ལྷ་སའི་འགྲིམ་འགྲུལ་ཉེན་རྟོག་པས་སློབ་འཁོར་གྱི་བདེ་འཇགས་ལ་ཞིབ་བཤེར་བྱེད་བཞིན་པ།

ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་གྲོང་ཤར་རུ་ཆེན་གྱིས་སློབ་ཚན་ཚུགས་གྲོལ་མཚམས་ཀྱི་སློབ་མ་མང་བའི་དུས་སུ། འགྲིམ་འགྲུལ་ལམ་སྟོན་བྱས་ཏེ་འགྲོ་ལམ་ཤར་བགྲོད་ཐུབ་པར་བྱེད་ཀྱི་ཡོད་པ་མ་ཟད། ད་དུང་སློབ་མར་གཞུང་ལམ་སྒྲོལ་རོགས་ཀྱང་བྱེད་ཀྱི་ཡོད་པ་རེད། ལྷ་ས་གྲོང་ཁྱེར་སྤྱི་བདེ་ཅུས་སྟོད་ལུང་བདེ་ཆེན་ཆུས་ཡན་ལག་ཅུས་འགྲིམ་འགྲུལ་ཉེན་རྟོག་རུ་ཆེན་གྱིས་སློབ་གྲྭའི་ཉེ་འཁོར་གྱི་འགྲིམ་འགྲུལ་ཁྲིམས་འགལ་བྱེད་སྤྱོད་སྣ་ཚོགས་ལ་བཅོས་སྒྲིག་བྱེད་པའི་ལས་དོན་སྤེལ་ཞིང་། རླངས་འཁོར་གང་བྱུང་དུ་ཁ་བཀག་པ་དང་། མྱུར་ཚད་ལས་བརྒལ་བ། མི་ཚད་ལས་བརྒལ་ནས་བླུགས་པ། གློག་སྒུལ་སྦག་སྦག་གཏོང་སྐབས་སྦག་ཞྭ་མ་གྱོན་པ་སོགས་ཀྱི་འགྲིམ་འགྲུལ་ཁྲིམས་འགལ་བྱེད་སྤྱོད་ལ་ཞིབ་བཤེར་ནན་པོ་བྱས་ཏེ། སློབ་ཚན་ཚུགས་པ་དང་གྲོལ་རིང་། སློབ་མ་ཚོ་བདེ་འཇགས་དང་ལྡན་པར་བྱས་པ་རེད།

ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་སྣེའུ་རུ་ཆེན་གྱིས་ལྷ་ས་གྲོང་ཁྱེར་མཐོ་རིམ་སློབ་འབྲིང་གསུམ་པ་དང་སྣེའུ་དམར་དམག་སློབ་ཆུང་དུ། སློབ་གྲྭ་དང《འགྲོ་ལམ་འགྲིམ་འགྲུལ་བདེ་འཇཌ་ཀྱི་འགན་འཁྲིའི་ཡི་གེ》བཞག་ནས། སློབ་གྲྭས་བདེ་འཇགས་དོ་དམ་གྱི་བྱེད་པོའི་འགན་འཁྲི་དོན་འཁྱོལ་བྱེད་པར་སྐུལ་འདེད་བཏང་བ་རེད། དེ་དང་ཆབས་ཅིག་འཛིན་གྲྭའི་སྐད་འཕྲིན་ཚོགས་པ་བརྒྱུད་ཁྱིམ་བདག་དང་སློབ་མར《འགྲིམ་འགྲུལ་བདེ་འཇཌ་ཡི་གེ》བཏང་སྟེ། འགྲོ་ལམ་འགྲིམ་འགྲུལ་གྱི་བདེ་འཇགས་བཅའ་ཁྲིམས་དང་ཁྲིམས་སྲོལ་ལ་བརྩི་སྲུང་ཞུ་བའི་བདེ་འཇགས་ཤེས་བྱ་ཁྱིམ་ཚང་ཁྲི་སྟོང་མང་པོར་དྲིལ་བསྒྲགས་བྱས་པ་རེད།

གཞན་ཡང་། འདམ་གཞུང་རྫོང་དང་། ཆུ་ཤུར་རྫོང་། སྙེ་མོ་རྫོང་བཅས་ཀྱི་སྤྱི་བདེ་ཅུས་འགྲིམ་འགྲུལ་ཉེན་རྟོག་རུ་ཆེན་གྱིས་སློབ་འཁོར་ལ་ཆེད་དོན་ཞིབ་བཤེར་དང“ལག་ཁྱེར་བཞིའི”འོས་ཐོབ་དང་བདེ་འཇགས་སྒྲིག་ཆས་ལ་ཞིབ་བཤེར་བྱས་པ་མ་ཟད། ཁ་ལོ་བར་འགྲིམ་འགྲུལ་བདེ་འཇགས་ཀྱི་གསོ་སྦྱོང་བྱས་ནས་སློབ་འཁོར་གྱི་བདེ་འཇགས་ལ་འགན་ལེན་བྱས་པ་རེད།