ཚེས་8ཉིན་ཆེས་མཐོའི་མི་དམངས་ཁྲིམས་ཁང་གི་ལས་དོན་སྙན་སྒྲོན་དང་ཆེས་མཐོའི་མི་དམངས་ཞིབ་དཔྱོད་ཁང་གི་ལས་དོན་སྙན་སྒྲོན་རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་ཚོགས་འདུ་ཐེངས་གསུམ་པར་གྲོས་ཞིབ་བྱ་རྒྱུར་ཕུལ་ཡོད།

ཆེས་མཐོའི་ཁང་གཉིས་ཀྱི་སྙན་སྒྲོན་ནང་འདས་ཟིན་པའི་ལོ་གཅིག་གི་ཁྲིམས་སྐྱོང་ལས་དོན་སྤེལ་ཚུལ་བཀོད་པ་དང་ཆབས་ཅིག གཏུམ་སྤྱོད་ཉེས་གསོག་ལ་ཆད་པ་ནན་པོ་གཅོད་རྒྱུ་དང་གློག་འཕྲིན་དྲ་རྒྱའི་ཁ་བསླུས་ལ་རྡུང་རྡེག་གཏོང་རྒྱུ་སོགས་ཁྲིམས་སྐྱོང་གི་གཙོ་གནད་དང་དཀའ་གནད་ལ་ལན་བཏབ་ནས་དྲང་གཞག་དང་དྲང་བདེན་དེ་བས་ཤེས་རྟོགས་དང་དེ་བས་མྱོང་ཚོར་ཐུབ་པར་བྱས་ཡོད།

གནད་ཚིག་དང་པོ།

གཏུམ་སྤྱོད་ཉེས་གསོག་ལ་ཆད་པ་ནན་པོ་བཅད་པ།

ཆེས་མཐོའི་མི་དམངས་ཁྲིམས་ཁང་གི་ལས་དོན་སྙན་སྒྲོན་ནང་མངོན་པར། རྐང་བཙུགས་ནས་མི་བསད་པ་སོགས་གཏུམ་སྤྱོད་ཉེས་གསོག་གི་གྱོད་གཞི་ཚབས་ཆེན་ཁྲི་4.9དང་མི་ཁྲི་5.8ལ་འདྲི་གཅོད་བྱེད་མཇུག་འགྲིལ་བ་དང་། རྒྱུན་རྣམ་ཅན་གྱི་སྒོ་ནས་ནག་སེལ་གཤེད་བཅོམ་གྱི་བྱ་སྤྱོད་སྤེལ་ཏེ། ནག་གཤེད་རིགས་དང་འབྲེལ་བ་ཡོད་པའི་ཉེས་གསོག་གྱོད་གཞི་ཁག་1663དང་མི་8840ལ་འདྲི་གཅོད་བྱེད་མཇུག་འགྲིལ་ཡོད།

ཆེས་མཐོའི་མི་དམངས་ཞིབ་དཔྱོད་ཁང་གི་ལས་དོན་སྙན་སྒྲོན་ནང་མངོན་པར། རྐང་བཙུགས་ནས་མི་བསད་པ་དང་། འཕྲོག་བཅོམ་བྱས་པ། བཙན་ཁྲིད་བྱས་པ་སོགས་ཀྱི་ཉེས་གསོག་པ་ཁྲི་6.03ཞུ་སྦྱོར་བྱས་པ་དང་། སྤྱི་བདེ་ལས་ཁུངས་ལ་གཞོགས་འདེགས་བྱས་ནས་མི་གསོད་གྱོད་གཞི་དང་ནར་ལུས་གྱོད་གཞི་འགག་སྒྲོལ་བྱས་ཤིང་། ཆེས་མཐོའི་མི་དམངས་ཞིབ་དཔྱོད་ཁང་གིས་གྱོད་གཞི་ཐོན་ནས་ལོ་ཉི་ཤུ་ལྷག་ཙམ་སོང་བའི་མི་གསོད་གྱོད་གཞིར་ཁྲིམས་ལྟར་ཞིབ་མཆན་བཀོད་དེ། མི་336བདའ་འདེད་བཏང་ནས་ཞུ་སྦྱོར་བྱས་པ་དང་། ནག་གཤེད་རིགས་དང་འབྲེལ་བ་ཡོད་པའི་ཉེས་གསོག་པ་ཁྲི་1.2ཞུ་སྦྱོར་བྱས་པ་དང“སྲུང་གདུགས”མི་74ཞུ་སྦྱོར་བྱས་ཡོད།

