43 བྱེད་སྤྱོད་གང་དག་ནི་མི་གཞན་གྱི་མིང་གྲགས་ཁེ་དབང་ལ་གནོད་འཚེ་གཏོང་བའི་བྱེད་སྤྱོད་ཁོངས་སུ་གཏོགས་སམ།

དོན་ཚན་ཆིག་སྟོང་དང་ཉེར་བཞི་པ། དམངས་དོན་བྱེད་པོ་ལ་མིང་གྲགས་ཀྱི་ཁེ་དབང་སྤྱོད་རྒྱུ་ཡོད། རྩ་འཛུགས་དང་མི་སྒེར་གང་ཡང་རུང་བས་དམའ་འབེབས་དང་སྙོན་འཛུགས་སོགས་ཀྱི་བྱེད་སྟངས་ཐོག་ནས་མི་གཞན་གྱི་མིང་གྲགས་ཀྱི་ཁེ་དབང་ལ་གནོད་འཚེ་བཏང་མི་ཆོག

མིང་གྲགས་ནི་དམངས་དོན་བྱེད་པོའི་ཀུན་སྤྱོད་དང་། སྙན་གྲགས། འཇོན་ཐང་། ཡིད་རྟོན་སོགས་ཀྱི་སྤྱི་ཚོགས་ཀྱི་གདེང་འཇོག་ཡིན།

ཁྲིམས་ལུགས་འཆད་སྟེགས།

རྩ་འཛུགས་སམ་མི་སྒེར་གང་རུང་གིས་དམའ་འབེབས་དང་སྙོན་འཛུགས་སོགས་ཀྱི་བྱེད་སྟངས་ཐོག་ནས་གཞན་གྱི་མིང་གྲགས་ཀྱི་ཁེ་དབང་ལ་གནོད་འཚེ་གཏོང་མི་རུང་། དམའ་འབེབས་གཏོང་བ་ཞེས་པ་ནི་གཏུམ་སྤྱོད་དམ་ཡང་ན་བྱེད་ཐབས་གཞན་དག་ལ་བརྟེན་ནས་གཞན་གྱི་མི་གཞིར་དམའ་འབེབས་གཏོང་བ་དང་གཞན་གྱི་མིང་གྲགས་མེད་པ་བཟོ་བ་ཞིག་རེད། དཔེར་ན་གཏུམ་སྤྱོད་ཀྱི་བྱ་སྤྱོད་དང་། སྐད་ཆ། ཡི་གེ་སོགས་ལ་བརྟེན་ནས་དམའ་འབེབས་གཏོང་བ་དེ་རེད། སྙོན་འཛུགས་ཞེས་པ་ནི་ཡིག་ཐོག་དང་ངག་ཐོག་སོགས་ནས་དོན་དངོས་འཁྱོག་བཤད་བྱས་ཏེ་གཞན་གྱི་མི་གཞིར་འཛེམས་མེད་ངང་གནོད་འཚེ་གཏོང་བའི་བྱ་སྤྱོད་ཅིག་རེད། བྱ་སྤྱོད་སྤེལ་མིས་སྤྱི་པའི་ཁེ་ཕན་ཆེད་གསར་འགྱུར་སྒྲོག་སྤེལ་དང་གླེང་ཕྱོགས་ཀྱི་ལྟ་སྐུལ་སོགས་སྤེལ་ནས་མི་གཞན་གྱི་མིང་གྲགས་ལ་ཤུགས་རྐྱེན་བཟོས་པ་ཡིན་ན་དམངས་དོན་འགན་འཁྲི་འཁུར་མི་དགོས། འོན་ཀྱང་གཤམ་གསལ་གནས་ཚུལ་གྲས་ཤིག་ཡོད་ན་འགན་འཁྲི་འཁུར་དགོས་པ་སྟེ། (1) དོན་དངོས་རྫུན་བཟོ་དང་འཁྱོག་བཤད་བྱེད་པ་དང་། (2) མི་གཞན་གྱིས་འདོན་སྤྲོད་བྱས་པའི་དོན་དངོས་དང་མི་མཐུན་པའི་བརྗོད་བྱ་ལ་བདེན་བརྡར་ལུགས་མཐུན་བྱེད་པའི་འོས་འགན་མ་སྒྲུབ་པ། (3) སྙད་སྐོ་བའི་ངག་ཚིག་སོགས་སྤྱད་ནས་མི་གཞན་གྱི་མིང་གྲགས་ལ་དམའ་འབེབས་བྱེད་པ།

