འདི་ནི་མི་དམངས་ཉེན་རྟོག་པ་པད་མ་རྡོ་རྗེས(གཡས)ཐུགས་རྗེ་ཆེ་ཞུ་བའི་ཡི་གེ་དང་གོས་དར་འཁྱེར་ནས་དྲན་རྟེན་པར་རྒྱག་བཞིན་པ།

འདི་ནི་མི་དམངས་ཉེན་རྟོག་པ་པད་མ་རྡོ་རྗེར་འབྱོར་བའི་ཐུགས་རྗེ་ཆེ་ཞུ་བའི་ཡི་གེ་ཡིན་པ།

ཉེ་ཆར། གཞིས་རྩེ་གྲོང་ཁྱེར་བསམ་གྲུབ་རྩེ་ཆུས་སྤྱི་བདེ་ཅུས་པང་གཅལ་གོང་གྲོང་ལྷན་དམངས་ཕན་ཉེན་རྟོག་ཞབས་ཞུའི་ས་ཚིགས་ཀྱི་མི་དམངས་ཉེན་རྟོག་པ་པད་མ་རྡོ་རྗེར་སི་ཁྲོན་ནས་བསྐུར་བའི་དམིགས་བསལ་གྱི་བསྐུར་མ་ཞིག་འབྱོར། པད་མ་རྡོ་རྗེས་ཡ་མཚན་ཆེན་པོས་བསྐུར་མའི་ཁ་ཕྱེ་སྐབས་དེའི་ནང་དུ“མེ་གསོད་དཔའ་བོའི་སྙིང་སྟོབས་བསྔགས། མི་དམངས་ཉེན་རྟོག་བཀའ་དྲིན་ཆེ”ཞེས་འཁོད་པའི་གོས་དར་ཞིག་དང་ཐུགས་རྗེ་ཆེ་ཞུ་བའི་ཡི་གེ་ཞིག་ཡོད། དར་གོས་དེ་ནི་ཁྲེང་ཏུའུ་ཡི་ཇ་ཁང་ཞིག་ནས་བསྐུར་བ་དང་དེའི་གནས་ཚུལ་ངོ་མ་ནི་མི་སེམས་འགུལ་བའི་ཉེན་རྟོག་པའི་གཏམ་རྒྱུད་ཅིག་རེད།

ཉེ་དུས། ནད་གཞིས་རྐྱེན་པས་ལས་དགོངས་ཞུས་ནས་ཁྲེང་ཏུའུ་རུ་གཟུགས་པོར་བརྟག་དཔྱད་བྱེད་པར་བསྐྱོད་པའི་པད་མ་རྡོ་རྗེ་བརྟག་དཔྱད་ཚར་རྗེས་ཇ་ཁང་ཞིག་ཏུ་ཟ་མ་བཟའ་བར་བསྐྱོད། སྐབས་དེ་དུས་ཁོང་གིས་ཟ་ཁང་གི་ཐབ་ཚང་ནས་དུ་བ་ལང་ལོང་དུ་འཕྱུར་བ་མཐོང་འཕྲལ་ལམ་སེང་ཟ་མ་བཟའ་འཕྲོ་བཞག་ནས་མེ་གསོད་ཡོ་ཆས་འཁྱེར་ཏེ་ཐབ་ཚང་ཕྱོགས་སུ་བསྐྱོད་པ་དང་ཆབས་ཅིག སྐད་ཤུགས་ཆེན་པོས་མང་ཚོགས་ལ“དེར་ཉེན་ཁ་ཆེ་བས་ཚང་མ་མགྱོགས་པོ་བྲོས་རྒྱུག མེ་ངས་གསོད་ཆོག”ཅེས་བཤད།

ནུས་ཤུགས་ཡོད་རྒུས་མེ་བསད་མཐར་ཐབ་ཚང་གི་མེ་སྐྱོན་གསོད་ཐུབ་པ་བྱུང་། མེ་མགྱོགས་མྱུར་གསོད་ཐུབ་པས། ད་ཐེངས་ཀྱི་མེ་སྐྱོན་ལས་གྱོང་གུན་ཚབས་ཆེན་བཟོས་མེད་པ་རེད།

“གལ་སྲིད་ཁྱེད་རང་མེད་ཚེ་ངའི་ཟ་ཁང་དངོས་འབྲེལ་དཔེ་བསགས་སོང་། ཁྱེད་ལ་ཐུགས་རྗེ་ཆེ་ཞུ་གི་ཡིན”ཞེས་ཟ་ཁང་གི་སྦྱིན་བདག་གིས་འདར་སྐད་དང་སྦྲགས་དེ་ལྟར་བཤད། པད་མ་རྡོ་རྗེས“དེ་ནི་ངས་སྒྲུབ་འོས་པའི་བྱ་བ་ཞིག་རེད། གནས་ཚུལ་དེ་རིགས་ཉེན་རྟོག་པ་སུ་ཞིག་ལ་འཕྲད་རུང་ཚང་མས་རོགས་པ་བྱེད་སྲིད”ཅེས་བཤད།

