པར①ནི་པིན་ཧྲོའུ་ཕེང་གིས་ཟུངས་ནུས་སྦྱོང་བརྡར་བྱེད་བཞིན་པ།

པར②ནི་པིན་ཧྲོའུ་ཕེང་གིས་རྩལ་ནུས་སྦྱོང་བརྡར་བྱེད་བཞིན་པ།

ཀྲུང་གུང་ཏང་ཡོན་པིན་ཧྲོའུ་ཕེང་ནི་2011ལོའི་ཟླ་12པར་དམག་དཔུང་ནང་ཞུགས་པ་དང་། ད་ལྟ་གཞིས་རྩེ་ཡན་ལག་རུ་ཁག་མཁར་རག་ཕུའུ་ཤར་ལམ་དམིགས་བསལ་ལས་སྒྲུབ་ས་ཚིགས་ཀྱི་ཡན་ལག་ས་ཚིགས་དང་པོའི་ཡན་ལག་རུ་དཔོན་དང་རིམ་པ་དང་པོའི་མེ་གསོད་རུ་མི་ཞིག་རེད། ལས་ཀར་ཞུགས་ཚུན་པིན་ཧྲོའུ་ཕེང་ལ་སྔ་རྗེས་སུ་མི་སྒེར་གྱི་བྱས་རྗེས་རིམ་པ་གཉིས་པ་ཐེངས་1དང་། བྱས་རྗེས་རིམ་པ་གསུམ་པ་ཐེངས་3 གཟེངས་བསྟོད་ཐེངས་3བཅས་ཐོབ་པ་དང་། 2020ལོར་བོད་རང་སྐྱོང་ལྗོངས་མེ་ཟོན་རོགས་སྐྱོབ་སྤྱི་ཁྱབ་རུ་ཁག་གིས“ཕུལ་བྱུང་གི་མེ་གསོད་མི་རུ་བཅུའི”ནང་བདམས་པ། 2021ལོར་རང་སྐྱོང་ལྗོངས་ཏང་ཨུད་དང་སྲིད་གཞུང་གིས“ལྗོངས་ཡོངས་ཀྱི་ཕུལ་བྱུང་གུང་ཁྲན་ཏང་ཡོན”ལ་བདམས་པ། 2022ལོའི་ཟླ་12པར་རྒྱལ་ཁབ་མེ་ཟོན་རོགས་སྐྱོབ་ཅུས་ཀྱིས་རྒྱལ་ཡོངས་ཀྱི་སྦྱོང་བརྡར་དཔེ་དམག་ལ་བདམས་པ་མ་ཟད། ད་དུང་ལོ་དེར་སྐབས་18པའི“བོད་ལྗོངས་གཞོན་ནུའི་ལྔ་བཞིའི་གཟེངས་རྟགས”ཐོབ་ལ། ད་ལོར་་ཡང“བོད་རང་སྐྱོང་ལྗོངས་ཀྱི་སྐབས་དྲུག་པཏའི་སྔོན་ཐོན་ལས་དོན་པའི”གཟི་བརྗིད་མཚན་སྙན་ཐོབ་པ་རེད།

ཁོང་གི་ལས་ཀར་འོད་སྟོང་འཕྲོ་ཞིང་གཡུར་དུ་ཟ་བའི་གྲུབ་འབྲས་ཐོབ་ཡོད་ཅེས་བརྗོད་ཆོག་ཆོག་རེད། ཡིན་ཡང་གཟི་བརྗིད་ཀྱི་རྒྱབ་ཏུ་འབད་བརྩོན་ལྷོད་མེད་དང་བློས་གཏོང་གྲངས་མེད་བྱས་པ་ནི་སྨྲ་མི་དགོས་པ་རེད།

ཞོགས་པའི་ཆུ་ཚོད་བདུན་དང་ཕྱེད་ཀར་ཞོགས་རྒྱུག་གློད་པ་ནས་ཁོང་གི་ཉིན་གཅིག་གི་ལས་ཀའི་འགོ་བརྩམས་ཤིང་། ལུས་སྟོབས་སྦྱོང་བརྡར་དང་། རྩལ་ནུས་སྦྱོང་བརྡར། མེ་གསོད་རོགས་སྐྱོབ། ཉེན་སེལ་རོགས་སྐྱོབ་བཅས་ཀྱི་སྦྱོང་བརྡར་ཚར་རྗེས། དགོང་མོར་ད་དུང་རྟག་ཏུ་རྒྱུག་ཤར་སྤྱི་ལེ་གསུམ་ཙམ་གློད་པ་མ་ཟད། གན་ཉལ་ཡར་ལངས་ལུས་རྩལ་དང་། ཁ་བུབ་ལག་བཙུགས་སྒྲེང་འགུག་ལུས་རྩལ། ཙོག་སྡོད་ཡར་ལངས་ལུས་རྩལ་ཁག་གསུམ་ཐེངས་100རེ་རྩེད་ཀྱི་ཡོད་པ་རེད།

