གྲང་ངར་ཆེ་བའི་དགུན་དུས་སུ་ཁྲེང་ཀོན་སྤྱི་བདེ་ཡན་ལག་ཅུས་ཀྱིས་ཁོངས་གཏོགས་ཁུལ་གྱི་དགུན་དུས་ཀྱི་མེ་ཟོན་བདེ་འཇགས་དང་། བདེ་འཇགས་འགོག་ཟོན། སློབ་གྲྭའི་བདེ་འཇགས། འགལ་ཟླ་དང་རྩོད་གཞི་སེལ་བ་བཅས་དང་། དེ་བཞིན་དམངས་ཕན་ཞབས་ཞུ་སོགས་ཁྱབ་ཁོངས་མང་པོར་དམིགས་ཏེ། “དགུན་དུས་ཀྱི་བྱ་སྤྱོད”ཕྱོགས་ཡོངས་ནས་སྤེལ་བ་དང་ཁོངས་གཏོགས་ཁུལ་གྱི་བདེ་འཇགས་ལ་སྲུང་སྐྱོང་ཏན་ཏིག་དང་མང་ཚོགས་ཀྱི་བློ་ཡིད་ཚིམ་ཚད་མཐོ་རུ་བཏང་ནས་དགུན་དུས་སུ་གྲོང་མིར་དྲོ་སྐྱིད་སྦྱིན་ཡོད།

དགུན་དུས་གནམ་གཤིས་སྐམ་ཤས་ཆེ་ཞིང་གྲང་ངར་ཆེ་བས་མེ་དང་གློག་སྤྱོད་ཚད་མང་དུ་ཕྱིན་ནས་མེ་ཟོན་བདེ་འཇགས་ཀྱི་གནས་བབ་ཛ་དྲག་ཏུ་འགྲོ་གི་ཡོད། ལྷག་པར་དུ་གློག་སྒུལ་རྐང་འཁོར་གྱི་གློག་སྡོང་ནི་གྲོང་མིའི་སྤྱོད་མང་བའི་སྒྲིག་ཆས་ཤིག་ཏུ་གྱུར་ཡོད་པས་དེའི་བདེ་འཇགས་ལ་དོ་ཁུར་ཆེན་པོ་བྱེད་ཀྱི་ཡོད། ཁྲེང་ཀོན་སྤྱི་བདེ་ཡན་ལག་ཅུས་ཀུན་བདེ་གླིང་མངགས་གཏོང་ཁང་བདེ་སྐྱིད་སྡེ་ཁུལ་གྱི་ཉེན་དོན་ཁང་གིས་ཉེན་རྟོག་པ་སྒྲིག་འཛུགས་བྱས་ཏེ་ཁོངས་གཏོགས་ཁུལ་གྱི་གློག་སྒུལ་འཁོར་རིགས་ཀྱི་གཅིག་སྡུད་གློག་སྡོང་གི་བདེ་འཇགས་ཀྱི་མངོན་མེད་རྐྱེན་ངན་ལ་གྲལ་ཞིབ་བྱས་ཡོད།

ཚོང་ལས་ཁྲོམ་གཞུང་ཁུལ་དུ་མི་མང་བ་མ་ཟད། འགྲོ་འོང་བྱེད་མཁན་གྱི་རླངས་འཁོར་ཡང་མང་བས་གློག་སྒུལ་འཁོར་རིགས་ཀྱི་གློག་སྡོང་སྤྱོད་མཁན་མང་པོ་ཡོད། ཉེན་རྟོག་པས་རྒྱུན་གཏན་གྱི་ཞིབ་བཤེར་བྱེད་རིང་གློག་སྡོང་གི་ཚ་སེལ་མ་ལག་ལ་སྐྱོན་ཤོར་ཡོད་མེད་དང་། ཚ་སེལ་དྲ་མིག་ནང་ཐལ་རྡུལ་དང་དངོས་པོ་འཛུལ་ཡོད་མེད། དུས་ཡུན་རིང་པོ་སྤྱད་རྗེས་སྒྲིག་ཆས་ཚ་པོ་ཆགས་ཡོད་མེད། གློག་སྡོང་གི་གློག་གསོག་མཐུད་ཁ་བརྟན་པོ་ཡོད་མེད། དབྱང་འགྱུར་ཚབས་ཆེན་ཡོད་མེད་སོགས་ལ་གཙོ་གནད་དུ་ཞིབ་བཤེར་བྱས་ཡོད།

སྡེ་ཁུལ་གྱི་ཉེན་རྟོག་པས་ཁུལ་ཆུང་རྙིང་པར་བསྐྱོད་ནས་རླངས་འཁོར་འཇོག་སའི་གློག་སྡོང་ལ་ཆག་སྐྱོན་ཤོར་མིན་དང་རྙིང་པ་ཡིན་མིན་དང་། གློག་གསོག་བསྒར་སྣེ་དང་བསྒར་ཁུང་གི་སྐུད་ལམ་གྱི་དབྱིབས་འགྱུར་ཡོད་མེད་དང་འཚིག་པ་དང་བཞུར་ཡོད་མེད། སྐུད་ལམ་ཕྱིར་དོན་པ་དང་རློན་པ་ཆགས་ཡོད་མེད་སོགས་ལ་ལྟ་ཞིབ་བྱས་ཡོད།

