འདི་ནི་གོ་འཇོ་རྫོང་དམངས་སྲིད་དང་དམག་ཞབས་ཐིམ་པའི་དམག་མིའི་ལས་དོན་ཅུས་ཀྱི་ལས་དོན་པས་དཀའ་ངལ་ཡོད་པའི་དབང་པོ་སྐྱོན་ཅན་ལ་འཚམས་འདྲི་བྱེད་བཞིན་པ།

ཉེ་ཆར། ཆབ་མདོ་གྲོང་ཁྱེར་གོ་འཇོ་རྫོང་དམངས་སྲིད་དང་དམག་ཞབས་ཐིམ་པའི་དམག་མིའི་ལས་དོན་ཅུས་ཀྱིས“དབང་པོ་སྐྱོན་ཅན་གྱི་འགོ་ཁྲིད་ནུས་པ་ཆེ་རུ་བཏང་ནས་ཁོང་ཡངས་དང་རྒྱུན་མཐུད་ཆོག་པའི་འབྱུང་འགྱུར་མཉམ་དུ་གཏོད་པ”བརྗོད་དོན་གཙོ་བོར་བྱས་པའི་དཀའ་ངལ་ཡོད་པའི་དབང་པོ་སྐྱོན་ཅན་ལ་འཚམས་འདྲིའི་བྱེད་སྒོ་སྤེལ་བ་རེད།

བྱེད་སྒོ་སྤེལ་རིང་། གོ་འཇོ་རྫོང་དམངས་སྲིད་དང་དམག་ཞབས་ཐིམ་པའི་དམག་མིའི་ལས་དོན་ཅུས་ཀྱི་ཏང་ཙུའི་ཧྲུའུ་ཅི་དང་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ཀྱི་ལས་དོན་པ་མཉམ་དུ་གོ་འཇོ་རྫོང་འབོ་ལོ་གྲོང་རྡལ་དང་། རྩེ་པ་ཤང་། ལྷ་རྒྱལ་ཤང་། ཨ་དབང་ཤང་སོགས་ཀྱི་དཀའ་ངལ་ཡོད་པའི་དབང་པོ་སྐྱོན་ཅན་གྱི་ཁྱིམ་དུ་བསྐྱོད་དེ། དབང་པོ་སྐྱོན་ཅན་གྱི་མང་ཚོགས་དང་ཁོང་ཚོའི་གཉེན་ཉེ་དང་སྤེལ་རེས་གཏིང་ཟབ་ཀྱིས་ཁོང་ཚོའི་འཚོ་བའི་གནས་ཚུལ་དང་གཟུགས་གཞིའི་གནས་ཚུལ་སྐད་ཆ་དྲིས་པ་མ་ཟད། ཁོང་ཚོའི་དཀའ་ངལ་དང་དགོས་མཁོ་ཤེས་རྟོགས་ཞིབ་ཕྲ་བྱས་པ་རེད། དེ་དང་ཆབས་ཅིག ཁོང་ཚོར་དབང་པོ་སྐྱོན་ཅན་གྱི་བདེ་ཐང་སླར་གསོའི་ཤེས་བྱ་ཁྱབ་གདལ་བཏང་བ་དང་འབྲེལ། ཁོང་ཚོར་སྤྲོ་སྣང་གི་སེམས་ཁམས་རྒྱུན་འཁྱོངས་དང་ཧུར་སྐྱེད་ཡར་བརྩོན་གྱིས་འཚོ་བའི་དཀའ་ངལ་སེལ་དགོས་པའི་སྐུལ་ལྕག་བྱས་པ་རེད། དཀའ་ངལ་ཡོད་པའི་དབང་པོ་སྐྱོན་ཅན་8ལ་འཚམས་འདྲིའི་དངུལ་སྒོར་7600དང་དེ་བཞིན་འོ་མ་དང་ཤིང་འབྲས་སོགས་ཀྱི་འཚོ་བའི་མཁོ་ཆེས་དང་དབང་པོ་སྐྱོན་ཅན་གྱི་རམ་འདེགས་ཡོ་བྱད་སྤྲད་པ་རེད།