ཉེ་ཆར། ལྷ་སའི་དམག་དོན་ཞིབ་དཔྱོད་ཁང་དང་ས་སྐྱ་རྫོང་མི་དམངས་ཞིབ་དཔྱོད་ཁང་གིས་བོད་སྡོད་དཔུང་སྡེ་ཞིག་ཏུ་བསྐྱོད་དེ་ཚའེ་ཆེ་གེ་མོར་སྐྱིན་ཚབ་དངུལ་སྤྲོད་སྐབས། དཔུང་སྡེ་དེའི་དངོས་ཞབས་དམག་མི་ཚའེ་ཆེ་གེ་མོས་སེམས་འགུལ་ཆེན་པོ་ཐེབས་བཞིན་དུ། “ངའི་ཁྲིམས་མཐུན་ཁེ་དབང་ལ་གནོད་འཚེ་ཕོག་ནས་ག་བྱེད་འདི་བྱེད་མེད་པར་གྱར་སྐབས། ཁྱེད་རྣམ་པས་ང་ལ་རོགས་རམ་གནང་བྱུང་། མཐའ་སྲུང་དམག་མི་ཞིག་གི་ངོས་ནས། ངས་ཁྱེད་ཚོའི་བཀའ་དྲིན་ནམ་ཡང་བློ་ལ་བརྟན་པོར་བཅངས་ཏེ། དེ་ངའི་རྒྱལ་སྲུང་མཐའ་སྲུང་གི་སྒུལ་ཤུགས་ཆེན་པོ་ཞིག་ཏུ་གྱུར་བར་བྱེད་ཀྱི་ཡིན”ཞེས་བརྗོད།

2022ལོའི་ཟླ་4པར། ཚའེ་ཆེ་གེ་མོ་དམག་སྒར་ནས་རླངས་འཁོར་ལ་བསྡད་དེ་འཁོར་ཞག་ཏུ་ལོག་པའི་ལམ་བར་དུ། ས་གནས་དེ་གའི་གྲོང་མི་ཝུའུ་ཆེ་གེ་མོའི་རླངས་འཁོར་དང་རྡུང་ཁ་ཐེབས་ཏེ་ཚའེ་ཆེ་གེ་མོར་རྨས་སྐྱོན་ཕོག་པ་རེད། འགྲིམ་འགྲུལ་ཉེན་རྟོག་སྡེ་ཚན་གྱིས་བརྟག་དཔྱད་བྱས་རྗེས། ཝུའུ་ཆེ་གེ་མོས་དོན་རྐྱེན་དེའི་འགན་འཁྲི་ཆ་ཚང་འཁུར་དགོས་པ་དང་། དཔྱད་འདོམས་བྱས་པ་བརྒྱུད། ཚའེ་ཆེ་གེ་མོར་རྨས་སྐྱོན་རིམ་པ་བཅུ་པ་ཕོག་པའི་གཏན་འཁེལ་བྱས། ཝུའུ་ཆེ་གེ་མོས་འགན་བཅོལ་ཀུང་སི་ཞིག་ནས་རླངས་འཁོར་ལ་བཙན་ཤེད་འགན་བཅོལ་དང་ཚོང་ལས་འགན་བཅོལ་ཉོས་ཡོད་པར་མ་ཟད། དེ་འགན་བཅོལ་བྱེད་ཁོངས་སུའང་ཚུད་ཡོད། དོན་རྐྱེན་བྱུང་བའི་ལོ་གཉིས་རིང་། ཚའེ་ཆེ་གེ་མོས་རྨས་སྐྱོན་དཔྱད་འདོམས་ཀྱི་དཔང་ཡིག་ཁྱེར་ནས་ཝུའུ་ཆེ་གེ་མོ་དང་འགན་བཅོལ་ཀུང་སི་དང་སྐྱིན་ཚབ་ཇི་ལྟར་འཇལ་མིན་ཐད་འབྲེལ་གཏུག་ཐེངས་མང་བྱས་ཀྱང་ལམ་ལྷོངས་མ་བྱུང་སྟབས། ཁོང་གི་ཁྲིམས་མཐུན་ཁེ་དབང་ལ་གནོད་འཚེ་ཕོག་པར་ལོ་གཉིས་རིང་འགན་སྲུང་ཐུབ་མེད།

