འདི་ནི་གནོད་འཚེ་ཕོག་པའི་མང་ཚོགས་ཀྱིས་གྱོད་སྒྲུབ་མི་དམངས་ཉེན་རྟོག་པར་གོས་དར་སྤྲོད་པའི་གནས་ཚུལ་ཡིན་པ།

འདི་ནི་སྨན་གླིང་གྲོང་ཁྱེར་གྱི་སྤྱི་བདེའི་མི་དམངས་ཉེན་རྟོག་པས་ཞིང་ཆེན་བརྒལ་ནས་མྱུལ་ཞིབ་གྱོད་དོན་སྒྲུབ་བཞིན་པ།

“བོད་ལྗོངས་སྤྱི་བདེ། ཁྱེད་ཚོ་ནི་ང་རང་ལ་ཐུག་པའི་འགན་སེམས་ཆེ་ཤོས་དང་འགན་འཁྲིར་ངོ་གནོངས་མི་དགོས་པའི་མི་ཤ་སྟག་རེད་འདུག ཁྱེད་ཚོ་ནི་ནམ་མཁའི་སྐར་ཚོགས་ལྟར་ས་མཐོའི་ཕྱོགས་གང་སར་ཁྱབ་ཡོད” ཉེ་ཆར་རང་སྐྱོང་ལྗོངས་སྤྱི་བདེ་ཐིང་ལ་ཧྲེན་ཀྲེན་གྲོང་ཁྱེར་ནས་ཡིན་པའི་ཡུལ་སྐོར་བ་ཞིག་གི་ཐུགས་རྗེ་ཆེ་ཞུ་བའི་འཕྲིན་ཡིག་འདི་འདྲ་ཞིག་འབྱོར་ཡོད། འཕྲིན་ཡིག་དེར་ཤོག་ལྷེ་བཞི་ཡོད་པ་དང་ཡིག་འབྲུ་རེ་རེ་ལས་སྨན་གླིང་གྲོང་ཁྱེར་སྤྱི་བདེ་ཅུས་ལ་ལྷག་བསམ་ཟོལ་མེད་ཀྱི་ཐུགས་རྗེ་ཆེ་ཞུ་ལུགས་མཚོན་ཡོད།

གནས་ཚུལ་དེ་ཟླ་བ་བཞི་པ་ནས་དྲུག་པའི་བར་ཐོན་ཞིང་། སྨན་གླིང་གྲོང་ཁྱེར་སྤྱི་བདེ་ཅུས་ལ་གནོད་འཚེ་ཕོག་པའི་མི་གསུམ་གྱི་གྱོད་དོན་སྙན་སེང་སྔ་རྗེས་སུ་འབྱོར་ནས། ཚང་མས་རང་ཉིད་གློག་འཕྲིན་ཁ་བསླུས་འོག་ཚུད་པའི་གནས་ཚུལ་བརྗོད་པ་རེད། ཟླ་བ་བཞི་པའི་ཚེས་5ཉིན། ཁྲེན་ཆེ་གེ་མོས་ཉེན་རྟོག་པར“ཟླ་བ་བཞི་པའི་ཚེས་ལྔ་ཉིན་གྱི་ཆུ་ཚོད་14ཙམ་ལ། མི་ཞིག་གིས་གནམ་གྲུའི་སྤ་སེ་ཕྱིར་སློག་བྱེད་དགོས་པར་ཁ་གཡར་ནས་ངའི་དངུལ་མང་པོ་མགོ་སྐོར་བཏང་སོང”ཞེས་གྱོད་དོན་སྙན་སེང་ཞུས། ཟླ་བ་དྲུག་པའི་ཚེས་བཅུ་གཉིས་ཉིན། ཝང་ཆེ་གེ་མོས་ཉེན་རྟོག་པར“མི་ཞིག་གིས་སྤྱི་བདེའི་མི་སྣར་བརྫུས་ནས་ང་ལ་བཙོག་དངུལ་གཙང་སྒྱུར་བྱས་པའི་དོགས་གཞི་ཡོད་ལུགས་བརྗོད་ནས་ངའི་དངུལ་མང་པོ་མགོ་སྐོར་བཏང་སོང”ཞེས་གྱོད་དོན་སྙན་སེང་ཞུས། ཟླ་བ་དྲུག་པའི་ཚེས་བཅུ་གསུམ་ཉིན། རྡོ་ཆེ་གེ་མོས“མི་ཞིག་གིས་མེ་གསོད་མི་སྣར་བརྫུས་ཏེ་ལས་གྲྭར་ཁ་གཡར་ནས་ངའི་དངུལ་མགོ་སྐོར་བཏང་སོང་བས། སྤྱི་བདེ་ལས་ཁུངས་ཀྱིས་བརྟག་དཔྱད་གནང་རོགས”ཞེས་གྱོད་དོན་སྙན་སེང་ཞུས།

