འདི་ནི་ཉེན་རྟོག་པ་ཁྱོ་ཤུག་དོན་གྲུབ་དཔལ་ལྡན་དང་ཡེ་ཤེས་དབང་མོའི་ཕྲུ་གུ་བཅས་པའི་དྲན་རྟེན་མཉམ་པར་ཡིན་པ།

འདི་ནི་མུ་ལེ་ཡིས་འཐབ་གྲོགས་ཚོ་དང་མཉམ་དུ་མཐའ་མཚམས་ཀྱི་འཐབ་ས་དང་པོར་སྐོར་གཡེང་བྱེད་བཞིན་པ།

འདི་ནི་གནས་སྤོས་མི་སེར་དོ་དམ་ཉེན་རྟོག་པས་མཐའ་མཚམས་ཀྱི་འཐབ་ས་དང་པོར་སྐོར་གཡེང་ལས་སྒྲུབ་བྱེད་བཞིན་པ།

བོད་ཀྱི་ལོ་གསར་ནི་བོད་རིགས་མི་དམངས་ཚོས་མཉམ་འཛོམས་དགའ་སྐྱིད་ལ་རོལ་བའི་དུས་སྐབས་ཤིག་ཡིན་མོད། འོན་ཀྱང་འདུ་བྲལ་གྱི་གནས་སྐབས་ནི་ཡིད་སྐྱོ་བ་ཞིག་རེད།

བོད་ཀྱི་ལོ་གསར་རིང་། མངའ་རིས་སྤུ་ཧྲེང་རྒྱལ་མཚམས་འཛུལ་སྒྲོལ་མཐའ་སྲུང་ཞིབ་བཤེར་ས་ཚིགས་ཀྱི་གནས་སྤོས་མི་སེར་དོ་དམ་ཉེན་རྟོག་པ་རྣམས་ཀྱིས་སྔར་བཞིན་སྤུ་ཧྲེང་འགག་སྒོར་སྡོད་བྱ་བྱས་ཏེ་འགག་སྒོར་རྒྱལ་མཚམས་འཛུལ་སྒྲོལ་བྱེད་མཁན་ལ་ཞིབ་བཤེར་དང་། ལྐོག་འདྲེན་དང་རྒྱལ་མཚམས་ནས་ལྐོག་བརྒལ་ལ་རྡུང་རྡེག་གཏོང་བ་སོགས་ཀྱི་ལས་འགན་ལྕི་པོ་ཕྲག་ཏུ་ཁུར་ཡོད། ཁྱིམ་དུ་ལོག་པའི་མི་དམངས་ཉེན་རྟོག་པ་ཁག་གཅིག་ནང་མི་དང་ཁ་བྲལ་མི་ཕོད་རུང་འོས་འགན་བསམས་ནས་ལས་གནས་སུ་ལོག་ཡོད།

▶ གཏམ་རྒྱུད་དང་པོ། དུས་ཐུང་མཉམ་འཛོམས་རྗེས་ཀྱི་ཞལ་གྱེས།

བོད་ཀྱི་ལོ་གསར་རིང་། སྤུ་ཧྲེང་རྒྱལ་མཚམས་འཛུལ་སྒྲོལ་མཐའ་སྲུང་ཞིབ་བཤེར་ས་ཚིགས་ཀྱི་ཉེན་རྟོག་པ་ཁྱོ་ཤུག་དོན་གྲུབ་དཔལ་ལྡན་དང་ཡེ་ཤེས་དབང་མོ་ཁྱིམ་དུ་ལོག་ཁོམ་བྱུང་ནས་ནང་མི་དང་མཉམ་འཛོམས་བྱུང་ཡོད། དགོང་མོ་མེ་ཐབ་འཁྲིས་སུ་སྡོད་སྐབས། ལོ་2ལ་སླེབས་པའི་ཕྲུ་གུས་དགའ་སྤྲོ་ཆེན་པོས“སྐར་མ་ཆུང་ཆུང་དེ་དག་ཆེན་པོ་ཆགས་རྗེས་པཱ་ལགས་དང་ཨ་མ་ལགས་གཞི་ནས་ལོག་ཡོང་གི་རེད”ཅེས་ཤོད་སྐབས་དོན་གྲུབ་དཔལ་ལྡན་ཁྱོ་ཤུག་གཉིས་པོའི་སེམས་གཅོང་ཡུད་ཙམ་ལ་སངས་མི་ཐུབ།

