ཉེ་ཆར་སྡོད་ཁང་འཛུགས་སྐྲུན་པུའུ་ཡིས་ཀྲེ་ཅང་ཉིང་པོ་རུ་རྒྱལ་ཡོངས་གྲོང་ཁྱེར་གྱི་འཚོ་བའི་གད་སྙིགས་རིགས་དབྱེའི་ལས་དོན་གྱི་ས་གནས་ས་ཐོག་གི་ཚོགས་འདུ་འཚོགས་ཤིང་། གསར་འགོད་པར་ཚོགས་འདུའི་ཐོག་ནས་ཤེས་རྟོགས་བྱུང་བར། མིག་སྔར་རྒྱལ་ཡོངས་ཀྱི་ས་ཁུལ་རིམ་པ་དང་དེ་ཡན་གྱི་གྲོང་ཁྱེར་གྱི་གྲོང་མིའི་ཁུལ་ཆུང་གི་གད་སྙིགས་རིགས་དབྱེ་ཐུབ་ཚད་92.6%ཟིན་ཡོད། གད་སྙིགས་རིགས་དབྱེའི་ལམ་ལུགས་རིམ་བཞིན་འཐུས་སྒོ་ཚང་དུ་ཕྱིན་ནས་ཞིང་ཆེན་21དང་གྲོང་ཁྱེར་173གྱིས་གད་སྙིགས་རིགས་དབྱེའི་ཐད་ཀྱི་ས་གནས་རང་བཞིན་གྱི་ཁྲིམས་སྲོལ་དང་སྲིད་གཞུང་གི་སྒྲིག་སྲོལ་བཟོས་པ་དང་། གད་སྙིགས་རིགས་དབྱེའི་མ་ལག་རགས་ཙམ་བཙུགས་ཡོད། གཙོ་གནད་གྲོང་ཁྱེར་46གིས་ཅུང་འཐུས་སྒོ་ཚང་བའི་གད་སྙིགས་རིགས་དབྱེ་བླུག་འཇོག་དང་། རིགས་དབྱེ་བསྡུ་རུབ། རིགས་དབྱེ་སྐྱེལ་འདྲེན། རིགས་དབྱེ་ཐག་གཅོད་བཅས་ཀྱི་མ་ལག་སྔོན་ལ་བཙུགས་པ་དང་ས་ཁུལ་རིམ་པའི་གྲོང་ཁྱེར་གཞན་དག་གི་རིགས་དབྱེའི་མ་ལག་འཛུགས་སྐྲུན་ལ་མགྱོགས་མྱུར་སྐུལ་འདེད་བཏང་ཡོད།

ཚོགས་འདུའི་ཐོག་བཏོན་དོན། ས་ཁུལ་རིམ་པ་དང་དེ་ཡན་གྱི་གྲོང་ཁྱེར་15ལ་མཛུབ་ཁྲིད་བྱས་ནས་ཐུན་མིན་ཁྱད་ཆོས་ལྡན་པའི་གད་སྙིགས་རིགས་དབྱེའི་དཔེ་སྟོན་གྱི་མ་དཔེ་བཏོད་ནས་ཁྱབ་གདལ་ཆོག་པ་དང་བསྐྱར་ཟློས་ཆོག་པའི་དཔེ་མཚོན་མགྱོགས་མྱུར་ཆགས་པར་བྱེད་དགོས། རྫོང་རིམ་པའི་གྲོང་ཁྱེར་གྱི་ཚོད་ལྟར་དམ་འཛིན་ཡག་པོ་བྱས་ནས་ས་ཁོངས་མི་འདྲ་བའི་སྟབས་བདེ་ཞིང་ལག་བསྟར་བྱེད་སླ་བའི་རིགས་དབྱེ་བྱེད་སྟངས་འཚོལ་ཞིབ་བྱས་ཏེ། རྫོང་རིམ་པའི་གྲོང་ཁྱེར་གྱི་གད་སྙིགས་རིགས་དབྱེར་སྐུལ་འདེད་བཏང་ནས་གད་སྙིགས་རིགས་དབྱེའི་ལམ་ལུགས་ཀྱི་ཁྱབ་རྒྱ་རྒྱུན་མཐུད་ཆེ་རུ་གཏོང་དགོས།