ཉེ་ཆར། དིང་རི་རྫོང་མི་དམངས་ཁྲིམས་ཁང་གིས་ལག་བསྟར་བྱེད་མཇུག་འགྲིལ་བའི་བྱེད་སྟངས་ཐོག་ནས་བུན་དབང་ནང་བཤུག་གཏོང་བ་དང་། འཛུགས་སྐྲུན་ལས་གྲྭ ཉོ་ཚོང་བཅས་ཀྱི་གན་རྒྱའི་རྩོད་གཞི་ཁག་74བདེ་བླག་ངང་ལག་བསྟར་བྱས་ནས་ལག་བསྟར་རེ་ཞུ་མཁན་ལ་གྱོད་འབྲེལ་དངུལ་སྒོར་ཁྲི་899ལྷག་ཙམ་སློག་པ་རེད།

2022ལོའི་ཟླ་11པར། ཀྲུང་གོ་འགྲིམ་འགྲུལ་གཞུང་ལམ་ལས་གྲྭ་ཀུང་སི་ག་གེ་མོ་དང་། སྟོད་ལུང་བདེ་ཆེན་གྱི་ལམ་ཟམ་ཀུང་སི་ག་གེ་མོ། ཕུན་ཆེ་གེ་མོ་སོགས་ཀྱིས་ཤིན་ཅང་གི་འཛུགས་སྐྲུན་ལས་གྲྭ་ཚོགས་པ་ཀུང་སི་ག་གེ་མོ་དང་བུན་དབང་ནང་བཤུག་གཏོང་བའི་གན་རྒྱའི་རྩོད་གཞི་དང་། འཛུགས་སྐྲུན་ལས་གྲྭའི་གན་རྒྱའི་རྩོད་གཞི། ཉོ་ཚོང་གན་རྒྱའི་རྩོད་གཞི་བཅས་དིང་རི་རྫོང་མི་དམངས་ཁྲིམས་ཁང་གིས་འདྲི་གཅོད་བྱས་པ་བརྒྱུད་ཤིན་ཅང་གི་འཛུགས་སྐྲུན་ལས་གྲྭ་ཚོགས་པ་ཀུང་སི་ག་གེ་མོས་ཀུང་སི་74དང་མི་སྒེར་ལ་དངུལ་ཁག་སྒོར་ཁྲི་899ལྷག་ཙམ་སྤྲོད་དགོས་པའི་དཔྱད་མཚམས་ཁྱབ་བསྒྲགས་བྱས་ཡོད། ཤིན་ཅང་གི་འཛུགས་སྐྲུན་ལས་གྲྭ་ཚོགས་པ་ཀུང་སི་ག་གེ་མོས་འདྲི་གཅོད་དང་པོར་བློ་ཡིད་མ་ཚིམ་པར་གོང་གཏུག་བྱས་རྗེས་འདྲི་གཅོད་ཁྲིམས་ཁང་གཉིས་པས་ཐོག་མའི་དཔྱད་མཚམས་ལ་གཞི་འཇོག་རྒྱུའི་གཏན་འཁེལ་བྱས། དཔྱད་མཚམས་གོ་ཆོད་རྗེས་ཤིན་ཅང་གི་འཛུགས་སྐྲུན་ལས་གྲྭ་ཚོགས་པ་ཀུང་སི་ག་གེ་མོས་གོ་ཆོད་ཀྱི་བཅའ་ཁྲིམས་ཡི་གེའི་འོས་འགན་རྩ་བ་ནས་མ་འཁུར་བས་ཀྲུང་གོ་འགྲིམ་འགྲུལ་གཞུང་ལམ་ལས་གྲྭ་ཀུང་སི་ག་གེ་མོ་སོགས་ཀྱིས་བཙན་ཤེད་ངང་ལག་བསྟར་བྱེད་དགོས་པའི་རེ་ཞུ་བཏོན།

གྱོད་གཞི་དེ་ལག་བསྟར་གྱི་བརྒྱུད་རིམ་དུ་སླེབས་རྗེས། ལག་བསྟར་ཁྲིམས་དཔོན་གྱིས་དབྱེ་ཞིབ་བརྡར་གཅོད་ཐེངས་མང་བྱས་པ་བརྒྱུད་ཤིན་ཅང་གི་འཛུགས་སྐྲུན་ལས་གྲྭ་ཚོགས་པ་ཀུང་སི་ག་གེ་མོའི་རྐང་བདག་ཁ་ཤས་ལ་ཁྲིམས་ལྟར་མ་དངུལ་འདོན་པའི་འོས་འགན་མ་འཁུར་བར་རྐང་དབང་ནང་བཤུག་གཏོང་བའི་བྱེད་སྤྱོད་ལྡན་པ་ཤེས་རྗེས་ལག་བསྟར་རེ་ཞུ་མཁན་ལ་ཁྲིད་སྟོན་བྱས་པ་མ་ཟད། ལག་བསྟར་གྱི་བསམ་འཆར་མི་མཐུན་པའི་བརྒྱུད་རིམ་བརྒྱུད་རྗེས། ཁྲིམས་ལྟར་མ་དངུལ་འདོན་པའི་འོས་འགན་མ་འཁུར་བའི་རྐང་བདག་ཚང་མ་ལག་བསྟར་བྱ་ཡུལ་ཡིན་པ་ཁྲིམས་ལྟར་བཀའ་བཅད་བྱས་ཡོད། འབྲེལ་ཡོད་རྐང་བདག་ལ་གསབ་སྣོན་གྱི་བཀའ་བཅད་བྱས་རྗེས། ལག་བསྟར་བྱ་ཡུལ་ཤིན་ཅང་གི་འཛུགས་སྐྲུན་ལས་གྲྭ་ཚོགས་པ་ཀུང་སི་ག་གེ་མོ་འགན་འཁུར་བ་གཙོ་བོ་ལམ་ཐག་རིང་པོར་མ་འཛེམ་པར་མཚན་དེ་རང་དུ་ཁྲིམས་ཁང་ལ་སླེབས་པ་མ་ཟད། ཡན་ལག་ཀུང་སི་ཞིག་གིས་ལག་བསྟར་རྒྱུ་ནོར་གྱི་ཁུངས་སྣེ་མཁོ་འདོན་བྱས་ནས་བསྡམས་བཅད་དང་རྩིས་ཁོངས་སྒྱུར་བ་སོགས་བྱས་ཡོད། མཐར་གྱོད་འབྲེལ་དངུལ་སྒོར་ཁྲི་899ལྷག་ཙམ་ཕྱིར་སློག་བྱས་ཡོད།