ཉེ་ཆར། གསར་འགོད་པར་རང་སྐྱོང་ལྗོངས་སྤྱི་བདེ་ཐིང་ནས་ཤེས་རྟོགས་བྱུང་བར། 2024ལོར་ལྗོངས་ཡོངས་ཀྱི་རིམ་ཁག་དུག་འགོག་སྡེ་ཚན་གྱིས་མཐོ་ས་ནས་སྐུལ་འདེད་མཐའ་འཁྱོངས་བཏང་ནས། དུག་འགོག་གི་འབྱུང་རྩ་གཙང་བཟོའི་བྱ་སྤྱོད་ལ་སྐུལ་འདེད་གཏིང་ཟབ་གཏོང་བ་དང་། དུག་འགོག་དྲིལ་བསྒྲགས་དང་སློབ་གསོ་གསར་གཏོད་ངང་སྤེལ་བ། དུག་འཐེན་མཁན་ལ་དོ་དམ་རོགས་ཁྲིད་བྱེད་ཤུགས་ཆེ་རུ་གཏོང་བ། དུག་རྫས་བཟོ་རྫས་ལ་དོ་དམ་ཚོད་འཛིན་བྱེད་ཤུགས་ཆེ་རུ་གཏོང་བ་བཅས་བྱས་པས། ལྗོངས་ཡོངས་ཀྱི་དུག་འགོག་ལས་དོན་ལ་གྲུབ་འབྲས་མངོན་གསལ་དོད་པོ་ཐོབ་ཡོད།

ངོ་སྤྲོད་བྱས་པར་གཞིགས་ན། 2024ལོར་ལྗོངས་ཡོངས་ནས་དུག་རྫས་དང་འབྲེལ་བའི་གྱོད་གཞི་64རྩད་ཆོད་པ་དང་། ཁྲིམས་འགལ་ཉེས་གསོག་དོགས་ཅན་24བཟུང་བ། དུག་རྫས་སྣ་ཚོགས་སྤྱི་རྒྱ་8.2ལག་ཏུ་ཐེབས་པ། རི་སྐྱེས་དུག་རྫས་འབྱུང་གཞིའི་དུག་ཤིང་སྡོང་རྐང་ཁྲི་3.8ལྷག་ཙམ་མེད་པར་བཟོས་པ། དུག་རྫས་དང་འབྲེལ་བའི་དྲ་ཐོག་ཏུ་ཡོངས་བསྒྲགས་བྱས་པའི་བྲོས་བྱོལ་བ་7བཟུང་བ་བཅས་བྱས་ཡོད།

2024ལོར། དུག་འགོག་དྲིལ་བསྒྲགས་སློབ་གསོའི་བྱེད་སྒོ་ཁག་ཐེངས་1500ལྷག་ཙམ་སྒྲིག་འཛུགས་བྱས་ནས་སྤེལ་བ་དང་། དུག་འགོག་དྲིལ་བསྒྲགས་དཔྱད་ཡིག་སྣ་ཚོགས་ཁྲི་50ལྷག་ཙམ་སྤྲད་པ། དྲ་ཐོག་ཏུ་དུག་འགོག་ཆ་འཕྲིན་སྣ་ཚོགས་700ལྷག་ཙམ་ཡོངས་བསྒྲགས་བྱས་པ། སློབ་གསོ་ཐོབ་པའི་མང་ཚོགས་མི་ཐེངས་ཁྲི་30ལྷག་ཙམ་ཟིན་པ་བཅས་རེད། ལྗོངས་ཡོངས་སུ་རྫོང་རིམ་པའི་དུག་འགོག་སློབ་གསོའི་རྟེན་གཞི་74དང་། དུག་རྫས་སྔོན་འགོག་སློབ་གསོའི་མཉམ་འགུལ་ཉམས་ལེན་ཁང་5 དུག་འགོག་གི་བརྗོད་དོན་གཙོ་བོའི་སྤྱི་གླིང་6 རྒྱལ་ཁབ་རིམ་པའི་སློབ་གྲྭའི་དུག་འགོག་དཔེ་དེབ་འཇོག་ས་15དང་རང་སྐྱོང་ལྗོངས་རིམ་པའི་སློབ་གྲྭའི་དུག་འགོག་དཔེ་དེབ་འཇོག་ས་48 དུག་འགོག་མི་སྣས་བཅའ་ཁྲིམས་གསལ་འགྲེལ་བྱེད་སའི་ཉེན་བརྡ་ཁང་1 དུག་འགོག་དྲིལ་བསྒྲགས་སྐར་ཁུང་222བཅས་བཙུགས་ཡོད།

དེ་དང་ཆབས་ཅིག ལྗོངས་ཡོངས་ཀྱི་དུག་འགོག་སྡེ་ཚན་གྱིས་དུག་འཐེན་མཁན་གྱི“དུས་བདེ་གཅེས་སྐྱོང”བྱ་སྤྱོད་རྒྱུན་རྣམ་ཅན་གྱིས་སྤེལ་ནས། སྟབས་བསྟུན་དོ་དམ་ཚོད་འཛིན་ལམ་སྲོལ་འཐུས་སྒོ་ཚང་དུ་གཏོང་བ་དང་། དུག་འཐེན་མཁན་ནད་པ་དང་དབང་པོ་སྐྱོན་ཅན་གྱི་དུག་བཅོས་དོ་དམ་ལ་ཤུགས་སྣོན་བརྒྱབ་སྟེ། དུག་འགོག་སྨན་བཅོས་དང་། བདེ་ཐང་མཛུབ་ཁྲིད། ཐུགས་ཁུར་རོགས་སྐྱོབ། ལས་ཞུགས་རོགས་སྐྱོར་སོགས་ཀྱི་བྱེད་ཐབས་ཕྱོགས་ཡོངས་ནས་དོན་འཁྱོལ་བྱས་ཡོད།