ཉེ་ཆར། ལྷ་ས་གྲོང་ཁྱེར་ཁྲོམ་ར་ལྟ་འདོམས་ཅུས་ཀྱིས་མང་ཚོགས་ཀྱི་ཁེ་ཕན་ལ་བཙན་གནོད་བཏང་བ་དང་ཡུལ་སྐོར་གྲོང་ཁྱེར་གྱི་གཟུགས་བརྙན་ལ་གནོད་འཚེ་བཏང་བའི་ཁྲིམས་འགལ་བྱེད་སྤྱོད་ཁག་གཅིག་ལ་རྡུང་རྡེག་ཚ་ནན་བཏང་ནས“དམིགས་ཚད་མཐོན་པོ་ལྔ”མངོན་འགྱུར་ཡོང་བར་བྱས་ཏེ། ལྷ་སའི་གཟུགས་བརྙན་སྲུང་སྐྱོང་ཡག་པོ་བྱས་པ་རེད། ཁྲིམས་འགལ་གྱི་དཔེ་མཚོན་གྱོད་གཞི་ཁག་གཅིག་ཡོངས་བསྒྲགས་ངང་དམར་འདོན་བྱས་པ་གཤམ་གསལ།

གྱོད་དཔེ་དང་པོ།

ལྷ་སའི་གྲོང་དཀྱིལ་གྱི་ཡུལ་ཟོག་ཚོང་ཁང་ཞིག་གིས་ལག་ཁྱེར་མེད་པར་སྨན་རྫུན་མ་བཙོངས་པའི་གྱོད་གཞི།

2024ལོའི་ཟླ་2ཚེས་1ཉིན། ལྷ་ས་གྲོང་ཁྱེར་ཁྲོམ་ར་ལྟ་འདོམས་ཅུས་ཀྱིས་ཁྲིམས་ལྟར་ལྷ་སའི་གྲོང་དཀྱིལ་གྱི་ཡུལ་ཟོག་ཚོང་ཁང་ཞིག་གིས་ལག་ཁྱེར་མེད་པར་སྨན་རྫུན་མ་བཙོངས་པའི་ཁྲིམས་འགལ་བྱེད་སྤྱོད་ཅིག་སྤྱི་བདེ་སྡེ་ཚན་ལ་ཉེས་དོན་འགན་འཁྲི་བདའ་འདེད་གཏོང་རྒྱུར་རྩིས་སྤྲད་པ་རེད།

དེ་ཡང་2023ལོའི་ལོ་མཇུག་ཏུ། ལྷ་ས་གྲོང་ཁྱེར་ཁྲོམ་ར་ལྟ་འདོམས་ཅུས་ལ་གྲོང་དཀྱིལ་གྱི་ཡུལ་ཟོག་ཚོང་ཁང་ཞིག་གིས་ལག་ཁྱེར་མེད་པར་སྨན་རྫུན་མ་བཙོངས་པའི་དོགས་གཞི་འདུག་ཅེས་ཐེར་འདོན་གོང་ཞུ་བྱས་པས། ཁྲིམས་སྒྱུར་པས་འཕྲལ་མར་ཚོང་ཁང་དེར་ཞིབ་བཤེར་བྱས་པ་དང་འབྲེལ། གོང་ཞུ་བྱེད་མཁན་གྱིས་ཉོས་པའི་སྨན་རྫས་ལ་དཔེ་འཐེན་གསལ་འབྱེད་བྱས་པ་བརྒྱུད་རྫུན་མ་ཡིན་པ་གཏན་འཁེལ་བྱས། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྨན་རྫས་དོ་དམ་བཅའ་ཁྲིམས》དང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་ཁྲིམས》ཀྱི་འབྲེལ་ཡོད་གཏན་འབེབས་གཞིར་བཟུང་། སྤྱི་བདེ་སྡེ་ཚན་ལ་ཉེས་དོན་གྱི་འགན་འཁྲི་བདའ་འདེད་གཏོང་རྒྱུར་རྩིས་སྤྲད་པ་རེད།

གྱོད་དཔེ་གཉིས་པ།

ལྷ་སའི་སོལ་རླངས་ས་ཚིགས་ཤིག་གིས་དབུགས་རིལ་སྤྱོད་མཁན་ལ་གཏན་འབེབས་ལྟར་དབུགས་རིལ་བདེ་འཇགས་ངང་སྤྱོད་དགོས་པའི་སྐོར་མ་བསླབས་པའི་གྱོད་གཞི།

