མི་དམངས་མང་ཚོགས་ཀྱི“ལྕེ་ཐོག་གི་བདེ་འཇགས”ལ་འགན་ལེན་ཏན་ཏིག་བྱ་ཆེད། ཉེ་ཆར་གཞིས་རྩེ་གྲོང་ཁྱེར་མི་དམངས་ཞིབ་དཔྱོད་ཁང་གིས་དྲ་རྒྱའི་བཟའ་བཅའ་སོགས་གཙོ་གནད་ཁྱབ་ཁོངས་ལ་བཅོས་སྒྲིག་བྱ་རྒྱུ་འཇུག་སྒོར་བྱས་ཏེ། ཁོངས་གཏོགས་ཁུལ་གྱི“མོས་འདེམས”དང“ལྟོགས་བྱུང་ངམ”གྱི་དྲ་རྒྱའི་བཟའ་བཏུང་ཞབས་ཞུའི་ཕྱོགས་གསུམ་པའི་ལས་སྟེགས་གཉེར་སྐྱོང་ཚོང་ཁང་གིས“ལས་གཉེར་ཆོག་པའི་ལག་ཁྱེར”དང“བཟའ་བཅའ་ཚོང་གཉེར་ཆོག་པའི་ལག་ཁྱེར”སྤྱི་བསྒྲགས་བྱས་མིན་སོགས་ཀྱི་གནས་ཚུལ་ལ་ཆེད་དོན་ལྟ་སྐུལ་བྱས་པ་རེད།

ཞིབ་དཔྱོད་ཁང་གི་ལས་དོན་པས་ཞིབ་བཤེར་བྱེད་རིང་། “མོས་འདེམས”དང“ལྟོགས་བྱུང་ངམ”སོགས་དྲ་རྒྱའི་བཟའ་བཏུང་ཞབས་ཞུའི་ཕྱོགས་གསུམ་པའི་ལས་སྟེགས་གཉེར་སྐྱོང་ཚོང་ཁང་ཁག་ཅིག་གིས་གཏན་འབེབས་ལྟར“ལས་གཉེར་ཆོག་པའི་ལག་ཁྱེར”དང“བཟའ་བཅའ་ཚོང་གཉེར་ཆོག་པའི་ལག་ཁྱེར”སྤྱི་བསྒྲགས་བྱས་མེད་པ་ཤེས་རྗེས། འཕྲལ་དུ་བྱ་སྤྱོད་སྤེལ་བ་དང་། གྱོད་དོན་ལ་བརྟག་དཔྱད་བྱས་ཏེ་འབྲེལ་ཡོད་སྲིད་འཛིན་ལས་ཁུངས་ལ་གྲོས་མོལ་ཡི་གེ་བཏང་ནས་ཁྲིམས་བཞིན་ལྟ་སྐུལ་འགན་འཁྲི་སྒྲུབ་དགོས་པའི་བླང་བྱ་བཏོན་ཡོད།

ད་རེས་ཕྱོགས་ཡོངས་ནས་གྲལ་བཤེར་བྱས་པ་བརྒྱུད། “མོས་འདེམས”དྲ་རྒྱའི་བཟའ་བཏུང་གི་རྒྱུན་གཏན་ལས་གཉེར་ཚོང་ཁང་687ཡོད་པའི་ཁྲོད། “ལག་ཁྱེར་གཉིས”ལ་གནད་དོན་ཡོད་པའི་ཚོང་ཁང་33ཞིབ་བཤེར་ཐུབ་པ་དང་། ཚོང་ཁང་11ལ་ཞིབ་བཤེར་བྱས་ནས་ཆོག་མཆན་སྤྲད་པ། ཚོང་ཁང་22སྒོ་རྒྱག་དགོས་པའི་འདུན་ཞུ་བྱས་པ་དང་། “ལྟོགས་བྱུང་ངམ”དྲ་རྒྱའི་བཟའ་བཏུང་གི་རྒྱུན་གཏན་ལས་གཉེར་ཚོང་ཁང་89ཡོད་པའི་ཁྲོད། “ལག་ཁྱེར་གཉིས”ལ་གནད་དོན་ཡོད་པའི་ཚོང་ཁང་16ལ་ཞིབ་བཤེར་བྱས་པ་དང་། ཚོང་ཁང་16སྒོ་རྒྱག་དགོས་པའི་འདུན་ཞུ་བྱས་ཡོད། དེ་དང་ཆབས་ཅིག་ཁྲིམས་སྒྱུར་མི་སྣས“མོས་འདེམས”དང“ལྟོགས་བྱུང་ངམ”གྱི་བཟའ་བཏུང་དྲ་རྒྱའི་ལས་སྟེགས་ལ་སླད་ཕྱིན་དྲ་ཞུགས་ཚོང་ཁང་གི“ལག་ཁྱེར་གཉིས”དྲ་ཐོག་ཏུ་གཏོང་བའི་ལས་དོན་ལ་ཞིབ་བཤེར་ནན་པོ་བྱས་ཏེ། “ལག་ཁྱེར་གཉིས”ཆ་ཚང་ལ་ཞིབ་བཤེར་བྱས་རྗེས་གཞི་ནས་དྲ་ཐོག་ཏུ་གཏོང་དགོས་པ་དང་། དུས་བཀག་ནང་དྲ་ཞུགས་ཚོང་ཁང་གི“ལག་ཁྱེར་གཉིས”སྤྱི་བསྒྲགས་བྱ་རྒྱུར་གྲལ་བཤེར་དང་རྗེས་འདེད་ཐག་གཅོད་སོགས་ཀྱི་ལས་དོན་སྤེལ་ཏེ། གཏན་འབེབས་བཞིན“ལག་ཁྱེར་གཉིས”སྤྱི་བསྒྲགས་བྱས་མེད་པའི་ཚོང་ཁང་སྒོ་རྒྱག་དགོས་པའི་ཐག་གཅོད་བྱ་རྒྱུ་ཡིན་པའི་བླང་བྱའང་བཏོན་ཡོད།