ཉེ་བའི་ལོ་ཤས་རིང་། ཉིང་ཁྲི་གྲོང་ཁྱེར་གྱིས་ཏང་འཛུགས་སྐྱོང་ལ་བརྟེན་ནས་ཁྲིད་སྟོན་དང་། གཙོ་རྐང་ཕྱོགས་ཡོངས་ལ་ཁྱབ་པ། དགེ་རྒན་དཔུང་ཁག་སྟོབས་ཆེར་གཏོང་བའི་འགག་རྩ་བཅས་ཕྱོགས་གསུམ་ལ་དམིགས་ཏེ། དེ་བས་འཐུས་སྒོ་ཚང་བའི་བསམ་བློ་ཆབ་སྲིད་ཀྱི་མ་ལག་དང་། དེ་བས་ཕུན་སུམ་ཚོགས་པའི་ལས་ཀའི་ནང་དོན། དེ་བས་སྣ་མང་གི་བསམ་བློ་ཆབ་སྲིད་ཀྱི་གཞི་རྟེན། དེ་བས་འཐུས་སྒོ་ཚང་བའི་བསམ་བློ་ཆབ་སྲིད་ཀྱི་སློབ་ཚན། དེ་བས་ཟབ་པའི་བསམ་བློ་ཆབ་སྲིད་ཀྱི་རྣམ་པ་བཅས་གཏོད་པར་ཤུགས་སྣོན་བརྒྱབ་ཅིང་། ཀུན་སྤྱོད་ལ་བརྟེན་ནས་མི་སྐྱོང་བའི་རྩ་བའི་ལས་འགན་ཁྱོན་ཡོངས་ནས་དོན་འཁྱོལ་གྱིས་སློབ་གྲྭ་འབྲིང་ཆུང་གི་བསམ་བློ་ཆབ་སྲིད་སློབ་གསོའི་སྤུས་ཚད་མཐོ་རུ་དང་ཕན་འབྲས་སྔར་བས་ཆེ་རུ་བཏང་ཡོད།

1 ཏང་འཛུགས་སྐྱོང་གི་ཁྲིད་སྟོན་ལ་དམིགས་ཏེ་བསམ་བློ་ཆབ་སྲིད་ལས་དོན་གྱི་མ་ལག་དེ་བས་འཐུས་སྒོ་ཚང་དུ་བཏང་བ།