2024ལོའི་ཟླ་4ཚེས་1ཉིན། ལྷ་ས་གྲོང་ཁྱེར་ཁྲེང་ཀོན་ཆུས་ཁྲོམ་ར་ལྟ་འདོམས་ཅུས་ཀྱིས་ལྷ་སའི་སོལ་རླངས་ས་ཚིགས་ཤིག་གིས་སོལ་རླངས་དབུགས་རིལ་སྤྱོད་མཁན་ལ་གཏན་འབེབས་ལྟར་སོལ་རླངས་དབུགས་རིལ་བདེ་འཇགས་ངང་སྤྱོད་དགོས་པའི་སྐོར་མ་བསླབས་པའི་ཁྲིམས་འགལ་བྱེད་སྤྱོད་ལ་ཁྲིམས་ལྟར་སྲིད་འཛིན་ཆད་པ་བཅད་པ་དང་སྦྲགས། དངུལ་ཆད་སྒོར་100000བཏང་བ་རེད།

དེ་ཡང་2024ལོའི་ཟླ་4ཚེས་28ཉིན། ལྷ་ས་གྲོང་ཁྱེར་ཁྲེང་ཀོན་ཆུས་ཁྲོམ་ར་ལྟ་འདོམས་ཅུས་ཀྱིས་སོལ་རླངས་ཀྱི་ཆེད་དོན་ཞིབ་བཤེར་བྱེད་རིང་ལྷ་སའི་སོལ་རླངས་ས་ཚིགས་ཤིག་གིས་སོལ་རླངས་བླུག་སྐབས་དབུགས་རིལ་སྤྱོད་མཁན་ལ་གཏན་འབེབས་ལྟར་བདེ་འཇགས་ངང་སྤྱོད་དགོས་པའི་སྐོར་སློབ་ཀྱི་མེད་པ་རྩད་ཆོད་པས། ཁྲིམས་སྒྱུར་པས་ས་ཡུལ་དངོས་སུ་ཟིན་ཐོ་བཀོད་པ་མ་ཟད། འབྲེལ་ཡོད་དཔང་རྟགས་ཀྱང་ཉར་བ་རེད། 《དམིགས་བསལ་སྒྲིག་ཆས་ཀྱི་བདེ་འཇགས་ཞིབ་བཤེར་སྲོལ་ཡིག》གི་འབྲེལ་ཡོད་གཏན་འབེབས་གཞིར་བཟུང་། གནད་དོན་དེར་ཁྲིམས་ལྟར་སྲིད་འཛིན་གྱི་ཆད་པ་གཅོད་དགོས་ཀྱི་ཡོད།

གྱོད་དཔེ་གསུམ་པ།

བོད་ལྗོངས་རིག་གནས་འཕེལ་རྒྱས་ཚད་ཡོད་ཀུང་སི་ཞིག་གིས་ལག་ཁྱེར་མེད་པར་སྨན་རྫུན་མ་བཙོངས་པའི་གྱོད་གཞི།

2024ལོའི་ཟླ་6ཚེས་12ཉིན། ལྷ་ས་གྲོང་ཁྱེར་ཁྲེང་ཀོན་ཆུས་ཁྲོམ་ར་ལྟ་འདོམས་ཅུས་ཀྱིས་ཁྲིམས་ལྟར་བོད་ལྗོངས་རིག་གནས་འཕེལ་རྒྱས་ཚད་ཡོད་ཀུང་སི་ཞིག་གིས་ལག་ཁྱེར་མེད་པར་སྨན་རྫུན་མ་བཙོངས་པའི་ཁྲིམས་འགལ་བྱེད་སྤྱོད་ཅིག་སྤྱི་བདེ་སྡེ་ཚན་ལ་ཉེས་དོན་འགན་འཁྲི་བདའ་འདེད་གཏོང་རྒྱུར་རྩིས་སྤྲད་པ་རེད།

