འདི་ནི་གངས་ཆེན་པོ་འབབ་སྐབས་དངོས་ཟོག་དབོར་བཞིན་པ།

འདི་ནི་རྒྱལ་སྒོའི་མདུན་དུ་རུ་བསྒྲིགས་ནས་ཉིན་དེའི་ལས་དོན་ལ་ཕྱོགས་སྡོམ་བྱེད་བཞིན་པ།

འདི་ནི་ཁྲིམས་སྐྱོང་དྲིལ་བསྒྲགས་བྱེད་བཞིན་པ།

འདི་ནི་ཞིབ་བཤེར་རྩད་གཅོད་ཐུབ་པའི་བ་སོའི་བཟོས་རྫས་ཡིན་པ།

2025ལོའི་ལོ་འགོར། གཞིས་རྩེ་འགག་སྒོའི་ལེགས་རྩེ་འགག་སྒོ་ལྟ་འདོམས་ས་ཚིགས་ལ“བོད་རང་སྐྱོང་ལྗོངས་བུད་མེད་ཤེས་དཔལ་ལས་གནས”ཀྱི་གཟི་བརྗིད་མཚན་སྙན་ཐོབ་པ་རེད། “གསུམ་བརྒྱད”རྒྱལ་སྤྱིའི་བུད་མེད་དུས་ཆེན་ལ་མཉམ་སྡེབ་དེར་རྒྱལ་ཡོངས་བུད་མེད་མཉམ་འབྲེལ་ལྷན་ཚོགས་ཀྱིས“རྒྱལ་ཡོངས་བུད་མེད་ཤེས་དཔལ་ལས་གནས”ཀྱི་གཟི་བརྗིད་མཚན་སྙན་སྤྲད་ཡོད། གཟི་བརྗིད་དེ་ནི་འགག་སྒོའི་བུད་མེད་ལས་མིའི་ལས་ཀའི་གྲུབ་འབྲས་ལ་ཁས་ལེན་བྱས་པ་ཞིག་ཡིན་པ་མ་ཟད། ཁོང་ཚོས་དཀའ་སྤྱད་འབད་བརྩོན་བྱས་པར་བསྔགས་བརྗོད་བྱས་པ་ཞིག་ཀྱང་རེད།

ས་རྒྱ་ཆེ་ལ་མི་འབོར་ཉུང་བ། རང་དཔེ་གཞན་སྟོན་གྱིས“མཁྲེགས་སར་གཏུག་ཕོད་པར”བྱས་པ།

2023ལོའི་ལོ་འགོར། གཉེན་སྒྲིག་བྱས་ནས་ཡུན་རིང་མ་སོང་བའི་ཉིའུ་ཏན་གྱིས་ལེགས་རྩེ་འགག་སྒོ་འཛུགས་སྐྲུན་ནང་ཞུགས་མཁན་ཁག་དང་པོ་སྐོང་བསྡུ་བྱེད་ཀྱི་ཡོད་པ་ཤེས་འཕྲལ། ཁོང་གིས་རང་འགུལ་ངང་མིང་ཐོ་བཀོད་དེ། “འགག་སྒོའི་དུས་འགོའི་འཛུགས་སྐྲུན་ལས་ཀ་སུས་བསྒྲུབས་ཀྱང་རུང་། ལྷག་པར་དུ་ང་ནི་ཏང་ཡོན་ཞིག་ཡིན་པས་འགན་འཁྲི་གཞན་ལས་ལྕི་བ་ཡོད”ཅེས་བཤད། འབྲོང་པ་རྫོང་དུ་འབྱོར་སྐབས་ཉིའུ་ཏན་གྱིས་གཞི་ནས་དེ་གར་དཀའ་ཚེགས་ཆེན་པོ་ཡོད་པ་ཤེས། མིག་གི་མཐོང་སར་ལྗོན་ཤིང་མེད་པར་ཐལ་རྡུལ་གྱིས་ཁེངས། རྩྭ་རྩི་ཤིང་སྐྱེ་བའི་དུས་ཚིགས་སུ་སླེབས་རུང་འོན་ཀྱང་ལེགས་རྩེ་འགག་སྒོར་གྲང་ངར་ཆེན་པོ་ཡོད། ཉིའུ་ཏན་གྱིས་ཕྱོགས་གཅིག་ནས་ལས་རོགས་སྐུལ་སློང་བྱས་ཏེ་བསམ་བློ་གཅིག་འགྱུར་དང་སྟོབས་ཤུགས་གཅིག་སྒྲིལ་དང་། ཕྱོགས་གཞན་ཞིག་ནས་རང་འགུལ་ངང་རུ་སྣེ་ཁྲིད་དེ་འཐབ་ས་དང་པོར་རང་དཔེ་གཞན་སྟོན་བྱས་ཡོད། འགག་སྒོ་འཛུགས་སྐྲུན་བྱེད་པའི་ཐོག་མའི་དུས་སུ། ལེགས་རྩེ་འགག་སྒོའི་ལྟ་འདོམས་ས་ཚིགས་ཀྱི་བུད་མེད་ལས་མི་ཚོས་ལེགས་རྩེ་འགག་སྒོའི་འཐབ་ས་དང་པོར་མཉམ་དུ་བརྟག་དཔྱད་ཞིབ་འཇུག་ཐེངས་10ལྷག་ཙམ་བྱས་ཏེ། ལེགས་རྩེ་འགག་སྒོ་རྒྱལ་ཁབ་ཀྱི་ཞིབ་བཤེར་རྩིས་ལེན་དང་དངོས་སུ་ཤར་གཏོང་འཁོར་སྐྱོད་བྱེད་རིང་གི་གནད་དོན་དང་དཀའ་ངལ་ཤེས་རྟོགས་བྱས་པ་མ་ཟད། “ས་གནས་ས་ཐོག་ཏུ་གཞུང་དོན་སྒྲུབ་པའི”རྣམ་པའི་ཐོག་ནས་འཕྲལ་མར་གནད་དོན་50ལྷག་ཙམ་ཐག་གཅོད་བྱེད་རོགས་བྱས་ཡོད།