སློབ་གྲྭ་ཁག་གིས“ཏང་གི་ཆེད་དུ་མི་གསོ་སྐྱོང་དང་རྒྱལ་ཁབ་ཀྱི་ཆེད་དུ་ཤེས་ལྡན་པ་གསོ་སྐྱོང་བྱེད་པའི”ཐོག་མའི་འགན་འཁྲི་ཐོག་མཐའ་བར་གསུམ་དུ་བློ་ལ་བརྟན་པོར་བཅངས་ཏེ། སློབ་གྲྭ་འབྲིང་ཆུང་གི་ཏང་རྩ་འཛུགས་ཀྱིས་འགོ་ཁྲིད་བྱེད་པའི་སློབ་སྤྱིའི་འགན་འཁུར་ལམ་ལུགས་ལག་བསྟར་གཏིང་ཟབ་བྱས་པ་དང་། ཏང་རྩ་འཛུགས་ཀྱི་ཧྲུའུ་ཅིས་བསམ་བློ་ཆབ་སྲིད་སློབ་ཚན་གྱི་ལས་ཀའི་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་བར་དོ་དམ་བྱེད་པ། ཏང་རྩ་འཛུགས་ཀྱི་ཧྲུའུ་ཅི་དང་སློབ་སྤྱིས་སྣེ་ཁྲིད་དེ་བསམ་བློ་ཆབ་སྲིད་སློབ་ཚན་ཁྲིད་པའི་ལམ་ལུགས་དོན་འཁྱོལ་ནན་པོ་བྱས་པ། སློབ་དུས་རེར་མ་མཐར་ཡང་བསམ་བློ་ཆབ་སྲིད་སློབ་གསོའི་ལས་དོན་སྐོར་གྱི་ཆེད་དོན་ཚོགས་འདུ་རེ་འཚོགས་ནས་འབྲེལ་ཡོད་ལས་དོན་ལ་ཞིབ་འཇུག་དང་བཀོད་སྒྲིག་བྱས་པ། རིམ་པ་ཁག་གི་སྔོན་ཐོན་གཞི་རིམ་ཏང་རྩ་འཛུགས་20ལྷག་ཙམ་འཛུགས་གཏོད་བྱས་པ། ཕུལ་བྱུང་ཏང་ཡོན་དང་། ཕུལ་བྱུང་ཏང་དོན་ལས་དོན་པ། དཔེ་དམག་40ལྷག་ཙམ་བཅས་ཐོན་པ། སློབ་གྲྭ་འབྲིང་ཆུང་གི་བསམ་བློ་ཆབ་སྲིད་ཀྱི་རྐང་འཛིན་དགེ་རྒན་ཏང་ནང་སྔོན་ལ་ཞུགས་སུ་བཅུག་ནས་སློབ་གྲྭ་འབྲིང་ཆུང་གི་བསམ་བློ་ཆབ་སྲིད་ཀྱི་དགེ་རྒན་དང་ཏང་ཡོན་གྱི་བསྡུར་ཚད་ཟམ་མི་ཆད་པར་མཐོ་རུ་བཏང་ཡོད། མིག་སྔར་ཉིང་ཁྲི་གྲོང་ཁྱེར་གྱི་ཏང་ཡོན་2093ཡི་གྲས་སུ་བསམ་བློ་ཆབ་སྲིད་སློབ་ཚན་གྱི་དགེ་རྒན་130ལྷག་ཙམ་ཡོད། ཏང་འཛུགས་སྐྱོང་ལ་བརྟེན་ནས་ཚོགས་པ་འཛུགས་སྐྱོང་དང་དཔུང་ཁག་འཛུགས་སྐྱོང་གི་སྣེ་ཁྲིད་པའི་ལས་ཀའི་ལམ་སྲོལ་འཐུས་སྒོ་ཚང་དུ་ཧུར་ཐག་བཏང་སྟེ། བསམ་བློ་ཆབ་སྲིད་སློབ་གསོར་སྐུལ་འདེད་གཏོང་བའི་ཐད་ཀྱི་གུང་གཞོན་སྡེ་ཚོགས་དང་ལོ་ཆུང་གདོང་ལེན་རུ་ཁག་སོགས་རྩ་འཛུགས་ཀྱི་དགེ་མཚན་དང་ནུས་པ་འདོན་སྤེལ་གང་ལེགས་བྱས་ཡོད།

2 གཙོ་རྐང་ཕྱོགས་ཡོངས་ལ་ཁྱབ་པར་དམིགས་ཏེ་བསམ་བློ་ཆབ་སྲིད་ལས་དོན་གྱི་ནང་དོན་དེ་བས་ཕུན་སུམ་ཚོགས་སུ་བཏང་བ།

ཉིང་ཁྲི་གྲོང་ཁྱེར་སློབ་གསོ་ཅུས་ཏང་ཙུའུ་ཡིས《གྲོང་ཁྱེར་ཡོངས་ཀྱི་སློབ་གསོའི་ཁོངས་གཏོགས་ཀྱིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་ཆེད་དོན་སློབ་གསོའི་ལག་ལེན་བྱེད་སྒོ་རྒྱུན་རྣམ་ཅན་གྱི་སྒོ་ནས་སྤེལ་རྒྱུའི་ཇུས་གཞི》བཟོས་པའི་ཁར།“ཡོངས་ཁྱབ་བདུན”གྱི་འདུ་འགོད་དང་ཟུང་འབྲེལ་བྱས་ཏེ་སྐད་ཡིག་གསོ་སྦྱོང་དང་། གཟུགས་བརྙན་མཚོན་རྟགས་དྲིལ་བསྒྲགས། དཔུང་ཁག་འཛུགས་སྐྱོང་འགན་ལེན་སོགས་གཙོ་གནད་ལས་དོན་ལ་དམ་འཛིན་ནན་པོ་བྱས་ཤིང་། རིམ་རྩིས་བྱས་ན་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་དཔེ་སྟོན་སློབ་གྲྭ་22དང་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་སློབ་གྲྭ་51བཙུགས་ཡོད་པ་རེད།

