུལ་དུ་ལས་དོན་པས་གནོད་འཚེ་སྔོན་འགོག་དང་ཉུང་གཏོང་གི་བརྗོད་དོན་གཙོ་བོའི་འཕྲེད་འགེལ་སྦྱར་ཡིག་འགེལ་བ་དང་། གནོད་འཚེ་སྔོན་འགོག་དང་ཉུང་གཏོང་གི་བརྙན་ཐུང་སྟོན་པ། དྲིལ་བསྒྲགས་འགྲེམས་པང་འཛུགས་པ། དྲིལ་བསྒྲགས་དཔྱད་གཞིའི་ཡིག་རིགས་སྤྲོད་པ། མང་ཚོགས་ཀྱི་བློ་འདྲིར་ལན་འདེབས་པ་སོགས་ཀྱི་བྱ་ཐབས་བརྒྱུད་ཕར་འགྲོ་ཚུར་འོང་བྱེད་མཁན་མང་ཚོགས་ལ་གནོད་འཚེ་སྔོན་འགོག་དང་ཉུང་གཏོང་གི་རྨང་གཞིའི་ཤེས་བྱ་དྲིལ་བསྒྲགས་བྱས་པ་རེད།

བོད་ལྗོངས་དགུ་དགུ་དགུ་ཛ་དྲག་རོགས་སྐྱོབ་ལྟེ་གནས་ཀྱི་མྱུར་སྐྱོབ་རྩལ་ནུས་འགྲེམས་ཁུལ་དུ་མི་མང་པོ་འདུས་ཡོད་ཅིང་། གྲོང་མི་ཀྲང་ཤིན་ཕིང་གིས་དྲན་པ་གསོ་ཐབས་དང་གློག་རྡེག་ཡོ་བྱད་སྤྱོད་སྟངས་ནན་ཏན་ངང་སྦྱོང་བཞིན་ཡོད་པ་དང་། ལས་དོན་པས་སྤྱོད་སྟངས་ལ་གསལ་བཤད་ཞིབ་ཕྲ་དང་དོགས་འདྲིར་ངང་རྒྱུད་རིང་པོས་ལན་བཏབ་སྟེ་ཁོང་ལ་སྦྱོང་བརྡར་ཡང་ཡང་དང་གནད་འགག་ཁོང་དུ་ཆུད་རྒྱུར་མཛུབ་ཁྲིད་བྱེད་བཞིན་ཡོད་པ་རེད།

ཚེས་12ཉིན། མངའ་རིས་ས་ཁུལ་གྱིས་ཞང་ཞུང་ཐང་ཆེན་དུ“5·12”རྒྱལ་ཡོངས་ཀྱི་གནོད་འཚེ་སྔོན་འགོག་དང་ཉུང་གཏོང་དྲིལ་བསྒྲགས་གཟའ་འཁོར་གྱི་བྱེད་སྒོ་སྤེལ་འགོ་བཙུགས་པ་རེད། མིང་རྟགས་བཀོད་ནས་གྲོས་འགོ་འདོན་པའི་ལྷུ་ཚིགས་སུ། བྱེད་སྒོར་ཞུགས་མཁན་ཡོངས་ཀྱིས་བརྗོད་དོན་གཙོ་བོའི་འཕྲེད་འགེལ་སྦྱར་ཡིག་ཐོག་མིང་རྟགས་བཀོད་དེ་ཚང་མ་ཞུགས་པའི་ཐུན་མོང་གི་ངོས་འཛིན་གཅིག་སྒྲིལ་བྱས་པ་རེད།

དགེ་སློབ་ཀྱི་ཡོམ་འགོག་དང་གནོད་འཚེ་ཉུང་གཏོང་གི་འདུ་ཤེས་སྔར་བས་ཟབ་ཏུ་བཏང་ནས་ཐོལ་བྱུང་དོན་རྐྱེན་ལ་ཁ་གཏད་གཅོག་པའི་འཕྲལ་སྡོམ་ཉེན་གཡོལ་དང་རང་སྲུང་རང་སྐྱོབ་ཀྱི་ནུས་པ་ཆེ་རུ་གཏོང་ཆེད། ཚེས་12ཉིན་ལྷ་ས་གྲོང་ཁྱེར་མཐོ་རིམ་སློབ་འབྲིང་བཞི་པས་སྟོད་ལུང་བདེ་ཆེན་ཆུས་མེ་ཟོན་རུ་ཆེན་དང་མཉམ་དུ་ཕྱོགས་ཡོངས་དང་རིམ་པ་མང་བའི་ཡོམ་འགོག་དང་གནོད་འཚེ་ཉུང་གཏོང་གི་ཕྱོགས་བསྡུས་ནང་སྦྱོང་བྱས་པ་རེད།

