འདི་ནི་ལྷ་སའི་འགྲིམ་འགྲུལ་ཉེན་རྟོག་པས་སྤྱི་སྤྱོད་གློག་སྒུལ་སྦག་སྦག་གང་བྱུང་དུ་འཇོག་པའི་གནས་ཚུལ་ལ་བཅོས་སྒྲིག་བྱེད་བཞིན་པ།

ཁོངས་གཏོགས་ཁུལ་གྱི་ལམ་འགྲམ་དུ་འཁོར་རིགས་འཇོག་པའི་སྒྲིག་ལམ་སྔར་བས་ཚད་ལྡན་དུ་བཏང་ནས་འགྲོ་ལམ་ཤར་གཏོང་གི་ལས་ཕྱོད་ཆེ་རུ་ཏན་ཏིག་བཏང་སྟེ“འཁོར་རིགས་གོ་རིམ་ལྡན་པའི་ངང་སྐྱོད་པ་དང་། འཁོར་རིགས་ཚད་ལྡན་འཇོག་པ། འགྲོ་ལམ་ཤར་བགྲོད་ཐུབ་པ། མང་ཚོགས་བློ་ཡིད་ཚིམས་པ”བཅས་ཀྱི་འགྲོ་ལམ་འགྲིམ་འགྲུལ་གྱི་ཁོར་ཡུག་ཧུར་ཐག་གཏོད་ཆེད། ཉིན་ཤས་བསྟུད་མར། ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་གྲོང་ནུབ་རུ་ཆེན་གྱིས་ཁོངས་གཏོགས་ཁུལ་གྱི་འགྲོ་ལམ་འགྲིམ་འགྲུལ་གྱི་ཁྱད་ཆོས་དང་ཟུང་འབྲེལ་དམ་ཟབ་བྱས་ཏེ། འཁོར་རིགས་ཁྲིམས་འགལ་ངང་འཇོག་པའི་བྱེད་སྤྱོད་ཐོན་མང་བའི་ས་ཁོངས་ལ་སྐོར་ཞིབ་དང་བཅོས་སྒྲིག་ཐེངས་མང་བྱས་པ་རེད།

བྱ་སྤྱོད་སྤེལ་རིང་། མི་དམངས་ཉེན་རྟོག་པས“ཕྱོགས་གཅིག་ནས་དྲིལ་བསྒྲགས་བྱེད་པ་དང་། ཕྱོགས་གཞན་ཞིག་ནས་ཚད་ལྡན་བཟོ་བ་དང་བཅོས་སྒྲིག་བྱེད་པའི”རྩ་དོན་མཐའ་འཁྱོངས་བྱས་ཏེ། རྒྱ་ཆེའི་འགྲུལ་བཞུད་པ་ཚོས་ཡ་རབས་ངང་འགྲོ་སྐྱོད་བྱས་ནས་ཐུན་མོང་ཐོག་ཡ་རབས་དང་ཤར་བགྲོད་ཀྱི་འགྲིམ་འགྲུལ་ཁོར་ཡུག་གཏོད་པར་ཁྲིད་སྟོན་བྱས་པ་རེད།

“དུས་རྒྱུན་ང་ཚོས་གློག་སྒུལ་སྦག་སྦག་གོ་རིམ་ལྡན་པའི་ངང་དམིགས་འཛུགས་ཀྱི་གློག་སྒུལ་སྦག་སྦག་འཇོག་སར་འཇོག་དགོས། དེ་ལྟར་བྱས་ཚེ་འགྲོ་ལམ་ཤར་བགྲོད་ཐུབ་ལ་འགྲོ་སྐྱོད་ཀྱང་སྟབས་བདེ་ཡོང་གི་རེད། འགྲིམ་འགྲུལ་ཉེན་རྟོག་བློ་མཐུན་ཚོས་དྲིལ་བསྒྲགས་ཁྲིད་སྟོན་དང་ཁ་ཏ་སློབ་གསོ་ཟུང་དུ་འབྲེལ་བའི་ལས་ཀའི་བྱ་ཐབས་མཐའ་འཁྱོངས་བྱས་པར་ཐུགས་རྗེ་ཆེ་ཞུ་རྒྱུ་ཡིན། ང་ཚོའི་རང་རྟོགས་ངང་རླངས་འཁོར་ཚད་ལྡན་འཇོག་པའི་འདུ་ཤེས་སྔར་བས་ཟབ་ཏུ་ཕྱིན་སོང”ཞེས་གྲོང་མི་ཚེ་རིང་ལྷ་མོས་བརྗོད།

སྐོར་ཞིབ་བྱེད་རིང་ཁྲིམས་འགལ་ངང་བཞག་པའི་འཁོར་རིགས་ལ་མི་དམངས་ཉེན་རྟོག་པས་འཁོར་རིགས་ཀྱི་ཁ་ལོ་བར་ངོ་ཐུག་གདོང་འཕྲད་ཀྱིས་དྲིལ་བསྒྲགས་སློབ་གསོ་བཏང་ནས། ཁོ་ཚོར་འཁོར་རིགས་ཚད་ལྡན་འཇོག་པར་ཁྲིད་སྟོན་བྱས་པ་དང་། ས་ཡུལ་དངོས་སུ་ཁ་ལོ་བ་མེད་པའི་འཁོར་རིགས་ལ་པར་བརྒྱབ་ནས་དཔང་རྟགས་ལེན་པ་དང་ཆབས་ཅིག་ཁ་པར་བརྒྱབ་པ་དང་འཕྲིན་ཐུང་བསྐུར་ནས་དྲན་སྐུལ་བྱས་པ། དུས་ཐོག་ཏུ་མི་བསྐྱོད་པའི་འཁོར་རིགས་ལ་འཁོར་རིགས་ཁྲིམས་འགལ་ངང་འཇོག་པའི་གསལ་ཞུའི་ཡི་གེ་སྦྱར་བས་ཞིབ་བཤེར་ནན་པོ་དང་དོ་དམ་ནན་པོ་བྱེད་པའི་དམ་བསྒྲགས་ཀྱི་རྣམ་པ་ཞིག་ཆགས་ཡོད།