ཉེ་ཆར། ལྷོ་ཁ་གྲོང་ཁྱེར་གོང་དཀར་རྫོང་སྤྱི་བདེ་ཅུས་ཀྱིས“ལས་ཀ་ངོ་སྤྲོད”ལ་ཁ་གཡར་ནས་མི་གཞན་གྱི་རྒྱུ་ནོར་ཁ་བསླུས་བརྒྱབ་པའི་གྱོད་གཞི་ཞིག་རྩད་ཆོད་དེ་ཉེས་གསོག་དོགས་ཅན་1བཟུང་བ་དང་ཁ་བསླུས་བརྒྱབ་པའི་དངུལ་སྒོར་ཁྲི་3.5ཚུར་བླངས་པ་རེད།

ཤེས་རྟོགས་བྱུང་བར་གཞིགས་ན། 2024ལོའི་ཟླ་3ཚེས་13ཉིན། ལྷོ་ཁ་གྲོང་ཁྱེར་གོང་དཀར་རྫོང་སྤྱི་བདེ་ཅུས་ཉེས་དོན་ཉེན་རྟོག་རུ་ཆེན་ལ་རང་ཉིད་ལ་མི་ཞིག་གིས“ཕྲུ་གུར་ལས་ཀ་ངོ་སྤྲོད་བྱེད་རོགས་བྱས་ཆོག”ཟེར་ནས་སྒོར་ཁྲི་16.58ཁ་བསླུས་བརྒྱབ་བྱུང་བས། སྤྱི་བདེ་ལས་ཁུངས་ཀྱིས་རོགས་རམ་གནང་རོགས་ཞེས་གནོད་འཚེ་ཕོག་མཁན་ཕུར་ཆེ་གེ་མོའི་གྱོད་དོན་སྙན་སེང་འབྱོར།

མི་དམངས་ཉེན་རྟོག་པས་ཞིབ་བཤེར་བྱས་རྗེས། 2021ལོའི་ཟླ་3པར། གྲོགས་པོས་ངོ་སྤྲོད་བྱས་པ་བརྒྱུད་གནོད་འཚེ་ཕོག་མཁན་ཕུར་ཆེ་གེ་མོས་ཉེས་གསོག་དོགས་ཅན་ཆིན་ཆེ་གེ་མོ་ངོ་ཤེས་པ་དང་། ཆིན་ཆེ་གེ་མོས་རང་ཉིད་ལ་འབྲེལ་བ་ཡག་པོ་ཡོད་པས། ཕུར་ཆེ་གེ་མོའི་ཕྲུ་གུར་ལས་ཀ་ངོ་སྤྲོད་བྱས་ཆོག འོན་ཀྱང་ཁ་ལག་གཏོང་བ་དང་ལག་རྟགས་སྤྲོད་དགོས་ཟེར། དེ་རྗེས་ཕུར་ཆེ་གེ་མོས་སྔ་རྗེས་སུ་དངུལ་སྨར་སྤྲད་པ་དང་འཕྲིན་ཕྲན་ནས་དངུལ་སྒྱུར་བ་སོགས་ཀྱི་བྱ་ཐབས་བརྒྱུད་ཆིན་ཆེ་གེ་མོར“ངོ་སྲུང་གྲོན་དངུལ”དང“བར་འབྲེལ་གྲོན་དངུལ”སྒོར་ཁྲི་16.58སྤྲད་པ་ཤེས་རྟོགས་བྱུང་བ་རེད།

གནས་ཚུལ་ཤེས་རྟོགས་བྱས་རྗེས། གྱོད་སྒྲུབ་མི་དམངས་ཉེན་རྟོག་པས་མགྱོགས་མྱུར་ཁུངས་སྣེ་འཚོལ་བསྡུ་དང་འབྲེལ་ཡོད་དཔང་རྟགས་གཏན་འཁེལ་བྱས་ཏེ་དབྱེ་ཞིབ་ཞིབ་དཔྱད་ནན་པོ་བྱས་རྗེས་ཧུའུ་ནན་ཞིང་ཆེན་ཁྲང་ཧྲ་གྲོང་ཁྱེར་ནས་ཉེས་གསོག་དོགས་ཅན་ཆིན་ཆེ་གེ་མོ་བཟུང་བ་རེད། ས་གནས་དེ་གའི་ཉེན་རྟོག་ཕྱོགས་ཀྱི་གཞོགས་འདེགས་ཤུགས་ཆེན་འོག ཉིན་20ལྷག་ཙམ་རིང་། གྱོད་སྒྲུབ་ཉེན་རྟོག་པས་ཉེས་གསོག་དོགས་ཅན་ཆིན་ཆེ་གེ་མོ་བཟུང་བ་རེད།

འདྲི་རྩད་བྱས་པ་བརྒྱུད། ཉེས་གསོག་དོགས་ཅན་ཆིན་ཆེ་གེ་མོས“ཕུར་ཆེ་གེ་མོར་ཕྲུ་གུར་ལས་ཀ་ངོ་སྤྲོད་བྱེད་པར”ཁ་གཡར་ནས་སྒོར་ཁྲི་16.58ཁ་བསླུས་བརྒྱབ་པའི་དོན་དངོས་སྦ་གསང་མེད་པར་ངོས་ལེན་ཞུས་པ་མ་ཟད། རང་ཉིད་ལ་མི་གཞན་ལ་ལས་ཀ་བཀོད་སྒྲིག་བྱེད་པའི་ནུས་པ་མེད་ལ། ཁ་བསླུས་བརྒྱབ་པའི་དངུལ་མང་ཆེ་བ་རང་ཉིད་ཀྱིས་རྒྱུན་གཏན་འགྲོ་སོང་ལ་སྤྱོད་ལུགས་ཁས་བླངས་པ་རེད།

མིག་སྔར་ཁ་བསླུས་བརྒྱབ་པའི་དངུལ་ལྷག་མ་སྒོར་ཁྲི་3.5ཕུར་ཆེ་གེ་མོར་ཕྱིར་སློག་བྱས་པ་དང་གྱོད་གཞི་དེ་སྔར་བས་སྒྲུབ་གཉེར་བྱེད་བཞིན་ཡོད་པ་རེད།