རྩྭ་མདའ་རྫོང་ཁྲོམ་ར་ལྟ་སྐུལ་དོ་དམ་ཅུས་ཀྱིས་2024ལོའི་དམངས་འཚོའི་ཁྱབ་ཁོངས་ཀྱི་གྱོད་གཞི་ཞིབ་བཤེར་ཐག་གཅོད་བྱེད་པའི་དམ་ནན་བྱ་སྤྱོད་མུ་མཐུད་སྤེལ་ཞིང་། ཉིན་ཤས་གོང་ཁྲིམས་ལྟར་བཟའ་བཅའ་དང་། ཐོན་རྫས། བྱུག་རྫས་བཅས་ཁྱབ་ཁོངས་ཀྱི་ཁྲིམས་འགལ་བྱེད་སྤྱོད་ཁག་3ལ་ཞིབ་བཤེར་ཐག་གཅོད་བྱས་པ་རེད།

ད་ལོའི་ཟླ་5ཚེས་20ཉིན། རྩྭ་མདའ་རྫོང་ཁྲོམ་ར་ལྟ་སྐུལ་དོ་དམ་ཅུས་ཀྱི་ཁྲིམས་འཛིན་མི་སྣས་རྩྭ་མདའ་རྫོང་དམངས་སྲོལ་ཁྲོམ་གཞུང་གི་ཤིན་དབང་རྒྱན་སྤྲོས་ལྕགས་རིགས་ཨར་ལས་རྒྱུ་ཆ་ཚོང་ཁང་ལ་ས་གནས་ས་ཐོག་ཏུ་ཞིབ་བཤེར་བྱེད་སྐབས། ཚོང་ཁང་དེའི་ནང་གསུམ་མེད་ཐོན་རྫས་ཀྱི་གློག་སྐུད་དང་གློག་ཐག་ཁྱོན་སྐོར་བ་5ཡོད་པ་ཤེས། ཞིབ་བཤེར་བྱས་པ་བརྒྱུད། དོ་བདག་གིས་གོང་གསལ་ཐོན་རྫས་མཁོ་འདོན་བྱེད་མཁན་གྱི་འབྲེལ་ཡོད་ཐོབ་ཐང་དཔང་ཡིག་དང་། ཟོག་འཐེན་རྩིས་ཐོ། ཚད་ལོན་དཔང་ཡིག་སོགས་ཀྱི་དཔང་རྟགས་དཔྱད་ཡིག་མཁོ་འདོན་བྱ་ཐབས་བྲལ་བ་རེད། ཡིན་ཡང་དོ་བདག་གིས་ཐོན་རྫས་དེ་དག་ཕྱིར་བཙོངས་མེད་པས་ཁྲིམས་འགལ་གྱི་ཐོབ་ཆ་དག་མེད་པ་རེད། ཁྲིམས་འཛིན་མི་སྣས《ཐོན་རྫས་ཀྱི་སྤུས་ཚད་སྐོར་གྱི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བཅའ་ཁྲིམས》ཀྱི་དོན་ཚན་ལྔ་བཅུ་པའི་གཏན་འབེབས་ལྟར། དོ་བདག་གི་ཐོན་རྫས་རྫུན་མ་གཞུང་བཞེས་བཏང་བ་དང་དངུལ་ཆད་མི་དམངས་ཤོག་སྒོར་3000བཅད་པ་རེད།

