ཉེ་ཆར་གཞིས་རྩེ་གྲོང་ཁྱེར་མི་དམངས་སྲིད་གཞུང་གསར་འགྱུར་གཞུང་དོན་ཁང་གིས་2024ལོར་གློག་འཕྲིན་དྲ་རྒྱའི་ཁ་བསླུས་ལ་རྡུང་རྡེག་བཅོས་སྒྲིག་ལས་དོན་སྐོར་གྱི་གསར་འགྱུར་ཡོངས་བསྒྲགས་ཚོགས་འདུ་འཚོགས་ཏེ། 2024ལོར་གློག་འཕྲིན་དྲ་རྒྱའི་ཁ་བསླུས་ལ་རྡུང་རྡེག་བཏང་བ་དང་བཅོས་སྒྲིག་བྱས་ཚུལ་བརྡ་ཁྱབ་བཏང་བ་རེད།

ངོ་སྤྲོད་བྱས་པར་གཞིགས་ན། གཞིས་རྩེ་གྲོང་ཨུད་དང་གྲོང་ཁྱེར་སྲིད་གཞུང་གིས་གློག་འཕྲིན་དྲ་རྒྱའི་ཁ་བསླུས་ལ་རྡུང་རྡེག་དང་བཅོས་སྒྲིག་ལས་དོན་ལ་མཐོང་ཆེན་པོ་བྱེད་ཀྱི་ཡོད། འདི་ལོའི་ལོ་སྟོད་དུ་གྲོང་ཁྱེར་ཡོངས་ཀྱི་སྤྱི་བདེ་ལས་ཁུངས་ཀྱིས་གློག་འཕྲིན་དྲ་རྒྱའི་ཁ་བསླུས་ཀྱི་གྱོད་གཞི་ཁྱོན་78དང་གྱོང་གུན་མ་དངུལ་སྒོར་ཁྲི་841.76ལྷག་ཙམ་ཐོ་འགོད་བྱས་པ་དང་གྱོད་གཞི་ཐོན་ཚད་དང་གྱོང་གུན་ཕོག་ཚད་ལོ་གོང་མའི་དུས་མཚུངས་ལས་63.55%དང་59.9%སོ་སོར་ཆག་པ་དང་། གྱོད་གཞི་80རྩད་ཆོད་པ་དེ་ལོ་གོང་མའི་དུས་མཚུངས་ལས་62.3%འཕར་བ། གློག་འཕྲིན་དྲ་རྒྱའི་ཁ་བསླུས་ཀྱི་ཉེས་གསོག་དོགས་ཅན་50བཟུང་བ་དེ་ལོ་གོང་མའི་དུས་མཚུངས་ལས་51.5%འཕར་བ། ཞིབ་དཔྱོད་ཁང་གིས་གློག་འཕྲིན་ཁ་བསླུས་ཀྱི་འབྲེལ་ཡོད་གྱོད་གཞི་14བདག་སྤྲོད་དང་མི་22ལ་ཞིབ་བཤེར་ཞུ་སྦྱོར་བྱས་པ་དང་ཁྲིམས་ཁང་གིས་གློག་འཕྲིན་ཁ་བསླུས་ཀྱི་འབྲེལ་ཡོད་གྱོད་གཞི་12དང་མི་19ལ་འདྲི་གཅོད་བྱས་པ་རེད། སྤྱི་བདེ་ལས་ཁུངས་ཀྱིས་དབང་ཁོངས་ཁ་གསལ་བའི་ཁ་བསླུས་ཐེབས་པའི་དངུལ་སྒོར་ཁྲི་275.47བདའ་འདེད་བཏང་ནས་དོ་བདག་ལ་བསློགས་པ་དང་མ་དངུལ་གྱི་གྱོང་གུན་སེལ་ཚད་ལོ་གོང་མའི་དུས་མཚུངས་ལས་བརྒྱ་ཆའི་གྲངས་14.9འཕར་ཡོད་པ་རེད།

