གསེར་སོགས་རྩ་ཆེའི་ལྕགས་རིགས་ལྐོག་འདྲེན་བྱེད་པའི་བྱེད་སྤྱོད་ཀྱིས་གསེར་དངུལ་སོགས་རྩ་ཆེའི་ལྕགས་རིགས་ཕྱིར་གཏོང་སྐོར་གྱི་རྒྱལ་ཁབ་ཀྱི་དོ་དམ་ལམ་ལུགས་ལ་གཏོར་བཤིག་གཏོང་བ་མ་ཟད། ད་དུང་རྒྱལ་ཁབ་ཀྱི་དངུལ་ལོར་གྱི་རིན་ཐང་བརྟན་པོ་དང་ཕྱི་ཕྱོགས་ཚོང་དོན་འཕེལ་རྒྱས་ལའང་གནོད་འཚེ་བཟོ་སྲིད། ཉེ་ཆར། གཞིས་རྩེ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་རྩ་ཆེའི་ལྕགས་རིགས་ལྐོག་འདྲེན་བྱེད་པའི་གྱོད་གཞི་ཞིག་དཔྱད་གཅོད་བྱས་པ་དེས་བཅའ་ཁྲིམས་ཀྱི་དབང་གྲགས་ནུས་ལྡན་མངོན་པ་མ་ཟད། རྒྱལ་ཁབ་ཀྱི་དཔལ་འབྱོར་སྒྲིག་ལམ་དང་འགག་སྒོའི་ལྟ་འདོམས་ལམ་ལུགས་སྲུང་སྐྱོང་ཐུབ་ཡོད།

ཁྲིམས་ཁང་གིས་ཞིབ་གཅོད་བྱས་ནས་རྩད་ཆོད་ཁ་གསལ་ཐུབ་པ་ལྟར་ན། གྱོད་གཞི་འདིའི་ཞུ་སྦྱོར་ཕྱི་མ་ཅཱ་ཆེ་གེ་མོ་དང་བསྟན་ཆེ་གེ་མོ་ནི་ལྐོག་འདྲེན་བྱེད་པར་གླས་པ་ཞིག་རེད། ཅཱ་ཆེ་གེ་མོས་ལྷ་སའི་མཱ་ཆེ་གེ་མོའི་ས་ནས་གསེར་ལེབ་23བླངས་ཏེ་གླ་བདག་གི་ངན་སྐུལ་ལྟར་རླངས་འཁོར་བཏང་ནས་འབྲོང་པ་རྫོང་དུ་བསྐྱོད། བསྟན་ཆེ་གེ་མོས་འབྲོང་པ་རྫོང་ནས་གསེར་ལེབ་23དེ་དག་བླངས་ཏེ་འགག་སྒོ་ལས་གཡོལ་ནས་ཀྲུང་ནེའི་མཐའ་མཚམས་སུ་གསེར་ལྐོག་འདྲེན་བྱེད་རྩིས་བྱས་ཀྱང་ལམ་བར་དུ་གྱོད་སྒྲུབ་མི་སྣས་བཀག ཁྲིམས་ལྟར་རྒྱ་མ་བཀྱག་པ་ལྟར་ན། གྱོད་འབྲེལ་གསེར་ལེབ་23ལ་ལྗིད་ཚད་ཁེ་23000ཡོད་པ་རེད།

《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་ཁྲིམས》དོན་ཚན་བརྒྱ་དང་ང་གཅིག་གི་ནང་གསེས་དོན་ཚན་གཉིས་པའི་གཏན་འབེབས་ལྟར་ན། ཕྱིར་གཏོང་བྱེད་མི་ཆོག་པའི་རྒྱལ་ཁབ་ཀྱི་རིག་དངོས་དང་། གསེར། རྒྱ་དངུལ། རྩ་ཆེའི་ལྕགས་རིགས་གཞན་དག་སམ་ཡང་ན་ཕྱིར་གཏོང་བྱེད་མི་ཆོག་པའི་རྒྱལ་ཁབ་ཀྱི་སྲོག་ཆགས་རྩ་ཆེན་དང་དེའི་ཐོན་རྫས་ལྐོག་འདྲེན་བྱས་རིགས་ལ་དུས་བཙོན་ལོ་ལྔ་ཡན་ནས་ལོ་བཅུ་མན་གྱི་ཉེས་ཆད་གཅོད་རྒྱུ་དང་སྦྲགས་དངུལ་ཆད་ཀྱང་གཅོད་རྒྱུ་དང་། གནས་ཚུལ་ཧ་ཅང་ཚབས་ལྕི་རིགས་ལ་དུས་བཙོན་ལོ་བཅུ་ཡན་ནམ་ཡང་ན་ཚེ་བཙོན་གྱི་ཉེས་ཆད་གཅོད་རྒྱུ་སྦྲགས་རྒྱུ་ནོར་གཞུང་བཞེས་གཏོང་རྒྱུ། གནས་ཚུལ་ཅུང་ཡང་བའི་རིགས་ལ་དུས་བཙོན་ལོ་ལྔ་མན་གྱི་ཉེས་ཆད་གཅོད་རྒྱུ་དང་སྦྲགས་དངུལ་ཆད་ཀྱང་གཅོད་རྒྱུ་བཅས་རེད།