ཟླ་6ཚེས་19ཉིན་རྩྭ་མདའ་རྫོང་ཁྲོམ་ར་ལྟ་སྐུལ་དོ་དམ་ཅུས་ཀྱི་ཁྲིམས་འཛིན་མི་སྣས་རྩྭ་མདའ་གངས་དཀར་ཏི་སི་གསོལ་མགྲོན་ཁང་ཚད་ཡོད་ཀུང་སིར་ས་གནས་ས་ཐོག་ཏུ་ཞིབ་བཤེར་བྱེད་སྐབས། གསོལ་མགྲོན་ཁང་དེའི་ཐབ་ཚང་དུ་དུས་ཚོད་ཡོལ་བའི་སྲན་ཕྱེ་ཁུག་མ་12དང་། སྒོ་ངའི་བག་ལེབ་ཁུག་མ་ཕྱེད་ཀ རྒྱ་ཐུག་སྐམ་པོ་ཁུག་མ་1 སྨུག་ཚལ་ཁུག་མ་1བཅས་བཞག་ཡོད་ཅིང་། ཐབ་ཚང་ནང་ད་དུང་གསུམ་མེད་ཐོན་རྫས་ཁུག་མ་1བཞག་ཡོད་པ་ཤེས་པ་རེད། ཞིབ་བཤེར་བྱས་པ་བརྒྱུད། དོ་བདག་གིས་དུས་ཚོད་ཡོལ་བའི་བཟའ་བཅའ་དང་བཟའ་བཅའི་སྦྱོར་རྫས་ཀྱི་འབྲེལ་ཡོད་ཟོག་འཐེན་རྩིས་ཐོ་དང་འཛིན་ཤོག་མཁོ་འདོན་བྱེད་ཐབས་བྲལ་བ་རེད། ཁྲིམས་འཛིན་མི་སྣས《བཟའ་བཅའི་བདེ་འཇགས་སྐོར་གྱི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བཅའ་ཁྲིམས》ཀྱི་དོན་ཚན་བརྒྱ་དང་ཉེར་བཞི་པའི་ནང་གསེས་དང་པོའི་གཏན་འབེབས（གཉིས་པ）གཞིར་བཟུང་། དོ་བདག་ལ་ཡུལ་དངོས་སུ་དུས་ཚོད་ཡོལ་བའི་བཟའ་བཅའི་རྒྱུ་ཆ་དང་ཟས་རིགས་སྦྱོར་རྫས་མེད་པར་བཟོ་རུ་བཅུག་པ་དང་དངུལ་ཆད་སྒོར་22000བཅད་པ་རེད།

ཟླ་6ཚེས་20ཉིན་རྩྭ་མདའ་རྫོང་ཁྲོམ་ར་ལྟ་སྐུལ་དོ་དམ་ཅུས་ཀྱི་ཁྲིམས་འཛིན་མི་སྣས་རྩྭ་མདའ་ཧུང་ཏ་ཕྱོགས་བསྡུས་ཚོང་ཁང་ལ་ས་གནས་ས་ཐོག་ཏུ་ཞིབ་བཤེར་བྱེད་སྐབས། ཚོང་དུད་དེའི་ཟོག་སྒྲོམ་ཐོག་རིན་ཐང་སྒོར་625རི་བའི་དུས་ཚོད་ཡོལ་བའི་བྱུག་རྫས་བཞག་ཡོད་པ་ཤེས། ཞིབ་བཤེར་བྱས་པ་བརྒྱུད། དོ་བདག་གིས་བྱུག་རྫས་དང་འབྲེལ་བ་ཡོད་པའི་ཟོག་འཐེན་རྩིས་ཐོ་དང་འཛིན་ཤོག་མཁོ་འདོན་བྱེད་ཐབས་བྲལ་བ་རེད། ཁྲིམས་འཛིན་མི་སྣས《བྱུག་རྫས་ལྟ་སྐུལ་དོ་དམ་སྲོལ་ཡིག》གི་དོན་ཚན་དྲུག་ཅུ་པའི་ནང་གསེས་ལྔ་པའི་གཏན་འབེབས་ལྟར། དོ་བདག་ལ་ཡུལ་དངོས་སུ་དུས་ཚོད་ཡོལ་བའི་བྱུག་རྫས་མེད་པར་བཟོ་རུ་བཅུག་པ་དང་འབྲེལ་དངུལ་ཆད་སྒོར་1000བཅད་པ་རེད།