ཆ་འཕྲིན་གང་དག་ནི་བཅའ་ཁྲིམས་ཀྱིས་སྲུང་སྐྱོང་བྱེད་པའི་མི་སྒེར་གྱི་ཆ་འཕྲིན་ཁོངས་སུ་གཏོགས་སམ།

དོན་ཚན་ཆིག་སྟོང་དང་སོ་བཞི་པ། རང་བྱུང་མིའི་མི་སྒེར་གྱི་ཆ་འཕྲིན་ལ་བཅའ་ཁྲིམས་ཀྱིས་སྲུང་སྐྱོབ་བྱེད་པ་ཡིན།

མི་སྒེར་གྱི་ཆ་འཕྲིན་ཞེས་པ་ནི་གློག་རྡུལ་ལམ་རྣམ་པ་གཞན་དག་གི་ལམ་ནས་ཟིན་ཐོར་བཀོད་པའི་ཁེར་རྐྱང་ངམ་ཆ་འཕྲིན་གཞན་དང་བསྡེབས་པའི་ཐོག་ནས་ངོས་འཛིན་བྱེད་ཐུབ་པའི་རང་བྱུང་མི་ངེས་ཅན་གྱི་ཆ་འཕྲིན་སྣ་ཚོགས་ལ་ཟེར། དེའི་ཁོངས་སུ་རང་བྱུང་མིའི་རུས་མིང་དང་། སྐྱེས་སྐར། ཐོབ་ཐང་ལག་ཁྱེར་ཨང་གྲངས། སྐྱེ་དངོས་ངོས་འཛིན་ཆ་འཕྲིན། གཞིས་གནས། ཁ་པར་ཨང་གྲངས། གློག་རྡུལ་ཡིག་སྒམ་གྱི་ས་གནས། བདེ་ཐང་གི་ཆ་འཕྲིན། འགྲོ་སྡོད་ཀྱི་ཆ་འཕྲིན་སོགས་ཚུད་ཡོད། མི་སྒེར་གྱི་ཆ་འཕྲིན་ལས་གསང་བའི་ཆ་འཕྲིན་ལ་སྒེར་གསང་གི་ཁེ་དབང་སྐོར་གྱི་འབྲེལ་ཡོད་གཏན་འབེབས་སྤྱད་འཐུས། གཏན་འབེབས་བྱས་མེད་ན་མི་སྒེར་གྱི་ཆ་འཕྲིན་སྲུང་སྐྱོབ་བྱེད་ཕྱོགས་སྐོར་གྱི་གཏན་འབེབས་སྤྱད་འཐུས།

ཁྲིམས་ལུགས་འཆད་སྟེགས།

ཆ་འཕྲིན་ལག་རྩལ་ཟམ་མི་ཆད་པར་འཕེལ་རྒྱས་འགྲོ་བ་དང་དེ་བཞིན་མི་སྒེར་གྱི་ཆ་འཕྲིན་ལས་སྣོན་བྱེད་སྟངས་གྲངས་འཛིན་ཅན་དུ་འགྱུར་ལྡོག་འགྲོ་བ་དང་བསྟུན་ནས་མི་སྒེར་གྱི་ཆ་འཕྲིན་ལ་གནོད་འཚེ་ཕོག་པའི་ཉེན་ཁ་ཇེ་ཆེར་འགྲོ་བཞིན་ཡོད་ཅིང་ལག་ལེན་ཁྲོད་མི་སྒེར་གྱི་ཆ་འཕྲིན་ཕྱིར་གྱར་བའི་སྣང་ཚུལ་ཚབས་ ཆེན་པོ་ཡོད། དེར་དམིགས་ནས《དམངས་དོན་ཁྲིམས་གཞུང》ནང་མི་སྒེར་གྱི་ཆ་འཕྲིན་ལ་གཞིགས་ཏེ་གཏན་འབེབས་ཞིབ་ཕྲ་བཟོས་ནས་མི་སྒེར་གྱི་ཆ་འཕྲིན་སྲུང་སྐྱོབ་བྱེད་ཤུགས་ཆེ་རུ་བཏང་ཡོད། རང་བྱུང་མིའི་རུས་མིང་དང་། སྐྱེས་སྐར། ཐོབ་ཐང་ལག་ཁྱེར་ཨང་གྲངས། སྐྱེ་དངོས་ངོས་འཛིན་ཆ་འཕྲིན། གཞིས་གནས། ཁ་པར་ཨང་གྲངས། གློག་རྡུལ་ཡིག་སྒམ་གྱི་ས་གནས། བདེ་ཐང་གི་ཆ་འཕྲིན། འགྲོ་སྡོད་ཀྱི་ཆ་འཕྲིན་སོགས་ཚང་མ་མི་སྒེར་གྱི་ཆ་འཕྲིན་ཁོངས་སུ་གཏོགས་ཡོད། མི་སྒེར་གྱི་ཆ་འཕྲིན་ལ་མི་སྒེར་གྱི་གསང་བའི་ཆ་འཕྲིན་དང་གསང་བ་མིན་པའི་ཆ་འཕྲིན་དབྱེ་བ་དང་གསང་བའི་ཆ་འཕྲིན་སྐོར་ལ་ད་དུང་སྒེར་གསང་ཁེ་དབང་སྲུང་སྐྱོབ་སྐོར་གྱི་གཏན་འབེབས་སྤྱད་འཐུས།