བོད་སྡོད་དཔོན་དམག་གི་ཁྲིམས་མཐུན་ཁེ་དབང་ལ་འགན་ལེན་གང་ལེགས་དང་ཚའེ་ཆེ་གེ་མོར་དགོས་ངེས་ཀྱི་སྐྱིན་ཚབ་ལེན་རོགས་བྱ་ཆེད། དམག་དཔུང་དང་ས་གནས་ཞིབ་དཔྱོད་ལས་ཁུངས་ཀྱིས་ཞིབ་དཔྱོད་ཀྱི་འགན་ནུས་གང་ལེགས་བཏོན་པ་དང་རང་འགུལ་ངང་འགན་འཁྲི་ཁུར་ཏེ་དཔོན་དམག་གི་སེམས་ཁྲལ་བསལ་བ་རེད། ས་སྐྱ་རྫོང་མི་དམངས་ཞིབ་དཔྱོད་ཁང་ལ་ལྷ་ས་དམག་དོན་ཞིབ་དཔྱོད་ཁང་གི་ཁུངས་སྣེ་འབྱོར་རྗེས་འཕྲལ་མར་དམངས་དོན་རྒྱབ་སྐྱོར་གྱི་ཞུ་གཏུག་གི་འགྲོ་ལུགས་གཉེར་འགོ་བཙུགས་ཤིང་། ཁྲིམས་ཁང་དེའི་ཅན་ཁྲ་ཀྲང་གིས་ཞིབ་དཔྱོད་དཔོན་གཙོ་བོ་བྱེད་པའི་གྱོད་སྒྲུབ་ཚོགས་ཆུང་བཙུགས་པ་དང་། རང་སྐྱོང་ལྗོངས་དང་གཞིས་རྩེ་གྲོང་ཁྱེར་གྱི་རིམ་གཉིས་ཞིབ་དཔྱོད་ཁང་གི་བརྒྱུད་རིམ་ཧྲིལ་པོའི་མཛུབ་ཁྲིད་འོག ཞིབ་དཔྱོད་དཔོན་གྱི་མཉམ་འབྲེལ་ཚོགས་འདུ་འཚོགས་ནས་གྱོད་གཞིའི་གནས་ཚུལ་ལ་ཕྱོགས་ཡོངས་ནས་དབྱེ་ཞིབ་དང་ཞིབ་འཇུག་བརྡར་གཅོད་གནད་འཁེལ་བྱས་ཏེ། ས་སྐྱ་རྫོང་ཁྲིམས་འཛིན་ཅུས་ཀྱིས་མངགས་པའི་ཁྲིམས་རྩོད་པ་དང་མཐུན་སྦྱོར་གྱིས་ཚའེ་ཆེ་གེ་མོར་བཅའ་ཁྲིམས་ཀྱི་རོགས་སྐྱོར་བྱས་པ་རེད། དེ་དང་ཆབས་ཅིག ལྷ་ས་དམག་དོན་ཞིབ་དཔྱོད་ཁང་དང་ས་སྐྱ་རྫོང་མི་དམངས་ཞིབ་དཔྱོད་ཁང་གི་ལས་དོན་པ་ཚའེ་ཆེ་གེ་མོ་གནས་སའི་དཔུང་སྡེར་གནས་ཚུལ་རྒྱུས་ལོན་བྱེད་པར་བསྐྱོད་པ་མ་ཟད། གཞིས་རྩེ་དང་། ལྷ་ས། ཁྲེང་ཏུའུ་བཅས་གསུམ་དུ་དཔང་རྟགས་བསྡུ་རུབ་དང་སྐྱིན་ཚབ་འཇལ་རྒྱུའི་སྐོར་གྲོས་མོལ་བྱེད་པར་བསྐྱོད་པ་རེད།

