ཆུ་ཤུར་རྫོང་སྤྱི་བདེ་ཅུས་འགྲིམ་འགྲུལ་ཉེན་རྟོག་རུ་ཆེན་གྱིས“མཛེས་སྡུག་ལྡན་པའི་གྲོང་གསེབ་ཏུ་སྐྱོད་པའི”དགུན་དུས་ཀྱི་འགྲིམ་འགྲུལ་བདེ་འཇགས་དྲིལ་བསྒྲགས་བྱས་པ།
དགུན་དུས་ཀྱི་འགྲོ་ལམ་འགྲིམ་འགྲུལ་བདེ་འཇགས་དོ་དམ་ལས་དོན་སྔར་བས་གཏིང་ཟབ་སྤེལ་ནས། འགྲོ་ལམ་འགྲིམ་འགྲུལ་གྱི་ལས་འཛོལ་སྔོན་འགོག་ནུས་ལྡན་དང་ཉུང་དུ་གཏོང་ཆེད། ཉེ་ཆར། ལྷ་ས་གྲོང་ཁྱེར་ཆུ་ཤུར་རྫོང་སྤྱི་བདེ་ཅུས་འགྲིམ་འགྲུལ་ཉེན་རྟོག་རུ་ཆེན་གྱིས་ཆུ་ཕུ་གྲོང་ཚོ་དང་། ཆུ་ཤུར་གྲོང་ཚོ། ཚར་པ་ནང་གྲོང་ཚོ་བཅས་སུ“མཛེས་སྡུག་ལྡན་པའི་གྲོང་གསེབ་ཏུ་སྐྱོད་པའི”དགུན་དུས་ཀྱི་འགྲིམ་འགྲུལ་བདེ་འཇགས་ཀྱི་དྲིལ་བསྒྲགས་བྱས་ནས་གྲོང་གསེབ་ཀྱི་འགྲོ་ལམ་འགྲིམ་འགྲུལ་བདེ་འཇགས་ཀྱི་འགོག་སྲུང་འཛིང་རགས་བརྟན་དུ་ནུས་ཤུགས་ཡོད་རྒུས་བཏང་བ་རེད།
བྱེད་སྒོ་སྤེལ་རིང་། མི་དམངས་ཉེན་རྟོག་པས་གྲོང་གསེབ་ཏུ་སྦག་སྦག་དང་འཁོར་གསུམ་གློག་སྒུལ་སྦག་སྦག་གཏོང་སྐབས་བདེ་འཇགས་རྨོག་ཞྭ་མི་གྱོན་པའི་འགྲོ་ལམ་འགྲིམ་འགྲུལ་གྱི་ཁྲིམས་འགལ་བྱེད་སྤྱོད་ལ་གཙོ་གནད་དུ་དམིགས་ནས། བདེ་འཇགས་རྨོག་ཞྭའི་འགོག་སྲུང་གི་ནུས་པ་དང་། ཇི་ལྟར་བྱས་ཏེ་བདེ་འཇགས་རྨོག་ཞྭ་ཡང་དག་འདེམས་པ་དང་གྱོན་པ་སོགས་ལ་གསལ་འགྲེལ་ཞིབ་ཕྲ་བརྒྱབ་པ་དང་འབྲེལ། ཚང་མར་འགྲིམ་འགྲུལ་གྱི་གོམས་གཤིས་ངན་པ་དོར་ནས་བདེ་འཇགས་དང་ཤེས་དཔལ་ངང་ཕྱིར་སྐྱོད་དགོས་པའི་དྲན་སྐུལ་བྱས་པ་རེད།
ཆུ་ཤུར་རྫོང་འགྲིམ་འགྲུལ་དོ་དམ་སྡེ་ཚན་གྱི་འགན་འཁུར་བས། ད་ཐེངས་ཀྱི་བྱེད་སྒོ་སྤེལ་བ་བརྒྱུད། ཁོངས་གཏོགས་ཁུལ་གྱི་མང་ཚོགས་ཀྱིས་འགྲིམ་འགྲུལ་སྒྲིག་སྲོལ་ལ་ངོས་འཛིན་བྱེད་ཤུགས་སྔར་བས་ཆེ་རུ་ཕྱིན་པ་དང་། ཁོངས་གཏོགས་ཁུལ་གྱི་མང་ཚོགས་ཀྱི་བཅའ་ཁྲིམས་ཀྱི་འདུ་ཤེས་དང་བདེ་འཇགས་ཀྱི་འདུ་ཤེས་ཟབ་ཏུ་ཕྱིན་ནས་ཁོངས་གཏོགས་ཁུལ་གྱི་འགྲོ་ལམ་འགྲིམ་འགྲུལ་བདེ་འཇགས་ཀྱི་སྒྲིག་ལམ་རྒྱུན་མཐུད་བརྟན་པོ་ཡོང་བར་རྨང་གཞི་བརྟན་པོ་བཏིང་ཡོད། གོམ་སྟབས་རྗེས་མར། ང་ཚོས་རྣམ་པ་མང་བ་དང་། ཐབས་ལམ་མང་བ། ཕྱོགས་ཡོངས་བཅས་ཀྱི་སྒོ་ནས་འགྲོ་ལམ་འགྲིམ་འགྲུལ་གྱི་བདེ་འཇགས་ཤེས་བྱ་དྲིལ་བསྒྲགས་ཡག་པོ་བྱས་ཏེ། སྤྱི་ཚོགས་ཡོངས་ལ་བདེ་འཇགས་དང་། གོ་རིམ། ཞི་མཐུན། ཤེས་དཔལ་བཅས་ལྡན་པའི་འགྲོ་ལམ་འགྲིམ་འགྲུལ་ཁོར་ཡུག་མཉམ་དུ་གཏོད་པར་སྐུལ་འདེད་གཏོང་རྒྱུ་ཡིན་ཞེས་བཤད་པ་རེད།