འདི་ལོ་ཚུན། ལྷོ་ཁ་གྲོང་ཁྱེར་གྱི་བཟའ་བཅའི་བདེ་འཇགས་ལས་དོན་གྱིས“ནན་ཤོས་བཞིའི”ཚད་གཞི་ལག་བསྟར་ནན་པོ་བྱས་ཏེ། ཏང་སྲིད་འགན་འཁྲི་གཅིག་མཚུངས་དང་རྩ་ལག་མཉམ་བཅོས་ཀྱི་འདུ་ཤེས་རྒྱུན་འཁྱོངས་བྱེད་པ་དང་། སྔོན་འགོག་གཙོ་བོར་བྱེད་པ། ཉེན་ཁར་དོ་དམ་བྱེད་པ། བརྒྱུད་རིམ་ཧྲིལ་པོར་ལྟ་སྐུལ་ཚོད་འཛིན་བྱེད་པ། སྤྱི་ཚོགས་མཉམ་བཅོས་ལ་སྐུལ་འདེད་གཏོང་བ་བཅས་བྱས་ནས། ནུས་ཤུགས་ཡོད་རྒུས་དེང་རབས་ཅན་གྱི་བཟའ་བཅའི་བདེ་འཇགས་བཅོས་སྐྱོང་མ་ལག་བསྐྲུན་པ་དང་ཞིང་ནང་ནས་གསོལ་ལྕོག་བར་གྱི་བརྒྱུད་རིམ་ཧྲིལ་པོའི་ལྟ་འདོམས་ནུས་པ་ཆེ་རུ་ཏན་ཏིག་བཏང་སྟེ། ནུས་ཤུགས་ཡོད་རྒུས་མི་དམངས་མང་ཚོགས་ཀྱི“ལྕེ་ཐོག་གི་བདེ་འཇགས”སྲུང་སྐྱོང་བྱས་པ་རེད།

ལྟ་འདོམས་བྱེད་ཤུགས་ཆེ་རུ་བཏང་ནས། བཟའ་བཅའི་བདེ་འཇགས་ཀྱི་འགོག་སྲུང་འཛིང་རགས་བརྟན་དུ་བཏང་བ།

བཟའ་བཅའི་བདེ་འཇགས་དོ་དམ་ལ་ཕྱོགས་ཡོངས་ནས་ཤུགས་སྣོན་བརྒྱབ་ནས་དེ་བས་བདེ་འཇགས་དང་སྐྱོན་བྲལ་གྱི་བཟའ་བཅའི་ཁོར་ཡུག་གཏོད་ཆེད། ལྷོ་ཁ་གྲོང་ཁྱེར་གྱིས་བྱ་ཐབས་ནུས་ལྡན་རབ་དང་རིམ་པ་སྤྱད་དེ་མཐོ་གནས་སྐུལ་འདེད་དང་ལམ་སྲོལ་གསར་གཏོད་ཟུང་འབྲེལ་བྱེད་པའི་བྱ་ཐབས་བརྒྱུད། བཟའ་བཅའི་བདེ་འཇགས་ཀྱི“འགན་འཁྲི་གཉིས”དོན་འཁྱོལ་བྱེད་པར་སྐུལ་འདེད་ནུས་ལྡན་བཏང་ཡོད། འགོ་ཁྲིད་ཀྱི་ངོས་ནས་ལྷོ་ཁ་གྲོང་ཨུད་དང་གྲོང་ཁྱེར་སྲིད་གཞུང་གིས་བཟའ་བཅའི་བདེ་འཇགས་ལས་དོན་ལ་ཚད་མཐོའི་མཐོང་ཆེན་བྱས་ནས། གྲོང་ཁྱེར་གྱི་བཟའ་བཅའ་དང་སྨན་རྫས་བདེ་འཇགས་ཨུ་ལྷན་གྱི་འགོ་ཁྲིད་ཚོགས་ཆུང་ལེགས་སྒྲིག་བྱས་པ་བརྒྱུད་བཟའ་བཅའི་བདེ་འཇགས་ཀྱི་ཏང་སྲིད་འགན་འཁྲི་གཅིག་མཚུངས་ནུས་ལྡན་ངང་མངོན་འགྱུར་བྱུང་བ་རེད།

