2024ལོའི་ཟླ་2ཚེས་27ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཀྲུའུ་ཞིའི་བཀའ་རྒྱ་ཨང་20པར་མཚན་རྟགས་བཀོད་དེ་རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་བརྒྱད་པར་བཟོ་བཅོས་བརྒྱབ་ནས་གྲོས་འཆམ་བྱུང་བའི《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་ཁབ་ཀྱི་གསང་སྲུང་བཅའ་ཁྲིམས》(གཤམ་དུ་གསང་སྲུང་བཅའ་ཁྲིམས་ཞེས་བསྡུ་རྒྱུ)ཁྱབ་བསྒྲགས་བྱས་ནས་2024ལོའི་ཟླ་5ཚེས་1ཉིན་ནས་བཟུང་ལག་བསྟར་བྱས་པ་རེད།

གསང་སྲུང་བཅའ་ཁྲིམས་བཟོ་བཅོས་བརྒྱབ་ནས་ཁྱབ་བསྒྲགས་བྱས་པ་དེ་ནི་རང་རྒྱལ་གྱི་གསང་སྲུང་ཁྲིམས་སྐྱོང་འཛུགས་སྐྱོང་འཕེལ་རིམ་ཁྲོད་ཀྱི་ལམ་ཚད་རྡོ་རིང་གསར་པ་ཞིག་ཡིན་ཞིང་། རྒྱལ་ཁབ་ཀྱི་གསང་བའི་བདེ་འཇགས་སྲུང་སྐྱོང་དང་། རྒྱལ་ཁབ་ཀྱི་བདག་དབང་དང་། བདེ་འཇགས། འཕེལ་རྒྱས་ཀྱི་ཁེ་ཕན་བཅས་སྔར་བས་སྲུང་སྐྱོང་ཡག་པོ་བྱེད་པར་སྟོབས་དང་ལྡན་པའི་ཁྲིམས་སྐྱོང་གི་འགན་ལེན་བྱས་པ་རེད།

ཉེ་ཆར། ལྷ་ས་གྲོང་ཁྱེར་གཡུ་ཐོག་ལམ་ཁྲོམ་གཞུང་དུ“གསང་སྲུང་བཅའ་ཁྲིམས་ལག་བསྟར་དོན་འཁྱོལ་བྱེད། ང་ཚོ་ཚང་མ་གསང་བ་སྲུང་མཁན་ཡིན”ཞེས་པའི་བརྗོད་དོན་གཙོ་བོའི་གསང་སྲུང་བཅའ་ཁྲིམས་གཅིག་སྡུད་དྲིལ་བསྒྲགས་བྱེད་སྒོ་ཚ་ཚ་འུར་འུར་ངང་སྤེལ་བ་རེད། ད་ཐེངས་ཀྱི་བྱེད་སྒོ་ནི་རང་སྐྱོང་ལྗོངས་ཏང་ཨུད་གསང་སྲུང་ཨུ་ལྷན་གཞུང་ལས་ཁང་དང་རང་སྐྱོང་ལྗོངས་རྒྱལ་ཁབ་གསང་སྲུང་ཅུས་ཀྱིས་སྣེ་ཁྲིད་ནས་སྒྲིག་འཛུགས་བྱས་པ་དང་། རང་སྐྱོང་ལྗོངས་ཏང་ཨུད་གསང་སྲུང་ཨུ་ལྷན་དང་ལྷ་ས་གྲོང་ཨུད་གསང་སྲུང་ཨུ་ལྷན་གྱི་ཁོངས་གཏོགས་ཚན་པ་49ཞུགས་ཡོད་པ་རེད།

ཟླ་5ཚེས་1ཉིན་ནི་གསར་དུ་བཟོ་བཅོས་བརྒྱབ་པའི་གསང་སྲུང་བཅའ་ཁྲིམས་ལག་བསྟར་བྱེད་འགོ་ཚུགས་པའི་ཉིན་དང་པོ་ཡིན་པ་དང་། གཡུ་ཐོག་ལམ་དུ་མི་ཚོགས་ཀྱིས་ཁེངས་ཡོད། བྱེད་སྒོར་ཞུགས་མཁན་ཚན་པ་ཁག་གིས་དྲིལ་བསྒྲགས་བློ་འདྲིའི་སྟེགས་བུ་འཛུགས་པ་དང་། གསང་སྲུང་དྲིལ་བསྒྲགས་ཀྱི་པར་གཞི་སྟོན་པ། དྲིལ་བསྒྲགས་སྦྱར་ཡིག་སྦྱར་བ། དྲིལ་བསྒྲགས་ལག་དེབ་དང་གསང་སྲུང་གི་རིག་གནས་བསམ་བཀོད་ཐོན་རྫས་སྤྲོད་པ་བཅས་ཀྱི་རྣམ་པར་བརྟེན་ནས་རྒྱ་ཆེའི་མང་ཚོགས་ལ་གསང་སྲུང་བཅའ་ཁྲིམས་དྲིལ་བསྒྲགས་བྱས་པ་དང་ཆབས་ཅིག དེར་ཞུགས་མཁན་ཚན་པ་ཁག་གིས་ད་དུང་ལན་འདེབས་མཁན་ལ་བྱ་དགའ་སྤྲོད་པ་སོགས་ཀྱི་མཉམ་འགུལ་བྱེད་སྒོ་སྤེལ་ནས་གསང་སྲུང་བཅའ་ཁྲིམས་སློབ་སྦྱོང་བྱེད་པའི་སྤྲོ་སྣང་འཕེལ་བར་བྱས་པ་རེད།