དེ་ཡང་2024ལོའི་ཟླ་4ཚེས་24ཉིན། མང་ཚོགས་ཀྱིས་ཐེར་འདོན་གོང་ཞུ་བྱས་རྗེས་ལྷ་ས་གྲོང་ཁྱེར་ཁྲོམ་ར་ལྟ་འདོམས་ཅུས་དང་ཁྲེང་ཀོན་ཆུས་ཁྲོམ་ར་ལྟ་འདོམས་ཅུས་ཀྱིས་མཉམ་དུ་གྲོང་ཁྱེར་ནང་གི་ཁུལ་ཆུང་ཞིག་གི་བོད་ཁང་ཞིག་ལ་ཁྲིམས་ལྟར་ཞིབ་བཤེར་བྱེད་སྐབས་བོད་ཁང་དེའི་ནང་ཕྱི་ཐུམ་ལ་འབྲེལ་ཡོད་བོད་སྨན་གྱི་མིང་དང་། ཕན་ནུས། གཙོ་བཅོས་བཅས་ཀྱི་ཤོག་བྱང་སྦྱར་བའི་ཐོན་རྫས་འབོར་ཆེན་ཡོད་པ་དེ་དག་དོ་བདག་གིས་དྲ་རྒྱའི་ཐད་གཏོང་བརྒྱུད་ཕྱིར་ཚོང་བྱེད་ཀྱི་ཡོད་པ་ཤེས་རྟོགས་བྱུང་བ་རེད། གསལ་འབྱེད་བྱས་པ་བརྒྱུད། དེ་དག་སྨན་རྫུན་མ་ཡིན་པ་གཏན་འཁེལ་བྱས། ཁྲིམས་སྒྱུར་པས་ཁྲིམས་ལྟར་ཚོང་ཟོག་དེ་དག་བཙན་ཉར་བྱས་པ་དང་འབྲེལ། ས་ཡུལ་དངོས་སུ་ཟིན་ཐོ་བཀོད་པ་རེད། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྨན་རྫས་དོ་དམ་བཅའ་ཁྲིམས》དང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་ཁྲིམས》ཀྱི་འབྲེལ་ཡོད་གཏན་འབེབས་གཞིར་བཟུང་། གྱོད་གཞི་དེ་སྤྱི་བདེ་སྡེ་ཚན་ལ་ཉེས་དོན་འགན་འཁྲི་བདའ་འདེད་གཏོང་རྒྱུར་རྩིས་སྤྲད་པ་རེད།

གྱོད་དཔེ་བཞི་པ།

བོད་ལྗོངས་བཟའ་བཏུང་ཀུང་སི་ཞིག་གིས་དུག་སེལ་ཟས་སྣོད་དང་མཚོ་ཟས་རིགས་ལ་རིན་གོང་གསལ་པོ་བཀོད་མེད་པའི་གྱོད་གཞི།

2024ལོའི་ཟླ་6ཚེས་7ཉིན། ལྷ་ས་གྲོང་ཁྱེར་ཁྲོམ་ར་ལྟ་འདོམས་ཅུས་ཀྱིས་བོད་ལྗོངས་བཟའ་བཏུང་ཀུང་སི་ཞིག་གི་དུག་སེལ་ཟས་སྣོད་དང་མཚོ་ཟས་རིགས་ཀྱི་རིན་གོང་གསལ་པོ་བཀོད་མེད་པའི་ཁྲིམས་འགལ་བྱེད་སྤྱོད་ལ་ཁྲིམས་ལྟར་སྲིད་འཛིན་ཆད་པ་བཅད་ནས་དུས་བཀག་ནང་དག་ཐེར་བྱེད་དགོས་པའི་བཀའ་བཏང་བ་དང་སྦྲགས། དངུལ་ཆད་སྒོར་1000བཏང་བ་རེད།

དེ་ཡང་2024ལོའི་ཟླ་6ཚེས་7ཉིན། ལྷ་ས་གྲོང་ཁྱེར་ཁྲོམ་ར་ལྟ་འདོམས་ཅུས་ཀྱིས་ཁྲིམས་ལྟར་བོད་ལྗོངས་བཟའ་བཏུང་ཀུང་སི་ཞིག་ལ་ཞིབ་བཤེར་བྱེད་སྐབས་ཟ་ཁང་དེའི་དུག་སེལ་ཟས་སྣོད་དང་མཚོ་ཟས་རིགས་ཀྱི་རིན་གོང་གསལ་པོ་བཀོད་མེད་པ་ཤེས་རྟོགས་བྱུང་བ་རེད། དོ་བདག་གི་བྱེད་སྤྱོད་དེ《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རིན་གོང་བཅའ་ཁྲིམས》ཀྱི་འབྲེལ་ཡོད་གཏན་འབེབས་ལས་འགལ་བས་ཁྲིམས་ལྟར་སྲིད་འཛིན་གྱི་ཆད་པ་གཅོད་དགོས་ཀྱི་ཡོད།

