འདི་ནི་ཞིབ་བཤེར་མི་སྣས་ཐབ་ཚང་གི་གཙང་སྦྲར་ཞིབ་བཤེར་བྱེད་བཞིན་པ།

ཁོངས་གཏོགས་ཁུལ་གྱི་ཚོང་གཉེར་ཁང་ཁག་གི་ཚད་ལྡན་དོ་དམ་ལ་སྔར་བས་ཤུགས་སྣོན་རྒྱག་པ་དང་སྡེ་ཁུལ་གྱི་བདེ་འཇགས་བརྟན་ལྷིང་སྲུང་སྐྱོང་བྱ་ཆེད། ཟླ་3ཚེས་14ཉིན་ལྷ་ས་གྲོང་ཁྱེར་ཁྲེང་ཀོན་ཆུས་གྲྭ་བཞི་ཁྲོམ་གཞུང་དོན་གཅོད་ཁྲུའུ་མཐུན་སྒྲིལ་གྲོང་གསར་སྡེ་ཁུལ་གྱིས་དམངས་ཕན་ཉེན་རྟོག་ཁང་དང་དེ་བཞིན་ལྷ་ས་གྲོང་ཁྱེར་ཁྲེང་ཀོན་ཆུས་ཁྲོམ་ར་ལྟ་འདོམས་ཅུས་དང་མཉམ་དུ་ཁོངས་གཏོགས་ཁུལ་གྱི་ཚོང་གཉེར་ཁང་ཁག་ལ་ཁྱོན་ཡོངས་ནས་ཞིབ་བཤེར་བྱས་པ་དང་། དེའི་དམིགས་ཡུལ་ནི་བདེ་འཇགས་ཀྱི་མངོན་མེད་རྐྱེན་ངན་གྲལ་བཤེར་དང་གཉེར་སྐྱོང་སྒྲིག་ལམ་ཚད་ལྡན་དུ་བཏང་སྟེ། གྲོང་མིའི་འཚོ་བའི་ཁོར་ཡུག་དང་ཁྲིམས་མཐུན་ཁེ་དབང་འགན་ལེན་ཏན་ཏིག་བྱ་ཆེད་རེད།

ཞིབ་བཤེར་བྱེད་རིང་། ཚོང་གཉེར་ཁང་མང་ཆེ་བས་འབྲེལ་ཡོད་གཏན་འབེབས་ལ་བརྩི་སྲུང་ནན་པོ་ཞུས་ཤིང་གཉེར་སྐྱོང་སྒྲིག་ལམ་ཡག་པོ་སྲུང་ཡོད། འོན་ཀྱང་ཚོང་གཉེར་ཁང་ཁ་ཤས་ལ་སྔར་བཞིན་གནད་དོན་མི་ཉུང་བ་གནས་ཡོད། དཔེར་ན། བཟའ་བཏུང་ཁང་ཁ་ཤས་ཀྱི་ཐབ་ཚང་གི་འཕྲོད་བསྟེན་ཁོར་ཡུག་ཅུང་ཞན་པ་དང་ཟས་རིགས་ཀྱི་དུས་ཚོད་ཡོལ་བ་དང་གསོག་ཉར་ཚད་གཞི་དང་མཐུན་གྱི་མེད། ཚོང་ཁང་འགའ་ཤས་ཀྱི་མེ་ཟོན་ཡོ་ཆས་དུས་ཚོད་ཡོལ་ཡང་དུས་ཐོག་ཏུ་བརྗེས་མེད་པ་དང་། བདེ་འཇགས་བགྲོད་ལམ་དུ་ཅ་ལག་སྤུངས་པའི་སྣང་ཚུལ་ཡོད། ད་དུང་ཚོང་གཉེར་ཁང་ཁག་གཅིག་ལ་གོ་ཆོད་པའི་ཚོང་གཉེར་ལག་ཁྱེར་རམ་ཡང་ན་ཆོག་འཐུས་ལག་ཁྱེར་སྟོན་རྒྱུ་མེད། གནད་དོན་དེ་དག་ལ་དམིགས་ནས་མཉམ་འབྲེལ་ཞིབ་བཤེར་ཚོགས་ཆུང་གིས་རང་སར་བཅོས་སྒྲིག་བྱེད་དགོས་པའི་བརྡ་ཐོ་བཏང་སྟེ། འབྲེལ་ཡོད་འགན་འཁུར་བར་དུས་བཀག་ནང་བཅོས་སྒྲིག་བྱེད་དགོས་པ་མ་ཟད། རྗེས་སུ་བསྐྱར་ཞིབ་བྱེད་ཀྱི་ཡིན་ལུགས་བརྗོད་པ་རེད།

ད་ཐེངས་ཀྱི་བྱེད་སྒོའི་ནང་ཚན་པ་མང་པོས་གཞོགས་འདེགས་དམ་ཟབ་བྱས་པས་ལས་ཀའི་མཉམ་ཤུགས་ཆེན་པོ་ཆགས་ཡོད། མཐུན་སྒྲིལ་གྲོང་གསར་སྡེ་ཁུལ་གྱི་ལས་དོན་པས་ཁོངས་གཏོགས་ཁུལ་གྱི་གནས་ཚུལ་ལ་རྒྱུས་མངའ་ཡོད་པའི་ལེགས་ཆར་གཞིགས་ནས་ཞིབ་བཤེར་གྱི་གཙོ་གནད་དང་ལམ་ཐིག་གཏན་འཁེལ་བྱེད་རོགས་བྱས་ཡོད། ཉེན་དོན་ཁང་གི་མི་དམངས་ཉེན་རྟོག་པས་ས་གནས་ས་ཐོག་གི་སྒྲིག་ལམ་སྲུང་སྐྱོང་གི་འགན་ཁུར་ནས་བདེ་འཇགས་གནད་དོན་དང་འབྲེལ་བ་ཡོད་པའི་ཚོང་གཉེར་ཁང་ལ་བརྟག་དཔྱད་དང་ཐག་གཅོད་བྱས་ཡོད། ལྷ་ས་གྲོང་ཁྱེར་ཁྲེང་ཀོན་ཆུས་ཁྲོམ་ར་ལྟ་འདོམས་ཅུས་ཀྱི་ཁྲིམས་སྒྱུར་མི་སྣས་ཆེད་ལས་ཤེས་བྱར་གཞིཌ་ནས་གཉེར་སྐྱོང་གི་ཐོབ་ཐང་དང་བཟའ་བཅའི་བདེ་འཇགས་སོགས་ཀྱི་ཐད་ཞིབ་བཤེར་ནན་པོ་བྱས་ཡོད། སྡེ་ཚན་མང་པོས་མཉམ་དུ་ལས་དོན་སྤེལ་བས་ཞིབ་བཤེར་ལས་དོན་གྱི་ཕྱོགས་ཡོངས་རང་བཞིན་དང་ཕན་ནུས་རང་བཞིན་འགན་ལེན་ཐུབ་ཡོད།