5110ཏེ། འཐབ་ཕྱོགས་དང་པོའི་མི་དམངས་ཉེན་རྟོག་པའི“རིམ་འདས་གྲངས་གཞི་ཆེ་མོ”
འཐབ་ཕྱོགས་དང་པོའི་མི་དམངས་ཉེན་རྟོག་པས་ཉེན་དོན་སྒྲུབ་སྐབས་དཀའ་ངལ་དང་གནད་དོན་མང་པོ་འཕྲད་སྲིད། སྐབས་དེར་ཁོང་ཚོས་འཕྲལ་མར“5110”ལ་ཁ་པར་རྒྱག་གི་ཡོད་པ་དེ་ནི་ཉེན་རྟོག་རུ་ཁག་གི་ཞབས་ཞུའི་ཆེད་སྤྱོད་ཁ་པར་ཡིན་ཞིང་། གཞི་རིམ་གྱི་འཐབ་ཕྱོཌ་དང་པོའི་མི་དམངས་ཉེན་རྟོག་པར་གྲངས་གཞིའི་འདེགས་སྐྱོར་བྱེད་ཀྱི་ཡོད།
པར་འདི་གསུམ་ནི་གཞིས་རྩེ་གྲོང་ཁྱེར་སྤྱི་བདེ་ཅུས་གྲངས་གཞི་ཆེ་མོའི་མཉམ་ལས་དམག་འཐབ་ལྟེ་གནས་ཀྱི་མི་དམངས་ཉེན་རྟོག་པས་ལས་ཀ་བྱེད་བཞིན་པ།
གཞི་རིམ་གྱི་འཐབ་ཕྱོགས་དང་པོའི་མི་དམངས་ཉེན་རྟོག་པར་རྒྱབ་རྟེན་མཁོ་འདོན་བྱས་པ།
འདི་ནི་གཞིས་རྩེ་གྲོང་ཁྱེར་སྤྱི་བདེ་ཅུས་གྲངས་གཞི་ཆེ་མོའི་མཉམ་ལས་དམག་འཐབ་ལྟེ་གནས་ལ་གོས་དར་ཕུལ་བ། (པར་རིས་འདི་དག་གཞིས་རྩེ་གྲོང་ཁྱེར་སྤྱི་བདེ་ཅུས་ཀྱིས་མཁོ་འདོན་བྱས)
གཞི་རིམ་གྱི་འཐབ་ཕྱོགས་དང་པོའི་མི་དམངས་ཉེན་རྟོག་པར་རྒྱབ་རྟེན་མཁོ་འདོན་བྱས་པ།
“5110”སྐོར་གླེང་སྐབས་སྒང་ཏོག་མངགས་གཏོང་ཁང་གི་མི་དམངས་ཉེན་རྟོག་པ་ཉི་མ་ཚེ་རིང་ལ་མྱོང་ཚོར་ཟབ་མོ་ཡོད་དེ། ཁོང་གིས་གསར་འགོད་པར་དེ་སྔ་གཞི་རིམ་གྱི་འཐབ་ཕྱོགས་དང་པོའི་མི་དམངས་ཉེན་རྟོག་པས་གྱོད་གཞི་སྣ་ཚོགས་ཐག་གཅོད་དང་རོགས་རམ་ཞུ་སྐབས་གཞི་རིམ་གྱི་དབང་ཆ་ལས་བརྒལ་བའི་གནས་ཚུལ་འཕྲད་ནས། འབྲེལ་ཡོད་ལག་རྩལ་གྱི་རྒྱབ་སྐྱོར་རེ་ཞུ་བྱེད་པར་རིམ་པ་མང་པོའི་ཞིབ་མཆན་དགོས་པས་རྙོག་དྲ་ཆེན་པོ་ཡོད་ལ་དུས་ཚོད་འཕྲོ་བརླག་ཀྱང་འགྲོ་ཡི་ཡོད། ཉེན་རྟོག་པ་གཞན་དག་དང་འབྲེལ་གཏུག་བྱེད་སྐབས་སྡེ་ཚན་དབར་བཀག་རྒྱ་ཡོད་པ་དང་། ཆ་འཕྲིན་ཕན་ཚུན་སྤེལ་རེས་མི་བྱེད་པ། ལས་ཆོད་ཀྱང་མཐོ་པོ་མེད་པས། གནས་ཚུལ་དེ་དག་ཐོག་མཐའ་བར་གསུམ་དུ་གཞི་རིམ་གྱི་འཐབ་ཕྱོགས་དང་པོའི་མི་དམངས་ཉེན་རྟོག་པའི་དཀའ་ངལ་ཆེ་ཤོས་ཤིག་རེད་ཅེས་བཤད།