ཁོངས་གཏོགས་ས་ཆའི་འགན་འཁྲི་སྔར་བས་དོན་འཁྱོལ་བྱ་ཆེད། ལྷོ་ཁ་གྲོང་ཁྱེར་གྱིས་རྫོང་རིམ་པའི་ལས་བྱེད་པ་3བཟའ་བཅའི་བདེ་འཇགས་ཀྱི“འགན་འཁྲི་གཉིས”ཀྱི་སྤྱི་ཁྱབ་འགན་འཁྲི་གཙང་ལེན་བྱེད་མཁན་ལ་ཆེད་མངགས་བསྐོ་གཞག་བྱས་ནས། རིམ་ཁག་འགན་འཁྲི་གཙང་ལེན་ལས་བྱེད་པས་འགན་འཁྲི་སྔར་བས་ནུས་ལྡན་ངང་བསྒྲུབ་རྒྱུར་སྐུལ་འདེད་བཏང་བ་རེད། དེ་དང་ཆབས་ཅིག་ལྷོ་ཁ་གྲོང་ཁྱེར་གྱིས་འབྲེལ་ཡོད་དཔྱད་ཞིབ་བྱ་ཐབས་བཏོན་པ་བརྒྱུད། བཟའ་བཅའི་བདེ་འཇགས་ལས་དོན་ལ་དཔྱད་གླེང་དཔྱད་ཞིབ་བྱས་པ་དང་འབྲེལ་དཔྱད་ཞིབ་གྲུབ་འབྲས་སྤྱོད་རྒྱུར་ཤུགས་སྣོན་བརྒྱབ་སྟེ། གྲུབ་འབྲས་མངོན་གསལ་དོད་པའི་གྲ་ནང་སོགས་རྫོང་5ལ་གཟེངས་བསྟོད་བྱས་པ་དང་ཁྱོན་བྱ་དགའི་དངུལ་སྒོར་ཁྲི་50སྤྲད་པ་རེད།

བྱེད་ཐབས་གསར་གཏོད་བྱས་ནས།  བཟའ་བཅའི་བདེ་འཇགས་ཀྱི་ཆུ་ཚད་མཐོ་རུ་བཏང་བ།

ཞིང་ལས་ཐོན་རྫས་ཀྱི་སྤུས་ཚད་བདེ་འཇགས་ཐད། ལྷོ་ཁ་གྲོང་ཁྱེར་གྱིས་ཞིང་ལས་ཐོན་རྫས་ཀྱི“བཀག་སྡོམ་ལས་འགལ་བ་དང་། ཞིང་སྨན་འཕྲོ་ལུས་ཚོད་འཛིན། མཐོར་འདེགས་ལ་སྐུལ་འདེད”བཅས་ཀྱི་བྱ་སྤྱོད་མུ་མཐུད་སྤེལ་ནས་དྲ་མིག་ཅན་གྱི་དོ་དམ་བྱས་པ་རེད། མིག་སྔའི་བར་ཚད་ལོན་ལག་ཁྱེར་1202སྤྲད་པ་དང་ལག་ཁྱེར་ཡོད་པའི་ཞིང་ལས་ཐོན་རྫས་ཁྲོམ་རར་འདོན་ཚད་ཏུན་250.1545ཟིན་ཡོད་པ་རེད།

བཟའ་བཅའི་ཐོན་སྐྱེད་ཆོག་འཐུས་དོ་དམ་ཐད་ལའང་ཤུགས་སྣོན་ཐེབས་ནས་བརྒྱུད་རིམ་ཧྲིལ་པོ་གློག་རྡུལ་ཅན་དུ་གྱུར་ཡོད། ལྷོ་ཁ་གྲོང་ཁྱེར་ཁྲོམ་ར་ལྟ་འདོམས་སྡེ་ཚན་གྱི་འབྲེལ་ཡོད་ལས་དོན་པས“བརྒྱུད་རིམ་ཧྲིལ་པོ་གློག་རྡུལ་ཅན་དུ་འགྱུར་བ་ལས་ལས་ཕྱོད་ཆེ་རུ་ཕྱིན་པ་མ་ཟད། ཆོག་འཐུས་དོ་དམ་སྔར་བས་ཚད་ལྡན་དང་ཀུན་གསལ་བྱུང་ཡོད། དེ་དང་ཆབས་ཅིག་སློབ་གྲྭའི་ཟ་ཁང་དང་བཟའ་བཅའ་གཉེར་སྐྱོང་ཚན་པར་ལྟ་འདོམས་བྱེད་ཤུགས་ཆེ་རུ་བཏང་ནས་བདེ་འཇགས་ལྡན་པའི་འཛད་སྤྱོད་ཁོར་ཡུག་བཏོད་ཡོད”ཅེས་བཤད།