གནད་ཚིག་གཉིས་པ།

རུལ་སུངས་བར་ཆད་པ་བཅད་པ།

ཆེས་མཐོའི་མི་དམངས་ཁྲིམས་ཁང་གི་ལས་དོན་སྙན་སྒྲོན་ནང་མངོན་པར། ལྐོག་ཟ་ལྐོག་རྔན་སྤྲོད་པ་སོགས་ལས་ཐོག་ཉེས་གསོག་གྱོད་གཞི་ཁག་ཁྲི་3དང་མི་ཁྲི་3.3ལ་འདྲི་གཅོད་བྱེད་མཇུག་འགྲིལ་བ་དང་། རྐང་རྩེད་སྤོ་ལོའི་ཁྱབ་ཁོངས་ཀྱི་རུལ་སུངས་གྱོད་གཞི་རབ་དང་རིམ་པར་ཞིབ་གཅོད་བྱས་ཏེ། ཏུའུ་ཀྲའོ་ཚའེ་དང་། ཁྲེན་ཤུས་ཡོན། ལི་ཐེ་སོགས་ལ་ཁྲིམས་ལྟར་ཉེས་པ་གཏན་འཁེལ་དང་ཁྲིམས་ཆད་བཅད་ཡོད།

ཆེས་མཐོའི་མི་དམངས་ཞིབ་དཔྱོད་ཁང་གི་ལས་དོན་སྙན་སྒྲོན་ནང་མངོན་པར། རིམ་ཁག་ལྟ་ཞིབ་ཨུ་ལྷན་གྱིས་རྩིས་སྤྲད་པའི་ལས་ཐོག་ཉེས་གསོག་པ་ཁྲི་2.7བདག་སྤྲོད་བྱས་པ་དང་མི་ཁྲི་2.4ཞུ་སྦྱོར་བྱས་པ་དེ་དུས་མཚུངས་ལས་37.8%དང་34.9%སོ་སོར་འཕར་བ་དང་། དངུལ་རྩ་དང་། ནུས་རྒྱུ། སྨན་རྫས། རྨང་གཞིའི་འཛུགས་སྐྲུན་ལས་གྲྭ་སོགས་ཁྱབ་ཁོངས་ཀྱི་རུལ་སུངས་ཉེས་གསོག་པ་5081ཞུ་སྦྱོར་བྱས་པ། དམངས་གཉེར་ཁེ་ལས་ཀྱི་འགག་རྩའི་ལས་གནས་ཀྱི་ལས་དོན་པའི་རུལ་སུངས་ཉེས་གསོག་ལ་ཁྲིམས་ལྟར་ཆད་པ་བཅད་ནས་མི་3298ཞུ་སྦྱོར་བྱས་ཡོད།

གནད་ཚིག་གསུམ་པ།

ན་སོ་དར་ལ་མ་བབས་པའི་མིར་སྲུང་སྐྱོང་ བྱེད་ཤུགས་ཆེ་རུ་བཏང་བ།

ཆེས་མཐོའི་མི་དམངས་ཁྲིམས་ཁང་གི་ལས་དོན་སྙན་སྒྲོན་ནང་མངོན་པར། ན་སོ་དར་ལ་མ་བབས་པའི་མིར་བཙན་གནོད་བྱས་པའི་ཉེས་གསོག་གྱོད་གཞི་ཁག་ཁྲི་4དང་མི་ཁྲི་4.1ལ་འདྲི་གཅོད་བྱེད་མཇུག་འགྲིལ་བ་དང་། ན་སོ་དར་ལ་མ་བབས་པའི་ཉེས་གསོག་སྔོན་འགོག་བཅོས་སྒྲིག་བྱེད་ཤུགས་ཆེ་རུ་བཏང་ནས་གུ་ཡངས་དང་ནན་པོ་ཟུང་འབྲེལ་དང་ཆད་གཅོད་དང་སློབ་གསོ་ཟུང་འབྲེལ་བྱས་ཡོད།