རང་བྱུང་མིའི་མི་སྒེར་གྱི་ཆ་འཕྲིན་ལས་སྣོན་བྱེད་པར་བཅའ་ཁྲིམས་ཀྱི་ཚོད་འཛིན་གང་དག་ཡོད་དམ།

དོན་ཚན་ཆིག་སྟོང་དང་སོ་ལྔ་པ། མི་སྒེར་གྱི་ཆ་འཕྲིན་ལས་སྣོན་བྱས་ཚེ་ཁྲིམས་མཐུན་དང་། ལུགས་མཐུན། དགོས་ངེས་བཅས་ཀྱི་རྩ་དོན་ལ་བརྩི་སྲུང་ཞུ་དགོས་ཤིང་། ལས་སྣོན་ཐལ་དྲགས་མི་ཆོག་པར་གཤམ་གསལ་གྱི་ཆ་རྐྱེན་དང་མཐུན་དགོས།

(གཅིག) རང་བྱུང་མི་དེའམ་དེའི་ལྟ་སྐྱོང་བའི་མོས་མཐུན་ཐོབ་དགོས། ཡིན་ནའང་བཅའ་ཁྲིམས་དང་སྲིད་འཛིན་ཁྲིམས་སྲོལ་གྱིས་ལོགས་སུ་གཏན་འབེབས་བྱས་ཡོད་པ་འདིའི་ཁོངས་སུ་མི་ཚུད།

(གཉིས) ཆ་འཕྲིན་ལས་སྣོན་བྱེད་པའི་སྒྲིག་སྲོལ་ཡོངས་བསྒྲགས་བྱེད་དགོས།

(གསུམ) ཆ་འཕྲིན་ལས་སྣོན་བྱེད་པའི་དམིགས་ཡུལ་དང་། བྱེད་སྟངས། ཁྱབ་ཁོངས་བཅས་གསལ་སྟོན་བྱེད་དགོས།

(བཞི) བཅའ་ཁྲིམས་དང་སྲིད་འཛིན་ཁྲིམས་སྲོལ་གྱིས་གཏན་འབེབས་དང་ཕྱོགས་གཉིས་ཀའི་གྲོས་དན་དང་མི་འགལ་བ། མི་སྒེར་གྱི་ཆ་འཕྲིན་ལས་སྣོན་བྱེད་པར་མི་སྒེར་གྱི་ཆ་འཕྲིན་འཚོལ་སྡུད་དང་། ཉར་ཚགས། བཀོལ་སྤྱོད། ལས་སྣོན། བརྒྱུད་འདྲེན། མཁོ་སྤྲོད། ཡོངས་བསྒྲགས་སོགས་ཚུད་ཡོད།