འོན་ཀྱང་། སྤྲོ་སྣང་ལྡན་པའི་དུས་ཚོད་ནི་ཁྱུག་ཙམ་རེད། ལས་གནས་སུ་ལོག་པའི་ཉིན་དེར། དོན་གྲུབ་དཔལ་ལྡན་གྱི་ཨ་མས་རྡོག་ཁྲེས་ཀྱི་གསེང་དུ་ཤ་མོག་ཚ་པོ་བླུགས་པའི་ལྟོ་སྣོད་བཞག་སྟེ“དེ་ལམ་བར་དུ་ཟོ་ཨང”ཞེས་ཡང་ཡང་བཤད་པ་དང་། རྡོག་ཁྲེས་བཞག་པའི་སྒྲ་ཡིས་ཕྲུ་གུ་གཉིད་ལས་སད།

ཁོང་གཉིས་ལས་གནས་སུ་ཕྱིར་ལོག་པའི་རླངས་འཁོར་གྱི་སྒོ་རྒྱག་སྐབས་སྤོ་བོའི་པང་གི་ཕྲུ་གུས་རླངས་འཁོར་གྱི་སྒེའུ་ཁུང་ཤུགས་ཀྱིས་རྡུང་སྟེ་ཁོ་གཉིས་དང་བྲལ་མི་ཕོད་པའི་ངུ་འབོད་བྱས།

མེས་རྒྱལ་ལ་ལེ་དབར་ཁྲི་ཡི་མཐའ་མཚམས་ལམ་ཐིག་ཡོད་པས། མཐའ་སྲུང་འཐབ་འཛིང་པ་རེ་རེའི་ངོས་ནས་བརྗོད་ན། གྱེས་ཁའི་གནས་ཚུལ་འདི་འདྲ་རྟག་ཏུ་འབྱུང་བཞིན་ཡོད་པས་རང་གིས་རང་ལ་སེམས་གསོ་གཏོང་རྒྱུ་ལས་མ་འདས།

ཁོང་ཚོས་དཀའ་སྤྱད་འབད་བརྩོན་གྱིས་གངས་རི་དང་ཐང་རྒོད་བསྲུངས་ནས་ནང་མི་དང་མཉམ་འཛོམས་བྱེད་པའི་དུས་ཚོད་ཐུང་ཐུང་རེད། ཕྲུ་གུས་གོམ་པ་སྤོ་སྟངས་སྦྱོང་བ་དང་། བཟའ་ཟླའི་མངལ་སྦྲུམ་བརྟག་དཔྱད། ཕ་མ་ནད་ཀྱིས་མནར་བ་སོགས་གནས་ཚུལ་གང་ཞིག་བྱུང་རུང་བརྙན་ལམ་ནས་འཚམས་འདྲི་བྱེད་པ་ལས་ཐབས་གཞན་མེད།

▶ གཏམ་རྒྱུད་གཉིས་པ། ཆུང་མས་བསྐུར་བའི་འཕྲིན་ཐུང་99

གྲང་རླུང་རྨ་བྱ་གཙང་པོའི་འགྲམ་དུ་ལྡང་སྐབས་སྤུ་ཧྲེང་རྒྱལ་མཚམས་འཛུལ་སྒྲོལ་མཐའ་སྲུང་ཞིབ་བཤེར་ས་ཚིགས་ཀྱི་གནས་སྤོས་མི་སེར་དོ་དམ་ཉེན་རྟོག་པ་མུ་ལེ་ཡིས་དྲོད་ཚད་ཀླད་ཀོར་འོག་གི་20℃ཡི་གྲང་རླུང་ཁྲོད་སྐོར་གཡེང་དང་ལས་སྒྲུབ་བྱེད་སྐབས་ཆུང་མས་བསྐུར་བའི་འཕྲིན་ཐུང་99ལྷོད་གཡེང་ལ་ཤོར་གྲབས་བྱས། དེ་ནི་ཆུང་མ་ཤང་ཞུའེ་ཧྥེ་ཡིས་ནད་ཁྲིའི་སྟེང་ནས་བསྐུར་བའི་གཤགས་བཅོས་མོས་མཐུན་ཡི་གེ་རེད། འཕྲིན་ཐུང་དེ་དག་མཐོང་སྐབས་ཁོང་ལ་སེམས་སྡུག་ཆེན་པོ་བྱུང་།