ཚེས་12ཉིན་ལྷོ་ཁ་གྲོང་ཁྱེར་གྱིས་སྣེ་གདོང་ཆུས་རྡོ་ཕོ་བྲང་ཤང་དུ“འཕྲལ་སྡོམ་འགན་འཁྲི། ལྷོ་ཁའི་2025ལོ”ཞེས་པ་བརྗོད་དོན་གཙོ་བོར་བྱས་པའི་གནོད་འཚེའི་རིགས་མང་པོ་དང་ས་ཡོམ་གྱི་གནོད་འཚེའི་ཕྱོགས་བསྡུས་འཕྲལ་སྡོམ་དངོས་འཐབ་ནང་སྦྱོང་སྒྲིག་འཛུགས་བྱས་ཏེ་ས་ཡོམ་དང་ཞོར་ཐོན་གནོད་འཚེའི་རྣམ་པར་ལད་མོ་བྱས་ནས་སྔོན་ཇུས་ཀྱི་ལུགས་མཐུན་རང་བཞིན་ལ་ཞིབ་དཔྱད་དང་ཚན་པ་ཁག་གི་མཉམ་འགུལ་ལམ་སྲོལ་གྱི་མཐུན་སྦྱོར་རང་བཞིན་ལ་ཞུན་བརྡར་སྤྲས་ཏེ་རོགས་སྐྱོབ་ནུས་པ་རྒྱུན་ཆད་མེད་པར་ཆེ་རུ་བཏང་ཡོད།

ལྷོ་ཁ་གྲོང་ཁྱེར་མཚོ་སྨད་རྫོང་གིས“མི་གཅིག་ལ་སློབ་གསོ་གཏོང་བ་དང་། ཁྱིམ་ཚང་གཅིག་ལ་སྐུལ་ཁྲིད་བྱེད་པ། སྤྱི་ཚོགས་ཧྲིལ་པོར་ཁྱབ་འགྱེད་ཐུབ་པ”བཅས་ཀྱི་དམིགས་ཚད་ལ་དམིགས་ཏེ་དྲ་ཐོག་དང་དྲ་ཕྱི་མཉམ་འདྲེས་ཀྱི་རྣམ་པ་ཕུན་སུམ་ཚོགས་པའི་དྲིལ་བསྒྲགས་བྱེད་སྒོ་སྤེལ་བ་རེད།

ཉིང་ཁྲི་གྲོང་ཁྱེར་རྫ་ཡུལ་རྫོང་འཕྲལ་སྡོམ་དོ་དམ་ཅུས་ཀྱིས་རྫོང་ཆུ་བེད་དང་། རང་བྱུང་ཐོན་ཁུངས། མེ་ཟོན། ནགས་ཚལ་མེ་ཟོན་སོགས་སྡེ་ཚན་མང་པོ་དང་མཉམ་དུ་རྫོང་གྲོང་དམངས་སྲིད་ཐང་ཆེན་དུ་གནོད་འཚེ་སྔོན་འགོག་དང་ཉུང་གཏོང་དྲིལ་བསྒྲགས་དང་ཚན་རིག་ཁྱབ་གདལ་གྱི་བྱེད་སྒོ་སྤེལ་བ་རེད། ད་རེས་ཀྱི་དྲིལ་བསྒྲགས་བྱེད་སྒོར་ས་གནས་ས་ཐོག་ཏུ་ཚན་རིག་ཁྱབ་གདལ་གྱི་དཔྱད་ཡིག་3000ལྷག་ཙམ་དང་དྲིལ་བསྒྲགས་དངོས་རྫས་2000ལྷག་ཙམ་སྤྲད་པ་དང་མང་ཚོགས་མི་ཐེངས་300ལྷག་ཙམ་གྱི་བློ་འདྲི་དང་ལེན་བྱས་ཡོད།

ཆབ་མདོ་གྲོང་ཁྱེར་མཛོ་སྒང་རྫོང་ནགས་ཚལ་མེ་ཟོན་རུ་འབྲིང་གིས་མེ་ཟོན་པ་30སྒྲིག་འཛུགས་བྱས་ཏེ་རྫོང་སློབ་འབྲིང་དུ་བསྐྱོད་ནས་ས་ཡོམ་གྱི་འཕྲལ་སྡོམ་ཁ་འགྲེམས་ནང་སྦྱོང་དང་རང་སྐྱོབ་རྩལ་ནུས་ཀྱི་གསོ་སྦྱོང་བྱེད་སྒོ་སྤེལ་ཞིང་། དངོས་འཐབ་ཅན་གྱི་ནང་སྦྱོང་དང་ཤེས་བྱའི་སྒྲོག་འགྲེལ་ཟུང་འབྲེལ་བྱེད་སྟངས་བརྒྱུད་དགེ་སློབ་ཀྱི་གེགས་སེལ་ཉེན་གཡོལ་གྱི་ནུས་པ་ཆེ་རུ་བཏང་བ་དང་བདེ་འཇགས་སློབ་གྲྭ་འཛུགས་སྐྲུན་ལ་མེ་ཟོན་གྱི་ནུས་ཤུགས་བཏོན་ཡོད།