ཆེས་མཐོའི་མི་དམངས་ཞིབ་དཔྱོད་ཁང་གི་ལས་དོན་སྙན་སྒྲོན་ནང་མངོན་པར། ན་སོ་དར་ལ་མ་བབས་པའི་མིར་བཙན་གཡེམ་དང་གནོད་འཚེ་བཏང་བ་སོགས་ཀྱི་ཉེས་གསོག་པ་ཁྲི་7.4ཞུ་སྦྱོར་བྱས་པ་དང་། ན་སོ་དར་ལ་མ་བབས་པའི་ཉེས་གསོག་པ་ཁྲི་5.7ཞུ་སྦྱོར་བྱས་པ། ན་སོ་དར་ལ་མ་བབས་པའི་མི་དང་འབྲེལ་འདྲིས་དམ་ཟབ་ཡོད་པའི་ཚན་པར་ལས་ཞུགས་ཆ་འཕྲིན་འཚོལ་བཤེར་བྱེད་དགོས་པའི་སྐུལ་འདེད་བཏང་ནས་མི་1361ལས་ཀར་བསྡུས་མེད།

གནད་ཚིག་བཞི་པ།

གློག་འཕྲིན་དྲ་རྒྱའི་ཁ་བསླུས་ལ་རྡུང་རྡེག་བཏང་བ།

ཆེས་མཐོའི་མི་དམངས་ཁྲིམས་ཁང་གི་ལས་དོན་སྙན་སྒྲོན་ནང་མངོན་པར། གློག་འཕྲིན་དྲ་རྒྱའི་ཁ་བསླུས་ཀྱི་གྱོད་གཞི་ཁག་ཁྲི་4དང་མི་ཁྲི་8.2ལ་འདྲི་གཅོད་བྱེད་མཇུག་འགྲིལ་བ་དང་། འབར་མའི་བྱང་རྒྱུད་སོགས་དང་འབྲེལ་བ་ཡོད་པའི་རྒྱལ་མཚམས་སྒྲོལ་བའི་གློག་འཕྲིན་དྲ་རྒྱའི་ཁ་བསླུས་ནང་ཉེས་གསོག་ལ་ཁྲིམས་ལྟར་ཆད་པ་ནན་པོ་བཅད་ཡོད།

ཆེས་མཐོའི་མི་དམངས་ཞིབ་དཔྱོད་ཁང་གི་ལས་དོན་སྙན་སྒྲོན་ནང་མངོན་པར། གློག་འཕྲིན་དྲ་རྒྱའི་ཁ་བསླུས་ཀྱི་ཉེས་གསོག་ལ་ཁྲིམས་ལྟར་ཆད་པ་བཅད་ནས་མི་ཁྲི་7.8ཞུ་སྦྱོར་བྱས་པ་དེ་དུས་མཚུངས་ལས་53.9%འཕར་ཡོད། ཀྲེ་ཅང་ཞིབ་དཔྱོད་ལས་ཁུངས་ལ་མཛུབ་ཁྲིད་བྱས་ཏེ། འབར་མའི་བྱང་རྒྱུད་ཀྱི་མིང་ཚང་གི་ཉེས་གསོག་ཚོགས་པ་དང་དེ་བཞིན་འབྲེལ་ཡོད་ཉེས་གསོག་ཚོགས་པའི་ཁོངས་མི་39གཞུང་གཏུག་བརྒྱབ་ནས་ཁྲིམས་ལྟར་ཆད་པ་ནན་པོ་བཅད་ཡོད།

