“ཁྱེད་ཚོས་ང་ཚོའི་གླ་ཆ་ལེན་རོགས་བྱས་པར་ཐུགས་རྗེ་ཆེ་ཞུ་གི་ཡིན” ལོ་འགོ་ལོ་མཇུག་ནི་ཞིང་པ་ལས་མིའི་གླ་ཆ་འགྱངས་ཆད་ཀྱི་གནད་དོན་ཐོན་མང་བའི་དུས་ཡིན་ལ། སྤྱི་ཚོགས་ཀྱི་ཉེན་ཁ་འགོག་སེལ་གྱི་འགག་རྩའི་དུས་ཀྱང་རེད། ཉེ་ཆར་ཉིང་ཁྲི་གྲོང་ཁྱེར་མེ་ཏོག་རྫོང་མེ་ཏོག་གྲོང་རྡལ་བདེ་འཇགས་ཁྲིམས་སྐྱོང་གཞུང་ལས་ཁང་གིས་མེ་ཏོག་གྲོང་ཚོའི་གྲོང་མི་10ལྷག་ཙམ་ལ་འགྱངས་ཆད་བྱས་པའི་སྐྱེལ་འདྲེན་གླ་ཆ་སྒོར་ཁྲི་38ལྷག་ཙམ་ལེན་རོགས་བྱས་ཏེ་གྲོང་མིའི་ཁྲིམས་མཐུན་ཁེ་དབང་སྲུང་སྐྱོང་ནུས་ལྡན་བྱས་པ་རེད།

དེ་གོང་མེ་ཏོག་གྲོང་ཚོའི་སྐྱེལ་འདྲེན་རུ་ཁག་གི་རུ་མི་ཚོས་རྣམ་གྲངས་ཞིག་གི་ལས་ཡུལ་དུ་སྐྱེལ་འདྲེན་ལས་ཀ་བྱས་ཡོད། ལོ་མཇུག་ཏུ་གླ་ཆ་རྩིས་རྒྱག་སྐབས་གླ་ཆ་སྒོར་ཁྲི་79ལྷག་ཙམ་ཟིན་པ་དང་གླ་ཆ་ཁག་གཅིག་སྤྲད་ཀྱང་ད་དུང་སྒོར་ཁྲི་38ཆད་ཡོད། ཡུལ་མི་ཚོས་ཚ་འདེད་ཐེངས་མང་བཏང་ཡང་ཁ་ཡ་མ་བྱས་པར་བརྟེན་འབྲེལ་ཡོད་ཚན་པར་ཞུ་གཏུག་བརྒྱབ་ཡོད།

མི་དམངས་འདུམ་འགྲིག་ནི་སྤྱི་ཚོགས་བརྟན་ལྷིང་སྲུང་སྐྱོང་བྱེད་པའི་འགོག་རགས་དང་པོ་དེ་ཡིན། མེ་ཏོག་གྲོང་རྡལ་གྱིས་གནས་ཚུལ་དེ་ཤེས་རྗེས་ཚད་མཐོའི་མཐོང་ཆེན་བྱས་ཏེ་བདེ་འཇགས་ཁྲིམས་སྐྱོང་གཞུང་ལས་ཁང་གི་ལས་དོན་པ་མངགས་ནས་གནས་ཚུལ་དེ་ཐག་གཅོད་བྱས་ཡོད།

མེ་ཏོག་གྲོང་རྡལ་བདེ་འཇགས་ཁྲིམས་སྐྱོང་གཞུང་ལས་ཁང་དང་རྣམ་གྲངས་འགན་གཙང་ལེན་མཁན་ཕྱོགས་ཀྱིས་ངང་རྒྱུད་རིང་པོས་ཁ་ཏ་བྱས་མཐར་ཀུང་སི་དེས་ནོར་འཁྲུལ་ངོས་ལེན་ཞུས་ནས་ས་གནས་ས་ཐོག་ཏུ་གྲོས་མཐུན་ཡི་གེ་བཞག་པ་མ་ཟད། ཆད་པའི་གླ་ཆ་ཐེངས་གཅིག་ལ་སྤྲོད་རྒྱུའི་ཁས་བླངས། སྒོར་ཁྲི་38ལྷག་ཙམ་ཡུལ་མིའི་ལག་ཏུ་འབྱོར་སྐབས་ལས་དོན་པ་ཚོར་ཐུགས་རྗེ་ཆེ་ཞུས་པ་རེད།