ཉེ་ཆར། བོད་རང་སྐྱོང་ལྗོངས་མི་དམངས་ཞིབ་དཔྱོད་ཁང་གི་2024ལོའི་སྐྱེ་ཁམས་ཁོར་ཡུག་སྲུང་སྐྱོང་གི་ཞིབ་དཔྱོད་ལས་དོན་གྱི་གསར་འགྱུར་ཡོངས་བསྒྲགས་ཚོགས་འདུ་འཚོགས་པ་རེད། གསར་འགོད་པས་ཚོགས་འདུའི་ཐོག་ནས་ཤེས་རྟོགས་བྱས་པར་གཞིགས་ན། 2024ལོར་བོད་ལྗོངས་ཞིབ་དཔྱོད་ལས་ཁུངས་ཀྱིས་སྐྱེ་ཁམས་ཁོར་ཡུག་ཁྱབ་ཁོངས་ཀྱི་ཞིབ་དཔྱོད་ལྟ་སྐུལ་གྱི་འགན་འཁྲི་ཁྲིམས་ལྟར་བསྒྲུབས་པས་ལས་དོན་ཁག་ལ་གྲུབ་འབྲས་མངོན་གསལ་དོད་པོ་ཐོབ་ཡོད། ཁོར་ཡུག་ཐོན་ཁུངས་ལ་གཏོར་བཤིག་གཏོང་བའི་ཉེས་གསོག་གྱོད་གཞི་ཁྱོན་བསྡོམས་30ཡི་མི་66ཞུ་གཏུག་བརྒྱབ་པ་དང་། ཁོར་ཡུག་ཐོན་ཁུངས་སྲུང་སྐྱོང་ལ་གཏོར་བཤིག་གཏོང་བའི་ཉེས་གསོག་དོགས་གཞི་ཡོད་པའི་ཁྲིམས་ཆད་ལག་བསྟར་གྱི་ལྡོག་ཕྱོགས་སྦྲེལ་མཐུད་ཀྱི་གྱོད་གཞི་19སྒྲུབ་གཉེར་བྱས་པ། སྐྱེ་ཁམས་ཁོར་ཡུག་དང་ཐོན་ཁུངས་སྲུང་སྐྱོང་ཁྱབ་ཁོངས་ཀྱི་སྤྱི་ཕན་གཏུག་བཤེར་གྱི་ཁུངས་སྣེ་542བསྡུ་རུབ་བྱས་པ་དང་གྱོད་གཞི་479ཐོ་འགོད་བྱས་པ་རེད། 2024ལོར་བོད་ལྗོངས་ཞིབ་དཔྱོད་ཀྱི་སྤྱི་ཕན་གཏུག་བཤེར་གྱི་སྤུས་ཚད་མཐོ་ཞིང་ཕན་འབྲས་ལྡན་པའི་གྱོད་སྒྲུབ་ལས་དོན་རྒྱལ་ཡོངས་ཀྱི་མདུན་གྲལ་དུ་སླེབས་པས་ཆེས་མཐོའི་ཞིབ་དཔྱོད་ཁང་གི་ཁས་ལེན་གང་ལེགས་ཐོབ་ཡོད།

བྱེད་ཐབས་ནན་པོ་སྤྱད་དེ།

སྐྱེ་ཁམས་ཁོར་ཡུག་ལ་གཏོར་བཤིག་གཏོང་བའི་ཉེས་གསོག་ལ་རྡུང་རྡེག་ཚ་ནན་བཏང་བ།

2024ལོར། བོད་ལྗོངས་ཞིབ་དཔྱོད་ལས་ཁུངས་ཀྱིས་སྐྱེ་ཁམས་ཁོར་ཡུག་ཁྱབ་ཁོངས་ཀྱི་ཞིབ་དཔྱོད་ལྟ་སྐུལ་གྱི་འགན་འཁྲི་ཁྲིམས་ལྟར་བསྒྲུབས་ནས་སྐྱེ་ཁམས་ཁོར་ཡུག་སྲུང་སྐྱོང་གི་ཉེས་དོན་ཞིབ་དཔྱོད་ལས་དོན་ལ་ཤུགས་སྣོན་རྒྱག་པ་དང་སྐྱེ་ཁམས་ཁོར་ཡུག་ལ་གཏོར་བཤིག་གཏོང་བའི་ཁྲིམས་འགལ་ཉེས་གསོག་ལ་རྡུང་རྡེག་གཏོང་ཤུགས་ཆེ་རུ་བཏང་ཡོད། 2024ལོར་ཁོར་ཡུག་ཐོན་ཁུངས་ལ་གཏོར་བཤིག་གཏོང་བའི་ཉེས་གསོག་གྱོད་གཞི་41གི་མི་109བདག་སྤྲོད་ཞིབ་བཤེར་གྱིས་ཁྲིམས་ལ་སྦྱར་བ་དང་། གྱོད་གཞི་42འདྲི་ཞིབ་མཇུག་འགྲིལ་ནས་མི་96ཐག་གཅོད་བྱས་པ། གྱོད་གཞི་30ཡི་མི་66གཞུང་གཏུག་བརྒྱབ་པ། གྱོད་གཞི་12ཀྱི་མི་30ཁྲིམས་ལ་སྦྱར་མེད་པ་རེད།