“‘5110’ནི་ང་ཚོའི་གཞི་རིམ་འཐབ་ཕྱོགས་དང་པོའི་མི་དམངས་ཉེན་རྟོག་པའི་རྒྱབ་རྟེན་ཞིག་ཡིན། དེས་ང་ཚོས་སྤྱི་ཚོགས་བདེ་འཇགས་ལ་སྲུང་སྐྱོང་དང་ཁྲིམས་འགལ་ཉེས་གསོག་ལ་རྡུང་རྡེག་གཏོང་བར་དོན་དངོས་དང་མཐུན་པའི་སྒོ་ནས་རྣམ་པ་ཀུན་དང་། གནས་ནས་གནས། ལྷན་འགྲོགས་རྣམ་པ་བཅས་ཀྱི་མི་ཐབས་ཀྱི་གྲངས་གཞིའི་ཞབས་ཞུའི་འདེགས་སྐྱོར་མཁོ་འདོན་བྱས་ཏེ། སྲོལ་རྒྱུན་གྱི་ལས་ཀའི་བྱེད་ཐབས་དང་ཐབས་ལམ་ལ་འགྱུར་ལྡོག་བཏང་བས། ང་ཚོས་སྔར་བས་ནུས་ཆེ་དང་གནད་སྨིན་གྱི་སྒོ་ནས་རང་ཉིད་ཀྱི་འགན་འཁྲི་སྒྲུབ་ཐུབ་སྟེ། མིང་དོན་མཚུངས་པའི་ང་ཚོའི་110ཞིག་རེད”ཅེས་ཉི་མ་ཚེ་རིང་གིས་བཤད།
གཞི་རིམ་གྱི་འཐབ་ཕྱོགས་དང་པོའི་མི་དམངས་ཉེན་རྟོག་པར་རྣམ་པ་ཀུན་ཏུ་གྲངས་གཞིའི་འདེགས་སྐྱོར་མཁོ་འདོན་བྱས་པ།
“ཁམས་བཟང་། འདི་ནི‘5110’ཡིན། ཁྱེད་ལ་རོགས་པ་གང་ཞིག་བྱེད་དགོས”གཞིས་རྩེ་གྲོང་ཁྱེར་སྤྱི་བདེ་ཅུས་ཀྱི་གྲངས་གཞི་ཆེ་མོའི་མཉམ་ལས་དམག་འཐབ་ལྟེ་གནས(གཤམ་དུ་ལྟེ་གནས་ཞེས་བསྡུ་རྒྱུ)སུ་ཐད་སྦྲེལ་ཁ་པར་གཅིག་རྗེས་གཉིས་མཐུད་ངང་འབྱོར་བ་དང་། དེ་ནི་གཞིས་རྩེ་སྤྱི་བདེ་ལས་ཁུངས་ཀྱི་ཞབས་ཞུའི་ཆེད་སྤྱོད་ཁ་པར་ཡིན་ལ། གཞི་རིམ་གྱི་འཐབ་ཕྱོགས་དང་པོའི་མི་དམངས་ཉེན་རྟོག་པར“གནས་ནས་གནས་དང་། ལྷན་འགྲོགས་རྣམ་པ། རྣམ་པ་ཀུན་ཏུ”བཅས་ཀྱི་གྲངས་གཞིའི་འདེགས་སྐྱོར་མཁོ་འདོན་བྱེད་ཀྱི་ཡོད། གཞི་རིམ་གྱི་འཐབ་ཕྱོགས་དང་པོའི་མི་དམངས་ཉེན་རྟོག་པས“5110”ལ་ཁ་པར་བརྒྱབ་ནས་རོགས་སྐྱོབ་རེ་ཞུ་བྱེད་སྐབས། ལྟེ་གནས་ཀྱི་མི་དམངས་ཉེན་རྟོག་པས་ཁོང་གི་ཐོབ་ཐང་བདེན་མིན་བཤེར་རྗེས་དུས་ཐོག་དང་། སྟབས་བདེ་གོ་ཆོད། གནད་སྨིན་འདེགས་སྐྱོར་བཅས་ཀྱི་སྒོ་ནས་རྣམ་པ་ཀུན་ཏུ་མི་ཐབས་གྲངས་གཞིའི་རོགས་སྐྱོར་གྱི་ཞབས་འདེགས་ཞུ་ཡི་ཡོད།
2024ལོའི་ཟླ་10ཚེས་17ཉིན། “5110”ལ་གཞིས་རྩེ་གྲོང་ཁྱེར་གྲོ་མོ་རྫོང་སྤྱི་བདེ་ཅུས་ཀྱི་ཁ་པར་འབྱོར་ནས་ཉེན་རྟོག་པས་ཁ་བསླུས་གྱོད་གཞི་ཞིག་གི་དོགས་ཡོད་མི་སྣའི་འབྲེལ་ཡོད་ཆ་འཕྲིན་འཚོལ་རོགས་ཞུས་པ་རེད། ལྟེ་གནས་ཀྱི་མི་དམངས་ཉེན་རྟོག་པས་འཕྲལ་མར་དོགས་ཡོད་མི་སྣའི་ཆ་འཕྲིན་བཙལ་རྗེས་དོགས་ཡོད་མི་སྣ་དེ་གཞིས་རྩེ་གྲོང་ཁྱེར་བསམ་གྲུབ་རྩེ་ཆུས་ཀྱི་ལམ་མདོ་ཞིག་ཏུ་ཡོད་པ་ཤེས་རྟོགས་བྱུང་བ་དང་། ཆུ་ཚོད་གཅིག་ལྷག་ཙམ་ལས་མ་འགོར་བར་དོགས་ཡོད་མི་སྣ་འཛིན་བཟུང་བྱས་པ་རེད།