ཕྱོགས་ཡོངས་ནས་ཞིབ་བཤེར་བྱས་པ་བརྒྱུད། ཁོངས་གཏོགས་ཁུལ་གྱི་ཁུལ་ཆུང་བསྡོམས་9དང་། ཚོང་ལས་ཁྲོམ་གཞུང་1 སྤྱི་པའི་ཁུལ་ཁོངས་བཅས་ཀྱི་གློག་སྒུལ་རྐང་འཁོར་གྱི་གློག་སྡོང་དང་འབྲེལ་བ་ཡོད་པ་དང་། རིམ་རྩིས་བརྒྱབ་ན་བདེ་འཇགས་ཀྱི་མངོན་མེད་རྐྱེན་ངན་སྣ་ཚོགས་ཁག་3རྩད་ཆོད་ཡོད། མིག་སྔའི་བར་ཁག་3བཅོས་སྒྲིག་བྱས་ཏེ། གློག་སྡོང་གི་གནད་དོན་ལས་ཐོན་པའི་མེ་སྐྱོན་གྱི་ཉེན་ཁ་ཆུང་དུ་ནུས་ལྡན་བཏང་ནས་གྲོང་མིས་དགུན་དུས་གློག་བདེ་འཇགས་ངང་སྤྱོད་རྒྱུར་རྨང་གཞི་བརྟན་པོ་བཏིང་ཡོད།

ཟླ་བ་གཅིག་ལྷག་ཙམ་རིང་རྒྱུན་རྣམ་ཅན་གྱི་མཚན་མོའི་སྐོར་གཡེང་ལས་དོན་སྤེལ་བ་བརྒྱུད་རྙོག་འཛིང་ཆེ་བའི་ཡུལ་དུ་རིམ་རྩིས་བརྒྱབ་ན་དོགས་ཡོད་མི་སྣ་མི་ཐེངས་8ལ་འདྲི་ཞིབ་བྱས་པའི་ནང་ཁོངས་གཏོགས་ཁུལ་གྱི་མངགས་གཏོང་ཁང་དུ་མི་3རྩིས་སྤྲད་པ་དང་མི་5ལ་སློབ་གསོ་དང་ཁ་ཏ་བྱས་ནས། ཁྲིམས་འགལ་ཉེས་གསོག་པ་ཁྲིམས་ལྟར་ཆད་པ་བཅད་པས་ཁོངས་གཏོགས་ཁུལ་གྱི་མཚན་མོའི་བདེ་འཇགས་ཁོར་ཡུག་མངོན་གསལ་དོད་པོས་ལེགས་སུ་ཕྱིན་པ་མ་ཟད། མང་ཚོགས་ཀྱི་བདེ་འཇགས་ཚོར་སྣང་ཆེ་རུ་ཤུགས་ཆེན་ཕྱིན་ནས་སྤྱི་ཚོགས་བདེ་འཇགས་ཀྱི་དར་སྲོལ་ཡང་གསར་པར་གྱུར་ཡོད།

སློབ་གྲྭའི་བདེ་འཇགས་ནི་བྱིས་པ་སྐྱོན་བྲལ་ངང་འཚར་ལོངས་ཡོང་བ་དང་འབྲེལ་བ་ཡོད་ཅིང་། དེ་ནི་ཁྲེང་ཀོན་སྤྱི་བདེ་ཡན་ལག་ཅུས་ཉེན་དོན་ཁང་ཁག་གི་ལས་དོན་གྱི་གལ་ཆེའི་ནང་གི་འགངས་ཆེན་ཞིག་དེ་བས་རེད། དགུན་དུས་སློབ་དུས་སུ་ཉེན་དོན་ཁང་གིས་རང་འགུལ་ངང་ཁོངས་གཏོགས་ཁུལ་གྱི་བུ་བཅོལ་ཁང་དང་འབྲེལ་གཏུག་བྱས་ཏེ། སློབ་གྲྭའི་བདེ་འཇགས་ཀྱི་མངོན་མེད་རྐྱེན་ངན་གྲལ་བཤེར་ལས་དོན་གཏིང་ཟབ་སྤེལ་ནས། སློབ་གྲྭས་མི་རྒྱུ་རྩལ་གསུམ་ལ་བརྟེན་ནས་འགོག་ཟོན་བྱེད་ཐབས་དོན་འཁྱོལ་བྱས་ཚུལ་ལ་ཞིབ་བཤེར་བྱེད་ཤུགས་ཆེ་རུ་བཏང་ཡོད།