འགྲིམ་འགྲུལ་བདེ་འཇགས་ཀྱི་མངོན་མེད་རྐྱེན་ངན་ འབྱུང་རྩ་ནས་བསལ་བ།
ལྷ་སའི་འགྲིམ་འགྲུལ་ཉེན་རྟོག་པས“འགྲུལ་འཁོར་གཉིས་དང་ཉེན་འཁོར་གཅིག་དོས་འཁོར་གཅིག”ལ་དོ་དམ་དང་ཚོད་འཛིན་ནན་པོ་བྱས་པ།
“འགྲུལ་འཁོར་གཉིས་དང་ཉེན་འཁོར་གཅིག་དོས་འཁོར་གཅིག”གི་གཙོ་གནད་སྐྱེལ་འདྲེན་ཁེ་ལས་ཀྱི་འབྱུང་རྩའི་ལྟ་སྐུལ་དོ་དམ་ལ་སྔར་བས་ཤུགས་སྣོན་བརྒྱབ་སྟེ་གཞུང་ལམ་གྱི་འགྲིམ་འགྲུལ་ལས་འཛོལ་སྔོན་འགོག་དང་ཉུང་དུ་གཏོང་ཆེད། ཉེ་ཆར་ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་གིས་བཀོད་སྒྲིག་མགྱོགས་པོ་བྱས་ཏེ། ཁོངས་གཏོགས་ཁག་གི་རུ་ཆེན་སྐྱེལ་འདྲེན་ཁེ་ལས་གཙོ་བོར་བསྐྱོད་ནས་འགྲིམ་འགྲུལ་བདེ་འཇགས་ཞིབ་བཤེར་གྱི་ཆེད་དོན་བྱ་སྤྱོད་སྤེལ་ཞིང་། ཕྱོགས་ཡོངས་ནས་གྲལ་བཤེར་དང་། སྐོང་འདྲི་བྱས་ནས་ཉེན་བརྡ་གཏོང་བ། བདེ་འཇགས་དོ་དམ་གྱི་འགན་འཁྲིའི་ཡི་གེར་མིང་རྟགས་འགོད་པ་སོགས་ཀྱི་བྱེད་ཐབས་སྤྱད་དེ་ཁེ་ལས་ཀྱིས་བྱེད་པོའི་འགན་འཁྲི་དོན་འཁྱོལ་ལ་སྐུལ་འདེད་བཏང་ནས་འགྲིམ་འགྲུལ་བདེ་འཇགས་ཀྱི་མངོན་མེད་རྐྱེན་ངན་འབྱུང་རྩ་ནས་བསལ་ཡོད།
དེའི་རིང་ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་གྲོང་ནུབ་རུ་ཆེན་གྱིས་ཁོངས་གཏོགས་ཁུལ་གྱི་ཉེན་ཆེའི་རྫས་འགྱུར་དངོས་རྫས་སྐྱེལ་འདྲེན་ཁེ་ལས་དང་ས་ཚིགས་སུ་བསྐྱོད་དེ། གཞུང་ལམ་གྱི་འགྲིམ་འགྲུལ་བདེ་འཇགས་གཙོ་གནད་དུ་བཟུང་ནས་ཆེད་དོན་ཞིབ་བཤེར་བྱས་ཡོད། མི་དམངས་ཉེན་རྟོག་པས་ས་གནས་ས་ཐོག་ཏུ་ཞིབ་བཤེར་དང་། རྩིས་ཐོ་ཀློག་བཤེར། བཞུགས་མོལ་སོགས་བྱས་ནས་ཁེ་ལས་ཀྱི་རླངས་འཁོར་ལ་འགུལ་རྣམ་ངང་ལྟ་སྐུལ་ཚོད་འཛིན་བྱེད་པ་དང་། ཁ་ལོ་བའི་འོས་ཐོབ་དང་། བདེ་འཇགས་གསོ་སྦྱོང་ཟིན་ཐོ། རླངས་འཁོར་ཉམས་བཟོའི་གནས་ཚུལ་བཅས་ལ་ཕྱོགས་ཡོངས་ནས་ཞིབ་བཤེར་བྱས་ཏེ་རླངས་འཁོར་གྱི་བདེ་འཇགས་སྒྲིག་ཆས་བཀོད་སྒྲིག་དང་ཉེན་ཆེའི་རྫས་འགྱུར་དངོས་རྫས་སྐྱེལ་འདྲེན་གྱི་འོས་ཐོབ་སོགས་འགྲིམ་འགྲུལ་བདེ་འཇགས་ཀྱི་མངོན་མེད་རྐྱེན་ངན་ལ་གཙོ་གནད་ཐོག་ཞིབ་བཤེར་བྱས་པ་རེད། ཞིབ་བཤེར་བྱེད་རིང་རུ་ཆེན་དེས་འབྲེལ་ཡོད་ཁེ་ལས་དང《སྐྱེལ་འདྲེན་ཁེ་ལས་ཀྱི་ཉེན་ཆེའི་རྫས་འགྱུར་དངོས་རྫས་ཀྱི་འགྲིམ་འགྲུལ་བདེ་འཇགས་དོ་དམ་གྱི་འགན་འཁྲིའི་ཡི་གེ》ལ་མིང་རྟགས་བཀོད་དེ། ཁེ་ལས་ཀྱི་འགྲིམ་འགྲུལ་བདེ་འཇགས་ཀྱི་བྱེད་པོའི་འགན་འཁྲི་སྔར་བས་ཁ་གསལ་བཟོས་པ་མ་ཟད། རླངས་འཁོར་དང་ཁ་ལོ་བའི་རྒྱུན་གཏན་གྱི་དོ་དམ་དོན་འཁྱོལ་ནན་པོ་དང་དུས་བཀག་ལྟར་བདེ་འཇགས་ཉེན་བརྡའི་སློབ་གསོ་བཏང་ནས་ཉེན་ཁའི་རྫས་འགྱུར་དངོས་རྫས་སྐྱེལ་འདྲེན་གྱི་འཁོར་འབྲེལ་ཧྲིལ་པོ་བདེ་འཇགས་དང་ཚོད་འཛིན་ཐུབ་པའི་འགན་ལེན་བྱེད་དགོས་པའི་བླང་བྱ་བཏོན་ཡོད།
ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་སྣེའུ་རུ་ཆེན་གྱིས་ལྷ་ས་གྲོང་ཁྱེར་ཡུའེ་ཐུང་ས་ཚིགས་ལས་དོན་ཚད་ཡོད་ཀུང་སིའི་སྣེའུ་རླངས་འཁོར་ས་ཚིགས་དང་བོད་ལྗོངས་ཧྲུན་ཏ་འགྲུལ་སྐྱེལ་ཚད་ཡོད་འགན་འཁྲི་ཀུང་སིར་བསྐྱོད་དེ་འགྲིམ་འགྲུལ་བདེ་འཇགས་ཞིབ་བཤེར་གྱི་ཆེད་དོན་བྱ་སྤྱོད་སྤེལ་བ་རེད། མི་དམངས་ཉེན་རྟོག་པས་འགྲུལ་སྐྱེལ་རླངས་འཁོར་འཁོར་སྐྱོད་ཀྱི་ཁྱད་ཆོས་དང་ཟུང་འབྲེལ་གྱིས་ཁེ་ལས་ཀྱི་བདེ་འཇགས་དོ་དམ་ལམ་སྲོལ་དང་། རླངས་འཁོར་གྱི་གནས་ཚུལ། ཁ་ལོ་བའི་ཁྲིམས་འགལ་ཟིན་ཐོ་སོགས་ལ་ཕྱོགས་ཡོངས་ནས་ཞིབ་བཤེར་བྱས་པ་དང་། ཁེ་ལས་ལ་GPSའགུལ་རྣམ་ལྟ་སྐུལ་དོ་དམ་ལ་ཤུགས་སྣོན་རྒྱག་པར་སྐུལ་འདེད་བཏང་བ། ངལ་དུབ་ནས་རླངས་འཁོར་གཏོང་བ་དང་མི་གྲངས་དང་མྱུར་ཚད་ལས་བརྒལ་བ་སོགས་འགྲིམ་འགྲུལ་གྱི་ཁྲིམས་འགལ་བྱེད་སྤྱོད་ལ་ཞིབ་བཤེར་ནན་པོ་བྱས་པ་རེད། དེ་དང་ཆབས་ཅིག་ཁེ་ལས་ལ་དུས་བཀག་ལྟར་ཁ་ལོ་བར་བདེ་འཇགས་གསོ་སྦྱོང་བྱེད་པ་དང་རླངས་འཁོར་ས་ཚིགས་ནས་ཐོན་པའི་བདེ་འཇགས་ཞིབ་བཤེར་ལམ་ལུགས་དོན་འཁྱོལ་བྱས་ཏེ“མངོན་མེད་རྐྱེན་ངན་གཙང་སེལ་དང་ཉེན་ཁ་སྔོན་འགོག་ཚོད་འཛིན”ཏན་ཏིག་བྱེད་དགོས་པའི་བླང་བྱ་བཏོན་པ་རེད།