ཆབ་མདོ་མཛོ་སྒང་རྫོང་མི་དམངས་ཁྲིམས་ཁང་གི་དམངས་དོན་ཁྲིམས་དཔོན་གྱིས་ཞིང་པ་ལས་མིའི་འགྱངས་ཆད་བྱུང་བའི་གླ་ཆ་ལེན་རོགས་བྱས་པ།
ཉེ་ཆར། ཆབ་མདོ་གྲོང་ཁྱེར་མཛོ་སྒང་རྫོང་མི་དམངས་ཁྲིམས་ཁང་གིས་ངལ་རྩོལ་གླ་ཆ་འདེད་ལེན་གྱི་གྱོད་གཞི་ཞིག་ཞིབ་གཅོད་བྱས་ཤིང་། ཞིང་པ་ལས་མིའི་ཚོགས་སྤྱིར་འགྱངས་ཆད་བྱུང་བའི་གླ་ཆ་དུས་ཐོག་ཏུ་ལེན་རོགས་བྱས་ནས། ཞིང་པ་ལས་མིའི་ཁྲིམས་མཐུན་ཁེ་དབང་སྲུང་སྐྱོང་ཏན་ཏིག་བྱས་པས་ཁྲིམས་ཁང་གི་ཁྲིམས་འཛིན་གྱིས་མི་དམངས་ལ་ཞབས་འདེགས་ཞུ་བའི་བརྩེ་སེམས་དང་འགན་འཁྲི་མངོན་པ་མ་ཟད། དོ་བདག་གི་བསྔགས་བརྗོད་ཆེན་པོ་ཐོབ་ཡོད།
2024ལོར་མཛོ་སྒང་རྫོང་གི་ལས་མི་75གསོལ་མགྲོན་ཁང་ཞིག་གི་མཛེས་བཟོའི་ལས་གྲྭའི་ནང་ཞུགས། ཕྱོགས་གཉིས་པོས་ངལ་རྩོལ་གྱི་གླ་ཆ་དེ་འཛིན་ཤོག་སྤྲོད་པའི་རྣམ་པའི་ཐོག་ནས་རྩིས་རྒྱག་རྒྱུའི་ཁ་ཆད་བྱས། ལས་གྲྭ་མཇུག་འགྲིལ་རྗེས། ལས་མི་ཚོས་འཛིན་ཤོག་ཁྱེར་ནས་འགན་གཙང་ལེན་མཁན་ལ་གླ་ཆ་སྤྲོད་དགོས་པའི་རེ་བ་བཏོན་མོད། འོན་ཀྱང་འགན་གཙང་ལེན་མཁན་གྱིས་རྒྱུ་མཚན་སྣ་ཚོགས་ལ་ཁ་གཡར་ནས་གཡོལ་ཐབས་ཁོ་ན་བྱས། རིམ་རྩིས་བརྒྱབ་ན་འགྱངས་ཆད་བྱུང་བའི་གླ་ཆ་སྒོར་ཁྲི་45ལྷག་ཙམ་ཟིན་ཡོད། ཞིང་པ་རྣམས་ཀྱིས་ཐེངས་མང་རེ་ཞུ་བྱས་ཀྱང་ཐག་གཅོད་མ་བྱས་པས་འཚོ་བར་དཀའ་ངལ་འཕྲད་ནས་ཐབས་ཟད་འུ་ཐུག་གིས་ཁྲིམས་ཁང་ལ་ཞུ་གཏུག་བརྒྱབ།
གྱོད་གཞི་བདག་སྤྲོད་བྱས་རྗེས། དམངས་དོན་ཁྲིམས་དཔོན་གྱིས་ཚད་མཐོའི་མཐོང་ཆེན་བྱས་ཏེ། མགྱོགས་མྱུར་ངང་གྱོད་སྒྲུབ་ཚོགས་པ་བཙུགས་ནས་ལྗང་མདོག་བགྲོད་ལམ་བཏོད་དེ་གྱོད་གཞི་དེ་སྔོན་ལ་ཐག་གཅོད་བྱས། གྱོད་སྒྲུབ་ཚོགས་པས་གྱོད་དོན་ལ་ཞིབ་འཇུག་གཏིང་ཟབ་བྱེད་པ་དང་། དཔང་རྟགས་འཚོལ་བསྡུ་ཧུར་ཐག་བྱེད་པ། གྱོད་གཞིའི་བརྒྱུད་རིམ་ཕྱོགས་ཡོངས་ནས་གསེད་བཀྲོལ་བྱེད་པ། འགན་གཙང་ལེན་མཁན་ལ་རང་འགུལ་ངང་འབྲེལ་བ་བྱེད་པ། ངང་རྒྱུད་རིང་པོས་བཅའ་ཁྲིམས་དང་གནས་ལུགས་ཤོད་པ་བཅས་བྱས་ཡོད། འོན་ཀྱང་འགན་གཙང་ལེན་མཁན་གྱི་རྣམ་འགྱུར་ངན་ལ་གཞོགས་འདེགས་བྱས་མེད། གནས་ཚུལ་དེར་དམིགས་ནས་ཁྲིམས་དཔོན་གྱིས་ཕྲལ་ཐག་ཆོད་པོས་བྱ་ཐབས་སྤྱད་དེ་འགན་གཙང་ལེན་མཁན་ཕྱོགས་ཀྱི་གོང་རིམ་གཙོ་གཉེར་སྡེ་ཚན་ལ་ཕྱོགས་མང་པོའི་ཐད་ནས་འབྲེལ་གཏུག་མཐུན་སྦྱོར་བྱས་ཏེ་ལས་ཀའི་མཉམ་ཤུགས་དང་བཅའ་ཁྲིམས་ཀྱི་ཟིལ་གནོན་ཆེན་པོ་ཆགས་པར་བྱས་ཡོད། འབད་བརྩོན་ལྷོད་མེད་བྱས་པ་བརྒྱུད། འགན་གཙང་ལེན་མཁན་ཕྱོགས་ཀྱིས་མཐར་གནད་དོན་གྱི་ཚབས་ཆེན་རང་བཞིན་ངོས་འཛིན་ཐུབ་ནས་འགྱངས་ཆད་བྱུང་བའི་གླ་ཆ་སྤྲོད་རྒྱུའི་མོས་མཐུན་བྱས་པ་མ་ཟད། ད་དུང་དུས་ཐོག་ཏུ་ལག་བསྟར་བྱས་པ་རེད།
གླ་ཆ་རྩིས་ཐོར་འབྱོར་རྗེས། ཁྲིམས་ཁང་གིས་མགྱོགས་མྱུར་ལས་མི་སྒྲིག་འཛུགས་བྱས་ནས་གླ་ཆ་སྤྲད་པ་རེད། གླ་ཆ་སྤྲོད་ཡུལ་དུ་ཞིང་པ་ལས་མིའི་ངོ་གདོང་ལས་དགའ་བའི་འཛུམ་མདངས་འཕྱུར་ཞིང་། ཁྲིམས་དཔོན་ལ་དཀར་གཙང་མཇལ་དར་ཕུལ་ནས་ཁྲིམས་དཔོན་གྱིས་དཀའ་སྤྱད་འབད་བརྩོན་གནང་བར་རྙིང་ཐག་པ་ནས་ཐུགས་རྗེ་ཆེ་ཞུས་པ་རེད།