གནད་ཚིག་ལྔ་པ།

ཁྲིམས་སྐྱོང་ཅན་གྱི་ཚོང་གཉེར་ཁོར་ཡུག་ མུ་མཐུད་ལེགས་སུ་བཏང་བ།

ཆེས་མཐོའི་མི་དམངས་ཁྲིམས་ཁང་གི་ལས་དོན་སྙན་སྒྲོན་ནང་མངོན་པར། སྒྲིག་འགལ་གྱིས་ས་ཆ་གཞན་དུ་ཁྲིམས་སྒྱུར་དང་ཁེ་ཕན་བརྩོན་ལེན་རང་བཞིན་གྱི་ཁྲིམས་སྒྱུར་གྱོད་གཞིར་ཞིབ་བཤེར་བྱེད་ཤུགས་ཆེ་རུ་བཏང་ནས། ཉེས་དོན་བྱེད་ཐབས་སྤྱད་དེ་དཔལ་འབྱོར་གྱི་རྩོད་གཞིར་ཐེ་གཏོགས་བྱེད་པར་སྔོན་འགོག་ནན་པོ་བྱས་པ་དང་། བདག་དབང་དང་འབྲེལ་བ་ཡོད་པའི་མ་ཉེས་ཁག་གཡོག་དང་ནོར་འཁྲུལ་གྱི་གྱོད་གཞི་46དང་མི་72ལ་ཁྲིམས་ལྟར་བསྐྱར་དུ་འདྲི་གཅོད་དང་ཡོ་བསྲང་བྱས་ནས་མི་13ལ་ཉེས་པ་མེད་པའི་ཁྲིམས་ཐག་བཅད་པ། ཁེ་ལས་ལ་དཀྲོག་གཏམ་བཟོས་པ་དང་བསྙད་འདོགས་རྒྱུ་ལེན་བྱས་པ་སོགས་ཀྱི་ཉེས་གསོག་ལ་ཆད་པ་ནན་པོ་བཅད་ཡོད།

ཆེས་མཐོའི་མི་དམངས་ཞིབ་དཔྱོད་ཁང་གི་ལས་དོན་སྙན་སྒྲོན་ནང་མངོན་པར། སྤྱི་ཚོགས་རིང་ལུགས་ཀྱི་ཁྲོམ་རའི་དཔལ་འབྱོར་སྒྲིག་ལམ་ལ་གཏོར་བཤིག་བཏང་བའི་ཉེས་གསོག་པ་ཁྲི་13.7ཞུ་སྦྱོར་བྱས་པ་དེ་དུས་མཚུངས་ལས་13%འཕར་བ་དང་། སྒོ་ཟམ་འཐེན་པ་དང་། བཀག་ཉར། བསྡམས་བཅད་སོགས་བཙན་ཤེད་ཀྱི་བྱེད་ཐབས་ལ་ལྟ་སྐུལ་བྱེད་ཤུགས་ཆེ་རུ་བཏང་ཡོད།

གནད་ཚིག་དྲུག་པ།

མི་སེར་གྱི་ཁེ་ཕན་སྲུང་སྐྱོང་བྱས་པ།

ཆེས་མཐོའི་མི་དམངས་ཁྲིམས་ཁང་གི་ལས་དོན་སྙན་སྒྲོན་ནང་མངོན་པར། དམངས་དོན་ཁྲིམས་གཞུང་དང་འཚམ་པའི་འབྲེལ་ཡོད་ཁྲིམས་འཛིན་གྱི་འགྲེལ་བཤད་བཟོས་ནས། ཕ་མས་གཉེན་སྒྲིག་བྱས་ཟིན་པའི་བུ་ཕྲུག་ལ་ཁང་པ་ཉོས་པ་དང་། བཟའ་ཚང་ཁ་བྲལ་བའི་རྣམ་པའི་ཐོག་ནས་བུ་ལོན་གཡོལ་ཐབས་བྱེད་པ། ཁྱི་ངན་གྱིས་མི་ལ་རྨུག་པ་སོགས་ཀྱི་རྩོད་གཞིའི་གནད་དོན་ལ་ཁྲིམས་གཅོད་ཀྱི་སྒྲིག་སྲོལ་ཁ་གསལ་བཟོས་པ་དང་། སློབ་གསོ་དང་། རྒན་གསོ། སྨན་བཅོས་སོགས་དམངས་འཚོ་དང་འབྲེལ་བ་ཡོད་པའི་གྱོད་གཞི་ཁག་ཁྲི་548.3གྱི་འདྲི་གཅོད་བྱེད་མཇུག་འགྲིལ་བ། ཚད་མཐོའི་དངུལ་གྲངས་ཧ་ཅང་མང་བའི་སློང་རྟེན་བཅོས་སྐྱོང་སྐོར་གྱི་ཁྲིམས་འཛིན་འགྲེལ་བཤད་ཁྱབ་བསྒྲགས་བྱས་ཡོད།