གྲོང་ཁྱེར་ཡོངས་ཀྱི་སྤྱི་བདེ་ལས་ཁུངས་ཀྱིས་འགག་སྒོ་མདུན་མར་སྤོ་བ་དང་མ་བྱུང་སྔོན་འགོག་མཐའ་འཁྱོངས་བྱས་ཏེ། ཁྱོན་ཁ་བསླུས་ཐེབས་གྲབས་ཡོད་པའི་མང་ཚོགས་ཁྲི་4.8ལྷག་ཙམ་ལ་ཁ་ཏ་བསླབ་བྱ་བྱས་པས་གྱོང་གུན་སྒོར་ཁྲི་674.52ལྷག་ཙམ་མི་ཕོག་སྔོན་འགོག་བྱུང་ཡོད། ཉེན་རྟོག་དང་དངུལ་ཁང་མཉམ་འགུལ་དང་དེ་བཞིན་རྒྱལ་ཁབ་ཀྱི་ཁ་བསླུས་ལ་ངོ་རྒོལ་གྱི་གྲངས་གཞི་ཆེན་པོའི་ལས་སྟེགས་ཕྱོགས་བསྡུས་སུ་སྤྱད་དེ། གྱོད་གཞི་དང་འབྲེལ་བ་ཡོད་པའི་ཐོ་ཁོངས་12992ཛ་དྲག་ངང་མཚམས་འཇོག་བྱས་པ་དང་གྱོད་གཞི་དང་འབྲེལ་བ་ཡོད་པའི་དངུལ་སྒོར་དུང་ཕྱུར་1.23ལྷག་ཙམ་གཏོང་མཚམས་བཞག་པ་དང་། གྱོད་གཞི་དང་འབྲེལ་བ་ཡོད་པའི་ཐོ་ཁོངས་791དང་གྱོད་གཞི་དང་འབྲེལ་བ་ཡོད་པའི་མ་དངུལ་སྒོར་ཁྲི་1671ལྷག་ཙམ་བསྡམས་བཅད་བྱས་པ། གྲོང་ཁྱེར་སྤྱི་བདེ་ཅུས་ཀྱིས་འཕྲིན་གཏོང་དང་དངུལ་རྩའི་སྡེ་ཚན་དང་མཉམ་དུ་གཱ་གཉེར་ཞིབ་བཤེར་ལས་དོན་གྱི་མཉམ་འགུལ་ལམ་སྲོལ་བཙུགས་པ་དང་། སྤྱི་བདེ་ལས་ཁུངས་ཀྱིས་དངུལ་རྩའི་སྒྲིག་གཞིས་མཁོ་འདོན་བྱས་པའི་དངུལ་ཁང་གཱ་ནས་ཁ་བསླུས་བརྒྱབ་པའི་དོགས་གཞི་ཡོད་པའི་ཁུངས་སྣེ་193བཙལ་བ། སྦྲག་སྲིད་མྱུར་སྐྱེལ་ཁེ་ལས་དང་མཉམ་འབྲེལ་བྱས་ནས་སྦྲག་བསྐུར“གཱ་གཉིས”དང་འབྲེལ་བ་ཡོད་པའི་ཁུངས་སྣེ་3བདེ་བླག་ངང་ཐག་གཅོད་བྱས་པ། “གཱ་གཉིས”ཀྱི་གྱོད་གཞི་དང་འབྲེལ་བ་ཡོད་པའི་མི་3བཟུང་བ། གཉའ་ལམ་རྫོང་སྤྱི་བདེ་ཅུས་ཀྱིས་སྦྲག་སྲིད་ཅུས་དང་མཉམ་འབྲེལ་བྱས་ནས་རྒྱལ་ཁོངས་ཕྱི་རོལ་གྱི་ཁ་པར་གཱ་142བདེ་བླག་ངང་བཀག་འགོག་བྱས་པ་རེད།

དེ་དང་ཆབས་ཅིག་གྲོང་ཁྱེར་ཡོངས་ཀྱི་རྫོང་ཆུས་ཁག་དང་སྡེ་ཚན་ཁག་ལ་ཁྱོན་དྲིལ་བསྒྲགས་དང་སྒྲོག་འགྲེལ་བྱེད་སྒོ་ཐེངས་600ལྷག་ཙམ་སྤེལ་བ་དང་། དྲིལ་བསྒྲགས་དཔྱད་ཡིག་ཁག་ཁྲི་4.7ལྷག་ཙམ་སྤྲད་པ། ཁ་བསླུས་ལ་ངོ་རྒོལ་གྱི་དྲིལ་བསྒྲགས་བརྙན་ཐུང་11བཟོས་ནས་བསྟན་པ། དོགས་ཟོན་བྱེད་དགོས་པའི་སྐོར་གྱི་རྩོམ་ཡིག་80ལྷག་ཙམ་བརྒྱུད་སྤེལ་བྱས་པ། ཁ་བསླུས་ལ་ངོ་རྒོལ་གྱི་དྲིལ་བསྒྲགས་འཕྲིན་ཐུང་ཁྲི་1ལྷག་ཙམ་བསྐུར་བ་བཅས་ལ་སློབ་གསོ་དང་ལེན་བྱེད་མཁན་མང་ཚོགས་མི་ཐེངས་ཁྲི་7ལྷག་ཙམ་ཟིན་པ་དང་གྲོང་ཁྱེར་ཡོངས་སུ“རྒྱལ་ཁབ་ཁ་བསླུས་ངོ་རྒོལ་ལྟེ་གནས”ཀྱི་APPཕབ་ལེན་ཐོ་འགོད་བྱེད་མཁན་8564མང་དུ་སོང་བ་དང་རང་མིང་བཀོད་ནས་ཐོ་འགོད་བྱེད་ཚད་62.89%ཟིན་ཡོད་པ་རེད།