འདི་ནི་བོད་ལྗོངས་Ｓ5ལམ་ཐིག་ཤར་གཏོང་ཐུབ་པ་ནས་བཟུང་ལྷ་ས་གྲོང་ཁྱེར་ནས་ལྷོ་ཁའི་སྣེ་གདོང་བར་གྱི་ལམ་ཐག་ཆུ་ཚོད་ཕྱེད་ཀ་ཐུང་དུ་ཕྱིན་པ།

ལྷོ་ཁ་གྲོར་ཁྱེར་གྲ་ནང་རྫོང་བསམ་ཡས་གྲོང་རྡལ་གནས་མགོ་གྲོང་ཚོ་དང་ལྷ་ས་གྲོང་ཁྱེར་སྟག་རྩེ་ཆུས་ཤིང་ཚང་གྲོང་ཚོའི་དབར་ཐད་ཀའི་བར་ཐག་སྤྱི་ལེ་24ལས་མེད། དེ་སྔ་རི་མཐོན་པོས་བཀག་སྟེ་གནས་མགོ་གྲོང་ཚོ་ནས་ཤིང་ཚང་གྲོང་ཚོ་བར་ཆུ་ཚོད་གསུམ་ནས་བཞི་བར་འགོར་གྱི་ཡོད།

འགྲིམ་འགྲུལ་སྔོན་ལ་ཤར་གཏོང་བྱས་ནས་གྲོང་ཁྱེར་དང་གྲོང་གསེབ་མཉམ་དུ་ཕྱུག་པོ་ཆགས་པར་བྱས་པ།

ཉེ་བའི་ལོ་ཤས་རིང་ལྷོ་ཁ་གྲོང་ཁྱེར་གྱིས་འགྲིམ་འགྲུལ་གྱི་རྨང་གཞིའི་སྒྲིག་བཀོད་འཛུགས་སྐྲུན་ལ་མ་དངུལ་གཏོང་ཤུགས་རྒྱུན་ཆད་མེད་པར་ཆེ་རུ་བཏང་ནས་སྔ་རྗེས་སུ་གཞུང་ལམ་ལས་གྲྭ་མང་པོ་ལག་བསྟར་བྱས་ཡོད།

ལྷ་ས་གོང་དཀར་གནམ་ཐང་ནས་རྩེད་ཐང་བར་གྱི་ཆེད་སྤྱོད་རིམ་མཐོའི་གཞུང་ལམ་བསྐྲུན་ནས་རླངས་འཁོར་ཤར་གཏོང་བྱས་པ་དང་། དེ་བཞིན་བོད་ཀྱི་Ｓ5ལམ་ཐིག་ཏུ་རླངས་འཁོར་ཚོད་ལྟའི་ཤར་གཏོང་བྱས་པ་དང་ཆབས་ཅིག གྲོང་ཁྱེར་ཡོངས་ཀྱི“ལྕགས་ལམ་དང་། གཞུང་ལམ། དམངས་སྤྱོད་མཁའ་འགྲུལ”བཅས་ཀྱི་ཕྱོགས་བསྡུས་འགྲིམ་འགྲུལ་སྐྱེལ་འདྲེན་མ་ལག་རགས་ཙམ་ཆགས་ཡོད། མིག་སྔའི་བར་ཁོངས་གཏོགས་ཁུལ་དུ་རྒྱལ་ལམ་3བསྐྲུན་པ་དང་རླངས་འཁོར་ཤར་གཏོང་ལམ་ཐག་སྤྱི་ལེ་1324ཟིན་ཞིང་། ཞིང་ཆེན་ལམ་7བསྐྲུན་པ་དང་རླངས་འཁོར་ཤར་གཏོང་ལམ་ཐག་སྤྱི་ལེ་1376ཟིན་ནས་རྒྱལ་ཁབ་དང་ཞིང་ཆེན་གྱི་མ་ལམ་གཞུང་ལམ་བཀོད་སྒྲིག་སྔར་བས་ལེགས་སུ་ཕྱིན་ཡོད།

ལྷག་པར་དུ་གླེང་རིན་ཡོད་པ་ཞིག་ནི“ལོ་ལྔ་ཚན་བཅུ་བཞི་པའི”ཚུན་དུ་ལྷོ་ཁ་གྲོང་ཁྱེར་གྱིས་རིམ་རྩིས་བརྒྱབ་ན། གྲོང་གསེབ་ཀྱི་གཞུང་ལམ་སྲིད་འཛིན་གྲོང་ཚོར་ཤར་གཏོང་གི་རྣམ་གྲངས་30ལག་བསྟར་བྱས་པ་དང་། གྲོང་ཁྱེར་ཡོངས་ཀྱི་ཤང་དང་གྲོང་རྡལ་དང་། སྲིད་འཛིན་གྲོང་ཚོར་གཞུང་ལམ་ཤར་གཏོང་བྱེད་ཚད་100%དང་93.67%སོ་སོར་ཟིན་པ་མ་ཟད། གྲོང་གསེབ་གཞུང་ལམ་ཕྱོགས་ཡོངས་ནས་རིམ་སྤོར་བྱས་ཡོད་པ་རེད།

