རྣམ་གཞག་དོན་ཚན་གྱིས་ང་ཚོར་ཤུགས་རྐྱེན་གང་དག་ཐེབས་སྲིད་དམ།
དོན་ཚན་བཞི་བརྒྱ་དང་གོ་དྲུག་པ། རྣམ་གཞག་དོན་ཚན་ཞེས་པ་ནི་བསྐྱར་ཟློས་སུ་སྤྱོད་ཆེད་དོ་བདག་གིས་སྔོན་ཚུད་ནས་ཟིན་འགོད་བྱས་ལ། གན་རྒྱ་འཇོག་སྐབས་ཕྱོགས་ཅིག་ཤོས་དང་གྲོས་མོལ་མི་བྱེད་པའི་དོན་ཚན་ཡིན།
རྣམ་གཞག་དོན་ཚན་ཐོག་ནས་གན་རྒྱ་འཇོག་ཚེ། རྣམ་གཞག་དོན་ཚན་འདོན་མཁན་ཕྱོགས་ཀྱིས་དྲང་སྙོམས་ཀྱི་རྩ་དོན་བརྩི་སྲུང་བྱས་ཏེ་དོ་བདག་བར་གྱི་ཁེ་དབང་དང་འོས་འགན་གཏན་འཁེལ་བྱེད་དགོས་པ་མ་ཟད། ལུགས་མཐུན་གྱི་བྱེད་སྟངས་སྤྱད་ནས་ཕྱོགས་ཅིག་ཤོས་ལ་རང་ཕྱོགས་ཀྱི་འགན་འཁྲི་མེད་པར་བཟོ་བའམ་བཅའ་ཡང་གཏོང་བ་སོགས་ཕྱོགས་ཅིག་ཤོས་དང་ཁེ་གྱོང་འབྲེལ་བ་ཆེན་པོ་ཡོད་པའི་དོན་ཚན་ལ་དོ་སྣང་བྱེད་པའི་སྣེ་སྟོན་བྱེད་དགོས་པ་དང་། ཕྱོགས་ཅིག་ཤོས་ཀྱི་རེ་འདུན་ལྟར་དོན་ཚན་དེ་གསལ་བཤད་བྱེད་དགོས། རྣམ་གཞག་དོན་ཚན་འདོན་མཁན་ཕྱོགས་ཀྱིས་སྣེ་སྟོན་ནམ་གསལ་བཤད་ཀྱི་འོས་འགན་མ་བསྒྲུབས་པར་བརྟེན། ཕྱོགས་ཅིག་ཤོས་ཀྱིས་ཁོ་རང་དང་ཁེ་གྱོང་འབྲེལ་བ་ཆེན་པོ་ཡོད་པའི་དོན་ཚན་ལ་དོ་སྣང་མ་བྱུང་བའམ་གོ་བ་མ་ལོན་པ་བཟོས་ན། ཕྱོགས་ཅིག་ཤོས་ཀྱིས་དོན་ཚན་དེ་གན་རྒྱའི་ནང་དོན་དུ་མི་འགྲུབ་པའི་འདོད་ཚུལ་བཏོན་ཆོག
དོན་ཚན་བཞི་བརྒྱ་དང་གོ་བདུན་པ། གཤམ་གསལ་གྱི་གནས་ཚུལ་གྲས་ཤིག་ཡོད་ན། རྣམ་གཞག་དོན་ཚན་དེར་ནུས་པ་མི་ལྡན་པ་ཡིན། (གཅིག) བཅའ་ཁྲིམས་འདིའི་ལེ་ཚན་དང་པོའི་ལེའུ་དྲུག་པའི་ས་བཅད་གསུམ་པ་དང་བཅའ་ཁྲིམས་འདིའི་དོན་ཚན་ལྔ་བརྒྱ་དང་དྲུག་པར་བཀོད་པའི་ནུས་པ་མི་ལྡན་པའི་གནས་ཚུལ་ཡོད་པ། (གཉིས) རྣམ་གཞག་དོན་ཚན་འདོན་མཁན་ཕྱོགས་ཀྱིས་འོས་མེད་ཀྱི་སྒོ་ནས་རང་ཕྱོགས་ཀྱི་འགན་འཁྲི་མེད་པར་བཟོས་པའམ་བཅའ་ཡང་བཏང་བ། ཕྱོགས་ཅིག་ཤོས་ཀྱི་འགན་འཁྲི་ལྕི་རུ་བཏང་བ། ཕྱོགས་ཅིག་ཤོས་ཀྱི་ཁེ་དབང་གཙོ་བོ་ཚོད་འཛིན་བྱས་པ། (གསུམ) རྣམ་གཞག་དོན་ཚན་འདོན་མཁན་ཕྱོགས་ཀྱིས་ཕྱོགས་ཅིག་ཤོས་ཀྱི་ཁེ་དབང་གཙོ་བོ་ཕྱིར་འབུད་བཏང་བ་བཅས་ཡིན།
ཁྲིམས་ལུགས་འཆད་སྟེགས།
《དམངས་དོན་ཁྲིམས་གཞུང》གི་དོན་ཚན་བཞི་བརྒྱ་དང་གོ་དྲུག་པའི་ནང་གསེས་དོན་ཚན་དང་པོའི་ནང་ཁྲིམས་ལུགས་ཀྱི་རྣམ་པའི་ཐོག་ནས་རྣམ་གཞག་དོན་ཚན་གྱི་གོ་དོན་གཏན་འཁེལ་བྱས་ཡོད་ཅིང་། དེ་ནི《གན་རྒྱའི་བཅའ་ཁྲིམས》ཀྱི་གོམ་གང་མདུན་སྤོས་ངང་འཐུས་ཚང་བཏང་བ་ཞིག་ཡིན། ནང་གསེས་དོན་ཚན་གཉིས་པའི་ནང་རྣམ་གཞག་དོན་ཚན་འདོན་མཁན་ལ་བླང་བྱ་བཏོན་པ་མ་ཟད། རྣམ་གཞག་དོན་ཚན་འདོན་མཁན་ཕྱོགས་ཀྱིས་སྣེ་སྟོན་ནམ་གསལ་བཤད་འོས་འགན་མ་བསྒྲུབས་པའི་མཇུག་འབྲས་ངན་པ་གསར་སྣོན་བྱས་ཡོད། དོ་སྣང་བྱེད་དགོས་པ་ཞིག་ལ། རྣམ་གཞག་དོན་ཚན་གྱི་སྣེ་སྟོན་ནམ་གསལ་བཤད་འོས་འགན་བསྒྲུབས་རུང་། གལ་ཏེ་གོང་གསལ་དོན་ཚན་བཞི་བརྒྱ་དང་གོ་བདུན་པའི་གཏན་འབེབས་ཀྱི་གནས་ཚུལ་གྲས་ཤིག་ཡོད་ན། རྣམ་གཞག་དོན་ཚན་དེར་ནུས་པ་མི་ལྡན་པ་ཡིན།