བསམ་གྲུབ་རྩེ་ཆུས་སྤྱི་བདེ་ཅུས་པང་གཅལ་གོང་གྲོང་ལྷན་དམངས་ཕན་ཉེན་རྟོག་ཞབས་ཞུའི་ས་ཚིགས་ཀྱི་ཉེན་རྟོག་པ་ཞིག་ཡིན་པའི་པད་མ་རྡོ་རྗེས་རྒྱུན་དུ་བདེ་འཇགས་སྐོར་གཡེང་དང་། ཉེན་བརྡ་དང་ལེན་དང་ཐག་གཅོད། མང་ཚོགས་ཀྱི་རོགས་སྐྱོབ་དང་ལེན། མེ་གསོད་བདེ་འཇགས་ཞིབ་བཤེར་སོགས་ཀྱི་ལས་ཀ་བྱེད་བཞིན་ཡོད།

པད་མ་རྡོ་རྗེས་གསར་འགོད་པར་ད་ཐེངས་མེ་སྐྱོན་མགྱོགས་མྱུར་གསོད་ཐུབ་པ་དེ་རྒྱུན་ལྡན་གྱི་ལས་ཀའི་སྦྱོང་བརྡར་ལས་བྱུང་བ་ཞིག་རེད། རྒྱུན་ལྡན་གྱི་ལས་ཀའི་ཁྲོད་ངས་ཁོངས་གཏོགས་ཁུལ་དུ་བསྐྱོད་དེ་མང་ཚོགས་དང་ཅི་འཕྲོས་མོལ་འཕྲོས་བྱེད་པ་དང་། མེ་ཟོན་བདེ་འཇགས་གསོ་སྦྱོང་བྱེད་པ། ཚང་མར་མེ་གསོད་ཡོ་ཆས་སྤྱོད་སྟངས་སློབ་པ་བཅས་བྱས་པས་ཡོ་ཆས་དེ་ངས་བྱང་ཆུབ་པ་སྤྱོད་ཤེས་ཀྱི་ཡོད་ཅེས་བཤད།

སྐབས་དེ་དུས་ཀྱི་གནས་ཚུལ་ཧ་ཅང་ཛ་དྲག་པོ་འདུག་པས། ངའི་སེམས་ནང་མེ་སྐྱོན་མགྱོགས་ཙམ་གསོད་ཐུབ་ན་བསམ་པ་ལས་བསམ་བློ་གཞན་འཁོར་མ་བྱུང་། སྦྲག་ཐོག་བསྐུར་མ་འབྱོར་སྐབས་ང་རང་ཡང་ཧང་སངས་བྱུང་། གོས་དར་དང་ཐུགས་རྗེ་ཆེ་ཞུ་བའི་ཡི་གེ་མཐོང་སྐབས་སེམས་ནང་བརྗོད་མི་ཤེས་པའི་སྤོབས་སེམས་ཤིག་སྐྱེ་བ་དང་ཁྱིམ་དུ་ལོག་རྗེས་ནང་མིར་དོན་དག་དེའི་སྐོར་བཤད་པ་ཡིན། གོས་དར་དང་ཐུགས་རྗེ་ཆེ་ཞུ་བའི་ཡི་གེ་ནི་མང་ཚོགས་ཚོས་ང་ཚོའི་ལས་ཀར་ཁས་ལེན་བྱས་པ་མཚོན་གྱི་ཡོད། བདེ་འཇགས་སྐོར་ཞིབ་དང་རོགས་སྐྱོབ་བྱེད་ཐེངས་ཚང་མ་མི་དམངས་ཀྱི་བདེ་འཇགས་སྲུང་བའི་དམ་བཅའ་ལག་ལེན་བསྟར་བ་ཞིག་ཡིན། རྗེས་སུ་ངས་ཁོངས་གཏོགས་ཁུལ་གྱི་ས་ཆ་ཚང་མ་ཡག་པོ་བསྲུངས་ནས་བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་གི་ཡིན”ཞེས་གོས་དར་སྐོར་གླེང་སྐབས་པད་མ་རྡོ་རྗེས་སེམས་འགུལ་ཐེབས་བཞིན་དེ་ལྟར་བཤད།