སྤྱི་ཕན་གཏུག་བཤེར་བྱས་ཏེ།

སྐྱེ་ཁམས་སླར་གསོ་དང་བཅོས་སྐྱོང་མཉམ་དུ་སྤེལ་བ།

2024ལོར། ལྗོངས་ཡོངས་ཀྱི་ཞིབ་དཔྱོད་ལས་ཁུངས་ཀྱིས་རང་འགུལ་ངང་བྱ་སྤྱོད་སྤེལ་ནས་སྐྱེ་ཁམས་ཁོར་ཡུག་དང་ཐོན་ཁུངས་སྲུང་སྐྱོང་ཁྱབ་ཁོངས་ཀྱི་སྤྱི་ཕན་གཏུག་བཤེར་གྱི་ཁུངས་སྣེ་542བསྡུ་རུབ་བྱས་པ་དང་གྱོད་གཞི་479ཐོ་འགོད་བྱས་པ་རེད། རང་སྐྱོང་ལྗོངས་སྤྱི་བདེ་ཐིང་དང་ཆུ་བེད་ཐིང་དང་མཉམ་དུ“ཆུ་ལམ་ནས་ཁྲིམས་འགལ་བྱེ་མ་སྔོག་མཁན་ལ་ཆེད་དོན་བཅོས་སྒྲིག”གི་བྱ་སྤྱོད་སྤེལ་ནས། བྱེ་མ་སྔོག་ས་50ལས་གཉེར་བྱེད་མཚམས་བཞག་ཏུ་བཅུག་སྟེ་འབྲེལ་ཡོད་གནད་དོན་ཐད་འབྲེལ་ཡོད་སྡེ་ཚན་ལ་ཁྲིམས་ལྟར་ལྟ་འདོམས་བྱེད་ཤུགས་ཆེ་རུ་གཏོང་བར་སྐུལ་འདེད་བཏང་ཡོད།

སྤུས་ཚད་མཐོ་ལ་ཕན་འབྲས་ཐོན་པའི་གྱོད་དོན་བསྒྲུབས་ཏེ།

སྐྱེ་ཁམས་ཤེས་དཔལ་འཛུགས་སྐྱོང་ལ་རམ་འདེགས་བྱས་པ།

དུས་ཡུན་རིང་པོའི་ནང་བོད་ལྗོངས་ཞིབ་དཔྱོད་ལས་ཁུངས་ཀྱིས་སྐྱེ་ཁམས་སྲུང་སྐྱོང་ཨང་དང་པོར་འཛིན་རྒྱུ་མཐའ་འཁྱོངས་ཀྱིས་ཞིབ་དཔྱོད་ལྟ་སྐུལ་གྱོད་སྒྲུབ་བྱེད་ཤུགས་ཆེ་རུ་བཏང་ནས་བོད་ཀྱི་སྐྱེ་ཁམས་ཤེས་དཔལ་གྱི་མཐོ་ས་ཏན་ཏིག་འཛུགས་གཏོད་ལ་སྐུལ་འདེད་བཏང་ཡོད། 2024ལོར། བོད་ལྗོངས་ཞིབ་དཔྱོད་ཀྱི་སྤྱི་ཕན་གཏུག་བཤེར་གྱི་སྤུས་ཚད་མཐོ་ལ་ཕན་འབྲས་ཐོན་པའི་གྱོད་སྒྲུབ་ལས་དོན་རྒྱལ་ཡོངས་ཀྱི་མདུན་གྲལ་དུ་སླེབས་པས་ཆེས་མཐོའི་ཞིབ་དཔྱོད་ཁང་གི་ཁས་ལེན་གང་ལེགས་ཐོབ་ཡོད།