-
ལང་ཚོའི་གཟི་བྱིན་འབར་བར་བྱེད། དམག་ཞུགས་ཕུགས་འདུན་དོན་དུ་གཉེར།
ཆབ་མདོ་ཡན་ལག་དམག་ཁུལ་ཁང་གིས་2024ལོའི་སྟོན་དུས་ཀྱི་དམག་གསར་ཁག་དང་པོ་བསུས་པ།
-
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ། | སྤེལ་དུས། 2024-10-15
དམག་དཔུང་ལ་མ་ཞུགས་གོང་གི་ཞིབ་བཤེར་བྱེད་བཞིན་པ།
དཔེ་སྟོན་སྦྱོང་བརྡར་བྱེད་བཞིན་པ།
དམག་མི་གསར་པར་ལྟ་རྟོག་བྱེད་བཞིན་པ།
ཉེ་ཆར་ཆབ་མདོ་ཡན་ལག་དམག་ཁུལ་ཁང་གིས་2024ལོའི་སྟོན་དུས་ཀྱི་དམག་མི་གསར་པ་ཁག་དང་པོ་བསུས་ཤིང་། དེ་ཉིན་ནས་བཟུང་དམག་དཔུང་སྟོབས་ཆེར་གཏོང་བའི་དུང་བརྡ་དངོས་སུ་གཏོང་འགོ་ཚུགས་པ་རེད།
གནམ་གྲུ་ནས་བབས་རྗེས་དམག་མི་གསར་པ་ཚོའི་སྤྲོ་སེམས་རབ་ཏུ་འཕེལ་ནས་རེ་སྒུག་ཆེན་པོ་བྱེད་ཅིང་། དམག་མི་རྒན་གྲས་ཚོས་ཟོལ་མེད་ཀྱི་དགའ་བསུ་ཞུས་པ་དང་དམག་མིའི་སྨན་པས་སེམས་ཁུར་ཆེན་པོ་བྱས་པ་ལས་ཁོ་ཚོའི་སེམས་པ་དྲོ་སྐྱིད་ཀྱིས་མྱོས།
དམག་མི་གསར་པ་བསུ་མཁན་འགྲུལ་སྐྱེལ་རླངས་འཁོར་ཆེ་གྲས་གཅིག་རྗེས་གཉིས་མཐུད་ངང་ཕུགས་འདུན་དོན་གཉེར་བྱེད་སའི་ཕྱོགས་སུ་བསྐྱོད་པ་དང་རྐང་འཛིན་ལས་བྱེད་པ་ཚོས་སྔ་ས་ནས་གྲ་སྒྲིག་ཡག་པོ་བྱས་ཏེ་སྒར་ཁུལ་དུ་དར་ཚོན་ལྷབ་ལྷུབ་ཏུ་གཡོ་བ་དང་འཁར་རྔའི་སྒྲ་ལྷང་ལྷང་དུ་གྲགས་ཤིང་། ཚང་མས་སྤྲོ་སེམས་འཁོལ་བའི་ཐལ་མོའི་རྡེབ་སྒྲ་དང་བཅོས་མིན་གྱི་འཛུམ་མདངས་བསྟན་ནས་དམག་མི་གསར་པར་དགའ་བསུ་ཞུས་པ་རེད།
དེ་རྗེས་དངོས་རྫས་ལ་ཞིབ་བཤེར་བྱེད་པའི་ལྷུ་ཚིགས་སུ་སླེབས་སྐབས། པན་ཀྲང་གིས་དམག་མི་གསར་པ་ཚོའི་སྒེར་གྱི་དངོས་རྫས་ལ་ཞིབ་བཤེར་དང་ཐོ་འགོད་བྱས་ནས་དངོས་རྫས་དག་དཔུང་སྡེའི་དོ་དམ་གཏན་འབེབས་དང་མཐུན་ཡོད་མེད་བལྟས་པ་རེད།
“ལམ་བར་གྱི་ཡུལ་ལྗོངས་གང་འདྲ་འདུག་གམ། ཁྱིམ་དང་བསྡུར་ན་དཔུང་སྡེའི་ལྟོ་ཆས་གང་འདྲ་འདུག་གམ། དཔུང་སྡེ་རང་གིས་བསམ་ཚོད་བྱས་པ་དང་གཅིག་པ་རེད་འདུག་གམ”ཞེས་སོ་སོའི་རུ་ཁག་ཏུ་བསླེབས་རྗེས་རྐང་འཛིན་ལས་བྱེད་པས་དམག་མི་གསར་པ་དང་སྙིང་གཏམ་ཤོད་རེས་བྱས་ནས་དམག་མི་གསར་པའི་བསམ་ཚུལ་དང་མྱོང་ཚོར་ཤེས་རྟོགས་བྱས་པ་མ་ཟད། ངང་རྒྱུད་རིང་པོས་ཁོ་ཚོའི་དོགས་གནད་ལ་ལན་བརྒྱབ་སྟེ་དམག་མི་གསར་པ་དམག་སྒར་དུ་ཐོག་མར་ཡོང་སྐབས་ཀྱི་དངངས་འཚབ་ལྷོད་དུ་བཏང་ནས་ཁོང་ཚོ་ཁོར་ཡུག་གསར་པར་གང་མགྱོགས་གོམས་པར་བྱས་པ་རེད།
“ད་ལོའི་ཟླ་གསུམ་པར་ང་རང་དམག་མིར་ཞུགས་རྒྱུའི་མིང་ཐོ་བཀོད་པ་ཡིན། འོན་ཀྱང་རྒྱང་སྒྲིབ་ཀྱིས་རྐྱེན་པས་ལམ་ལྷོངས་བྱུང་མ་སོང་། དེ་ནས་ངས་ལམ་སེང་རྒྱང་སྒྲིབ་གཤགས་བཅོས་བྱས་པ་ཡིན། ད་ཐེངས་ང་རང་ཡུན་རིང་རེ་སྒུག་བྱེད་པའི་དམག་སྒར་དུ་སླེབས་སོང་། ངས་རང་ཉིད་ཀྱི་གདམ་ག་ནི་འཁྲུལ་མེད་ཡང་དག་ཅིག་ཡིན་པའི་ཡིད་ཆེས་བརྟན་པོ་ཡོད”ཅེས་དམག་མི་གསར་པ་ཀྲུའུ་ཕེང་ཧྥེ་ཡིས་རང་ཉིད་དམག་མིར་ཞུགས་པའི་མྱོང་ཚོར་བརྗོད།