སྙེ་མོ་རྫོང་སྤྱི་བདེ་ཅུས་ཀྱིས་དབྱར་ཁའི་བདེ་འཇགས་བཅོས་སྐྱོང་བྱ་སྤྱོད་ལ་སྐུལ་འདེད་བཏང་བ།
ཉེ་ཆར་སྙེ་མོ་རྫོང་སྤྱི་བདེ་ཅུས་ཀྱིས་དབྱར་ཁའི་བདེ་འཇགས་བཅོས་སྐྱོང་བྱ་སྤྱོད་ལས་དོན་གྱི་བཀོད་སྒྲིག་བླང་བྱ་གཞིར་བཟུང་། ཁྱོན་ཡོངས་ནས་དབྱར་ཁའི་བདེ་འཇགས་བཅོས་སྐྱོང་གཙང་བཤེར་བྱ་སྤྱོད་སྤེལ་བ་རེད།
ད་ཐེངས་ཀྱི་བདེ་འཇགས་བཅོས་སྐྱོང་བྱ་སྤྱོད་དེ་ཕྱོགས་བསྡུས་ཅན་གྱི་སྐོར་སྲུང་དང་ཕྱོགས་ཡོངས་ནས་གཙང་བཤེར་གཙོ་གནད་དུ་བཟུང་ནས“ཞིབ་བཤེར་དང་གཙང་བཤེར”ཁྱོན་ཡོངས་ལ་ཁྱབ་པ་དང་། “སྔོན་འགོག་དང་ལྟ་འདོམས”ཡུལ་དུས་ཡོངས་ལ་ཁྱབ་པ། “རྡུང་རྡེག་དང་བཅོས་སྒྲིག”ཕྱོགས་ཡོངས་ལ་ཁྱབ་པའི་བླང་བྱ་གཞིར་བཟུང་། ཁོངས་གཏོགས་ཁུལ་གྱི་དོན་དངོས་དང་ཟུང་འབྲེལ་བྱས་ཏེ་བཀོད་སྒྲིག་ཞིབ་ཚགས་དང་། བྱ་ཐབས་ལ་ཤུགས་སྣོན། ནུས་ཤུགས་ཡོད་རྒུས་གཙང་བཤེར་བཅོས་སྒྲིག་བཅས་བྱས་ནས་བྱ་སྤྱོད་ལ་ཕན་འབྲས་དངོས་ཐོན་པར་འགན་ལེན་བྱས་ཡོད།
བྱ་སྤྱོད་སྤེལ་རིང་སྙེ་མོའི་སྤྱི་བདེས“ཉེས་གསོག་རིགས་གང་མང་ན་རིགས་དེ་ལ་གཙོ་གནད་ཐོག་རྡུང་རྡེག་གཏོང་བ་དང་བདེ་འཇགས་ཀྱི་གནད་དོན་ཚབས་ཆེན་ཐོན་ཁུལ་གང་དུ་ཡོད་ན་དེ་གར་གཙོ་གནད་ཐོག་བཅོས་སྒྲིག་བྱེད་པ”མཐའ་འཁྱོངས་བྱས་ཏེ། བྱ་ཐབས་སྣ་མང་མཉམ་སྤྱོད་ཀྱིས་ཞིབ་བཤེར་བྱེད་ཤུགས་ཆེ་རུ་གཏོང་བ་དང་། གཙོ་གནད་ཁུལ་དང་གཙོ་གནད་ས་ཁོངས་ལ་སྐོར་གཡེང་ལྟ་འདོམས་བྱེད་ཤུགས་ཆེ་རུ་མུ་མཐུད་གཏོང་བ། བསྙད་རྐོ་ཟིང་སློང་དང་དཔུང་སྡེབ་རྩོད་འཛིང་སོགས་ཀྱི་ཁྲིམས་འགལ་ཉེས་གསོག་ལ་རྡུང་རྡེག་ཚ་ནན་གཏོང་བ། ＫＴＶདང་ཁྲུས་ཁང་སོགས་རོལ་རྩེད་ཞབས་ཞུ་མཁོ་འདོན་བྱ་ཡུལ་གཙོ་བོར་ཕྱོགས་ཡོངས་ནས་གཙང་བཤེར་བྱས་ཏེ་མང་ཚོགས་ཀྱི་བདེ་འཇགས་ཚོར་སྣང་ཆེ་རུ་བཏང་ཡོད།
ཤེས་རྟོགས་བྱུང་བར་གཞིགས་ན། གོམ་སྟབས་རྗེས་མའི་ལས་དོན་ཁྲོད་སྙེ་མོ་རྫོང་སྤྱི་བདེ་ཅུས་ཀྱིས་ཚད་གཞི་དེ་བས་མཐོ་བ་དང་། བླང་བྱ་དེ་བས་ནན་པ། བྱ་ཐབས་དེ་བས་ཏན་ཏིག ཤུགས་ཚད་དེ་བས་ཆེ་བ་བཅས་ཀྱི་ཐོག་ནས་དབྱར་ཁའི་བདེ་འཇགས་བཅོས་སྐྱོང་བྱ་སྤྱོད་མུ་མཐུད་གཏིང་ཟབ་སྤེལ་ཏེ་གང་སར་བདེ་འཇགས་ཡོང་བ་བྱ་རྒྱུ་རེད།