ཐོན་ལས་དར་བ་དང་ལས་ཞུགས་བརྟན་པོར་བརྟེན་ནས་གྲོང་གསེབ་འབྱོར་ཕྱུག་ཡོང་བར་བྱས་པ།

གྲ་ནང་རྫོང་གྲ་ཐང་གྲོང་རྡལ་གྱི་གཞོན་ནུ་ཚེ་རིང་དངོས་གྲུབ་ལོ་གསུམ་བསྟུད་མར་གཞུང་རྒྱུགས་ལོན་མེད། གྲོགས་པོ་རྣམས་རེ་རེ་བཞིན་ལས་གནས་སུ་བསྐྱོད་པ་མཐོང་སྐབས་ཚེ་རིང་དངོས་གྲུབ་ཀྱི་ལས་ཀ་འཚོལ་བའི་སེམས་ཤུགས་ཡང་འཕེལ། 2024ལོའི་དཔྱིད་དུས་སུ་ཁོང་སྟབས་ལེགས་པ་ཞིག་ལ་ཀྲུང་གོ་རླངས་འཁོར་ཚོགས་པས་བསྡུས་པ་དང་ཀྲུའུ་ཀྲོའུ་རུ་ཟླ་བ་ཁ་ཤས་རིང་སློབ་སྦྱོང་ཧུར་ཐག་བྱས་པ་བརྒྱུད། གློག་འདྲེན་དང་གློག་སྒྱུར་སྒྲིག་ཆས་སྒྲིག་སྦྱོར་ལག་རྩལ་ཁོང་དུ་ཆུད་པ་རེད། ད་ཆ་སློབ་མཐར་ཕྱིན་པའི་ཚེ་རིང་དངོས་གྲུབ་ནི་ཀྲུང་གོ་རླངས་འཁོར་ཚོགས་པའི་ལྷོ་ཁའི་ནུས་རྒྱུ་གཙང་མའི་སྒྲིག་ཆས་ཐོན་ལས་གླིང་གི་ལས་བཟོ་ཞིག་རེད།

ཉེ་བའི་ལོ་ཤས་རིང་ལྷོ་ཁ་གྲོང་ཁྱེར་གྱིས་ཏང་ཀྲུང་དབྱང་དང་རང་སྐྱོང་ལྗོངས་ཀྱི་འབྲེལ་ཡོད་ཚོགས་འདུའི་དགོངས་དོན་ལག་བསྟར་གཏིང་ཟབ་བྱས་ཏེ་ལས་ཞུགས་བརྟན་ལ་འབབ་འཕར་ཡོང་བར་སྐུལ་འདེད་གཏོང་བ་དང་། དམངས་འཚོ་མུ་མཐུད་འགན་ལེན་དང་ལེགས་སུ་གཏོང་བའི་རྨང་གཞིའི་ཐོག་ཐོན་ལས་དར་རྒྱས་དེ་གྲོང་གསེབ་དར་རྒྱས་ཀྱི་ལས་འགན་ཨང་དང་པོར་བརྩིས་ནས་གྲོང་གསེབ་དར་རྒྱས་ལ་ཕྱོགས་ཡོངས་ནས་རོགས་རམ་བྱས་ཡོད། ཀུ་ཤུ་དང་། ཁམ་བུ། རྒུན་འབྲུམ། བོད་བྱ་སོགས་ཐོན་ལས་དར་ཁུལ་གཅིག་རྗེས་གཉིས་མཐུད་དུ་བསྐྲུན་ཏེ། ཁྱད་ལྡན་ཐོན་ཁུངས་ལ་གཞི་ཚུགས་ནས་ཁྱད་ལྡན་ཞིང་འབྲོག་ཐོན་རྫས་ལས་སྣོན་ལས་རིགས་དང་གྲོང་གསེབ་ཡུལ་སྐོར་ལས་རིགས་རྒྱུན་ཆད་མེད་པར་རྒྱ་སྟོབས་ཆེ་རུ་གཏོང་བ་དང་། ཐོན་ལས་འཁོར་འབྲེལ་རྒྱ་ཆེར་གཏོང་བ། ཟུར་སྣོན་རིན་ཐང་ཆེ་རུ་གཏོང་བ་བཅས་བྱས་པ་རེད།