44 བརྙན་འཕྲིན་དང་གསར་འགྱུར་གྱི་ནང་དོན་བདེན་པ་མིན་པས་མི་གཞན་གྱི་མིང་གྲགས་ཁེ་དབང་ལ་གནོད་འཚེ་ཕོག་ཚེ་ཐག་གཅོད་ཇི་ལྟར་བྱེད་དགོས་སམ།

དོན་ཚན་ཆིག་སྟོང་དང་ཉེར་བརྒྱད་པ། དམངས་དོན་བྱེད་པོར་དུས་དེབ་དང་དྲ་བ་སོགས་སྨྱན་སྦྱོར་ཐོག་སྤེལ་བའི་གནས་འཕྲིན་དེ་བདེན་པ་ཤོར་ནས་རང་ཉིད་ཀྱི་མིང་གྲགས་ཀྱི་ཁེ་དབང་ལ་གནོད་འཚེ་བཏང་ཡོད་པ་བདེན་དཔང་བྱེད་ཐུབ་པའི་དཔང་རྟགས་ཡོད་ན། དམངས་དོན་བྱེད་པོར་སྨྱན་སྦྱོར་དེས་དུས་ཐོག་ཏུ་ནོར་བཅོས་སམ་བསུབ་འཐེན་བྱེད་པ་སོགས་དགོས་ངེས་ཀྱི་བྱེད་ཐབས་སྤྱོད་དགོས་པའི་རེ་འདུན་འདོན་དབང་ཡོད།

ཁྲིམས་ལུགས་འཆད་སྟེགས།

གསར་འགྱུར་གནས་ཚུལ་སྒྲོག་སྤེལ་བྱེད་པར་དུས་བཀག་རང་བཞིན་ལྡན་ཡོད། གལ་ཏེ་གནོད་འཚེ་ཕོག་མཁན་གྱིས་བདེན་པ་མིན་པའི་གནས་ཚུལ་ནོར་བཅོས་བྱེད་དགོས་པའི་རེ་འདུན་ཞུས་པར་སྨྱན་སྦྱོར་ཚན་པས་དུས་ཐོག་ཏུ་ནོར་བཅོས་བྱས་ཚེ། མི་གཞིའི་ཁེ་དབང་ལ་གནོད་འཚེ་ཕོག་ཚད་ཚད་གཞི་དམའ་ཤོས་སུ་གཏོང་ཐུབ་པ་དང་བདེན་པ་མིན་པའི་གནས་ཚུལ་སྤེལ་བ་ལས་སྤྱི་ཚོགས་ཀྱི་སྤྱི་དམངས་ལ་ཤུགས་རྐྱེན་ཐེབས་ཤུགས་ཆུང་དུ་གཏོང་ཐུབ། དེར་བརྟེན་ཚགས་པར་དང་དུས་དེབ་དང་དྲ་རྒྱ་སོགས་སྨྱན་སྦྱོར་ཐོག་གནས་ཚུལ་སྤེལ་བའི་ནང་དོན་བདེན་པ་ཤོར་བས་གཞན་གྱི་མིང་གྲགས་ཀྱི་ཁེ་དབང་ལ་གནོད་འཚེ་ཕོག་ཚེ་གནོད་འཚེ་ཕོག་མཁན་གྱིས་སྨྱན་སྦྱོར་དེར་དུས་ཐོག་ཏུ་དག་བཅོས་སམ་བསུབ་འཐེན་སོགས་དགོས་ངེས་བྱེད་ཐབས་སྤྱོད་དགོས་པའི་རེ་འདུན་འདོན་དབང་ཡོད། གལ་ཏེ་སྨྱན་སྦྱོར་གྱིས་དུས་ཐོག་ཏུ་བྱེད་ཐབས་སྤྱད་མེད་ཚེ་གནོད་འཚེ་ཕོག་མཁན་གྱིས་མི་དམངས་ཁྲིམས་ཁང་ལ་སྨྱན་སྦྱོར་དེས་དུས་བཀག་ངེས་ཅན་ནང་འགན་འཁྲི་སྒྲུབ་དགོས་པའི་རེ་འདུན་འདོན་དབང་ཡོད།