2024ལོའི་ཟླ་3ཚེས་21ཉིན། ས་སྐྱ་རྫོང་མི་དམངས་ཞིབ་དཔྱོད་ཁང་གིས་ས་སྐྱ་རྫོང་མི་དམངས་ཁྲིམས་ཁང་ལ་ཁྲིམས་ལྟར་དམངས་དོན་རྒྱབ་སྐྱོར་གྱི་ཞུ་གཏུག་བྱས་མཐར། ཕྱོགས་གཉིས་པོས་འདུམ་འགྲིག་བྱ་རྒྱུར་མོས་མཐུན་བྱུང་སྟེ་འདུམ་འགྲིག་གི་གྲོས་མཐུན་བཞག་པ་རེད། 2024ལོའི་ཟླ་5ཚེས་22ཉིན། ཝུའུ་ཆེ་གེ་མོ་དང་འགན་བཅོལ་ཀུང་སི་དེས་ཚའེ་ཆེ་གེ་མོར་སྨན་རིན་དང་དབང་པོ་སྐྱོན་ཅན་གྱི་སྐྱིན་ཚབ་དངུལ་སོགས་ཁྱོན་སྒོར་130285.9འཇལ་བ་རེད། དམག་དཔུང་དང་ས་གནས་ཞིབ་དཔྱོད་ལས་ཁུངས་ཀྱི་ཐུན་མོང་གི་འབད་བརྩོན་དང་གྱོད་སྒྲུབ་ཞིབ་དཔྱོད་དཔོན་གྱི་སེམས་ནུས་ཡོད་རྒུའི་རོགས་སྐྱོར་འོག ཚའེ་ཆེ་གེ་མོར་རྨས་སྐྱོན་ཕོག་པར་སྐྱིན་ཚབ་འཇལ་བའི་གྱོད་གཞི་དེ་ཐག་གཅོད་བདེ་བླག་བྱུང་ཡོད།

ལྷ་ས་དམག་དོན་ཞིབ་དཔྱོད་ཁང་གི་ཅན་ཁྲ་ཀྲང་ཙེང་ཐའོ་ཡིས། དམག་དཔུང་དང་ས་གནས་ཞིབ་དཔྱོད་ལས་ཁུངས་ཀྱིས་གོ་སྐབས་དེ་སྤྱད་དེ། གྱོད་གཞིའི་གྲུབ་འབྲས་སྔར་བས་སྲ་བརྟན་དང་གཏིང་ཟབ་ཏུ་གཏོང་བ་དང་། དམག་དཔུང་དང་ས་གནས་ཞིབ་དཔྱོད་ལས་ཁུངས་ཀྱི་མཉམ་ལས་ལ་ཤུགས་སྣོན་རྒྱག་པ། དམག་དཔུང་དང་ས་གནས་ཞིབ་དཔྱོད་ལས་ཁུངས་ཀྱི་མཉམ་ལས་ཀྱི་ཁྱབ་ཁོངས་རྒྱ་ཆེར་གཏོང་བ། འབྲེལ་གཏུག་མཐུན་སྦྱོར་ལམ་སྲོལ་འཐུས་སྒོ་ཚང་དུ་གཏོང་བ་བཅས་བྱས་ནས། དཔོན་དམག་གི་དངོས་ཡོད་གནད་དོན་ཁྲིམས་ལྟར་ཐག་གཅོད་ནུས་ལྡན་བྱས་ཏེ། རྒྱལ་ཁབ་སྟོབས་ཆེན་དང་དམག་དཔུང་སྟོབས་ཆེན་གྱི་བྱ་གཞག་ལ་ཞབས་འདེགས་ཞུ་བར་གྲུབ་འབྲས་དེ་བས་ཆེ་བ་ཐོབ་པར་བྱེད་ཀྱི་ཡིན་ཞེས་བརྗོད།