ཤེས་དཔལ་སྲོལ་བཟང་ལ་བརྟེན་ནས་གྲོང་གསེབ་དར་རྒྱས་བཏང་བ།

2024ལོའི་ཡུལ་སྐོར་བ་མང་བའི་དུས་སུ་བོད་ཀྱི་ལྷ་མོའི་གྲོང་ཚོ་དང་པོ་ཞེས་གྲགས་པའི་སྣེ་གདོང་ཆུས་ཁྲ་འབྲུག་གྲོང་རྡལ་བཀྲ་ཤིས་མཆོད་རྟེན་སྡེ་ཁུལ་དུ་ཕྱོགས་བཞི་མཚམས་བརྒྱད་ཀྱི་མགྲོན་པོས་ཁེངས།

ཉེ་བའི་ལོ་ཤས་རིང་ལྷོ་ཁ་གྲོང་ཁྱེར་གྱིས“ཤེས་དཔལ་སྲོལ་གསར་གཏོད། གོམས་སྲོལ་ངན་པ་སྒྱུར། གྲོང་སྲོལ་དམངས་ཆིངས་འཛུགས། ཕུལ་བྱུང་རིག་གནས་དར། མཛེས་སྡུག་གྲོང་གསེབ་སྐྲུན”བཅས་པ་ནང་དོན་གཙོ་བོར་བྱེད་པའི་ཞིང་འབྲོག་པའི་རྣམ་པ་གསར་པ་གཏོད་པའི་བྱ་སྤྱོད་ཕྱོགས་ཡོངས་ནས་སྤེལ་བ་རེད། མིག་སྔའི་བར་གྲོང་ཁྱེར་ཡོངས་སུ་གྲོང་ཚོ་རིམ་པའི་རིག་རྩལ་དྲིལ་བསྒྲགས་རུ་ཁག་540བཙུགས་པ་དང་། གྲོང་གསེབ་ཀྱི་རིག་གནས་སྤུས་རྟགས་77བཙུགས་པ། དུས་རབས་གསར་པའི་དཔལ་ཡོན་ལག་ལེན་ས་ཚིགས་549བཙུགས་པ། དང་བླངས་ཞབས་ཞུའི་རུ་ཁག་2724བཙུགས་ཡོད། དེ་དང་ཆབས་ཅིག་ལྟ་སྦྱོང་སློབ་སྦྱོང་སྒྲིག་འཛུགས་དང་། སྔོན་ཐོན་དཔེ་མཚོན་འདེམས་པ། དྲིལ་བསྒྲགས་སློབ་གསོར་ཤུགས་སྣོན་རྒྱག་པ་སོགས་ཀྱི་བྱ་ཐབས་བརྒྱུད། རྒྱ་ཆེའི་ཞིང་འབྲོག་མང་ཚོགས་ལ་སྲོལ་རྙིང་དང་གོམས་སྲོལ་ངན་པ་དོར་ནས་ཤེས་དཔལ་གྱི་སྲོལ་གསར་དར་སྤེལ་གཏོང་རྒྱུའི་ཁྲིད་སྟོན་བྱས་ཡོད།

2024ལོར་རང་སྐྱོང་ལྗོངས་རྒྱལ་ཁབ་ཀུན་སྤྱོད་སྐད་ཡིག་འགྲན་བསྡུར་ཁྲོད་ལྷོ་ཁ་གྲོང་ཁྱེར་ལྷོ་བྲག་རྫོང་ལྷ་ཁང་གྲོང་རྡལ་སྡུར་གྲོང་ཚོའི་གྲོང་མི་བསྟན་འཛིན་ཡོན་ཏན་ལ་ཞིང་འབྲོག་པའི་ཚོགས་ཆུང་གི་ཨང་དང་པོ་ཐོབ་པ་དང་། ལྗོངས་ཡོངས་ཀྱི་ཞིང་འབྲོག་པའི་རྒྱལ་ཁབ་ཀྱི་སྤྱི་སྤྱོད་སྐད་ཡིག་གཏམ་བཤད་འགྲན་བསྡུར་སྐབས་གཉིས་པའི་ནང་། ལྷོ་ཁ་གྲོང་ཁྱེར་གྱི་འགྲན་ཞུཌ་པ་3ལ་བྱ་དགའ་རིམ་པ་གཉིས་པ་ཐོབ་པ་དང་འགྲན་ཞུགས་པ་1ལ་བྱ་དགའ་རིམ་པ་གསུམ་པ་ཐོབ་པ་རེད།