45 མི་གཞན་གྱི་སྒེར་གསང་གི་ཁེ་དབང་ལ་གནོད་འཚེ་གཏོང་བའི་བྱེད་སྤྱོད་གང་དག་ཡོད་དམ།

དོན་ཚན་ཆིག་སྟོང་དང་སོ་གཉིས་པ། རང་བྱུང་མི་ལ་སྒེར་གསང་གི་ཁེ་དབང་སྤྱོད་རྒྱུ་ཡོད། རྩ་འཛུགས་དང་མི་སྒེར་གང་ཡང་རུང་བས་མྱུལ་རྟོག་བྱེད་པ་དང་། དཀྲུག་ཟིང་གཏོང་བ། ཕྱིར་བསྒྲགས་བྱེད་པ། ཡོངས་བསྒྲགས་བྱེད་པ་སོགས་ཀྱི་བྱེད་སྟངས་ཐོག་ནས་མི་གཞན་གྱི་སྒེར་གསང་གི་ཁེ་དབང་ལ་གནོད་འཚེ་བཏང་མི་ཆོག སྒེར་གསང་ཞེས་པ་ནི་རང་བྱུང་མིའི་མི་སྒེར་གྱི་འཚོ་བའི་བདེ་འཇགས་དང་མི་གཞན་ལ་ཤེས་རྟོགས་བྱེད་དུ་འཇུག་འདོད་མེད་པའི་སྒེར་གྱི་གསང་བའི་བར་སྟོང་དང་། གསང་བའི་བྱ་སྤྱོད། གསང་བའི་ཆ་འཕྲིན་བཅས་ལ་ཟེར།

ཁྲིམས་ལུགས་འཆད་སྟེགས།

སྒེར་གསང་གི་ཁེ་དབང་གི་རིན་ཐང་ནི་མི་སྒེར་གྱི་རང་དབང་དང་ལ་རྒྱའི་ངོ་བོ་ཡིན་པ་དང་མི་སྒེར་གྱིས་རང་ཚུགས་བྱེད་པ་ལས་གཞན་གྱིས་ཁ་ལོ་སྒྱུར་མི་ཐུབ་པའི་ཐོག་ནས་མཚོན་གྱི་ཡོད། སྒེར་གསང་ནི་རང་བྱུང་མིའི་སྒེར་གྱི་འཚོ་བའི་བདེ་འཇགས་གཞན་གྱིས་ཤེས་སུ་འཇུག་འདོད་མེད་པའི་སྒེར་གྱི་གསང་བའི་བར་སྟོང་དང་། གསང་བའི་བྱ་སྤྱོད། གསང་བའི་ཆ་འཕྲིན་བཅས་རེད། བཅའ་ཁྲིམས་ནང་རྩ་འཛུགས་དང་མི་སྒེར་གང་རུང་གིས་མྱུལ་རྟོག་བྱེད་པ་དང་། དཀྲུག་ཟིང་གཏོང་བ། ཕྱིར་བསྒྲགས་བྱེད་པ། ཡོངས་བསྒྲགས་བྱེད་པ་སོགས་ཐོག་ནས་མི་གཞན་གྱི་སྒེར་གསང་གི་ཁེ་དབང་ལ་གནོད་འཚེ་བཏང་མི་ཆོག་པའི་གཏན་འབེབས་བྱས་ཡོད། ཁེ་དབང་བདག་པོས་མོས་མཐུན་ཁ་གསལ་བྱས་པ་ཕུད་རྩ་འཛུགས་དང་མི་སྒེར་གང་རུང་བས་གཤམ་གསལ་བྱ་སྤྱོད་སྤེལ་མི་ཆོག་པ་སྟེ།

(1) ཁ་པར་དང་། འཕྲིན་ཐུང་། སྐབས་ཐོག་འཕྲིན་གཏོང་ཡོ་ཆས། གློག་རྡུལ་སྦྲག་ཡིག སྦྲག་ཡིག་སོགས་ཀྱི་ཐོག་ནས་གཞན་གྱི་སྒེར་གྱི་འཚོ་བའི་ལྷིང་འཇགས་ལ་དཀྲུག་ཟིང་བཟོ་བ་དང་། (2) གཞན་གྱི་སྡོད་ཁང་དང་མགྲོན་ཁང་སོགས་སྒེར་གྱི་གསང་བའི་བར་སྟོང་ནང་དུ་འཛུལ་བ་དང་། པར་ལེན་པ། ལྐོག་ལྟ་བྱེད་པ།

(3) མི་གཞན་གྱི་གསང་བའི་བྱ་སྤྱོད་པར་ལེན་པ་དང་། ལྐོག་ལྟ། ལྐོག་ཉན། ཡོངས་བསྒྲགས་བཅས་བྱེད་པ། (4) མི་གཞན་གྱི་ལུས་པོའི་གསང་གནས་པར་ལེན་པ་དང་ལྐོག་ལྟ་བྱེད་པ། (5) མི་གཞན་གྱི་སྒེར་གྱི་གསང་བའི་ཆ་འཕྲིན་ལས་སྣོན་བྱེད་པ། (6) བྱེད་སྟངས་གཞན་དག་གི་ཐོག་ནས་མི་གཞན་གྱི་སྒེར་གསང་གི་ཁེ་དབང་ལ་གནོད་འཚེ་གཏོང་བ་བཅས་རེད།