ཉེ་ཆར། ལིའུ་ཆེ་གེ་མོས་བཟོ་པའི་སྣེ་ཁྲིད་དེ་མངའ་རིས་ས་ཁུལ་སྒར་རྫོང་སྤྱི་བདེ་ཅུས་གྲོང་བྱང་མངགས་གཏོང་ཁང་དུ་བསྐྱོད་ནས“བརྩེ་སེམས་བཅངས་ནས་ནུས་ཤུགས་ཡོད་རྒུས་རོགས་རམ་བྱེད། རང་འགན་གཙང་སྒྲུབ་ཀྱིས་སྤྲོ་སེམས་འཁོལ་པོས་དམངས་ལ་ཞབས་འདེགས་ཞུ”དང“དམངས་ལ་བྱ་བ་དངོས་སྒྲུབ། མི་དམངས་ཀྱི་ཉེན་རྟོག་པ་བཟང་པོ”ཞེས་པའི་གོས་དར་གཉིས་ཕུལ་ནས་སྤྱི་བདེ་མི་དམངས་ཉེན་རྟོག་པར“མི་དམངས་ཉེན་རྟོག་པས་ང་ཚོར་ལས་གྲྭའི་དངུལ་དང་གླ་ཆ་ཐག་གཅོད་བྱེད་རོགས་བྱས་པར་ཐུགས་རྗེ་ཆེ་ཞུ་རྒྱུ་ཡིན། ཁྱེད་ཚོ་མེད་ན་ང་ཚོར་གླ་ཆ་རག་ས་མ་རེད”ཅེས་བཤད།

ཟླ་8ཚེས་19ཉིན་ལིའུ་ཆེ་གེ་མོ་སོགས་ཀྱིས“ཁོངས་གཏོགས་ཁུལ་གྱི་ཀུང་སི་ཞིག་གི་ལས་གྲྭ་འགན་གཙང་བླངས་པ་དང་མིག་སྔར་འབྲེལ་ཡོད་ལས་གྲྭའི་དངུལ་དང་གླ་ཆ་རག་མ་བྱུང”ཞེས་རོགས་རམ་རེ་ཞུ་བྱས། མི་དམངས་ཉེན་རྟོག་པས་ཤེས་རྟོགས་བྱས་པ་བརྒྱུད། ལིའུ་ཆེ་གེ་མོ་སོགས་ཀྱིས་2020ལོ་ནས་2023ལོའི་བར་ཀུང་སི་ཞིག་གི་ལས་གྲྭ་འགན་གཙང་བླངས་མོད། རྣམ་གྲངས་འཛུགས་པ་སོགས་ཀྱི་གནད་དོན་གྱིས་རྐྱེན་པས་འབྲེལ་ཡོད་ལས་གྲྭའི་དངུལ་དང་གླ་ཆ་སྤྲད་མེད་པ་ཤེས་རྟོགས་ཐུབ་ཡོད། ཉེན་རྟོག་པས་འཕྲལ་མར་འབྲེལ་ཡོད་འགན་ནུས་སྡེ་ཚན་དང་ཀུང་སི་དེའི་འགན་འཁུར་བ་དང་འབྲེལ་བ་བྱས་ཏེ་ལས་གྲྭའི་དངུལ་དང་གླ་ཆ་འགྱངས་ཆད་བྱས་པའི་གནད་དོན་འདུམ་འགྲིག་བྱས་མཐར་ཕྱོགས་གཉིས་པོའི་དབར་གཏོང་སྤྲོད་ཀྱི་གྲོས་མཐུན་བྱུང་བ་རེད།

ཤེས་རྟོགས་བྱུང་བར་གཞིགས་ན། མི་དམངས་ཉེན་རྟོག་པས་རྗེས་སྙེགས་འདེད་ལེན་ཧུར་ཐག་བྱས་པ་བརྒྱུད། ཀུང་སི་དེས་ཁས་ལེན་བྱས་པའི་ཁག་དང་པོའི་མ་དངུལ་སྒོར་ཁྲི་40ཞིང་པ་ལས་མིའི་ངལ་ནུས་ཀུང་སིའི་རྩིས་ཁྲར་བསྒྱུར་བ་དང་ཁག་གཉིས་པའི་མ་དངུལ་སྒོར་ཁྲི་110ངལ་ནུས་ཀུང་སིའི་རྩིས་ཁྲར་གང་མགྱོགས་བསྒྱུར་ནས་ཞིང་པ་ལས་མི་ཚང་མར་མགྱོགས་མྱུར་གླ་ཆ་རག་པའི་འགན་ལེན་བྱས་པ་རེད།