སྟོན་ཁ་ཤར་བ་དང་བསྟུན་ནས་གནམ་གཤིས་རིམ་བཞིན་གྲང་དུ་ཕྱིན་ཞིང་། རང་ལྗོངས་སུ་གཞུང་ལམ་གྱི་ཆ་རྐྱེན་ཞན་དུ་འགྲོ་བའི་ཁར། ཆར་པ་དང་གངས་འབབ་པ་དང་སྨུག་པ་འཁྲིགས་པ་སོགས་ཀྱི་གནམ་གཤིས་བསྟན་ནས་མང་ཚོགས་ཀྱི་འགྲོ་སྐྱོད་བདེ་འཇགས་ལ་ཉེན་ཁ་ཆེན་པོ་བཟོ་གི་ཡོད།

དུས་ཚིགས་འདིར་འགྲིམ་འགྲུལ་ཉེན་རྟོག་པ་རྣམས་ནི་འགྲོ་ལམ་ཐོག་ལས་བྲེལ་ཆེ་ཤོས་དེ་ཡིན་པ་ལས“གང་དུ་དཀའ་ངལ་ཡོད་ན། དེ་གར་ང་ཚོ་འགྲིམ་འགྲུལ་ཉེན་རྟོག་པ་ཡོད”ཅེས་པ་དེ་མངོན་ཡོད།

ནམ་དགུང་དུ་རོགས་སྐྱོར་བྱས་པ།

ལྷོ་རོང་འགྲིམ་འགྲུལ་ཉེན་རྟོག་པའི་མི་སེམས་དྲོ་བའི་རོགས་རམ།

ཟླ་10ཚེས་21ཉིན་གྱི་ཐོ་རེངས་ཆུ་ཚོད་0ཙམ་ལ། ཆབ་མདོ་གྲོང་ཁྱེར་ལྷོ་རོང་རྫོང་འགྲིམ་འགྲུལ་ཉེན་རྟོག་རུ་ཆེན་ལ་བཀོད་འདོམས་ལྟེ་གནས་ནས“རྒྱལ་ལམ་349ལྷོ་རོང་རྫོང་ལྟེ་ཐང་གྲོང་ཚོའི་ལམ་དུམ་དུ་ས་རུབ་པ་དང་བསྟུན་ནས་རླངས་འཁོར་ཞིག་སྟབས་མ་ལེགས་པར་ལམ་ཟུར་གྱི་ཆུ་ཡུར་དུ་ཟགས་འདུག”ཅེས་པའི་ཉེན་བརྡ་འབྱོར།

ཉེན་བརྡ་འབྱོར་རྗེས། ལྷོ་རོང་རྫོང་འགྲིམ་འགྲུལ་ཉེན་རྟོག་རུ་ཆེན་གྱིས་འཕྲལ་མར་ཉེན་རྟོག་པ་སྒྲིག་འཛུགས་བྱས་ཏེ་རོགས་སྐྱོབ་ཡོ་བྱད་ཁྱེར་ནས་ལས་འཛོལ་ཐོན་ཡུལ་དུ་བསྐྱོད།

ཆུ་ཚོད་གཅིག་ཙམ་འབད་བརྩོན་བྱས་པ་བརྒྱུད། རླངས་འཁོར་བདེ་བླག་ངང་ཆུ་ཡུར་ནས་བཏོན་ཡོད། ཁ་ལོ་བས“གལ་སྲིད་ཁྱེད་ཚོ་མེད་ན། གནམ་གཤིས་གྲང་མོ་འདི་འདྲར་ང་རང་འདི་གར་ལུས་ཐག་ཆོད་རེད། དངོས་གནས་ཐུགས་རྗེ་ཆེ་ཞུ་རྒྱུ་ཡིན”ཞེས་སེམས་འགུལ་ཐེབས་བཞིན་དུ་མི་དམངས་ཉེན་རྟོག་པར་བཤད།

མང་ཚོགས་གློ་བུར་དུ་ན་བ།

ཉིང་ཁྲིའི་འགྲིམ་འགྲུལ་ཉེན་རྟོག་པས་རོགས་རམ་གང་ཐུབ་བྱས་པ།

ཟླ་10ཚེས་18ཉིན་གྱི་ཕྱི་དྲོ། ཉིང་ཁྲི་གྲོང་ཁྱེར་གྱི་འགྲིམ་འགྲུལ་ཉེན་རྟོག་ཉིང་ལག་རུ་ཁག་གི་མི་དམངས་ཉེན་རྟོག་པ་དང་ལས་རོགས་ཉེན་རྟོག་པ་འགྲིམ་འགྲུལ་ཉེན་རྟོག་པའི་དྲིལ་བསྒྲགས་པར་གཞི་ལེན་པར་འགྲོ་བའི་ལམ་བར་དུ་རླངས་འཁོར་ཞིག་གཞུང་ལམ་གྱི་དཀྱིལ་དུ་བཀག་ནས་གཞུང་ལམ་འགྲིམ་འགྲུལ་གྱི་སྒྲིག་ལམ་ལ་ཤུགས་རྐྱེན་ཚབས་ཆེན་བཟོས་པ་མཐོང་བས་དེ་མ་ཐག་གནས་ཚུལ་ཤེས་རྟོགས་བྱེད་པར་བསྐྱོད།