ལོ་མང་རིང་གི་ཤུགས་ཚད་ཆེ་བའི་སྦྱོང་བརྡར་ལས། པིན་ཧྲོའུ་ཕེང་གི་རྐང་པ་དང་ལག་པ་རྟག་ཏུ་སྨུག་པོར་གྱུར་པ་དང་སྦྱོང་བརྡར་གྱི་ལྷམ་ཡང་མགྱོགས་པོ་ཟད་འགྲོ་ཡི་ཡོད། 2015ལོར་པན་ཀྲང་གི་འགན་ཁུར་རྗེས་ཁོང་གིས་རང་ཉིད་ལ་རེ་བ་སྔར་བས་ནན་པོ་བཏོན་པ་དང་། ཁོང་གི་སྣེ་ཁྲིད་འོག་པན་ཡོངས་སུ་ཡང་དམག་སྦྱོང་བྱེད་པའི་ཚ་རླབས་ཤིག་འཕྱུར།

2020ལོར་ཡན་ལག་རུ་དཔོན་གྱི་འགན་ཁུར་ཚུན་ཁོང་གིས་རང་ཉིད་ཀྱི་ཕྲག་ཐོག་གི་འགན་འཁྲི་དེ་བས་ལྕི་རུ་ཕྱིན་པ་ཚོར་ཞིང་། སྦྱོང་བརྡར་རིང་རུ་མིའི་སྐས་འཛེག་མྱུར་ཚད་མགྱོཌ་སུ་གཏོང་ཆེད། སྐས་ཀ་འཛེག་སྟངས་ཡང་ཡང་བསླབ་པ་མ་ཟད། ད་དུང་རང་ཉིད་ཀྱིས་ཤེས་པའི་ལས་སྒོའི་རྩལ་ནུས་ཚང་མ་སྦ་གསང་མེད་པར་རུ་མི་ཚོར་ཁྲིད་པ་རེད།

དམག་གསར་ཞིག་ནས་པན་ཀྲང་དང་། དེ་ནས་ལས་སྒོ་བྱང་ཆུབ་པའི་ཡན་ལག་རུ་དཔོན་ཞིག་ཏུ་གྱུར་ཞིང་། དྲག་རྩལ་འགྲན་བསྡུར་གྱི་འགྲན་ར་ནས་བདེ་སྲུང་གི་འཐབ་ས་དང་པོའི་བར། ཉེན་སེལ་རོགས་སྐྱོབ་བྱ་ཡུལ་ནས་མེ་གསོད་རོགས་སྐྱོབ་ཀྱི་འཐབ་ས་མདུན་མའི་བར་པིན་ཧྲོའུ་ཕེང་གིས་བྱ་སྤྱོད་དངོས་ལ་བརྟེན་ནས་མེ་གསོད་རུ་མི་ཞིག་གིས་མེ་གསོད་རོགས་སྐྱོབ་བྱ་གཞག་ལ་བཅངས་པའི་དགའ་ཞེན་མཚོན་པར་བྱས་ཡོད་ལ། དུས་རབས་གསར་པའི་མེ་གསོད་རུ་མིའི“ཏང་ལ་ལྷག་བསམ་རྣམ་དག་དང་། སྒྲིག་ཁྲིམས་དམ་ལ་ནན་པ། སྲོག་ཉེན་ལ་མི་འཛེམ་པ། བསམ་པ་རྣམ་དག་གིས་དམངས་ལ་ཞབས་འདེགས་ཞུ་བ”བཅས་ཀྱི་བླ་ན་མེད་པའི་གཤིས་རྒྱུད་གསལ་བཤད་བྱས་པ་རེད།

ལོ་བཅུ་ལྷག་ཙམ་རིང་། པིན་ཧྲོའུ་ཕེང་སྔ་རྗེས་སུ“4·25”ས་ཡོམ་རོགས་སྐྱོབ་སོགས་མེ་གསོད་དང་ཉེན་སེལ་རོགས་སྐྱོབ་སྣ་ཚོགས་ཁག་819ནང་ཞུགས་ནས་ཉེན་གྱར་མང་ཚོགས་1709མྱུར་སྐྱོབ་ཁ་འགྲེམ་བྱས་པ་དང་། རིན་ཐང་སྒོར་ཁྲི་1609.5རི་བའི་རྒྱུ་ནོར་བསྐྱབས་པ་རེད། པིན་ཧྲོའུ་ཕེང་གིས་བྱ་སྤྱོད་དངོས་ལ་བརྟེན་ནས་མི་དམངས་མང་ཚོགས་ཚོས་མེ་ཟོན་རོགས་སྐྱོབ་རུ་ཁག་གི་འབད་འཐབ་ཚོར་བར་བྱས་ཤིང་། དུས་རབས་གསར་པའི་མེ་ཟོན་རོགས་སྐྱོབ་དཔུང་ཁག་གི“བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་བའི”དམིགས་ཡུལ་དང་འགན་འཁྲི་གསོན་ཉམས་དོད་པོས་མངོན་པར་བྱས་པ་རེད།