དུས་ཐུང་ཟླ་བ་གསུམ་རིང་ཁོང་ཚོས་འགག་སྒོའི་སྒྲིག་ཆས་དང་གློག་མིག་སོགས་ཚང་མ་སྒྲིག་སྦྱོར་བྱས་པར་རྒྱལ་ཁབ་རིམ་པའི་ཞིབ་བཤེར་རྩིས་ལེན་བདེ་བླག་བྱུང་བ་མ་ཟད། 2023ལོའི་ཟླ་11ཚེས་13ཉིན་དངོས་སུ་སྤྱོད་འགོ་ཚུགས་ཡོད།

འགག་རྩར་དམ་པོར་དམིགས་པ། ཕྱིར་བཤོལ་སྤུ་ཙམ་མེད་པར་འགན་འཁྲི་ཕྲག་ཏུ་ཁུར་བ།

དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ་20ཡི་དགུན་གྱི་གངས་ཐོག་མ་འབབ་པའི་ཞོགས་པ་ཞིག་ལ། འགག་སྒོའི་ལས་མི་ཚོས་ཉིན་གཅིག་གི་ལས་ཀ་སྒྲུབ་འགོ་ཚུགས། འགག་སྒོའི་ལས་མི་ཟླ་སྒྲོན་དང་ལས་རོགས་ཚོ་རུ་བསྒྲིགས་ནས་ཡུལ་སྐོར་ཞིབ་བཤེར་ཚོམས་ཆེན་དུ་ཡོང་། ལས་དོན་བཀོད་སྒྲིག་གཞིར་བཟུང་འགག་སྒོའི་ཉིང་རྡུལ་འགྱེད་འཕྲོའི་ལྟ་ཞིབ་ཚད་ལེན་ཡོ་ཆས་དང་སྨུག་ཕྱིའི་འོད་ཀྱི་གཟུགས་པོའི་དྲོད་ཚད་བརྟག་དཔྱད་འཕྲུལ་འཁོར་གྱི་གློག་སྤོར་བ་དང་རྒྱུན་གཏན་གྱི་ཚོད་ལྟ་སྙོམས་སྒྲིག་བྱེད་འགོ་ཚུགས། རླུང་གནོན་དམའ་བ་དང་མཐོ་གྲང་གི་གནམ་གཤིས་ཀྱིས་རྐྱེན་པས་ཚོད་ལྟ་སྙོམས་སྒྲིག་གི་ལས་དོན་ཡང་ཡང་བསྒྲུབས་རྗེས་གཞི་ནས་ལེགས་གྲུབ་ཐུབ་ཀྱི་ཡོད། འགག་སྒོ་ཤར་གཏོང་ཐུབ་པ་ནས་བཟུང་། ལྟ་འདོམས་ས་ཚིགས་ཀྱི་འགག་སྒོའི་བུད་མེད་ལས་མི་ཚོས་འགག་སྒོ་སྒྲོལ་བའི་བརྒྱུད་རིམ་འཐུས་སྒོ་ཚང་དུ་བཏང་སྟེ་འགག་སྒྲོལ་ལྟ་འདོམས་དང་འཕྲོད་བསྟེན་ནད་ཡམས་ཞིབ་བཤེར་གྱི་བརྒྱུད་རིམ་ཧྲིལ་པོ་དང་རྒྱུ་རྐྱེན་གཙོ་བོ་ཚང་མའི་ལས་སྒོའི་གསོ་སྦྱོང་ཐེངས་12བྱས་པ་དང་། འགག་སྒོ་སྒྲོལ་བའི་འགྲུལ་པ་དང་རྡོག་ཁྲེས་ཞིབ་བཤེར་སོགས་འགྲུལ་པའི་ཞིབ་བཤེར་བརྒྱུད་རིམ་བཞི་དང་ཟུང་འབྲེལ་བྱས་ནས་ལས་ཀའི་ཇུས་གཞི་དང་སྔོན་ཇུས་སོགས་ཀྱི་ལམ་ལུགས་16ཙམ་འཐུས་སྒོ་ཚང་དུ་བཏང་སྟེ། འགག་སྒོ་བདེ་འཇགས་ངང་སྒྲོལ་བར་ལམ་ལུགས་ཀྱི་འགན་ལེན་བྱས་ཡོད།