གནད་ཚིག་བདུན་པ།

དངུལ་རྩའི་བདེ་འཇགས་ལ་དམིགས་པ།

ཆེས་མཐོའི་མི་དམངས་ཞིབ་དཔྱོད་ཁང་གི་ལས་དོན་སྙན་སྒྲོན་ནང་མངོན་པར། དངུལ་རྩའི་ཁ་བསླུས་དང་དངུལ་རྩའི་དོ་དམ་སྒྲིག་ལམ་ལ་གཏོར་བཤིག་བཏང་བའི་ཉེས་གསོག་པ་ཁྲི་2.5དང་། ནོར་དོན་རྫུན་བཟོ་དང་ནང་མོལ་ཉོ་ཚོང་སོགས་འཛིན་ལོར་རིགས་ཀྱི་ཉེས་གསོག་པ་825 “རྟོག་བཟོའི་དངུལ་ལོར”བེད་སྤྱད་ནས་ཉེས་གསོག་ལས་བྱུང་བའི་ཐོབ་ཆ་གཞན་སྒྱུར་སོགས་བཙོག་དངུལ་གཙང་སྒྱུར་གྱི་ཉེས་གསོག་པ་3032བཅས་ཞུ་སྦྱོར་བྱས་ཡོད།

ཆེས་མཐོའི་མི་དམངས་ཁྲིམས་ཁང་གི་ལས་དོན་སྙན་སྒྲོན་ནང་མངོན་པར། དངུལ་རྩའི་གྱོད་གཞི་ཁག་ཁྲི་266འདྲི་གཅོད་བྱེད་མཇུག་འགྲིལ་བ་དེ་དུས་མཚུངས་ལས་12.3%ཆག་པ་དང་། “ཐར་པར་གཏན་ནས་མི་གཏོང་བའི”རྣམ་འགྱུར་གྱི་ཐོག་ནས་ནོར་དོན་རྫུན་བཟོ་དང་ནང་མོལ་ཉོ་ཚོང་སོགས་འཛིན་ལོར་གྱི་དུས་བཅད་ཚོང་ཟོག་གི་ཁྲིམས་འགལ་ཉེས་གསོག་ལ་ཆད་པ་བཅད་ཡོད།

གནད་ཚིག་བརྒྱད་པ།

ངལ་རྩོལ་བའི་ཁེ་དབང་སྲུང་སྐྱོང་བྱས་པ།

ཆེས་མཐོའི་མི་དམངས་ཁྲིམས་ཁང་གི་ལས་དོན་སྙན་སྒྲོན་ནང་མངོན་པར། ངལ་རྩོལ་རྩོད་གཞིའི་གྱོད་གཞི་ཁག་ཁྲི་61.4འདྲི་གཅོད་བྱེད་མཇུག་འགྲིལ་བ་དེ་དུས་མཚུངས་ལས་5.5%འཕར་བ་དང་། “ལས་འཚོལ་དངུལ་བུན་གཏོང་བ”དང“གསོ་སྦྱོང་དངུལ་བུན་གཏོང་བ”སོགས་ཁ་བསླུས་བརྒྱབ་པའི་བྱེད་སྤྱོད་ལ་ཁྲིམས་བཞིན་ཆད་པ་ནན་པོ་བཅད་པ། ངལ་རྩོལ་གྱི་ཐོབ་ཆ་འདེད་ལེན་གྱི་གྱོད་གཞི་ཁག་ཁྲི་8.8འདྲི་གཅོད་བྱེད་མཇུག་འགྲིལ་བ་དང་ཐོབ་ཆ་སྒོར་དུང་ཕྱུར་285.4འདེད་ལེན་བྱས་པ་དེ་དུས་མཚུངས་ལས་4.3%དང་16%སོ་སོར་འཕར་བའི་ནང་ཞིང་པ་ལས་མིའི་གླ་ཆ་སྒོར་དུང་ཕྱུར་18.6ཚུད་ཡོད།