ཁྲིམས་ལུགས་འཆད་སྟེགས།

དྲ་སྦྲེལ་ཐོན་ལས་འཕེལ་རྒྱས་འགྲོ་བ་དང་ལག་ཐོགས་ཁ་པར་ཁྱབ་གདལ་འགྲོ་བ་དང་དུས་མཚུངས་མི་ཚང་མ་སྒུལ་བདེའི་མཉེན་ཆས་སྤྱོད་རྒྱུ་དང་ཁ་བྲལ་ཐབས་མེད། མཉེན་ཆས་ནང་མི་སྒེར་གྱི་ཆ་འཕྲིན་འཚོལ་སྡུད་ཐལ་དྲགས་པ་དང་འབྲེལ་ཁྲིམས་འགལ་གྱི་བཀོལ་སྤྱོད་བྱེད་པའི་གནས་ཚུལ་ཡང་ཡང་ཐོན་བཞིན་ཡོད། དེར་བརྟེན《དམངས་དོན་ཁྲིམས་གཞུང》ནང་རང་བྱུང་མིའི་མི་སྒེར་གྱི་ཆ་འཕྲིན་ལས་སྣོན་བྱེད་པར་གཏན་འབེབས་བྱས་ཡོད། མི་སྒེར་གྱི་ཆ་འཕྲིན་ཐག་གཅོད་བྱེད་པའི་ནང་མི་སྒེར་གྱི་ཆ་འཕྲིན་འཚོལ་སྡུད་དང་། ཉར་ཚགས། བཀོལ་སྤྱོད། ལས་སྣོན། བརྒྱུད་འདྲེན། མཁོ་སྤྲོད། ཡོངས་བསྒྲགས་སོགས་ཚུད་ཡོད། བཅའ་ཁྲིམས་ནང་ཁྲིམས་མཐུན་དང་། ལུགས་མཐུན། དགོས་ངེས་བཅས་ཀྱི་རྩ་དོན་ལ་བརྩི་སྲུང་ཞུས་ཚེ་གཞི་ནས་མི་སྒེར་གྱི་ཆ་འཕྲིན་ལས་སྣོན་བྱེད་ཆོག་པའི་གཏན་འབེབས་བྱས་ཡོད། མི་སྒེར་གྱི་ཆ་འཕྲིན་ལས་སྣོན་བྱེད་པར་བཅའ་ཁྲིམས་ཀྱིས་གཏན་འབེབས་གཞན་དག་བྱས་པ་ཕུད་ངེས་པར་དུ་རང་བྱུང་མི་དེའམ་དེའི་ལྟ་སྐྱོང་བའི་མོས་མཐུན་ཐོབ་དགོས། གཞན་ཡང་རང་བྱུང་མིའི་ཆ་འཕྲིན་ལས་སྣོན་བྱེད་སྐབས་ད་དུང་ཆ་འཕྲིན་ལས་སྣོན་བྱེད་པའི་སྒྲིག་སྲོལ་ཡོངས་བསྒྲགས་བྱེད་དགོས་པ་དང་། ཆ་འཕྲིན་གྱི་དམིགས་ཡུལ་དང་། བྱེད་སྟངས། ཁྱབ་ཁོངས་བཅས་གསལ་སྟོན་བྱེད་དགོས་པ་མ་ཟད་བཅའ་ཁྲིམས་དང་སྲིད་འཛིན་ཁྲིམས་སྲོལ་གྱིས་གཏན་འབེབས་དང་ཕྱོགས་གཉིས་ཀའི་གྲོས་དན་དང་མི་འགལ་བ་བྱེད་དགོས།

ཆ་འཕྲིན་ལས་སྣོན་བྱེད་མཁན་གྱིས་ཁོ་རང་གིས་འཚོལ་སྡུད་དང་ཉར་ཚགས་བྱས་པའི་མི་སྒེར་གྱི་ཆ་འཕྲིན་གཞན་ལ་འདོན་སྤྲོད་བྱེད་ཆོག་གམ།

དོན་ཚན་ཆིག་སྟོང་དང་སོ་བརྒྱད་པ། ཆ་འཕྲིན་ལས་སྣོན་བྱེད་མིས་ཁོ་རང་གིས་འཚོལ་སྡུད་དང་ཉར་ཚགས་བྱས་པའི་མི་སྒེར་གྱི་ཆ་འཕྲིན་ཕྱིར་བསྒྲགས་སམ་གཡོ་བཅོས་བྱས་མི་ཆོག རང་བྱུང་མིའི་མོས་མཐུན་མ་བྱུང་ཚེ་མི་གཞན་ལ་ཁྲིམས་འགལ་གྱིས་དེའི་ཆ་འཕྲིན་འདོན་སྤྲོད་བྱས་མི་ཆོག ཡིན་ནའང་ལས་སྣོན་བྱས་པ་བརྒྱུད་མི་སྒེར་ངེས་ཅན་ཤིག་ཏུ་ངོས་འཛིན་བྱེད་མི་ཐུབ་ལ་སླར་གསོའང་བྱེད་མི་ཐུབ་པ་འདིའི་ཁོངས་སུ་མི་ཚུད།

