གསར་འགོད་པར་འབྲེལ་ཡོད་སྡེ་ཚན་ནས་ཤེས་རྟོགས་བྱུང་བར། འདི་ལོའི་ཟླ་དང་པོ་ནས་དགུ་པའི་བར་ལྗོངས་ཡོངས་ཀྱི་དྲ་ཐོག་སིལ་ཚོང་དངུལ་འབོར་སྒོར་དུང་ཕྱུར་164.2ཟིན་པ་དེ་དུས་མཚུངས་ལས་75.4%འཕར་ཡོད། དེའི་ནང་རྫས་གྲུབ་ཚོང་ཟོག་དྲ་ཐོག་སིལ་ཚོང་དངུལ་འབོར་སྒོར་དུང་ཕྱུར་138.0ཟིན་པ་དེ་དུས་མཚུངས་ལས་91.1%འཕར་བ་དང་། འཕར་ཚད་གཉིས་ཀ་རྒྱལ་ཡོངས་ཀྱི་ཨང་དང་པོར་སླེབས་ཡོད། མངོན་གསལ་དོད་པའི་གྲངས་གཞི་ལས་གྲངས་འཛིན་དཔལ་འབྱོར་གྱི་རླབས་རྒྱུན་ཆེན་པོའི་ཁྲོད་བོད་ཀྱི་འཕེལ་རྒྱས་ཀྱི་སྒུལ་ཤུགས་ཆེན་པོ་མངོན་ཡོད་པ་རེད།

ཉེ་བའི་ལོ་ཤས་རིང་། རང་ལྗོངས་ཀྱིས་གྲོང་གསེབ་ཏུ་དྲ་ཐོག་ཚོང་དོན་སྤེལ་བའི་ཕྱོགས་བསྡུས་དཔེ་སྟོན་ཁུལ་ཧྲིལ་པོར་སྐུལ་འདེད་གཏོང་བའི་ལས་དོན་རྨང་གཞིར་བྱས་ཏེ། གྲངས་འཛིན་དཔལ་འབྱོར་དང་དྲ་ཐོག་ཚོང་དོན་ལ་བརྟེན་ནས་ཞིང་ལས་དར་རྒྱས་གཏིང་ཟབ་བཏང་ཞིང་། གྲངས་གཞི་ལས་མངོན་པར། ཟླ་དང་པོ་ནས་དགུ་པའི་བར་བོད་ཀྱི་གྲོང་གསེབ་ཀྱི་དྲ་ཐོག་ཚོང་དོན་སིལ་ཚོང་དངུལ་འབོར་དུས་མཚུངས་ལས་61.4%འཕར་ནས་ལྗོངས་ཡོངས་ཀྱི་དྲ་ཐོག་ཚོང་དོན་ཁྲོད་བསྡུར་ཚད་བཟུང་ཚད་15.5%བར་འཕར་ཡོད་པ་རེད།