རྒྱལ་ཁབ་ཀྱི་འཕྲོད་བསྟེན་གྲོང་ཁྱེར་འཛུགས་གཏོད་ལས་དོན་ཐད། ལྷོ་ཁ་གྲོང་ཁྱེར་གྱིས་འབྲེལ་ཡོད་ལས་དོན་གཏིང་ཟབ་ཏུ་བཏང་ནས་གཅིག་སྡུད་ཐོག་ཚན་པ་ཁག་གི་ཟ་ཁང་ལ་ལྟ་འདོམས་བྱེད་ཤུགས་ཆེ་རུ་བཏང་བ་དང་འབྲེལ་ས་གནས་ས་ཐོག་ཏུ་ཞིབ་བཤེར་དང་གསོ་སྦྱོང་ཡང་བྱས་པ་རེད། ཏུང་ཧུའེ་སློབ་འབྲིང་གི་ཟ་ཁང་གི་འགན་འཁུར་བ་སྤེན་པས“གསོ་སྦྱོང་བྱས་པ་བརྒྱུད། ང་ཚོའི་ཟ་ཁང་གི་ལས་དོན་པའི་བཟའ་བཅའི་བདེ་འཇགས་ལ་ངོས་འཛིན་སྔར་བས་གཏིང་ཟབ་བྱུང་བ་མ་ཟད། བཀོལ་སྤྱོད་ཀྱང་སྔར་བས་ཚད་ལྡན་དུ་ཕྱིན་ཡོད”ཅེས་བཤད།

དྲ་ཐོག་བཟའ་བཏུང་གི་བདེ་འཇགས་ལ་ལྟ་འདོམས་ནན་པོ་བྱས་ནས་དྲ་ཐོག་གཉེར་སྐྱོང་ཚོང་དུད་ཀྱི་འོས་ཐོབ་ལ་ཞིབ་བཤེར་བྱས་ཡོད། མིག་སྔའི་བར་བཟའ་བཅའ་ཐོན་སྐྱེད་ཆོག་འཐུས་ལག་ཁྱེར་3གསར་དུ་གཉེར་ནས་གྲོང་ཁྱེར་ཡོངས་ཀྱི་བཟའ་བཅའ་ཐོན་སྐྱེད་གཉེར་སྐྱོང་ཚན་པ་9437ལ་ཞིབ་བཤེར་བྱས་པ་དང་ཞིབ་བཤེར་ཁྱབ་ཚད་100%ཟིན་ཡོད།

གཞན་ཡང་། “ཞིབ་བཤེར་འགན་ལེན”དང“བྱ་ཐབས་ནན་པོ”“སློབ་གྲྭའི་བཅོས་སྒྲིག”སོགས་ཆེད་དོན་བྱ་སྤྱོད་མུ་མཐུད་སྤེལ་ནས་བཟའ་བཅའ་དང་སྨན་རྫས་བདེ་འཇགས་ཁྱབ་ཁོངས་ཀྱི་ཁྲིམས་འགལ་བྱེད་སྤྱོད་ལ་རྡུང་རྡེག་ཚ་ནན་བཏང་ཞིང་། མིག་སྔའི་བར་ཁྲིམས་འགལ་གྱོད་གཞི་63ཞིབ་བཤེར་ཐག་གཅོད་བྱས་པ་དང་། དངུལ་ཆད་བསྡོམས་སྒོར་ཁྲི་43.2བཏང་བ། དཔེ་མཚོན་གྱོད་དཔེ་18ཡོངས་བསྒྲགས་བྱས་པ་རེད།