གྱོད་གཞི་འདིའི་ནང་ཞུ་སྦྱོར་ཕྱི་མ་གཉིས་ནི་མཉམ་དུ་ཉེས་པ་གསོག་སྐབས་གཞན་གྱིས་གླས་ནས་ཞུགས་པ་ཞིག་ཡིན་པས་ཉེས་ཅན་ཕལ་པ་ཡིན་པར་བསམ་གཞིགས་བྱས་ཏེ། ཁྲིམས་ལྟར་ཆད་པ་ཡང་གཅོད་དམ་ཆག་ཡང་བཏང་བ་སྟེ། མཐར་ཁྲིམས་ཁང་གིས་ཞུ་སྦྱོར་ཕྱི་མ་བསྟན་ཆེ་གེ་མོར་དུས་བཙོན་ལོ་གསུམ་དང་ཟླ་བ་བཅུའི་ཁྲིམས་ཐག་བཅད་པ་དང་ཆབས་ཅིག་དངུལ་ཆད་མི་དམངས་ཤོག་སྒོར་160000བཅད་པ་དང་ཞུ་སྦྱོར་ཕྱི་མ་ཅཱ་ཆེ་གེ་མོར་དུས་བཙོན་ལོ་གསུམ་གྱི་ཁྲིམས་ཐག་བཅད་པ་དང་ཆབས་ཅིག་དངུལ་ཆད་མི་དམངས་ཤོག་སྒོར་80000བཅད་པ་རེད།

ཁྲིམས་དཔོན་གྱིས་གྱོད་གཞིའི་སྐོར་བརྗོད་པ། གྱོད་གཞི་འདིར་དེ་སྔའི་རྩ་ཆེའི་ལྕགས་རིགས་ལྐོག་འདྲེན་གྱི་ཉེས་དོན་གྱོད་གཞི་དང་བསྡུར་ན་ཁྱད་ཆོས་གསར་པ་ཧ་ཅང་མངོན་གསལ་དོད་པོ་ཡོད་པ་རེད། གླ་བདག་གིས་གསེར་ལྐོག་འདྲེན་གྱི་ཁྲིམས་འགལ་བྱེད་སྤྱོད་བདེ་བླག་ངང་སྤེལ་ཐུབ་པ་བྱེད་ཆེད། མཐའ་མཚམས་མི་སེར་ལ་རྒྱལ་མཚམས་ཀྱི་ལམ་བུར་རྒྱུས་མངའ་ཆེ་བའི་སྟབས་བདེ་སྤྱད་དེ་འགག་སྒོའི་ལྟ་འདོམས་ལས་གཡོལ་ནས་གསེར་རྒྱལ་མཚམས་ནས་སྐྱེལ་འདྲེན་བྱེད་རྩིས་བྱས་པ་ཞིག་རེད།

ཞིབ་གཅོད་ཁྲིམས་དཔོན་གྱིས་གྱོད་གཞི་འདི་ཞིབ་གཅོད་བྱ་རྒྱུ་དེ་རྒྱ་ཆེའི་སྤྱི་དམངས་ལ་མཚོན་ན་དྲན་སྐུལ་ཞིག་ཡིན་པས་ཁྲིམས་འགལ་ངང་ཁེ་ཕན་རག་ཐབས་ཀྱིས་ཉེས་གསོག་གི་ལམ་དུ་གཏན་ནས་བསྐྱོད་མི་རུང་བའི་དྲན་སྐུལ་བྱས་པ་རེད། གཞན་ཡང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གསེར་དངུལ་དོ་དམ་སྲོལ་ཡིག》གི་འབྲེལ་ཡོད་གཏན་འབེབས་གཞིར་བཟུང་། གསེར་དངུལ་འཁྱེར་ནས་རྒྱལ་མཚམས་སྒྲོལ་སྐབས། ཀྲུང་གོའི་འགག་སྒོ་ལས་ཁུངས་ཀྱིས་ཀྲུང་གོ་མི་དམངས་དངུལ་ཁང་གིས་སྤྲད་པའི་དཔང་རྟགས་སམ་ཡང་ན་དེ་སྔའི་རྒྱལ་མཚམས་སྒྲོལ་སྐབས་ཀྱི་སྙན་ཞུའི་ཐོག་ཐོ་འགོད་བྱས་པའི་གྲངས་འབོར་ལ་གཞིགས་ནས་ཞིབ་བཤེར་བྱས་ཏེ་ཕྱིར་གཏོང་བྱེད་ཀྱི་ཡོད། དཔང་རྟགས་འདོན་སྤྲོད་བྱེད་མི་ཐུབ་པའམ་ཡང་ན་དེ་སྔའི་རྒྱལ་མཚམས་སྒྲོལ་སྐབས་ཀྱི་སྙན་ཞུའི་ཐོག་ཐོ་འགོད་བྱས་པའི་གྲངས་འབོར་ལས་བརྒལ་ཚེ་རྒྱལ་མཚམས་ནས་སྒྲོལ་ཆོག་གི་མེད། དེར་བརྟེན། རྩ་ཆེའི་ལྕགས་རིགས་འཁྱེར་ནས་རྒྱལ་མཚམས་སྒྲོལ་དགོས་ཚེ། དེ་མཚུངས་ཀྱི་དཔང་རྟགས་དཔྱད་གཞི་བཏོན་ནས་འགག་སྒོ་ལས་ཁུངས་ལ་སྙན་སེང་ཞུ་དགོས།