དེ་དང་ཆབས་ཅིག སྡེ་ཚོགས་གྲོང་ཨུད་སོགས་སྡེ་ཚན་དང་མཉམ་དུ་ལོ་ཆུང་གདོང་ལེན་རུ་མིའི“སྐེ་དར་དམར་པོ”འཚོལ་ཞིབ་ཀྱི་ལག་ལེན་བྱེད་སྒོ་མུ་མཐུད་སྤེལ་ཞིང་། ཀོང་ཏུང་ཞིང་ཆེན་ཀྲུའུ་ཅང་ཟུར་གསུམ་ཁུལ་གྱི་གྲོང་ཁྱེར་དང་ས་ཁུལ་ཁག་ཏུ་ཀོང་ཏུང་དང་ཉིང་ཁྲིའི་ས་ཁུལ་གྱི་དགེ་སློབ་ཀྱིས་ལག་གདང་སྦྲེལ་བའི་བྱེད་སྒོ་མུ་མཐུད་སྤེལ་ཡོད། རྒྱ་ཆེའི་དགེ་སློབ་རྣམས་ཀྱིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པར་ཁྲིད་སྟོན་བྱ་ཆེད། ཉིང་ཁྲི་གྲོང་ཁྱེར་སློབ་གསོ་ཅུས་ཀྱིས་གྲོང་ཨུད་དྲིལ་བསྒྲགས་པུའུ་དང་མཉམ་དུ་རིམ་རྩིས་བྱས་ན་དགེ་སློབ་300ལྷག་ཙམ་གྱིས་ཀོང་པོ་རྒྱ་མདའ་རྫོང་དུ་ལྗོངས་ནང་ཁུལ་གྱི་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་ཆེད་དོན་འགྲེམས་སྟོན(ཐའེ་ཀྲའོ་གནའ་གྲོང་ཆེད་དོན་འགྲེམས་སྟོན)དུ་ལྟ་སྐོར་སྒྲིག་འཛུགས་བྱས་པ་དང་། སི་ཁྲོན་ཞིང་ཆེན་ལུའུ་ཀྲོའུ་གྲོང་ཁྱེར་གྱི་དཔེ་སྟོན་རང་བཞིན་གྱི་ཕྱོགས་བསྡུས་ལག་ལེན་རྟེན་གཞི་དང་མཉམ་དུ་ལྗོངས་ཕྱིར་རིམ་རྩིས་བྱས་ན“རྒྱ་བོད་མཐུན་སྒྲིལ་ཁྱིམ་ཚང་གཅིག་ལྟར་བརྩེ། ཀྲུང་གོའི་ཕུགས་འདུན་ཐུན་མོང་ཐོག་ཏུ་གཏོད”སོགས་བརྗོད་དོན་གཙོ་བོར་བྱས་པའི་ཞིབ་སྦྱོང་ལག་ལེན་བྱེད་སྒོ་ཐེངས་4སྤེལ་ཡོད། སྣ་མང་ཕུན་སུམ་ཚོགས་པའི་ཞིབ་སྦྱོང་ལག་ལེན་སློབ་ཚན་ཁག་བརྒྱུད་དེ་ཏང་དང་། རྒྱལ་ཁབ། མི་དམངས་བཅས་ལ་བཅངས་པའི་སློབ་མའི་བརྩེ་སེམས་ཟམ་མི་ཆད་པར་ཟབ་ཏུ་ཕྱིན་པ་དང་། སློབ་མའི་མི་རིགས་ཀྱི་གདེང་ཚོད་དང་སྤོབས་སེམས་གསོ་སྐྱོང་ཐུབ་པ། ས་གནས་དེ་གའི་ཐོན་ཁུངས་ཀྱི་ལེགས་ཆ་འདོན་སྤེལ་བྱས་ནས་གྲོང་ཁྱེར་ནང་ཁུལ་གྱི་རིགས་ཁག་གི་ཞིབ་སློབ་ལག་ལེན་བྱེད་སྒོ་ཁྱོན་བསྡོམས་95སྤེལ་བར་ཞུགས་མཁན་མི་གྲངས་6000ལྷག་ཙམ་ཟིན་ཡོད།

3 དགེ་རྒན་དཔུང་ཁག་སྟོབས་ཆེར་གཏོང་བའི་འགག་རྩར་དམིགས་ཏེ་བསམ་བློ་ཆབ་སྲིད་དཔུང་ཁག་གི་སྟོབས་ཤུགས་དེ་བས་ཆེ་རུ་བཏང་བ།