གྱོད་དཔེ་ལྔ་པ།

བོད་ལྗོངས་བཟའ་བཏུང་ཚད་ཡོད་ཀུང་སི་ཞིག་གིས་བཙན་ཐབས་ཀྱི་ཞིབ་དཔྱད་གཏན་འཁེལ་བྱས་མེད་པའི་གློག་རྡུལ་རྒྱ་མ་སྤྱད་པའི་གྱོད་གཞི།

2024ལོའི་ཟླ་6ཚེས་21ཉིན། ལྷ་ས་གྲོང་ཁྱེར་ཁྲོམ་ར་ལྟ་འདོམས་ཅུས་ཀྱིས་བཟའ་བཏུང་ཚད་ཡོད་ཀུང་སི་ཞིག་གིས་བཙན་ཐབས་ཀྱི་ཞིབ་དཔྱད་གཏན་འཁེལ་བྱས་མེད་པའི་གློག་རྡུལ་རྒྱ་མ་སྤྱད་པའི་ཁྲིམས་འགལ་བྱེད་སྤྱོད་ལ་ཁྲིམས་ལྟར་སྲིད་འཛིན་གྱི་ཆད་པ་བཅད་པ་དང་དུས་བཀག་ནང་ཞིབ་དཔྱད་གཏན་འཁེལ་བྱེད་དགོས་པའི་བཀའ་བཏང་བ་དང་སྦྲགས། དངུལ་ཆད་སྒོར་800བཏང་བ་རེད།

དེ་ཡང་2024ལོའི་ཟླ་6ཚེས་21ཉིན། ལྷ་ས་གྲོང་ཁྱེར་ཁྲོམ་ར་ལྟ་འདོམས་ཅུས་ཀྱིས་ཁྲིམས་ལྟར་བཟའ་བཏུང་ཚད་ཡོད་ཀུང་སི་ཞིག་ལ་ཞིབ་བཤེར་བྱེད་སྐབས་ཟ་ཁང་དེའི་མཚོ་ཟས་ཁུལ་དུ་སྤྱོད་བཞིན་པའི་གློག་རྡུལ་རྒྱ་མར་བཙན་ཐབས་ཀྱི་ཞིབ་དཔྱད་གཏན་འཁེལ་བྱས་མེད་པ་རྩད་ཆོད་པ་རེད། དོ་བདག་གི་བྱེད་སྤྱོད་དེ《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཚད་འཇལ་བཅའ་ཁྲིམས》དང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཚད་འཇལ་བཅའ་ཁྲིམས་ལག་བསྟར་ཞིབ་སྲོལ》གྱི་འབྲེལ་ཡོད་གཏན་འབེབས་ལས་འགལ་བས་ཁྲིམས་ལྟར་སྲིད་འཛིན་གྱི་ཆད་པ་གཅོད་དགོས་ཀྱི་ཡོད།

ལྷ་ས་གྲོང་ཁྱེར་ཁྲོམ་ར་ལྟ་འདོམས་ཅུས་ཀྱིས་རྒྱ་ཆེའི་གཉེར་སྐྱོང་བྱེད་པོར་ཁྲིམས་མཐུན་དང་ལུགས་མཐུན་ངང་གཉེར་སྐྱོང་བྱས་ནས་འཛད་སྤྱོད་པའི་ཁྲིམས་མཐུན་ཁེ་དབང་ལ་སྲུང་སྐྱོང་ཏན་ཏིག་བྱེད་དགོས་པའི་བསླབ་བྱ་ཡང་བསྐྱར་བརྒྱབ་པ་དང་། རྒྱ་ཆེའི་གྲོང་མིར་འཛད་སྤྱོད་བྱེད་སྐབས་ཁྲིམས་འགལ་གྱི་བྱེད་སྤྱོད་ཤེས་རྟོགས་བྱུང་ཚེ་དཔང་རྟགས་ཡག་པོ་ཉར་ནས་དུས་ཐོག་ཏུ་12315སོགས་ཀྱི་ཐབས་ལམ་བརྒྱུད་ཐེར་འདོན་གོང་ཞུ་བྱེད་དགོས་པའི་དྲན་སྐུལ་བྱས་པ་རེད།