ཉེ་ཆར་ལྷ་ས་གྲོང་ཁྱེར་ཆུ་ཤུར་རྫོང་ཆུ་ཤུར་གྲོང་རྡལ་ཆུ་ཕུ་གྲོང་ཚོས་གཞི་རིམ་གྱི་སྒྲོག་འགྲེལ་པ་སྒྲིག་འཛུགས་བྱས་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་པ་དང་རྒྱལ་ཁབ་ཀྱི་འདུ་ཤེས་དང་། སྤྱི་དམངས་ཀྱི་འདུ་ཤེས། ཁྲིམས་སྐྱོང་གི་འདུ་ཤེས་བཅས་སྲ་བརྟན་དུ་གཏོང་བའི་མང་ཚོགས་རང་བཞིན་གྱི་དྲིལ་བསྒྲགས་སློབ་གསོའི་བྱེད་སྒོ་སྤེལ་བ་རེད། དེའི་དམིགས་ཡུལ་ནི་ཞིང་འབྲོག་མང་ཚོགས་ཀྱིས“རྒྱལ་ཁབ་ཀྱི་འདུ་ཤེས་དང་། སྤྱི་དམངས་ཀྱི་འདུ་ཤེས། ཁྲིམས་སྐྱོང་གི་འདུ་ཤེས”བཅས་ཟབ་ཏུ་གཏོང་བར་སྔར་བས་ཁྲིད་སྟོན་བྱས་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་རྒྱུ་དེ་ཡིན།

སྒྲོག་འགྲེལ་བྱེད་སྒོར་སྒྲོག་འགྲེལ་པ་ཕུར་བུ་བཀྲ་ཤིས་ཀྱིས“རྒྱལ་ཁབ་ཀྱི་འདུ་ཤེས་དང་། སྤྱི་དམངས་ཀྱི་འདུ་ཤེས། ཁྲིམས་སྐྱོང་གི་འདུ་ཤེས”བཅས་ཀྱི་ནང་དོན་ཟབ་པོ་གོ་བདེ་ཤེས་སླའི་སྐད་ཆར་བརྟེན་ནས་གསལ་བཤད་བྱས་པ་རེད། ཁོང་གིས། རྒྱལ་གཅེས་རིང་ལུགས་ཀྱི་བརྩེ་སེམས་ཟབ་ཏུ་གཏོང་བ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ། སྤྱི་དམངས་ཀྱིས་བསྒྲུབ་དགོས་པའི་འོས་འགན་རང་རྟོགས་ངང་སྒྲུབ་པ། སྐྱོན་བྲལ་དང་ཡ་རབས་ཀྱི་འཚོ་བ་སྐྱེལ་སྟངས་འཇགས་པ། ཁྲིམས་སྐྱོང་གི་འདུ་ཤེས་འཛུགས་པ་བཅས་ཀྱི་ཐོག་ནས་ཁྲིམས་བཀུར་དང་། ཁྲིམས་སྦྱོང་། ཁྲིམས་སྲུང་། ཁྲིམས་སྤྱོད་བཅས་ཀྱི་སྤྱི་དམངས་བཟང་པོ་ཞིག་བྱས་ཏེ་བློ་བརྟན་འགྱུར་མེད་ངང་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་བྱས་ནས་མེས་རྒྱལ་གཅིག་གྱུར་དང་མི་རིགས་མཐུན་སྒྲིལ་ལ་རང་རྟོགས་ངང་སྲུང་སྐྱོང་བྱེད་དགོས་པའི་ནན་བཤད་བྱས་པ་རེད།

བྱེད་སྒོར་ཞུགས་མཁན་མང་ཚོགས་ཀྱི་ཁྲོད་ཚུར་སྣང་ལན་ཆ་ཆེན་པོ་བྱུང་ནས་ཚང་མས་བློ་སྒོ་ཕྱེ་ཚུལ་གཅིག་རྗེས་གཉིས་མཐུད་ངང་བརྗོད་པ་རེད། ཚང་མས། ད་ཐེངས་ཀྱི་སྒྲོག་འགྲེལ་ལས་རྒྱལ་ཁབ་ཀྱི་སྤྱི་དམངས་ཤིག་ལ་རྒྱལ་ཁབ་ཀྱི་འདུ་ཤེས་ཟབ་མོ་ལྡན་དགོས་པ་དང་རྒྱལ་ཁབ་དར་རྒྱས་ལ་སྟོབས་ཤུགས་ལེགས་སྐྱེས་འབུལ་དགོས་པ་སྔར་བས་ཤེས་རྟོགས་ཐུབ་སོང་། དེ་དང་ཆབས་ཅིག་ཁྲིམས་ཤེས་ཁྲིམས་སྲུང་དང་བཅའ་ཁྲིམས་ལ་བརྟེན་ནས་རང་ཉིད་ཀྱི་བྱ་སྤྱོད་ཚད་ལྡན་དུ་གཏོང་གི་ཡིན། མིག་སྔའི་མཐུན་སྒྲིལ་བརྟན་ལྷིང་གི་དུས་བབ་ལ་གཅེས་སྤྲས་བྱས་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་བཙུགས་ཏེ་འཚོ་བ་སྔར་བས་མཛེས་སྡུག་ལྡན་པ་ཡོང་རྒྱུར་ཐུན་མོང་ཐོག་འབད་བརྩོན་བྱེད་ཀྱི་ཡིན་ཞེས་གཅིག་རྗེས་གཉིས་མཐུད་ངང་བརྗོད་པ་རེད།