དམངས་ཀྱི་ཁེ་ཕན་ལ་ཐུག་པ་གྱོད་དོན་ཆུང་ཆུང་མིན། གྱོད་དོན་སྙན་སེང་འབྱོར་རྗེས། སྨན་གླིང་གྲོང་ཁྱེར་སྤྱི་བདེ་ཅུས་ཏང་ཨུད་ཀྱིས་ཚད་མཐོའི་མཐོང་ཆེན་བྱས་ནས་གྱོད་གཞི་ཚབས་ཆེན་དང་གྱོད་གཞི་གལ་ཆེན་མྱུར་སྒྲུབ་ལས་དོན་གྱི་ལམ་སྲོལ་འཕྲལ་མར་ལག་བསྟར་བྱས་ཏེ། ཆེད་སྒྲུབ་ཚོགས་ཆུང་བཙུགས་པ་དང་མྱུལ་ཞིབ་རྡུང་རྡེག་གཏོང་བའི་ལས་ཀའི་ཇུས་གཞི་བཟོས་པ་རེད། མི་དམངས་ཉེན་རྟོག་པས་ཟླ་བ་གཅིག་ལྷག་ཙམ་རིང་དཀའ་སྤྱད་འབད་འཐབ་བྱས་པ་དང་། ཞིང་ཆེན་བཅུ་ལྷག་ཙམ་དང་གྲོང་ཁྱེར་དང་རྫོང་ཉི་ཤུ་ལྷག་ཙམ་ལ་བསྐྱོད་པ། དཀའ་ངལ་མང་པོ་ཁྱད་བསད་བཅས་བྱས་པ་བརྒྱུད། གློག་འཕྲིན་ཁ་བསླུས་ཀྱི་གྱོད་གཞི་3རྩད་བདེ་བླག་ཆོད་པ་དང་། གློག་འཕྲིན་ཁ་བསླུས་ཀྱི་ནག་ཚོགས་གཉིས་གཏོར་བ། ཉེས་གསོག་དོགས་ཅན་10འཛིན་བཟུང་བྱས་པ། དཔལ་འབྱོར་གྱི་གྱོང་གུན་སྒོར་ཁྲི་37ལྷག་ཙམ་ཚུར་བླངས་པ་རེད།

ཉེན་རྟོག་པ་ཉིང་ཁྲི་སྨན་གླིང་གནམ་ཐང་དུ་འབྱོར་མ་ཐག་གྱོད་དོན་སྙན་སེང་ཞུ་མཁན་མང་ཚོགས་ཀྱིས་ཁོང་ཚོར་དཀར་གཙང་མཇལ་དར་སྒྲོན་པ་དང་འབྲེལ། “ཉེས་དོན་མྱུལ་ཞིབ་བྱ་སྤྱོད་ཤུགས་དང་ལྡན”དང“མི་དམངས་ཉེན་རྟོག་དམངས་ལ་དགའ་ཞེན་ཆེ། ཁ་བསླུས་ཐེབས་དངུལ་ཕྱིར་སློག་མི་སེམས་དྲོས”ཞེས་བྲིས་པའི་གོས་དར་རེ་རེ་སྤྲད་དེ་ཁོང་ཚོའི་ལས་དོན་ལ་གུས་བཀུར་དང་ཐུགས་རྗེ་ཆེ་ཞུ་ལུགས་མཚོན་པར་བྱས་ཡོད། གནོད་འཚེ་ཕོག་པའི་མི་ཞིག་གིས་མིག་ལ་མཆི་ཞག་འཁོར་བཞིན་དུ“ཁྱེད་ཚོར་ཐུགས་རྗེ་ཆེ་ཞུ་རྒྱུ་ཡིན། མི་དམངས་ཉེན་རྟོག་པའི་སྒེར་སེམས་མེད་པའི་ལེགས་སྐྱེས་དང་དཔའ་ངར་ཆེ་བའི་བྱ་སྤྱོད་ལས་ངས་བདེན་སྐྱོང་གི་སྟོབས་ཤུགས་ཚོར་བྱུང་ལ། འཚོ་བར་སླར་ཡང་རེ་བས་ཁེངས་སོང”ཞེས་བརྗོད་པ་རེད།