གྱོད་གཞི་རྩད་གཅོད་བྱེད་པ་ཕུད་མང་ཚོགས་ལ་མགྱོགས་མྱུར་རོགས་རམ་བྱེད་པ་དང་དཀའ་ངལ་ཐག་གཅོད་བྱ་རྒྱུ་དེའང“5110”གྱི་རྒྱུན་གཏན་གྱི་ལས་ཀ་རེད།
སྤུས་ཚད་ཞིབ་བཤེར་ལས་གནས་ཀྱི་བརྒྱུད་རིམ་ཧྲིལ་པོའི་ལྟ་སྐུལ་ཞིབ་བཤེར་ལས་གྲངས་གཞིའི་བདེ་འཇགས་ལ་སྲུང་སྐྱོང་བྱས་པ།
གྲངས་གཞི་ཆེ་མོའི་མཉམ་ལས་དམག་འཐབ་ལྟེ་གནས་ཀྱི་མི་དམངས་ཉེན་རྟོག་པ་ཚེ་རིང་དོན་གྲུབ་ཀྱིས། གྲངས་གཞི་ཆེ་མོའི་མཉམ་ལས་དམག་འཐབ་ལྟེ་གནས་ནི་གཞིས་རྩེ་གྲོང་ཁྱེར་སྤྱི་བདེ་ཅུས་ཀྱིས་ཉེན་རྟོག་གི་སྟོབས་ཤུགས་གཅིག་སྡུད་དང་། ཉེན་དོན་ལས་སྟེགས་སྣ་ཚོགས་བསྡུ་སྒྲིལ། གྲངས་གཞིའི་ཐོན་ཁུངས་བསྡུ་སྒྲིལ། ལག་རྩལ་བྱེད་ཐབས་བསྡུ་སྒྲིལ་བཅས་ཀྱི་བྱ་ཐབས་ཡག་ཤོས་ཡིན་པས། གཞིས་རྩེ་གྲོང་ཁྱེར་སྤྱི་བདེ་ཁོངས་གཏོགས་ཀྱི་ནུས་པ་ཆེ་ཤོས་འཐབ་ཕྱོགས་དང་པོར་གཏོང་ཐུབ་སྟེ། འཐབ་ཕྱོགས་དང་པོའི་མི་དམངས་ཉེན་རྟོག་པའི“རིམ་འདས་གྲངས་གཞི་ཆེ་མོ”ཞིག་རེད་ཅེས་བཤད།
“ང་ནི་སྤུས་ཚད་ཞིབ་བཤེར་ལས་གནས་ཀྱི་ལས་མི་ཞིག་ཡིན། སྤུས་ཚད་ཞིབ་བཤེར་ལས་གནས་ནི་ང་ཚོའི་གྲངས་གཞི་ཆེ་མོའི་མཉམ་ལས་དམག་འཐབ་ལྟེ་གནས་ཀྱི་བརྒྱུད་རིམ་ཧྲིལ་པོའི་གྲངས་གཞིའི་བདེ་འཇགས་སྲུང་སྐྱོང་བྱེད་པའི་འགོག་སྲུང་འཛིང་རགས་ཤིག་ཡིན། ང་ཚོས་ལྟེ་གནས་ཀྱི་བརྒྱུད་རིམ་ཧྲིལ་པོའི་ལྟ་སྐུལ་ཞིབ་བཤེར་ནང་ཞུགས་ནས་ལྟེ་གནས་ཀྱིས་གཞི་རིམ་གྱི་འཐབ་ཕྱོགས་དང་པོའི་ཚན་པ་ཁག་ལ་གཞོགས་འདེགས་སྒོས་འདྲི་རྩད་བྱས་པའི་གྲངས་གཞི་ཚང་མ་བདེ་འཇགས་དང་། བློས་འགེལ། ཡང་དག་བཅས་ཡིན་པའི་འགན་ལེན་བྱེད་པ་ཡིན། ལྟེ་གནས་ཀྱི་མི་སྣས་གྲངས་གཞིའི་ཞབས་ཞུའི་སྒྲིག་འགལ་ཁྲིམས་འགལ་གྱི་གནས་ཚུལ་གཏན་འགོག་བྱེད་དགོས་ལ། གལ་ཏེ་གནས་ཚུལ་དེ་རིགས་ཐོན་ཚེ་དེ་མཚུངས་ཀྱི་འགན་འཁྲི་བདའ་འདེད་གཏོང་གི་ཡོད”ཅེས་ཚེ་རིང་དོན་གྲུབ་ཀྱིས་བཤད།