དམིགས་ཡུལ་བློ་ལ་བརྟན་པོར་འཆང་བ། ནུས་ཤུགས་ཡོད་རྒུས“ཞབས་ཞུའི”ལས་དོན་བསྒྲུབས་པ།

འབྲོང་པ་རྫོང་ལ་ཚྭ་གཏེར་དང་འབྲོག་ལས་ཐོན་ཁུངས་ཕུན་སུམ་ཚོགས་པོ་ཡོད། འགག་སྒོ་ཕྱེ་བ་བརྒྱུད་རྩྭ་ཐང་དང་ནོར་ལུག་འཚོ་རྟེན་དུ་བྱེད་པའི་འབྲོག་པ་ཚོས་རང་གི་སྒོ་རྩར་ཚོང་རྒྱག་ཐུབ་པ་དང་། འཚོ་བའི་གདམ་ག་སྔར་ལས་སྣ་མང་ཅན་དུ་གྱུར་ནས་ས་གནས་དེ་གའི་མཐའ་མཚམས་མི་སེར་གྱིས་དུས་ཡུན་རིང་པོའི་ནང་མི་དང་ཕྱུགས་རིགས་ཀྱིས་ཁལ་འཁུར་བ་དང་དངོས་ཟོག་བརྗེ་རེས་བྱེད་པའི་སྲོལ་རྒྱུན་གྱི་མཐའ་མཚམས་ཉོ་ཚོང་བྱེད་སྟངས་ཕྱོགས་ཡོངས་ནས་ལེགས་སུ་ཕྱིན་པ་དང་། མཐའ་མཚམས་ཉོ་ཚོང་སྔར་བས་དར་རྒྱས་བྱུང་བ། མཐའ་མཚམས་མི་སེར་གྱི་བདེ་རྩ་སྔར་བས་ཆེ་རུ་ཕྱིན་ཡོད།

འགག་སྒོ་ཕྱེ་བ་ཐོག་མའི་དུས་སུ། དངོས་གཞིའི་ཐབས་ལམ་བརྒྱུད་ནས་ཉོ་ཚོང་བྱེད་པའི་ཐད་རྒྱལ་ཁབ་གཉིས་ཀྱི་མཐའ་མཚམས་མི་སེར་ལ་ད་དུང་དོགས་པ་དང་ཐེ་ཚོམ་སྐྱེ་ཡི་ཡོད། གཞིས་རྩེ་འགག་སྒོའི་ལེགས་རྩེ་ལྟ་འདོམས་ས་ཚིགས་ཀྱི་བུད་མེད་བློ་མཐུན་ཚོས་རང་ངོས་ཀྱི་གང་ལེགས་བཏོན་ཏེ། འབྲོང་པ་རྫོང་གི་འབྲོག་ལས་ཕྱིར་གཏོང་ལ་རོགས་རམ་བྱེད་པའི་ཆེད་དོན་བྱ་སྤྱོད་སྤེལ་བ་དང་། ལུག་གི་རིམས་ནད་བརྟག་དཔྱད་གྲལ་བཤེར་བྱས་ཏེ་སྲིད་ཇུས་གསལ་འགྲེལ་དང་ལས་སྒོའི་བློ་འདྲི་སོགས་ཀྱི་བྱེད་ཐབས་བརྒྱུད་ས་གནས་དེ་གའི་འབྲོག་པ་དང་ཚྭའི་ཁེ་ལས་ལ་ལུག་དང་གཏེར་ཚྭ་ཕྱིར་གཏོང་ཉོ་ཚོང་བྱེད་སྟངས་བསླབས་ཡོད།