ཆེས་མཐོའི་མི་དམངས་ཞིབ་དཔྱོད་ཁང་གི་ལས་དོན་སྙན་སྒྲོན་ནང་མངོན་པར། རྒྱུན་རྣམ་ཅན་གྱི་སྒོ་ནས་གླ་ཆ་འགྱངས་ཆད་བཅོས་སྐྱོང་གི་ལས་དོན་ནང་ཞུགས་ཏེ་རྐང་བཙུགས་ནས་གླ་ཆ་འགྱངས་ཆད་ཀྱི་ཉེས་གསོག་པ་1140ཞུ་སྦྱོར་བྱས་ནས་ཞིང་པ་ལས་མིས་གླ་ཆ་ལེན་པའི་ཁེ་དབང་སྲུང་སྐྱོང་གི་དམངས་དོན་གཏུག་བཤེར་གྱོད་གཞི་ཁག་ཁྲི་4.04ལ་རྒྱབ་སྐྱོར་བྱས་པ་ལས་གླ་ཆ་འགྱངས་ཆད་སྒོར་དུང་ཕྱུར་15.7འདེད་ལེན་ཐུབ་ཡོད།

གནད་ཚིག་དགུ་པ།

དྲང་གཞག་ཁྲིམས་འཛིན་ལ་སྐུལ་འདེད་བཏང་བ།

ཆེས་མཐོའི་མི་དམངས་ཁྲིམས་ཁང་གི་ལས་དོན་སྙན་སྒྲོན་ལས་མངོན་པར། ལག་བསྟར་དམིགས་སར་འབྱོར་བའི་དངུལ་འབོར་སྒོར་དུང་ཕྱུར་ཁྲི་2.3ཟིན་པ་དེ་དུས་མཚུངས་ལས་3.5%འཕར་ཡོད། ཡིད་རྟོན་མེད་རིགས་ལ་བསླབ་སྡོམ་དང་ཡིད་རྟོན་སླར་གསོའི་ལམ་སྲོལ་འཐུས་སྒོ་ཚང་དུ་བཏང་ནས་ཡིད་རྟོན་མེད་རིགས་ཀྱི་མིང་ཐོའི་ནང་མི་ཐེངས་ཁྲི་245.7བཅུག་པ་དེ་དུས་མཚུངས་ལས་23.4%ཆག་ཡོད། མི་ཐེངས་ཁྲི་282.1ཡིད་རྟོན་སླར་གསོ་ཐུབ་ནས་ཁྲོམ་རར་ཕྱིར་ལོག་ཐུབ་པ་དེ་དུས་མཚུངས་ལས་35.4%འཕར་ཡོད།

གནད་ཚིག་བཅུ་པ།

ཤེས་བྱའི་བདག་དབང་ལ་ཁྲིམས་འཛིན་སྲུང་སྐྱོང་བྱེད་ཤུགས་ཆེ་རུ་བཏང་བ།

ཆེས་མཐོའི་མི་དམངས་ཁྲིམས་ཁང་གི་ལས་དོན་སྙན་སྒྲོན་ནང་མངོན་པར། ཤེས་བྱའི་བདག་དབང་གི་གྱོད་གཞི་ཁག་ཁྲི་49.4འདྲི་གཅོད་བྱེད་མཇུག་འགྲིལ་ཡོད། ཁྲིམས་ལྟར་གསར་གཏོད་ལ་སྲུང་སྐྱོང་ནན་པོ་བྱས་ནས་བསམ་ངན་བཅངས་ཏེ་དབང་ཆར་བཙན་གནོད་བྱས་པའི་གནས་ཚུལ་ཚབས་ཆེའི་གྱོད་གཞི་ཁག་460ལ་ཆད་གཅོད་རང་བཞིན་གྱི་སྐྱིན་ཚབ་འཐུས་སྤྱོད་བྱས་པ་དེ་དུས་མཚུངས་ལས་44.2%འཕར་ཡོད། ཚན་རྩལ་གསར་གཏོད་ཀྱི་བྱེད་པོའི་ཁྲིམས་མཐུན་ཁེ་དབང་ལ་ཁྲིམས་ལྟར་སྲུང་སྐྱོང་བྱས་ཡོད།