ཉེན་རྟོག་པས་ཁ་ལོ་བའི་ངོ་གདོང་སྐྱ་བོར་གྱུར་པ་མཐོང་འཕྲལ་བྱ་སྤྱོད་སྤེལ་ཏེ། ཕྱོགས་གཅིག་ནས་རླངས་འཁོར་གྱི་མཐའ་འཁོར་དུ་ཉེན་བརྡའི་མཚོན་རྟགས་འཇོག་པ་དང་ཕར་འགྲོ་ཚུར་འོང་བྱེད་མཁན་རླངས་འཁོར་བསྐོར་ནས་འགྲོ་རུ་བཅུག་སྟེ་འགྲོ་ལམ་འགྲིམ་འགྲུལ་བདེ་འཇགས་ལ་འགན་ལེན་བྱས་པ་དང་། ཕྱོགས་གཞན་ཞིག་ནས་ཉེ་འགྲམ་གྱི་ཚོང་ཁང་ནས་བྱི་རིལ་སོགས་ཉོས་ཏེ་ཁ་ལོ་བའི་ཁྲག་མངར་རྒྱུ་དམའ་བའི་ནད་རྟགས་སེལ་ཐབས་བྱས་པ་རེད།

ངལ་གསོ་གང་ཙམ་བརྒྱབ་པ་བརྒྱུད། ཁ་ལོ་བའི་གཟུགས་པོའི་གནས་ཚུལ་རིམ་བཞིན་ཡག་ཏུ་ཕྱིན་པ་དང་། ཁ་ལོ་བའི་གཟུགས་པོར་སྐྱོན་ཆེན་པོ་མེད་པ་ཤེས་རྗེས། མི་དམངས་ཉེན་རྟོག་པ་གཞི་ནས་བློ་བདེའི་ངང་ཕྱིར་ལོག་པ་རེད།

གནམ་གཤིས་ངན་པོའི་ཁྲོད་ཉེན་གྱར་ཁ་ལོ་བ་བསྐྱབས་པ།

སྣ་དཀར་རྩེའི་འགྲིམ་འགྲུལ་ཉེན་རྟོག་པར་བསྔགས་བརྗོད་ཐོབ་པ།

ཟླ་10ཚེས་20ཉིན་གྱི་ཆུ་ཚོད་14ཙམ་ལ། ལྷོ་ཁ་གྲོང་ཁྱེར་སྣ་དཀར་རྩེ་རྫོང་སྤྱི་བདེ་ཅུས་ལྷུན་པོ་ཞོལ་ཤང་མངགས་གཏོང་ཁང་ལ་བཀོད་འདོམས་ལྟེ་གནས་ནས་གློ་བུར་དུ་གངས་མ་ཆར་བབས་པའི་རྐྱེན་གྱིས། ཞིང་ཆེན་ལམ་206གི་ལམ་དུམ་596ཏུ་ཡོད་པའི་ཆུ་མགོ་གྲོང་ཚོའི་སྣ་མ་རི་སྟེང་དུ་འཕྲུལ་འཁོར་ཉམས་གསོ་ས་ཚིགས་ཀྱི་ལས་དོན་པ་ཞིག་གིས་གཟབ་གཟབ་མ་བྱས་པའི་དབང་གིས། རླངས་འཁོར་རི་སྐེད་ཀྱི་གྲོག་རོང་ནང་ཟགས་པས་འཕྲལ་མར་རོགས་སྐྱོབ་བྱེད་པར་འགྲོ་དགོས་པའི་ཉེན་བརྡ་འབྱོར།

དུས་ཚོད་ནི་ཚེ་སྲོག་ཡིན། ཉེན་བརྡ་འབྱོར་རྗེས། འགྲིམ་འགྲུལ་ཉེན་རྟོག་པས་ཤང་འཕྲོད་བསྟེན་ཁང་གི་ལས་དོན་མི་སྣ་དང་མཉམ་དུ་རླངས་འཁོར་བཏང་སྟེ་ལས་འཛོལ་ཐོན་སར་བསྐྱོད། གནས་ཚུལ་ཐོན་ཡུལ་དུ་འབྱོར་རྗེས་མི་དམངས་ཉེན་རྟོག་པས་འཕྲལ་མར་ཆེད་ལས་རོགས་སྐྱོབ་ཡོ་བྱད་དང་སྒྲིག་ཆས་སྤྱད་དེ་ཉེན་གྱར་ཁ་ལོ་བ་བསྐྱབས་པ་དང་འབྲེལ། མྱུར་སྐྱོབ་རླངས་འཁོར་ནང་བླུགས་ནས་སྐྱོབ་རོགས་བྱས་པས། སྟབས་ལེགས་པ་ཞིག་ལ་ཁ་ལོ་བ་དེར་རྨས་སྐྱོན་ཆེན་པོ་ཕོག་མེད་པ་རེད། དེ་རྗེས་མི་དམངས་ཉེན་རྟོག་པས་རླངས་འཁོར་དེ་བཏོན་པས། ཁ་ལོ་བས་མི་དམངས་ཉེན་རྟོག་པས་དུས་ཐོག་ཏུ་སྐྱོབ་པར་ཐུགས་རྗེ་ཆེ་ཞུས་པ་རེད།

མང་ཚོགས་ཀྱི་ཁེ་ཕན་ལ་དོན་ཆུང་མེད། ཞབས་འདེགས་ཆུང་ཆུང་ལས་མི་སེམས་ལ་དྲོ་སྐྱིད་སྦྱིན། སྟོན་མཇུག་ཏུ་བོད་ཀྱི་ས་ཕྱོགས་གང་སར་འགྲིམ་འགྲུལ་ཉེན་རྟོག་སྡེ་ཚན་གྱིས་བྱ་སྤྱོད་དངོས་ཀྱི་ཐོག་ནས“མི་དམངས་སྤྱི་བདེས་མི་དམངས་ལ་བྱ་བ་སྒྲུབ་པའི”དམིགས་ཡུལ་དང་འགན་འཁྲི་གང་ལེགས་མངོན་པར་བྱས་ཡོད།