གྲོང་མི་བསོད་ནམས་ཀྱིས་འབྲེལ་ཡོད་གནད་དོན་སྐོར་བློ་འདྲི་བྱས་རྗེས་གསང་སྲུང་བཅའ་ཁྲིམས་སྐོར་གྱི་དྲི་བར་ལན་འདེབས་པའི་བྱེད་སྒོར་ཞུགས་པ་རེད། ཁོང་གིས“རྒྱལ་ཁབ་ཀྱི་གསང་བ་སྲུང་རྒྱུ་ནི་ང་ཚོ་མི་སེར་གྱི་འཚོ་བ་དང་འབྲེལ་བ་དམ་ཟབ་ཡོད་པས། ང་ཚོས་ཤེས་བྱ་དེ་དག་ཤེས་པ་བྱས་ནས་རྒྱལ་ཁབ་ཀྱི་གསང་བ་ཕྱིར་མི་གྱར་བ་བྱེད་ཀྱི་ཡིན”ཞེས་བཤད།

ད་ཐེངས་ཀྱི་དྲིལ་བསྒྲགས་བྱེད་སྒོར་གསང་སྲུང་དྲིལ་བསྒྲགས་དཔྱད་ཡིག་16414དང་། རིག་གནས་བསམ་བཀོད་ཐོན་རྫས་5273སྤྲད་པ་དང་། འགྲེམས་པང་92བསྒྲིགས་པ། བརྡ་ཆ་259སྦྱར་བ། འཕྲེད་འགེལ་སྦྱར་ཡིག་50བཀལ་བ། ས་གནས་ས་ཐོག་ཏུ་ལན་འདེབས་མཁན་མི་ཐེངས་1200ལྷག་ཙམ་བྱུང་བ། མི་ཐེངས་3000ལྷག་ཙམ་གྱི་དོགས་གཞི་བསལ་བ་བཅས་བྱས་པ་རེད།

རང་སྐྱོང་ལྗོངས་གསང་སྲུང་ཅུས་ཀྱི་ལས་བྱེད་པ་བདེ་སྐྱིད་གཡང་འཛོམས་ཀྱིས་གསར་འགོད་པར“ཆེད་བསྐོས་གསང་སྲུང་ལས་བྱེད་པ་ཞིག་གི་ངོས་ནས། ངས་གསར་དུ་བཟོ་བཅོས་བརྒྱབ་པའི་གསང་སྲུང་བཅའ་ཁྲིམས་དྲིལ་བསྒྲགས་ལག་བསྟར་བྱེད་པའི་ལས་དོན་མིག་སྔའི་གཙོ་གནད་ལས་དོན་ཞིག་ཏུ་བརྩིས་ནས་གསོན་ཉམས་ལྡན་ལ་མང་ཚོགས་ཀྱིས་གོ་ཐུབ་པའི་གསང་སྲུང་དྲིལ་བསྒྲགས་བྱེད་སྒོ་མུ་མཐུད་སྤེལ་ཏེ། རྒྱ་ཆེའི་མང་ཚོགས་ཀྱིས‘རྒྱལ་ཁབ་ཀྱི་གསང་བ་སྲུང་རྒྱུ་དེ་མི་ཚང་མར་འགན་འཁྲི་ཡོད’པའི་འདུ་ཤེས་བརྟན་པོ་འཛུགས་པར་སློབ་གསོ་ཁྲིད་སྟོན་བྱས་ནས་གསང་སྲུང་ལས་དོན་གྱི་མང་ཚོགས་ཀྱི་རྨང་གཞི་བརྟན་དུ་གཏོང་ཆེད་རང་ཉིད་ཀྱི་ལེགས་སྐྱེས་འབུལ་གྱི་ཡིན”ཞེས་བཤད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་བྱེད་སྒོ་ནི་2024ལོའི་ལྗོངས་ཡོངས་ཀྱི་གསང་སྲུང་དྲིལ་བསྒྲགས་སློབ་གསོའི་ཟླ་བའི་བྱེད་སྒོ་རབ་དང་རིམ་པའི་གྲས་ཤིག་ཡིན་པ་དང་། དེའི་དམིགས་ཡུལ་ནི་གསར་དུ་བཟོ་བཅོས་བརྒྱབ་པའི་གསང་སྲུང་བཅའ་ཁྲིམས་སློབ་སྦྱོང་དྲིལ་བསྒྲགས་དང་ལག་བསྟར་དོན་འཁྱོལ་བྱེད་པའི་རྣམ་པ་ཟབ་ཏུ་གཏོང་བ་དང་། རྒྱ་ཆེའི་ལས་བྱེད་པ་དང་མང་ཚོགས་ལ་གསང་སྲུང་ཁྲིམས་སྐྱོང་གི་འདུ་ཤེས་དང་རྒྱལ་ཁབ་ཀྱི་གསང་བ་སྲུང་བའི་འགན་འཁྲིའི་བསམ་པ་རྒྱུན་ཆད་མེད་པར་ཟབ་ཏུ་གཏོང་བར་སློབ་གསོ་ཁྲིད་སྟོན་བྱས་ཏེ། དུས་རབས་གསར་པར་ཏང་དང་རྒྱལ་ཁབ་ཀྱི་གསང་བའི་བདེ་འཇགས་སྲུང་བའི་མི་དམངས་ཀྱི་འགོག་སྲུང་འཛིང་རགས་བརྟན་དུ་གཏོང་རྒྱུ་དེ་རེད།