ལག་ཐོགས་ཁ་པར་ཐོག་གི་འཕྲིན་ཐུང་དེ་དག་མཐོང་སྐབས་མུ་ལེར་བསམ་བློ་འདྲ་མིན་སྣ་ཚོགས་འཁོར་ནས་ཆུང་མར་གནོང་འགྱོད་ཆེན་པོ་སྐྱེས་ཏེ། ལས་ཁུངས་ལ་དགོངས་པ་ཞུས་འཕྲལ་མཚན་མོ་དེ་རང་དུ་ཁྲུང་ཆིང་ལ་ལོག ལམ་བར་དུ་ཁོང་གི་སེམས་ཁྲལ་ཚང་མ་བཟའ་ཟླའི་བདེ་སྡུག་རེད།

དཀའ་བ་དུ་མ་བརྒྱུད་རྗེས་མུ་ལེ་སྨན་ཁང་གི་ནད་ལྕིའི་ལྟ་སྐྱོང་ནད་ཁང་དུ་འབྱོར་སྐབས་ཉལ་ཁྲིའི་སྟེང་དྲན་པ་ཐོར་བའི་བཟའ་ཟླ་ཤང་ཞུའེ་ཧྥེ་ཡིས་ཕྲུ་གུ་བཙའ་སྐབས་ཁྲག་འདྲིལ་ནད་ཀྱིས་དབང་པོ་ཕལ་ཆེར་ཉམས་པས། དོས་དྲག་བརྡ་ཐོའི་ཡི་གེའི་ཐོག་གི“ཡི་གེ་ཁ་ཤས”དེས་ཁོང་གི་སྙིང་ལ་གྲི་བཙུགས་པ་ལྟར་ན་ཟུག་ཚད་མེད་བཏང་།

ཉིན་20ཡི་སྨན་བཅོས་བརྒྱུད་མཐར་ཁོང་གི་བཟའ་ཟླ་དྲན་པ་གསོས་ནས་བཤད་པའི་སྐད་ཆ་དང་པོ་དེ“རང་ཡོང་བ་ཡིན་ནམ”ཞེས་པ་དེ་ཡིན། སྐད་ཆ་དེས་ཁོང་ཡུད་ཙམ་རིང་ནད་ཁང་གི་འཁྱམས་རའི་རྐུབ་སྟེགས་ཐོག་ཧོན་ཐོར་ནས་བསྡད།

ལས་གནས་སུ་ལོག་པའི་སྔ་ནུབ་ཏུ་བཟའ་ཟླས“རང་བློ་བདེ་པོས་ལས་ཀ་བྱེད་རོགས། དེ་གར་སེམས་ཁྲལ་བྱེད་དགོས་དོན་མེད”ཅེས་མངགས་བྱ་ཡང་ཡང་བྱས། མུ་ལེས་གདོང་གཤིས་སྐྱོ་བའི་བཟའ་ཟླར་ལྟ་བཞིན་སྐབས་ཤིག་རིང་སེམས་སྡུག་གིས་མིད་པ་འཆུས་ནས་ཤོད་འདོད་པའི་སྐད་ཆ་རྣམས་ཤོད་འཕྲོར་ལུས།

གནས་མོ་སྣ་གཉིས་གངས་རིར་ཉི་འོད་རབ་ཏུ་འཕྲོས་ནས། མཐའ་སྲུང་མི་སྣས་ཉིན་མཚན་དབྱེར་མེད་ངང་བརྟན་སྲུང་བྱས་ཏེ་ནང་མིར་ལྟ་རྟོག་མ་བྱུང་བའི་གནོང་འགྱོད་དེ་མཐའ་མཚམས་ལམ་ཐིག་སྲུང་བའི་སྟོབས་ཤུགས་སུ་གྱུར་ནས། གངས་རླུང་ཁྲོད་འགྱིང་ངེར་གནས་པ་ལྟར་སྣང་།