ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་ཀྱིས།
སྐྱེ་ཁམས་ཁོར་ཡུག་སྲུང་སྐྱོང་དང་གྲོང་ཁྱེར་བཅོས་སྐྱོང་ལས་དོན་ལ་དམ་འཛིན་ནན་པོ་བྱས་པ།
ཉེ་བའི་ལོ་ཤས་རིང་། ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་ཀྱིས་བྱ་ཐབས་ནུས་ལྡན་རབ་དང་རིམ་པ་སྤྱད་དེ་སྐྱེ་ཁམས་ཁོར་ཡུག་སྲུང་སྐྱོང་དང་གྲོང་ཁྱེར་བཅོས་སྐྱོང་ལས་དོན་ལ་དམ་འཛིན་ནན་པོ་བྱས་པས། ས་ཁོངས་ཀྱི་ཁོར་ཡུག་ལེགས་སུ་ནུས་ལྡན་ཕྱིན་པ་མ་ཟད། མང་ཚོགས་ཀྱི་འཚོ་བའི་སྤུས་ཚད་ཀྱང་མངོན་གསལ་དོད་པོས་མཐོ་རུ་ཕྱིན་ཡོད།
སྟོད་ལུང་བདེ་ཆེན་ཆུས་ཀྱིས་གཙོ་གནད་མདོང་ལམ་སྒྱུར་བཀོད་རྣམ་གྲངས་15ཇུས་འགོད་ལག་བསྟར་བྱས་པའི་ནང་སྟོད་ལུང་གཞུང་ལམ་གྱི་ཆུ་འབུད་མདོང་ལམ་སྒྱུར་བཀོད་དང་། སྣེའུ་ཤར་ཟམ་ཆེན་གྱི་བཙོག་འབུད་འཕྲལ་སྡོམ་གཙང་གསིང་། མདོང་ལམ་གཤོང་བ། ཁུལ་ཆུང་རྙིང་པ་སྒྱུར་བཀོད་སོགས་ཚུད་ཡོད། མིག་སྔའི་བར། ལྷ་ས་སྐྱིད་ཆུ་དང་སྟོད་ལུང་ཆུ་བོ་དང་དེའི་ཆུ་ཕྲན་རྒྱུད་ཀྱི་བཙོག་འབུད་བཅོས་སྒྲིག་ཁག་28དང་། དེ་བཞིན་མཐུན་སྒྲིལ་ལམ་གྱི་ཆར་ཆུ་དང་བཙོག་ཆུའི་མདོང་ལམ་སྒྱུར་བཀོད་ལེགས་གྲུབ་ཟིན་ཡོད།
བཙོག་ཆུ་གཙང་གསིང་གི་ལས་ཕྱོད་སྔར་བས་ཆེ་རུ་གཏོང་ཆེད། སྟོད་ལུང་བདེ་ཆེན་ཆུས་ཀྱིས་ད་དུང་ཆུ་འབུད་མདོང་ལམ་གྱི་མ་ལག་ཕྱོགས་ཡོངས་ནས་རིམ་སྤོར་བྱས་ཤིང་། བྱ་ཐབས་རབ་དང་རིམ་པ་ལག་བསྟར་བྱས་པ་བརྒྱུད་སྟོད་ལུང་བདེ་ཆེན་ཆུས་ཀྱི་འཚོ་བའི་བཙོག་ཆུ་གཙང་གསིང་ལ་ཕན་འབྲས་མངོན་གསལ་དོད་པོ་ཐོབ་ཡོད།