ལེགས་རྩེ་འགག་སྒོའི་ལྟ་འདོམས་ས་ཚིགས་ཀྱི་བུད་མེད་བློ་མཐུན་ཚོས་འགག་སྒོའི་མཐའ་མཚམས་མི་སེར་ལ་མང་ཚོགས་དབྱེ་བ་དང་། ངོ་ཐུག་གདོང་འཕྲད། མཉམ་འགུལ་བཅས་བྱས་ནས་ཚོང་གཉེར་ཁོར་ཡུག་ལེགས་སུ་གཏོང་བའི་སྲིད་ཇུས་རིགས་ཀྱི་བཞུགས་མོལ་ཚོགས་འདུ་ཐེངས་གསུམ་འཚོགས་པ་དང་། འགག་སྒོའི་མང་ཚོགས་ཀྱི་བཅའ་ཁྲིམས་ཤེས་ཚད་མཐོ་རུ་དང་ཁྲིམས་སྲུང་གི་རྨང་གཞི་བརྟན་དུ་བཏང་བ་མ་ཟད། མཐའ་མཚམས་མི་སེར་གྱིས་ལེགས་རྩེ་འགག་སྒོ་འཛུགས་སྐྲུན་དང་སྒྱུར་བཅོས་ཀྱི་དོན་སྙིང་ལ་ངོས་འཛིན་བྱེད་ཚད་ཟབ་ཏུ་བཏང་བ་དང་། ས་གནས་དེ་གའི་མཐའ་མཚམས་མི་སེར་ལ་མཐུན་སྒྲིལ་སྣེ་ཁྲིད་བྱས་ནས་རྒྱབ་སྐྱོར་མི་བྱེད་པའི་སྲིད་ཇུས་དང་ལུགས་མཐུན་མིན་པའི་ལྟ་འདོམས་ཀྱི་སྲོལ་རྒྱུན་མཐའ་མཚམས་ཉོ་ཚོང་བྱེད་སྟངས་མེད་པ་བཟོས་ནས། འབྲོང་པ་རྫོང་གི་ས་གནས་དེ་གའི་ཕྱི་ཕྱོགས་ཚོང་དོན་ཁེ་ལས་6དང་མཐའ་མཚམས་མི་སེར་དུད་ཚང་32ཚྭ་དང་ལུག་ཉོ་ཚོང་ནང་ཞུགས་རྒྱུར་སྐུལ་འདེད་བཏང་བ། ཚྭ་ཏུན་40ལྷག་ཙམ་དང་ལུག་མགོ་གྲངས་5400ལྷག་ཙམ་ཕྱིར་གཏོང་ཐུབ་པར་འགན་ལེན་བྱས་ཡོད།

ས་མཐོའི་ཁྱད་ལྡན་ཐོན་རྫས་དེ་བས་མང་བ་ཕྱིར་གཏོང་དང་ནེ་པ་ལའི་སྤུས་ལེགས་ཐོན་རྫས་ནང་འདྲེན་བྱས་པ་དང་ཆབས་ཅིག་རྒྱལ་ཁབ་གཉིས་པོའི་མི་དམངས་ཀྱིས་དཔལ་འབྱོར་ཚོང་དོན་འགྲོ་འོང་དང་རིག་གནས་སྤེལ་རེས་ཁྲོད་ཕན་ཚུན་ཤེས་རྟོགས་དང་། འབྲེལ་འདྲིས། ཕྱར་བ་གྲུ་འདེགས་བཅས་བྱས་ནས་རྒྱལ་ཁབ་གཉིས་པོའི་འབྲེལ་བ་མུ་མཐུད་ཟབ་ཏུ་བཏང་ཡོད།