དབྱར་དུས་ཀྱི་བདེ་འཇགས་བཅོས་སྒྲིག་ཆེད་དོན་བྱ་སྤྱོད་སྤེལ་ཚུན། ལྷོ་ཁའི་སྤྱི་བདེ་དང་འགྲིམ་འགྲུལ་དོ་དམ་སྡེ་ཚན་གྱིས་གཞུང་ལམ་གྱི་འགྲིམ་འགྲུལ་ལས་འཛོལ་སྔོན་འགོག་གི“གྲངས་འབོར་ཉུང་གཏོང་དང་ཚོད་འཛིན་ཆེན་པོའི”ལས་ཀའི་དམིགས་ཚད་ལ་དམིགས་པ་དང“རང་བྱུང་གནོད་འཚེ་ཐོན་སར་ཉེན་སེལ་རོགས་སྐྱོབ་བྱེད་པ་དང་། འགྲིམ་འགྲུལ་ལས་འཛོལ་ཐོན་ཚད་མངོན་གསལ་དོད་པོས་ཉུང་དུ་གཏོང་བ། གཞུང་ལམ་གྱི་འགྲིམ་འགྲུལ་བདེ་འཇགས་ཤར་གཏོང་ཐུབ་པ་བཅས་ཀྱི་གཙོ་གནད་ལས་འགན་ལ་དམ་པོར་དམིགས་ཏེ། དབྱར་དུས་ཀྱི་བདེ་འཇགས་བཅོས་སྒྲིག་གི་ཆེད་དོན་བྱ་སྤྱོད་གཏིང་ཟབ་སྤེལ་ནས་འགྲིམ་འགྲུལ་བདེ་འཇགས་ཀྱི་མངོན་མེད་རྐྱེན་ངན་རྒྱུན་མཐུད་ངང་བསལ་ཏེ། དབྱར་དུས་ཀྱི་བདེ་འཇགས་ཕྱིར་སྐྱོད་འགོག་སྲུང་འཛིང་རགས་ཕྱོགས་ཡོངས་ནས་བརྟན་དུ་བཏང་ཡོད།

ལྷོ་ཁའི་སྤྱི་བདེ་དང་འགྲིམ་འགྲུལ་དོ་དམ་སྡེ་ཚན་གྱིས་འགྲིམ་འགྲུལ་སྐྱེལ་འདྲེན་སོགས་སྡེ་ཚན་དང་མཉམ་ལས་གཞོགས་འདེགས་བྱེད་ཤུགས་ཆེ་རུ་བཏང་སྟེ། ལྷོ་ཁ་གྲོང་ཁྱེར་ཡོངས་ཀྱི་རྒྱལ་ལམ་དང་། ཞིང་ཆེན་ལམ། གཙོ་གནད་འགྲོ་ལམ། ལྷག་པར་དུ་ཆུ་འཁྱིལ་ས་དང་། གཡང་གཟར་ས། གུག་ཆ་ཆེ་ས། རི་ཉིལ་སླ་ས་བཅས་ཀྱི་མངོན་མེད་ཉེན་ཁར་གྲལ་བཤེར་བྱས་པ་དང་། ཉེན་ཆེའི་དུམ་བུར་ལམ་འགོག་སྙུང་མདོང་འཇོག་པ་དང་། ཚོན་དར་འཐེན་པ། མཚོན་རྟགས་འབྲི་བ་བཅས་བྱས་ནས་འགྲོ་འོང་རླངས་འཁོར་ལ་དོགས་ཟོན་བྱེད་དགོས་པའི་ཉེན་བརྡ་བཏང་སྟེ། བདེ་འཇགས་འགོག་སྲུང་འཛིང་རགས་ཀྱི་རྨང་གཞི་ཕྱོགས་ཡོངས་ནས་བརྟན་དུ་བཏང་ཡོད། མིག་སྔའི་བར་མངོན་མེད་རྐྱེན་ངན་སྣ་ཚོགས་100ལྷག་ཙམ་ཤེས་རྟོགས་བྱུང་བ་དང་འབྲེལ་དག་ཐེར་བྱས་པ་དང་། འདམ་རྡོའི་ཆུ་རུད་སོགས་རང་བྱུང་གནོད་འཚེའི་ཉེན་སེལ་རོགས་སྐྱོབ་ཐེངས་112བྱས་པ། ཉེན་གྱར་རླངས་འཁོར་870ལྷག་ཙམ་དང་མང་ཚོགས་2100ལྷག་ཙམ་ལ་རོགས་སྐྱོབ་བྱས་ཡོད། གཙོ་གནད་རླངས་འཁོར་ལ་ལྟ་སྐུལ་དོ་དམ་བྱེད་ཤུགས་ཆེ་རུ་བཏང་སྟེ། འགྲིམ་འགྲུལ་དོ་དམ་སྡེ་ཚན་གྱི་མི་དམངས་ཉེན་རྟོག་པས་སྤྱི་སྤྱོད་རླངས་འཁོར་དང་། འགྲུལ་སྐྱེལ་རླངས་འཁོར། ཨར་ལས་བྱ་ཡུལ་སོགས་ཁེ་ལས་སུ་བསྐྱོད་དེ་འགྲིམ་འགྲུལ་བདེ་འཇགས་ཀྱི་མངོན་མེད་རྐྱེན་ངན་གྲལ་བཤེར་བཅོས་སྒྲིག་གི་ལས་དོན་སྤེལ་ནས“རླངས་འཁོར་གཉིས་དང་ཉེན་ཁའི་ཡུལ་གཅིག”གི་ཁེ་ལས་ཀྱི་རླངས་འཁོར་500ལྷག་ཙམ་ལ་ཞིབ་བཤེར་བྱས་ཡོད།

འགྲིམ་འགྲུལ་བདེ་འཇགས་ཀྱི་མངོན་མེད་རྐྱེན་ངན་གང་ཐུབ་སེལ་ཆེད། ལྷོ་ཁའི་སྤྱི་བདེ་དང་འགྲིམ་འགྲུལ་དོ་དམ་སྡེ་ཚན་གྱིས“སྐབས་བསྟུན་སྐོར་ཞིབ་དང་། སྐབས་བསྟུན་འཐེན་བཤེར། འཚང་གཡོལ་ལས་སྒྲུབ”བཅས་ཀྱི་ལས་ཀའི་རྣམ་པ་སྤྱད་དེ་ལྷོ་ཁ་གྲོང་ཁྱེར་ཡོངས་སུ་ལས་སྒྲུབ་ས་ཚིགས་37བཙུགས་པར་ཉིན་རེར་ཆ་སྙོམས་ཉེན་རྟོག་པ་250ལྷག་ཙམ་བཏང་སྟེ་ཁྲིམས་འགལ་གནས་ཚུལ་ཐོན་ཡུལ་གཙོ་བོའི་ས་ཚིགས་དང་དུས་མཚམས་ལ་གཙོ་གནད་སྐོར་ཞིབ་དང་སྔོན་འགོག་ཚོད་འཛིན་བྱས་ཡོད།