ཉིང་ཁྲི་གྲོང་ཁྱེར་གྱིས《དུས་རབས་གསར་པའི་སློབ་གྲྭ་འབྲིང་ཆུང་གི་བསམ་བློ་ཆབ་སྲིད་རིགས་པའི་གཞུང་ལུགས་སློབ་ཚན་གྱི་དགེ་རྒན་དཔུང་ཁག་འཛུགས་སྐྱོང་ལ་ཤུགས་སྣོན་རྒྱག་རྒྱུའི་སྐོར་གྱི་བསམ་འཆར》ལག་བསྟར་དོན་འཁྱོལ་གཏིང་ཟབ་བྱས་ཤིང་། རྒྱལ་ཁབ་དང་རང་སྐྱོང་ལྗོངས་ཀྱི་གསོ་སྐྱོང་འཆར་གཞི་བརྒྱུད་སློབ་གྲྭ་འབྲིང་ཆུང་གི་བསམ་བློ་ཆབ་སྲིད་སློབ་ཚན་གྱི་དགེ་རྒན་གསོ་སྦྱོང་ལ་མུ་མཐུད་ཤུགས་སྣོན་བརྒྱབ་པ་དང་། དྲ་ཐོག་ནས་སློབ་སྦྱོང་དང་། གཅིག་སྡུད་གསོ་སྦྱོང་། གྲོང་གསེབ་ཏུ་གསོ་སྦྱོང་བྱེད་པ་སོགས་ཀྱི་བྱ་ཐབས་སྤྱད་དེ་གྲོང་ཁྱེར་ཡོངས་ཀྱི་བསམ་བློ་ཆབ་སྲིད་དགེ་རྒན་ལ་གཅིག་སྡུད་གསོ་སྦྱོང་ཐེངས་37བྱས་ནས་ཁྱོན་ཡོངས་ལ་ཁྱབ་ཡོད།

དེ་དང་ཆབས་ཅིག གྲོང་ཁྱེར་ཡོངས་ཀྱི་སློབ་སྤྱི་8དང་། དགེ་རྒན་གྲགས་ཅན་10 རིག་ཚན་སྣེ་ཁྲིད་པ་34 བསམ་བློ་ཆབ་སྲིད་སློབ་ཚན་གྱི་རྐང་འཛིན་དགེ་རྒན་བཅས་ཀྱི་ཁྲོད་ནས“ཕུལ་བྱུང་ནང་གི་ཕུལ་བྱུང”བདམས་ཏེ་བསམ་བློ་ཆབ་སྲིད་སློབ་གསོའི་གྲོང་ཁྱེར་རིམ་པའི་གསོ་སྦྱོང་རིགས་གཅིག་མཁས་ཅན་གྱི་མཛོད་བཙུགས་ཡོད། བསམ་བློ་ཆབ་སྲིད་དགེ་རྒན་དཀོན་པའི་དོན་དངོས་ལ་དམིགས་ཏེ། 2017ལོ་ནས་བཟུང་ཀོང་ཏུང་ཞིང་ཆེན་གྱིས་སློབ་ཆེན་སློབ་མའི་བསམ་བློ་ཆབ་སྲིད་སློབ་གསོའི“སློབ་གྲྭ་དང་ས་གནས་མཉམ་སྐྲུན”གྱི་རྣམ་གྲངས་ལག་བསྟར་བྱས་ནས། ཀོང་ཏུང་ཞིང་ཆེན་གྱི་མཐོ་སློབ་13གྱིས་སློབ་ཐོན་སློབ་མ་1931ཉིང་ཁྲི་གྲོང་ཁྱེར་གྱི་སློབ་གྲྭ་60ལྷག་ཙམ་ལ་སློབ་སྐྱོར་ལ་མངགས་ཡོད། བོད་སྐྱོར་དགེ་རྒན་དང་ས་གནས་དེ་གའི་དགེ་རྒན་ཆ་བསྒྲིགས་ནས་ཕན་ཚུན་སློབ་སྦྱོང་སྤེལ་རེས་དང་ཕན་ཚུན་འཚར་ལོངས་ཡོང་བར་རོགས་རམ་བྱེད་པའི་རྣམ་པ་བཟང་པོ་ཞིག་ཆགས་པར་བྱས་ཡོད།