དྲིལ་བསྒྲགས་རྒྱ་ཁྱབ་བྱས་ནས།  བཟའ་བཅའི་བདེ་འཇགས་ཀྱི་ཁོར་ཡུག་བཏོད་པ།

བཟའ་བཅའི་བདེ་འཇགས་ཐད་ལ་སྤྱི་ཚོགས་ཡོངས་ཀྱིས་ཐུན་མོང་ཞུགས་པ་དང་རྒྱབ་སྐྱོར་བྱེད་དགོས། གྲོང་མིའི་བཟའ་བཅའི་བདེ་འཇགས་ཀྱི་འདུ་ཤེས་ཟབ་ཏུ་གཏོང་ཆེད། ལྷོ་ཁ་གྲོང་ཁྱེར་གྱིས་བཟའ་བཅའི་བདེ་འཇགས་ཀྱི་དྲིལ་བསྒྲགས་བྱེད་སྒོ་རྒྱ་ཁྱབ་ངང་སྤེལ་ནས་བཟའ་བཅའི་བདེ་འཇགས་ཀྱི་རྣམ་པ་ཟབ་མོ་ཞིག་བཏོད་ཡོད།

ཟླ་10ཚེས་10ཉིན་ལྷོ་ཁ་གྲོང་ཁྱེར་གྱིས་2024ལོའི་བཟའ་བཅའི་བདེ་འཇགས་དྲིལ་བསྒྲགས་གཟའ་འཁོར་དང་དེ་བཞིན་བཟའ་བཅའ་དང་སྨན་རྫས་བདེ་འཇགས་ཀྱི་དང་བླངས་ཞབས་ཞུའི་བྱ་སྤྱོད་སྤེལ་འགོ་ཚུགས་པའི་མཛད་སྒོ་འཚོགས་པ་རེད།

ལས་དོན་པས་ངང་རྒྱུད་རིང་པོས་གྲོང་མིར་བཟའ་བཅའི་བདེ་འཇགས་སྐོར་གྱི་ཤེས་བྱ་འགྲེལ་བཤད་བརྒྱབ་ཅིང་། “བཟའ་བཅའི་བདེ་འཇགས་ཀྱི་ཤེས་བྱ་ཤེས་རྟོགས་བྱས་པ་བརྒྱུད་རང་ཉིད་ཀྱིས་ཉོས་པའི་བཟའ་བཅའ་བདེ་འཇགས་ཡིན་མིན་གཞི་རྩའི་ཆ་ནས་དབྱེ་འབྱེད་ཐུབ་པས་བློ་བདེ་པོ་འདུག”ཅེས་གྲོང་མི་བསོད་ནམས་པད་མས་བཤད།

སྡེ་ཁུལ་གྱི་ཐང་ཆེན་དུ་བྱེད་སྒོ་སྤེལ་བ་ཕུད། ལྷོ་ཁ་གྲོང་ཁྱེར་གྱིས་ད་དུང་བརྙན་འཕྲིན་དང་། རླུང་འཕྲིན། ཚགས་པར། དྲ་རྒྱ་སོགས་སྨྱན་སྦྱོར་བརྒྱུད་བཟའ་བཅའི་བདེ་འཇགས་ཀྱི་ཤེས་བྱ་དང་བཅའ་ཁྲིམས་ཁྲིམས་སྲོལ་དྲིལ་བསྒྲགས་རྒྱ་ཁྱབ་བྱས་པ་རེད།

དྲིལ་བསྒྲགས་རྒྱ་ཁྱབ་བྱས་པ་བརྒྱུད། ལྷོ་ཁ་གྲོང་ཁྱེར་གྱི་གྲོང་མིའི་བཟའ་བཅའི་བདེ་འཇགས་ཀྱི་འདུ་ཤེས་མངོན་གསལ་དོད་པོས་ཟབ་ཏུ་ཕྱིན་ནས། སྤྱི་ཚོགས་ཡོངས་ཀྱིས་བཟའ་བཅའི་བདེ་འཇགས་ལས་དོན་ལ་ཐུན་མོང་ཐོག་དོ་ཁུར་བྱེད་པ་དང་དེའི་ནང་ཞུགས་པའི་རྣམ་པ་བཟང་པོ་ཞིག་ཆགས་ཡོད།