ཆ་འཕྲིན་ལས་སྣོན་བྱེད་མིས་ལག་རྩལ་གྱི་བྱེད་ཐབས་དང་ཉེར་མཁོའི་བྱེད་ཐབས་གཞན་དག་སྤྱད་དེ་ཁོ་རང་གིས་འཚོལ་སྡུད་དང་ཉར་ཚགས་བྱས་པའི་མི་སྒེར་གྱི་ཆ་འཕྲིན་གྱི་བདེ་འཇགས་ཁག་ཐེག་བྱེད་དགོས་པ་དང་། ཆ་འཕྲིན་ཕྱིར་བསྒྲགས་དང་། གཡོ་བཅོས། བོར་བརླག་བཅས་འབྱུང་བ་བཀག་འགོག་བྱེད་དགོས། མི་སྒེར་གྱི་ཆ་འཕྲིན་ཕྱིར་བསྒྲགས་དང་། གཡོ་བཅོས། བོར་བརླག་བཅས་བྱུང་བའམ་འབྱུང་སྲིད་པ་ཡིན་ན་དུས་ཐོག་ཏུ་གསབ་བཅོས་བྱེད་ཐབས་སྤྱོད་དགོས་པ་དང་། གཏན་འབེབས་ལྟར་རང་བྱུང་མི་ལ་གོ་བརྡ་སྤྲོད་དགོས་པ་དང་སྦྲགས་འབྲེལ་ཡོད་གཙོ་སྐྱོང་སྡེ་ཁག་ལ་སྙན་སེང་ཡང་ཞུ་དགོས།

ཁྲིམས་ལུགས་འཆད་སྟེགས།

ཆ་འཕྲིན་ལས་སྣོན་བྱེད་མིར་ཆ་འཕྲིན་ཐོབ་རྗེས་དེས་འཚོལ་སྡུད་དང་ཉར་ཚགས་བྱས་པའི་མི་སྒེར་གྱི་ཆ་འཕྲིན་ཕྱིར་བསྒྲགས་དང་གཡོ་བཅོས་བྱེད་མི་རུང་།

འཚོལ་སྡུད་བྱ་ཡུལ་གྱི་མོས་མཐུན་མ་ཐོབ་པར་གཞན་ལ་ཁྲིམས་འགལ་གྱིས་མི་སྒེར་གྱི་ཆ་འཕྲིན་འདོན་སྤྲོད་བྱེད་མི་ཆོག ཚན་རྩལ་ཡར་ཐོན་དང་འཕེལ་རྒྱས་འགྲོ་བ་དང་སྦྲགས་གྲངས་གཞི་འཚོལ་སྡུད་དང་མཉམ་སྤྱོད་བྱེད་སྟངས་ལ་འགྱུར་ལྡོག་འགྲོ་བཞིན་ཡོད་པ་དང་གྲངས་གཞི་ནི་ཐོན་ལས་ཤིག་གི་ཐོག་ནས་དབྱར་མཚོ་རྒྱས་པ་ལྟར་འཕེལ་རྒྱས་འགྲོ་གི་ཡོད། རྒྱལ་ཁབ་ཀྱིས་གྲངས་གཞི་གསར་སྤེལ་དང་། བཀོལ་སྤྱོད། མཉམ་སྤྱོད་བཅས་བྱེད་པར་སྐུལ་མ་གཏོང་དགོས་ལ་གྲངས་གཞིའི་ཐོན་ལས་འཕེལ་རྒྱས་འགྲོ་བར་སྐུལ་འདེད་གཏོང་སྐབས་མི་སྒེར་གྱི་ཆ་འཕྲིན་སྲུང་སྐྱོབ་བྱེད་རྒྱུར་ཡང་མཐོང་ཆེན་བྱས་ཏེ་གྲངས་གཞི་མཉམ་སྤྱོད་དང་མི་སྒེར་གྱི་ཆ་འཕྲིན་གྱི་ཁེ་ཕན་སྲུང་སྐྱོབ་བྱེད་པའི་དབར་དོ་སྙོམས་ཡོང་བར་བྱེད་དགོས། དེར་བརྟེན་བཅའ་ཁྲིམས་ནང་ཆ་འཕྲིན་ལས་སྣོན་བྱེད་མིས་མི་སྒེར་གྱི་ཆ་འཕྲིན་ལས་སྣོན་བྱས་པ་བརྒྱུད་མི་སྒེར་ངེས་ཅན་ཞིག་ཏུ་ངོས་འཛིན་བྱེད་མི་ཐུབ་ལ་སླར་གསོ་ཡང་བྱེད་མི་ཐུབ་པའི་གནས་ཚུལ་འོག་འཚོལ་སྡུད་བྱ་ཡུལ་གྱི་མོས་མཐུན་མ་ཐོབ་ཀྱང་གཞན་ལ་འདོན་སྤྲོད་བྱེད་ཆོག་པའི་གཏན་འབེབས་བྱས་ཡོད།