འཚོ་བའི་གད་སྙིགས་གཙང་སེལ་ཡག་པོ་བྱ་ཆེད། སྟོད་ལུང་བདེ་ཆེན་ཆུས་ཀྱིས་གད་སྙིགས་རིགས་དབྱེའི་ལམ་ལུགས་ཁྱབ་གདལ་ཧུར་ཐག་བཏང་ཡོད། དྲིལ་བསྒྲགས་དང་སློབ་གསོ་རྒྱ་ཁྱབ་སྤེལ་ནས་གྲོང་མི་ཚོར་གད་སྙིགས་རིགས་དབྱེ་ཡང་དག་བྱེད་པར་ཁྲིད་སྟོན་བྱས་པས། གད་སྙིགས་རིགས་དབྱེའི་གནད་འཁེལ་རང་བཞིན་དང་དེའི་ནང་ཞུགས་ཚད་མཐོ་རུ་ཕྱིན་པ་མ་ཟད། མང་ཚོགས་ལ་ཁོར་ཡུག་སྲུང་སྐྱོང་གི་གོམས་གཤིས་བཟང་པོ་ཡང་རིམ་བཞིན་འཇགས་པར་བྱས་ཡོད།
སྟོད་ལུང་བདེ་ཆེན་ཆུས་ཀྱི་འབྲེལ་ཡོད་ལས་དོན་པས“གོམ་སྟབས་རྗེས་མར་སྟོད་ལུང་བདེ་ཆེན་ཆུས་ཀྱིས་ལྟ་སྐུལ་དང་། མཛུབ་ཁྲིད། ཞིབ་བཤེར་བཅས་དམ་འཛིན་བྱ་གཞིར་བྱས་ནས། ལྟ་སྐུལ་པའི་སྤྱོད་ཚུལ་དང་སྒྲིག་ཁྲིམས་ལ་ལྟ་ཞིབ་བྱེད་ཤུགས་སྔར་བས་ཆེ་རུ་བཏང་ནས་སྐར་མ་བརྗེ་སའི་སྒོ་རྩིས་ཚོང་ཁང་9ཡི་སྐར་བརྗེས་དངོས་ཟོག་གི་ལས་དོན་དོན་འཁྱོལ་ནན་ཏན་བྱེད་པ་དང་། སྐར་བརྗེའི་ལྟ་སྐུལ་པའི་འགན་འཁྲིར་ཤུགས་སྣོན་བརྒྱབ་ནས་གད་སྙིགས་རིགས་དབྱེའི་ལས་དོན་ཁག་ནུས་ཆེའི་ངང་སྤེལ་ཐུབ་པའི་འགན་ལེན་བྱས་ཏེ། རྒྱུན་ཆད་མེད་པར་བྱ་ཐབས་གསར་གཏོད་དང་། སྐུལ་འདེད་བརྟན་པོ། སྙིང་རུས་གཏན་འཁྱོངས་བཅས་བྱས་པས། འཚོ་བའི་གད་སྙིགས་རིགས་དབྱེའི་ལས་དོན་སླར་ཡང་སྐས་རིམ་གསར་པ་ཞིག་ཏུ་སླེབས་ཐུབ་པར་བྱེད་ཀྱི་ཡིན”ཞེས་གསར་འགོད་པར་བརྗོད་བྱུང་།
ད་ཆ་སྟོད་ལུང་བདེ་ཆེན་ཆུས་འདི་ཉིད་གནས་འཕྲོད་ལས་འཚམ་གྱི་མཛེས་སྡུག་ལྡན་པའི་ཁྱིམ་གཞིས་ཤིག་ཏུ་གྱུར་ཡོད། མང་ཚོགས་ཚོས་དེ་གར་མཁའ་རླུང་གཙང་མ་དང་མཛེས་སྡུག་ལྡན་པའི་ཁོར་ཡུག་ལོངས་སུ་སྤྱོད་བཞིན་བདེ་སྐྱིད་དང་མཛེས་སྡུག་ལྡན་པའི་འཚོ་བ་སྐྱེལ་བཞིན་ཡོད། ཁོང་ཚོས་མུ་མཐུད་ཁོར་ཡུག་སྲུང་སྐྱོང་བྱེད་པར་རང་ཉིད་ཀྱི་སྟོབས་ཤུགས་སྐྱེས་སུ་ཕུལ་ནས་ས་གཞི་འདིར་ནམ་ཡང་སྐྱེ་སྟོབས་དང་གསོན་ཤུགས་ལྡན་པར་བྱེད་ཀྱི་ཡིན་ཞེས་གཅིག་རྗེས་གཉིས་མཐུད་ངང་བཤད།